Luk 8

1Đunh 'biơ̆ đơ̆ng noh Yêsu năm tơ lơ pơlei chă bơtho đe tơdrong 'Bok Kei-Dei wă pơgơ̆r kon bơngai. Lu mơjĭt-'bar 'nu bơngai pơhrăm păng Sư kư̆m năm kiơ̆ Sư mơ̆n. 2Na kư̆m đei lu drŏ-kăn năm hơdai lu sư mơ̆n. Lu drŏ-kăn noh sơ̆ đơ̆ng đêl Yêsu pơklaih lơ tơdrong jĭ lu sư, kư̆m đei pơpuh lu yang kơnê̆ đơ̆ng lu sư mơ̆n. Lu đe noh anăn lu sư: Mari đơ̆ng Pơlei Mađơla. Bơngai noh sơ̆ Yêsu pơpuh tơpơh tŏ yang kơnê̆ đơ̆ng sư. 3Yă Jôanna akăn Chusa. Chusa noh sư wei-lăng tơmam pơtao Hêrôt. Yă Susana păng kư̆m đei lơ drŏ-kăn nai dơ̆ng kiơ̆ hơdai Yêsu. Lu sư tơgŭm Yêsu păng lu bơngai pơhrăm păng Sư bơ̆n tơmam, bơ̆n jên.

Pơtih gia bơngai rei 'ba

4Đei lơ bơngai năm tơ Yêsu đơ̆ng jơ̆p pơlei na Sư pơma pơtih gia kơ lu sư thoi âu: 5“Đei minh 'nu bơngai năm rei adrĕch 'ba. Lăp sư rei, đei găr mơ'nah huŏng tơ trong, na đe juă 'bơm, sem kư̆m jur sa. 6Kư̆m đei găr mơ'nah huŏng tơ kơpal tơmo trêl ưh kơ gan đei teh lơ. Sư chăt mơ̆n ră mă-lei sư jing jô yua kơ teh đơng ưh kơ jrŭ. 7Kư̆m đei mơ'nah huŏng 'bơ̆t 'nhĕt jơla na 'nhĕt jơla chăt wơ̆ hơdai sư krênh lê̆ sư hloi. 8Kư̆m đei mơ'nah huŏng tơ teh 'lơ̆ng, na sư chăt wơ̆ truh tơ đei plei trem minh-hrĕng găr.”

Na Yêsu pơma re 'biơ̆ dơ̆ng khan: “Bu đei đon athei tơchĕng kơdih bĕ.”

Yua kơ kiơ Yêsu bơtho pơjuang?

9Klaih kơ noh lu bơngai pơhrăm păng Sư jet Sư khan: “Tơdrong mă Ih pơtih gia noh hei wă khan kiơ?”

10Yêsu khan: “'Bok Kei-Dei ăn kơ iĕm băt gah tơdrong Sư wă pơgơ̆r kon bơngai thoi yơ, mă-lei Inh bơtho lu bơngai nai tơdrong noh Inh yua nơ̆r pơjuang ngăl, wă kơ sư lăng khŏm khŏm ră mă-lei ưh kơ 'bôh tơdrong kiơ, wă kơ sư mơ̆ng khŏm khŏm ră mă-lei ưh kơ hlôh.”

