ÀfaꞋa 8
8
1Sɔ̂l li mbɔ̂ mbɨ̧̀ɨ̧̀ne nê bɔ̀ bùŋe atò mbɨ̀Ꞌɨ̀ bɔ li ngɨ̀ la.
Sɔ̂l me kɨ àtsəa bòt chɔsì enɨ
EbuꞋu ane àlia ngaa bɔ bùꞋ me ŋa ngoꞋ kèkweelè abua chɔsì wu a Jèlusalèm la. Bòt chɔsì bu bàgème e taatè ngà àbâ àlaꞋ a Jùdià bɔ̂ Sàmalìà tè è tsìꞋi wuê bɔntu̧ tò bu a Jèlusalèm. 2Stifèn pfə ale, bòt Mbɔ̧ɔ̧mà ko e tu atò mbɔ̂ ndɨ̀ atò kwàꞋ ànyaꞋne. 3Ka è me wu a Sɔ̂l tà nyɔ̀Ꞌte nê yea me tseke a si ntaa chɔsì wu. Tà me ghǎ a lobtsə səèŋnà mbâ̧ ègème nè àvi tà zì èntɨ̧ɨ̧ vi ane Yesò la nɨa wɔb ngà maꞋa a tèfȩ.
Filìb làꞋ èngǎ̧ Mbɔ̧ɔ̧mà a Sàmalìà
4Bòt Yesò bu e li ntààte me ghȩ̀ȩ̀na ntsɔ̀tà Ntu̧ Ntsɔ̧̀ yu a èdzìꞋ ègème. 5Filìb gha a èbem taꞋa àpfəèà nɨ̧ ako a Sàmalìà me tsɔ̀tè mènəè Fɔ̧̀ wu Mbɔ̧ɔ̧mà li ndzɔꞋ ntsà la, abua bòt bu abot la. 6Mbɨ̀Ꞌɨ̀ ènɔ̧̂ bòt bu e zə ànəa Filìb shua la, mè ndzè tèwuute ènəê kà ye fɨ̀Ꞌ tu tà ghɨ̀ la, bɔ nèètè ngàꞋte ètû̧ bɔb njùte èngǎ̧ tò. 7Fote kàbɔ̀ŋ tèa ŋǎ bòt ngoꞋ la te sà bòt nyaŋ, tà mè mbəâ e fɔɔle bòt nyaŋ èba ènyit bɔb e pfəꞋte la, nè èbe èka bɔb e ŋɔꞋte la. 8Ale, bòt Sàmalìà bàgème e taꞋa wùꞋtè àwɔb.
9Wòt kǒ li ngu àpfəa nɨ̧ və bɔ me tɔ atò nê Simùn. Tà ghɨ̀ tà lute tèkaŋtsə tè ànəa ngaa a bê ntsè wòt ègème a Sàmalìà. Simùn waa ghɨ̀ tà me wu̧u̧ nkùꞋ zi shua nê ye ghe. 10Waa waa ebuꞋu ane wɔ̀jûŋ e ghǎ wu ane watèchɨɨle tsiꞋa njùta wuê ànəa tà shua la, tè ntsìꞋa shua nê mbê waa bê nguê wuê Mbɔ̧ɔ̧mà wu bɔ̀ɔ ntɔ nê “Mètàŋ Kèkweelè” la. 11Bɔɔ̀ shua ale ngu ndɨ tà lute tèkaŋtsə ane àfɨ̀Ꞌ à sèe tè ànəa ngaa a bê ntsè àwɔb tè bɔ tsiꞋa njùta wuê ànəa tà shua la. 12Mbɨ̀Ꞌɨ̀ bɔ zə Ntu̧ Ntsɔ̧̀ kèfɔ̧̀ Mbɔ̧ɔ̧mà ane èlen Yesò Klistò lu Filìb làꞋà la, wòt ègème, mbâ̧ nè àvi bɨ̧ɨ̧nè, bɔ zì atò a èdzî. 13Simùn wu mɨ̧ bɨ̧ɨ̧nè èngǎ̧ Filìb, tà zì atò a èdzî mɨ̧̂, mbùꞋ me ghȩ̀ȩ̀nè bɔ̂ Filìb. Mbɨ̀Ꞌɨ̀ bɔ̀ɔ ngȩ̀ȩ̀nà la, Filìb wu ghɨ̀ tèwuute ènəê kà ye fɨ̀Ꞌ nè ngɨŋa mènəè tè a bê ntsè atò.
