Jɔ̌n 18
18
Bɔ baãaã Yesò
(Mat 26:47-56; Mk 14:43-50; Lk 22:47-53)
1AfɨꞋa Yesò tsàꞋta Mbɔ̧ɔ̧mà tè mpàa la, bɔ̂ bɔkatè bi elɔ̀Ꞌ ngà ntù̧ àfuꞋ àko bɔ̀ɔ ntɔ ane Kidèlòn la nga aguŋ. ÀdziꞋa mbȩ ko a li ngu abot, bɔ̂ bɔkatè bi e gha a èbèm. 2Bɔɔ ngɨ̀ ale, Judàs wu tà fɨ̧̀ɨ̧̀ne atò la ko abot mɨ̧̂, nkàà nê wu àdziꞋa Yesò bɔ̂ bɔkatè bi e zìi wua mbù̧ù̧tà la. 3Judàs kɨ̀Ꞌɨ̂ abot nè àlaã bèshujà, bɔ̂ bèmbaabà lob nɨ̧ Mbɔ̧ɔ̧mà, bètǎt bèntsìà mèpɨ̧̀ Mbɔ̧ɔ̧mà nè Bèfalèsiì e tsàà wɔb la. Bɔɔ nkɨ̀Ꞌa ale mbèà mèkàꞋà bɔ̂ mbȩ̀tsə bɔ tò̧ la, nè èghɨ èbet.
4Yesò li nko àghɨa nga e ghɨ̌ ane zi la, ndɔ̀Ꞌ a si nkɨ̀Ꞌɨ̂ a mbì, mbììte awɔb nê, “Bɨ̀ kɨa wà à?”
5Bɔ bɨ̀ɨ̀lè nê, “Yesò wòt Nazàlet.”
Yesò shu abua yɔb nê, “E ngu tòa.” Bɔɔ ngɨ̀ ale Judàs wu tà fɨ̧̀ɨ̧̀ne a Yesò la wua abot bɔ̂ bèshujà bu tà tɨ̧ɨ̧ la. 6Mbɨ̀Ꞌɨ̀ Yesò shu abua yɔb nê wu zia la, bɔ ghà kwèn, kwèn ndèbte a si.
7Tà mè mbììte awɔb nê, “Bɨ laꞋnê bɨ kɨa wà leè?”
Bɔ bɨ̀ɨ̀lè nê, “Yesò wòt Nazàlet.”
8Yesò bɨ̀ɨ̀lè nê, “Ka mâ shu abua yɨ̧ nê e ngu tòà? Ale, bɨ wua nkɨà am bɨ tsiꞋ bòt baa e ghà.” 9Àyaa a li ntsè anè mbɨ̀Ꞌɨ̀ e ghɨ̌ mèngà̧ mu tà li shu abua Mbɔ̧ɔ̧mà la naa te. Tà li nê, “Ka wuê wòt wemɔ̀Ꞌ ane bòt bu à ŋa abua am la bakà nyɔ̂.”
10Simùn wu èlen tò ko wu Pità la bɔ àlùmbà̧, mbê sɔ̀ŋ mì, ndo àtû̧ àbualu̧ àbùꞋ a àtsəa bèntsìà mèpɨ̧̀ Mbɔ̧ɔ̧mà. Èlen àbùꞋ mbɔŋ wu Malekusì.
11Yesò shu abua Pità nê, “Zi àlùmbà̧ ayê a èbem baꞋ zi; Tè à mɨ̀ɨ̀tè nê è nka nu ndɔŋ ngoꞋ yaa Tǎt am è ŋa abua am la à?”
Yesò a mbì Anàs
12ÀfɨꞋa mbɔŋ àlaã bèshujà yu nè tǎt wɔb ndɔ̀Ꞌ nè bèmbaabà Bèjuê bu e baãaã Yesò nkùùle atò. 13Mbɔ̂ mbɨ̀ nɨa tò ngà a mbì Anàs wu tà wu nantsi Kefàs la. Kefàs li ngu àtsəa bèntsìà mèpɨ̧̀ Mbɔ̧ɔ̧mà a èngùꞋu mbɔŋ. 14Eyaa wu Kefàs wu tà li shu abua bɔɔjuŋ Bèjuê nê, a bɔ̂ŋ nê wòt wemɔ̀Ꞌ pfə bòt è pem la.