Yêsu tơblang tơdrong bơngai rei 'ba

11Yêsu khan: “Tơdrong rei 'ba noh hei wă khan thoi âu: 'Ba noh wă pơtih gia kơ nơ̆r 'Bok Kei-Dei. 12Pơtih gia găr mă huŏng tơ trong noh hei wă khan lu bơngai mă mơ̆ng ră mă-lei yang kơnê̆ Satan dang lĕ iŏk nơ̆r noh đơ̆ng lu sư wă kơ lu sư ưh kơ lui kơ 'Bok Kei-Dei, na ưh kơ klaih đơ̆ng tơdrong yoch. 13Lu găr mă huŏng tơ kơpal tơmo trêl wă pơtih gia kơ lu bơngai kơtơ̆ng đe bơtho tơdrong 'Bok Kei-Dei. Lu sư hưch hanh păng iŏk hloi mơ̆n. Kư̆m đei ră tơnơm 'ba mă-lei rơh sư chăt ưh kơ jrŭ, sư jing jô lôch hloi, 'noh wă khan lu sư đei ră đon lui mă-lei ưh kơ đunh lăp đei tơdrong pơlong lăng lu sư jing achăng lê̆. 14Lu găr mă huŏng 'bơ̆t 'nhĕt jơla wă pơtih gia kơ lu bơngai kơtơ̆ng đe bơtho nơ̆r 'Bok Kei-Dei ră, mă-lei lu sư wă tơchĕng tơdrong arih sư kăl hloh, sư wă kơ mơdrŏng, hiôk jơnap tơ ala teh đĕch. Thoi noh na sư jing ưh kơ plei. 15Lu găr mă huŏng tơ teh 'lơ̆ng wă pơtih gia kơ lu bơngai kơtơ̆ng đe bơtho nơ̆r 'Bok Kei-Dei na kiơ̆ hloi kơjăp hăm pơm 'lơ̆ng tơpăt. Sư kư̆m adrin lui khŏm khŏm pơyua tơdrong jang 'Bok Kei-Dei tơpă.”

Tơdrong Yêsu bơtho pơjuang Sư wă kơ bơ̆n hlôh

16Yêsu bơtho dơ̆ng kơ lu đe noh, Sư khan: “Bơ̆n tơ̆k ŭnh kơđeng wă kơ hơdah; bơ̆n ưh kơ lah tơ̆k ŭnh kơđeng tah tơ lăm ge dah 'măn lê̆ tơ ala rimrôm giơng wă kơ măng mu ôh. Bơ̆n juăt kơ atol ŭnh kơđeng tơ kơpal jrăng wă kơ bơ̆n 'bôh hơdah jơ̆p-jang. 17Thoi noh tôm tơdrong Inh bơtho pơjuang kơ iĕm dang ei iĕm gô băt dơning dơmônh.

18“Thoi noh na iĕm athei mơ̆ng Inh mă nhên. Bơngai bu hlôh, 'Bok Kei-Dei gô pơthim kơ sư hlôh hloh kơ noh dơ̆ng tơpă. Bơngai bu ưh kơ wă mơ̆ng, bơngai 'noh sư tơchĕng sư hlôh ră, mă-lei sư gô hiong dôm tơdrong sư hlôh.”

Oh Yêsu hăm mĕ Sư năm tơ Sư

19Oh Yêsu hăm mĕ Sư năm tơ Sư ră, mă-lei ưh kơ gơh truh yua kơ bơngai hrăt-hrot kơ 'măng. 20Na đe khan kơ Yêsu: “Mĕ Ih hăm oh Ih dơ̆ng tơ 'ngoaih hnam to. Lu sư chă Ih.”

21Na Yêsu khan: “Bơngai bu mă mơ̆ng păng kiơ̆ dôm nơ̆r 'Bok Kei-Dei, bơngai noh boih dang mĕ Inh, dang 'nhŏng oh Inh.”

Kră Yang Yêsu khă kial hơbŭt

22Minh năr ei, Yêsu păng lu bơngai pơhrăm păng Sư tŏk thŏng-nan. Na Yêsu khan kơ lu sư: “Bĕ bơ̆n tŏk pah to đak dơsĭ.” Na lu sư năm hloi. 23Kơplah lu sư oei yak kơpal đak dơsĭ, Yêsu tep. Na đei kial hơbŭt tih păng đei đak poh-yă tih tơprah mơ̆t lăm thŏng-nan. Đak wă jê̆ 'bĕnh na thŏng-nan wă jê̆ krăm. 24Lu bơngai pơhrăm păng Yêsu năm râu Yêsu khan hloi: “Ơ 'Bok Thây, bơ̆n wă lôch kơ đak lơ̆p boih.” Na Yêsu hơloh iung khă hloi kial hăm đak poh-yă. Na kial thĕng hloi păng đak poh-yă kư̆m pă adrŏ adrĕnh. 25Thoi noh boih na Yêsu khan kơ lu bơngai pơhrăm păng Sư: “Lơliơ iĕm tam băt gơnang kơ Inh?” Lu bơngai pơhrăm păng Sư lăng hlĭch kơ đon. Jơhngơ̆m lu sư hli dêh. Na lu sư apinh băl khan: “Bu âu kih, kial hơbŭt, đak dơsĭ poh-yă tih dang noh, mă kư̆m chu yom kơ Sư?”