14ÀfɨꞋa bɔntu̧ Yesò bu a Jèlusalèm e zə nê bòt Sàmalìà e zə èngǎ̧ Mbɔ̧ɔ̧mà tè mbɨ̧̀ɨ̧̀ne la, bɔ tsaa Pità bɔ̂ Jɔ̌n nê bɔ ghǎ kwene ane yɔb. 15Mbɨ̀Ꞌɨ̀ bɔ̂ ghà tê nyî la, bɔ tsàꞋtè nê Mbɔ̧ɔ̧mà zi Fo Kèfə adù̧ bòt fi bu bɔ zì mèntɨ̧ɨ̧ mɔb ane Yesò la. 16Bɔɔ ngɨ̀à ale ngu ndɨ wòt ndzìꞋ ntsě ane yɔb Fo Mbɔ̧ɔ̧mà chu adù̧ tò la. Bɔ le yaã ndzì àwɔb a èdzî wuê ane èlen Yesò Lefɨ̀Ꞌ. 17Pità bɔ̂ Jɔ̌n e nɔ̀ŋè èbu bɔb àtsəa bèŋût, àfɨꞋa mbɔŋ Fo Kèfə nyi a mèntɨ̧ɨ̧ mɔb.
18Simùn ye ndɨ bɔntu̧ bu e nɔ̀ŋè èbu bɔb àtsəa bòt bu Fo Mbɔ̧ɔ̧mà kɨꞋɨ ane yɔb la, me kɨ ŋa èkab abua yɔb 19nê, bɔ̀ ŋa avi mètàŋ maa mɨ̧̂, mbɨ̀Ꞌɨ̀ wòt ègème ye nɔ̀ŋè èbu bi àtsəa tò la naa bɔ Fo Kèfə mɨ̧̂.
20Pità bɨ̀ɨ̀lè nê, “Tè bɨ èkab wê wu è lem, ndɨ̀ wu à kwaꞋtè nê betsiꞋa bɔ yu̧ mètàŋ Mbɔ̧ɔ̧mà ane èkab la. 21À bakà bɔ ànəê ane àfàꞋ yaa, nkàà nê èntɨ̧ɨ̧ wê e ntsě ndɨŋndɨ̀ŋ e mbì Mbɔ̧ɔ̧mà. 22È wu ale, kubte èntɨ̧ɨ̧ wê ane ànəa kàbɔ̀ŋ yaa à mɨ̀ɨ̀tè la, mè shù̧ù̧te a Mbɔ̧ɔ̧mà mbɨ̀Ꞌɨ̀ ateko tà wu waꞋa èwuu ànəê yaa à mɨ̀ɨ̀te a èntɨ̧ɨ̧ wê la. 23Ghɨ̀ ale nkàà nê mâ ye nê à taꞋa wua ngɔ̀Ꞌnà àghɨ, mènəè kàbɔ̀ŋ mê mè nkùùla awê mbɨ̀Ꞌɨ̀ wòt tèfȩ.”
24Simùn shu abua Pità bɔ̂ Jɔ̌n nê, “Bɨ̀ tsàꞋte a Mbɔ̧ɔ̧mà àtsə am mbɨ̀Ꞌɨ̀ ka àghɨa ko ane èghɨ bàa bɨ shu la a ghɨ̀ ane yaã.”
25ÀfɨꞋa Pità bɔ̂ Jɔ̌n e shu ànəa bɔ ko ane Yesò mè ndàꞋ èngǎ̧ tò la, bɔ wene a Jèlusalèm. Mbɨ̀Ꞌɨ̀ bɔ̀ɔ ngà la, bɔ me ghȩ̀ȩ̀na ntsɔ̀tà Ntu̧ Ntsɔ̧̀ yu a èpfəè nyaŋ àlaꞋ a bòt Sàmalìà.
Filìb bɔ̂ wòt nɨ̧ Ètìopìà kǒ
26Wantu̧ Mbɔ̧ɔ̧mà ko li shu abua Filìb nê, “Lɔ̀Ꞌɔ a si nchu ngà ane alu̧ wu nàa ndɔꞋa Jèlusalèm ntsèa àbâ àlaꞋ àyuube nchu a ngà a Gazà la.” 27-28Filìb dzəè mbà̧à̧ èlu̧, ngà kwene ane wòt nɨ̧ ko tà dzə àlaꞋ a Ètìopìà tàa nkua akwèn nga àlaꞋ yɔb la. Mbê waa li ngu wòt nɨ̧ àtsəa lob èkab Kàndasì è wu àvi tà li ngu fɔ̧̀ àlaꞋ a Ètìopìà la. Tà li ndzəè nè Jèlusalèm ewùꞋte a Mbɔ̧ɔ̧mà, mbɔ̂ ngu a ègwet èwuu àkàt ako bɔ ghɨ̂ ndzì mèliꞋ bèloà be me səè la. Tà tseke ale me ghȩ̀ȩ̀na ntɔ àdziꞋa ko a èbem àkatè yu Àsayà ndàꞋàtɔŋ Mbɔ̧ɔ̧mà li shɨŋ la. 29Fo Mbɔ̧ɔ̧mà shu abua Filìb nê, “Dù àlia me ghȩȩne a ngèt àkàt zia.”