Pità nê ye bakà ko a Yesò
(Mat 26:69-70; Mk 14:66-68; Lk 22:55-57)
15Bɔ me ghà ne Yesò ale, Simùn Pità bɔ̂ wakatè kǒ e baãaã kwene yɔb me kùŋà wɔb ngà. Ndɨ̀ wu wakatè waa ko àtsəa bèntsìà mèpɨ̧̀ Mbɔ̧ɔ̧mà la, tà kùŋe a Yesò ba kwat tè ngà ngu àsà̧aã èsaꞋa àtsəa bèntsìà mèpɨ̧̀ Mbɔ̧ɔ̧mà wu. 16Mbɨ̀Ꞌɨ̀ tàa nyia la, Pità wu a ètsəêkaã àbȩ tà tɨ̧ɨ̧ la. Wakatè waa àtsəa bèntsìà mèpɨ̧̀ Mbɔ̧ɔ̧mà a ko atò la ghà ndàꞋ bɔ̂ waàvi wu tàa mbààba ètsəêkaã yu la nɨa Pità nyi a èbèm.
17Waàvi wu a ètsəêkaã la biite a Pità nê, “Ka à wu ayê è wekǒ ayɔɔ bɔkatè mbê via à?”
Pità nê “ChaꞋ e ntsě wakatè tò.”
18ÈdziꞋ e li ngua fìa, ale bɔfàꞋ nè bèmbaabà bu e tsəꞋtè èwet ntɨ̧̀ɨ̧̀te me yɔɔ. Pità ghà ntɨ̧̀ɨ̧ àzi bɔ̂ tò ba me yɔɔ èwet mɨ̧̂.
Àtsəa bèntsìà mèpɨ̧̀ a biite a Yesò mèngà̧
(Mat 26:59-66; Mk 14:55-64; Lk 22:66-71)
19Àtsəa bèntsìà mèpɨ̧̀ Mbɔ̧ɔ̧mà a biite a Yesò ànəa bɔkatè tò nè èghɨ tàa nyɨ̀Ꞌta la.
20Yesò tsɔꞋ èngǎ̧ tò nê, “Maà wua ndaꞋa àfɨ̀Ꞌ àgème a kètsìà bòt bàgème, mè nyɨ̀Ꞌta a èbem lobte Mbɔ̧ɔ̧mà fɔ̀ɔ̀le a èbem lob nɨ̧ Mbɔ̧ɔ̧mà, adzìꞋa Bèjuê bàgème àa mbù̧ù̧ta la. E mbakà li me làꞋa ànəa ko a ntsèm. 21Ghǎ e ghɨ̂ ka à me biite am mènəè anè à? Biite bòt bu bɔ li ndzəè mèngǎ̧ mɔ̧ la. Biite awɔb àghɨa e ndi shu awɔb la, bɔ ko mèngà̧ ègème mâ làꞋa la.”
22Yesò làꞋà ale, mbaabà kǒ te àbu a èsi tò nê, “À ghɨ̀ na ka ndaꞋa abua àtsəa bèntsìà mèpɨ̧̀ Mbɔ̧ɔ̧mà a èlɨ̀ wa à?”
23Yesò bɨ̀ɨ̀lè nê, “È wu nê mâ làꞋ ale fà̧, à bê shu banɔ̧̀ e zə, mbə è wu nê e mbakà fà̧ à wua ndèbà am nê ghàà?” 24Anàs tsàà atò tà bele ane mèliꞋ la abua Kefàs wu tà wu àtsəa bèntsìà mèpɨ̧̀ Mbɔ̧ɔ̧mà la.
Pità mè shu nê ye bakà ko a Yesò
(Mat 26:71-75; Mk 14:69-72; Lk 22:58-62)
25Mbɨ̀Ꞌɨ̀ Pità li mbèle abot ndzɔ̀ɔ èwet la, bòt ko e biite atò nê, “Tè à ntsě wekǒ ane bɔkatè mbê wu?”
Tà tu̧ nê, “ChaꞋ e ntsě wakatè tò.”
26WafàꞋ àtsəa bèntsìà mèpɨ̧̀ Mbɔ̧ɔ̧mà kǒ, è wu wòt àndǎ̧ mbê wu Pità yaã ndo àtû̧ atò la, mè mbììte a Pità nê, “Ka mâ yaã ndzè àwê bɨ tò a èbem àdziꞋ mbȩ yu à?” 27Pità mè ntu̧ nê “ChaꞋ.” KwàꞋ àfɨꞋa mbɔŋ lu̧nkɔ̀Ꞌ bê ntɔ.