Yêsu pơklaih bơngai yang mơ̆t

26Lu sư tŏk hloh pah to đak dơsĭ tơ tơring đe Gerasen. Tơring đe Gerasen noh pah to đak dơsĭ, pah âu dêh char Galilê. 27Lăp Yêsu jur đơ̆ng thŏng-nan Sư tơ'bơ̆p hloi minh 'nu bơngai pơlei noh, bơngai yang mơ̆t. Sư pă lah hrŭk hơbĕn ao boih. Sư pă wă oei tơ hnam boih, sư oei tơ bơsat đĕch. 28-29Lăp sư 'bôh Yêsu, sư ôr na năm 'nap 'bơ̆t anăp Yêsu na Yêsu athei yang kơnê̆ lĕch đơ̆ng akâu sư. Yang kơnê̆ ei pơma pơret khan: “Ơ Yêsu, Kon 'Bok Kei-Dei Kră Yang Tih Hloh, lơliơ Ih wă phak inh dang ei, apinh Ih 'nĕ phak inh hŏ.” Đơ̆ng sơ̆ yang kơnê̆ juăt kơ pơm kơ sư wik. Đe chô̆ ră jơ̆ng ti sư păng glang mam, gak sư ră mă-lei sư hrĕch kơtĕch kơtoch đĭ, na yang kơnê̆ pơpuh sư năm tơ char glă chơngue.

30Yêsu jet anăn sư: “Anăn ih bu?”

Sư khan: “Anăn inh Tơpôl.” Sư khan thoi noh yua kơ sư đei lơ yang kơnê̆ oei lăm sư. 31Na lu yang kơnê̆ ei apinh Yêsu thoi âu: “Dah Ih pơpuh nhôn, Ih 'nĕ pơpuh nhôn năm tơ sơlŭng jrŭ.”

32Đei minh tơpôl nhŭng chă sa kiơ̆ groi ei, na lu yang kơnê̆ apinh Yêsu ăn kơ lu sư gơh mơ̆t tơ tơpôl lu nhŭng mă sa kiơ̆ groi ei. Na Yêsu ăn lu sư mơ̆t tơ lăm nhŭng kiơ̆ ei. 33Thoi noh na lu sư jăk hloi đơ̆ng bơngai 'nei mơ̆t hĭ tơ lu nhŭng. Lu nhŭng ei kơdâu jur đơ̆ng kông groi ei huŏng hơtat tơ đak dơsĭ, glơ̆k lôch đĭ minh tơpôl nhŭng ei.

34Lu bơngai mă wei nhŭng 'bôh thoi noh na kơdâu chă roi kơ đe jơ̆p-jang lăm pơlei ei. 35Na lu kon pơlei pơla năm lăng tơdrong noh lơliơ. Lu sư năm tơ Yêsu na 'bôh bơngai mă đêl yang mơ̆t ei oei ngôi 'bơ̆t jơ̆ng Yêsu. Sư hrŭk hơbĕn ao thoi lĕ bơngai hmă boih, ưh pă wơnh dơ̆ng. Na lu đe ei hli kơ Yêsu. 36Lu đe mă đêl 'bôh Yêsu pơklaih bơngai wơnh hei, lu sư chă roi kơ đe tơdrong noh dơ̆ng. 37Đơ̆ng noh na đĭ-đăng lu bơngai tơring Gerasen ei athei Yêsu jăk tơ nai yua kơ lu sư hli dêh. 38Lăp Yêsu tŏk tơ thŏng-nan na bơngai mă 'nao klaih kơ wơnh ei apinh kiơ̆ oei păng Yêsu. Mă-lei Yêsu ưh kơ anhăk ba ôh. Sư khan: 39“Ih wih brŏk tơ hnam ih đĕch chă roi kơ đe tơdrong 'Bok Kei-Dei 'mêm mơnat kơ ih dang yơ, na sư mah pơklaih ih đơ̆ng ti yang kơnê̆.” Na sư wih tơ hnam chă ră roi jơ̆p-jang kơ pơlei sư dôm tơdrong Yêsu pơklaih sư.