30Filìb lùùlà ngà me zə mbê wu wua ntɔ àdziꞋ ako a èbem àkatè Àsayà ndàꞋàtɔŋ Mbɔ̧ɔ̧mà, tà bììte atò nê, “Tè àà nkoa àghɨa à tɔ la à?”
31Wɔ̀jûŋ wu bɨ̀ɨ̀lè nê, “Wòt bakà ghaꞋte e shu am e ngɨ̀ na ka nko à?” Tà làꞋ ale mbɔ̂ shu abua Filìb nê tà kɔꞋ ntsèke a èbem àkàt yu bɔ̂ nì.
32ÀdziꞋa èngǎ̧ yu tà li ngua ntɔ a èbem Àkata Mbɔ̧ɔ̧mà yu la a li ngua shua nê,
“Tà li ngu mbɨ̀Ꞌɨ̀ njɨ̀ bɔ̀ɔ nɨa atò nga ekɨ̧ɨ̧me la,
mè ngu mbɨ̀Ꞌɨ̀ wanjɨ̀
bɔ̀ɔ ndoota nyemte tò kà tà wua ŋȩ̀a la.
Tà li tà kà bê shu ànəê.
33Bɔ loo èkuê tò wòt kà bê ngu tàa tɨ̧ɨ̧ akwèn tò la.
Wòt kǒ ntsě tàa li laꞋa ànəa bɔ̧ tò la,
nkàà nê bɔ ghɨ àyea tò a sitsǎꞋ a kùꞋ ale.”
34Wɔ̀jûŋ wu biite a Filìb nê, “Shu am wòt wu ndàꞋàtɔŋ waa làꞋ ànəê yaa ane tò la. Tà làꞋa ane zi zìambɔŋ, kò wuê ane wòt kǒ tsa à?” 35Filìb è bùꞋ ane àdziꞋa àkatè yu mbê wu wua ntɔ la shu atò Ntu̧ Ntsɔ̧̀ yu ane Yesò la.
36Mbɨ̀Ꞌɨ̀ bɔ̀ɔ ngȩ̀ȩ̀nà aa alu̧ və nchua ngà la, bɔ ye àtɨ̀ŋ a mèleb adzìꞋ ako, wɔ̀jûŋ wu shu abua tò nê, “Ye mèleb, e ghǎ àa kele am nê ko mbɨ̀Ꞌɨ̀ bɔ zì am a èdzî à?” 37[Filìb shu abua tò nê, “À nàŋa tè ndzia èntɨ̧ɨ̧ wê ègème ane Yesò ko betsiꞋa bɔ zì àwê a èdzî.” Tà nê, “Oò mâ bɨ̧̀ɨ̧̀nè nê Yesò Klistò wu Waã Mbɔ̧ɔ̧mà.”] 38Ale, wɔ̀jûŋ wu ghɨ̀ àkàt yu a tɨ̧̂, bɔ̂ Filìb e chu nga a èbem àtɨ̀ŋ yu tà zì atò a èbèm. 39ÀfɨꞋa bɔ dzə a èbem àtɨ̀ŋ yu la, Fo Mbɔ̧ɔ̧mà nɨa Filìb ngà, wɔ̀jûŋ wu ka tsi ndze atò, tà tsiꞋi me ghà ne mbì ngȩ̀ȩ̀nà ngùꞋtà àvi. 40Filìb me ye ntsìꞋa a èbem àpfəèà nɨ̧a Azotùs. Ngà me ghȩȩna ntsɔ̀tà Ntu̧ Ntsɔ̧̀ Yesò a èpfəè nɨ̧ ègème tè ngà ngu a Sìsalìà.
હાલમાં પસંદ કરેલ:
ÀfaꞋa 8: mnf
Highlight
શેર કરો
નકલ કરો
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