Yesò a mbì Pȩlèt
(Mat 27:1-2, 11-14; Mk 15:1-5; Lk 23:1-5)
28È me wu kwàꞋ a ntɔtetsɔ̌Ꞌ, bɔ nɨa Yesò ndɔꞋɔ a lob Kefàs ngà a tsâ̧ gɔvanɔ̀. Bɔɔjuŋ Bèjuê e li bɔ̀ ka nyi a èbem tsâ̧ wu mbɨ̀Ꞌɨ̀ ka bɔ gha ghɨ̌ fà̧ ànəa ko, ka ntsèke kà jɨ èpǎ̧ Màntsea a ègwet. 29Ale, gɔvanɔ̀ Pȩlèt gha àbȩ mbììte awɔb nê, “Ànəa kàbɔ̀ŋ mbê waa ghɨ̀ la wu ghà à?”
30Bɔ bɨ̀ɨ̀lè nê, “Tà ghɨ̀ ale, tà kà ghɨ ànəa kàbɔ̀ŋ, ko ba bakà nɨ atò nɨ ekɨꞋɨ abua yê.”
31Pȩlèt nê, “Bɨ̀ nɨ atò bɨa mbɔŋ ngà saꞋa tò ane ndɨ mbɨ̧ tɨ̧ te nyɨꞋte la.”
Bɔɔjuŋ Bèjuê bu e shu abua tò nê, “Bɨa bòt Luêm e bakà ŋa awa mètàŋ nê bà saꞋa wòt mbuŋe atò.” 32Àyaa a li ntsè anè mbɨ̀Ꞌɨ̀ e ghɨ̌ ànəa Yesò li shu ane èwuu èvə yea li epfə lùà la aa te.
33Pȩlèt mè ngwènè a èbem tsâ̧ vi ntɔ a Yesò mbììte atò nê, “À wu Fɔ̧̀ Bèjuê?”
34Yesò mè mbììte atò nê, “Èngà̧ waa à bììte am la e dzəa àtsəa yê, kò wu ànəa bòt tsa e shu awê ane yaã la à?”
35Pȩlèt bɨ̀ɨ̀lè nê, “E ngu wòt Juê?” Bòt àlaꞋ ayê, nè bètǎt bèntsìà mèpɨ̧̀ Mbɔ̧ɔ̧mà ka bɔ zi awê a tèkitebu taã la. “Ànəa à ghɨ̀ la wu ghà à?”
36Yesò bɨ̀ɨ̀lè nê, “Kèfɔ̧̀ am è ntsě we sitsǎꞋ. Kèfɔ̧̀ am è ghɨ̀ ale, ngu we sitsǎꞋ, ko bɔfàꞋ bɔ̧ aa nû ekele nê mbɨ̀Ꞌɨ̀ bɔ zì am a tèkitebu Bèjuê. Ka Kèfɔ̧̀ am è ntsě we sitsǎꞋ ŋàa.”
37Pȩlèt bììte atò nê, “Tè a wu Fɔ̧̀?”
Yesò bɨ̀ɨ̀lè nê, “À bê shu tè ndɔ̀Ꞌ. E ndi nkɨ̀Ꞌɨ̂ a ngɔ̀ŋ ŋaa bɔ bi am nkàà ànəê yeamɔꞋ, enyɨ̀Ꞌte bòt àghɨa nkûŋ wu yùà la. Waa waa tàa nkɔ̀ŋkà nkûŋ la nàà ndzəa ànəa màa shua la.”
38Pȩlèt bììte atò nê, “Nkûŋ wu ghàà?”
Tà biite ale mè ndzəè nga àbȩ nkwene ane Bèjuê bu, shu abua yɔb nê “E mbakà yea ànəa kàbɔ̀ŋ ko tà ghɨ̀ la. 39Nàa ngɨ̀ è wu àlia èpǎ̧ Màntsea a ègwet àgème, è ntsɔꞋɔ wòt tèfȩ wemɔ̀Ꞌ sàŋ. Bɨa nkɨà nê è ntsɔꞋɔ Fɔ̧̀ Bèjuê saŋ abua yɨ̧?”
40Bɔ ŋȩ nê, “ChaꞋ; à ka sa tò, sà wua Bàlabasì.” (Bàlabasì li ngu kwàꞋ tsɔŋ kèkweelè.)
હાલમાં પસંદ કરેલ:
Jɔ̌n 18: mnf
Highlight
શેર કરો
નકલ કરો
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