Yêsu tơiung arih kon 'bok Jairut lôch păng pơklaih minh 'nu drŏ-kăn tuh pham

40Yêsu tŏk tơ thŏng-nan tŏk găn brŏk tơ pah âu dơ̆ng. Đei lơ bơngai răp gô Sư.

41Đei minh 'nu bơngai năm tơ Yêsu. Sư ei bơngai kră wei-lăng hnam akŭm đe Juđê lăm pơlei kiơ̆ ei. Anăn sư Jairut. Sư 'nap 'bơ̆t jơ̆ng Yêsu na apinh Yêsu năm tơ hnam sư, 42yua kơ kon pôm adruh sư bơlŏ dêh.

Kơplah Yêsu oei yak năm tơ hnam sư 'nei, đei lơ bơngai yak hơdai Sư hmĕt hmot Sư. 43Đei minh 'nu bơngai drŏ-kăn tuh pham mơjĭt-'bar sơnăm boih. Sư apah đe ming akâu sư tĕch đĭ mŭk tơmam sư ră mă-lei ưh kơ klaih ôh. 44Sư năm hơdai đe kiơ̆ đơ̆ng rŏng Yêsu chur mơ̆t kiơ̆ Yêsu wă pel tơdrơi ao Yêsu wă kơ klaih kơ tơdrong jĭ sư. Lăp sư pel 'bơm tơdrơi ao Yêsu, kơtă ei sư klaih hloi kơ đơ̆ng tuh pham. 45Kơplah 'nei Yêsu khan: “Bu kih pel Inh?”

Đĭ-đăng lu đe ei khan: “Nhôn ưh kơ đei pel Ih.” Na Pêtrôs khan: “Ơ 'Bok Thây, đei lơ bơngai hmĕt hmot Ih.”

46Yêsu khan: “Đei bơngai pơrơ̆ng pel Inh yua kơ Inh băt kơdih tơdrong mơsêh Inh lĕch.” 47Bơngai drŏ-kăn ei băt sư ưh pă gơh ôn boih na sư hli tơtey năm tơ Yêsu 'nap 'bơ̆t anăp Sư roi hloi 'bơ̆t anăp đe tơpôl tơdrong sư pel Yêsu, na sư klaih hloi kơ jĭ. 48Na Yêsu khan kơ sư: “Ơ duch, kơlih kơ ih lui na ih klaih. Na dang ei brŏk kơ ih mă 'lơ̆ng bĕ.”

49Kơplah Yêsu oei pơma, blư 'bôh minh 'nu bơngai đơ̆ng hnam 'bok Jairut năm giong khan kơ sư: “Kon adruh ih lôch boih, ih oei pơhrat kiơ kơ 'Bok Thây?”

50Yêsu kơtơ̆ng sư pơtruh kơ Jairut thoi noh na Sư khan: “Ih 'nĕ kơ hli, ih kư̆ kơ lui đĕch, na kon ih gô klaih.”

51Lăp lu sư truh tơ hnam Jairut boih, na Yêsu ăn lăp Pêtrôs, Yôhan, Yakơ păng mĕ 'bă adruh ei đĕch mơ̆t tơ hnam noh. 52Đei lơ bơngai 'bơ̆t ei tơjrông tơjrang mang oei nhơ̆m hmoi. Na Yêsu khan kơ lu đe ei: “Iĕm 'nĕ pă nhơ̆m hmoi kơ sư wăi, sư ưh kơ lôch ôh, sư tep đĕch.”

53Na đe ei pơm hiĕk kơ Sư yua kơ lu sư băt nhên kơ bơngai noh lôch tơpă boih. 54Đơ̆ng noh na đe Yêsu păng mĕ 'bă adruh ei mơ̆t tơ anih đe tơ'bĭch adruh ei na Yêsu rôp ti adruh ei păng khan: “Ơ mŏ adruh iĕ, iung bĕ.” 55Bơhngol sư wih hloi na sư gruih iung. Đơ̆ng noh Yêsu athei mĕ sư sŏ ăn kơ kon adruh sư ei tơmam sŏng sa. 56Mĕ 'bă sư sơleng kơ đon. Na Yêsu khă bre sư khan: “Biĕm 'nĕ kơ chă roi kơ đe hŏ.”

હાલમાં પસંદ કરેલ:

Luk 8: bdq

Highlight

શેર કરો

નકલ કરો