Luk 5
5
1Minh năr ei Yêsu oei tơ jih đak dơsĭ Galilê mă đe kư̆m anăn dơsĭ Gênêsaret, na lu đe tơpôl hmĕt hmot Sư yua kơ wă mơ̆ng Sư bơtho tơdrong 'Bok Kei-Dei. 2Na Sư 'bôh 'bar tŏ thŏng-nan tơ jih đak dơsĭ ei, na lu bơngai chă ka ei ưh pă đei hao thŏng-nan lu sư, yua kơ lu sư hăt kơ pih jal lu sư. 3Na Yêsu apinh tŏk thŏng-nan Simôn ei, na Sư athei Simôn wơ̆r thŏng-nan ataih 'biơ̆ kơ đơ̆ng jih đak. Đơ̆ng rŏng kơ noh Yêsu tơoei bơtho lu đe tơpôl ei đơ̆ng thŏng-nan. 4Yêsu bơtho lu đe ei đang boih, na Sư khan kơ Simôn thoi âu: “Bĕ bơ̆n wơ̆r thŏng-nan bơ̆n tơ jrŭ 'biơ̆ wă traih jal.” 5Na Simôn khan: “Ơ 'Bok, nhôn măng hei traih ră jal prăt măng hloi, mă-lei 'nhŏ kơ đei minh găr. Dah traih jal kơ'năr rai lŭch mă-lei dang ei yua kơ Ih athei na inh chu Ih mơ̆n.”
6Truh tơ đak jrŭ boih na bre Simôn păng bôl sư traih hloi, ka puh jal bre sư lơ tơpă, na jal sư mah wă hiah hloi. 7Na bre ei kuơch krao hloi 'bar 'nu bôl sư đêl hơdai sư thŏng-nan mă 'bar ei năm tơgŭm sư. Na bre sư năm hloi. Na đĭ-đăng kơ lu sư hiŏng atŏk hloi ka ei tuh tơ 'bar tŏ thŏng-nan ei, mlưi mah wă 'bĕnh tôm, thŏng-nan kư̆m mah wă krăm hloi. 8Lăp Simôn mă đe kư̆m anăn Pêtrôs 'bôh Yêsu pơm tơdrong mơsêh thoi noh boih na sư hơloh 'nap 'bơ̆t anăp Yêsu kơkuh kơ Sư khan hloi: “Ơ 'Bok, Ih weh đơ̆ng inh đĕch wăi, inh hli kơ Ih, yua kơ inh bơngai yoch.”
9Simôn pơma thoi noh yua kơ đĭ-đăng kơ lu sư sơleng kơ đon đơ̆ng lu sư rôp ka lơ dêh noh hei. 10Bôl mă jang hơdai sư ei kư̆m sơleng kơ đon mơ̆n. Anăn bre sư ei Yakơ păng Yôhan, kon Sêbêđê. Na Yêsu khan kơ Simôn: “Ih 'nĕ pă hli. Đơ̆ng âu tơ anăp kơnh ih gô krao chă kon bơngai wă kơ sư lui kơ 'Bok Kei-Dei.” 11Na lu sư wơ̆r thŏng-nan ei truh tơ jih đak dơsĭ achăng lê̆ dôm tơmam sư ei, na kiơ̆ hloi Yêsu.
Yêsu pơklaih bơngai jĭ chin
12Minh năr ei Yêsu năm tơ pơlei đe tơ'bơ̆p minh 'nu bơngai jĭ chin jơ̆p-jang kơ akâu sư. Lăp bơngai ei 'bôh Yêsu na sư drap hloi kơkuh kơ Sư păng apinh Yêsu thoi âu: “Ơ 'Bok, dah Ih wă, Ih gơh pơklaih inh.”
13Na Yêsu chro hloi ti pel bơngai ei păng khan: “Inh wă tơpă pơklaih ih, Inh pơklaih ih dang ei.” Na bơngai jĭ ei klaih kơtă hloi. 14Na Yêsu pơkă kơ sư khan: “Ih 'nĕ chă roi kơ đe hŏ. Dang ei ih klaih boih na ih năm tơ'bôh akâu ih kơ 'bok soi păng soi sơmah kơ 'Bok Kei-Dei kiơ̆ thoi Môis pơkă sơ̆ wă kơ đe băt tơdrong jĭ ih klaih tơpă boih.”
15Yêsu kuă ăn kơ đe băt tơdrong Sư pơklaih bơngai noh hei ră, mă-lei đe kơtơ̆ng ang tơdrong noh jơ̆p-jang hloi. Na đei lơ bơngai năm wă mơ̆ng Sư bơtho păng wă kơ Yêsu pơklaih jĭ jăn lu sư mơ̆n. 16Mă-lei hơtai noh Yêsu wă năm krao khan kơ 'Bă Sư 'Bok Kei-Dei tơ anih kueng, na Sư năm hloi.
Yêsu pơklaih bơngai hơwen hơwo
17Minh năr ei Yêsu oei bơtho đe na đei lu bơngai Juđê mă lui kơ 'Bok Kei-Dei kiơ̆ tơdrong Pharisi păng lu 'bok thây bơtho tơdrong juăt đe Juđê oei mơ̆ng Sư. Lu sư năm đơ̆ng rim pơlei lăm dêh Galilê păng lăm dêh Juđê păng đơ̆ng Pơlei Jêrusalem mơ̆n. Na Yêsu đei tơdrong mơsêh mơyang đơ̆ng 'Bok Kei-Dei gơh pơklaih bơngai jĭ jăn. 18Na blư 'bôh đe tung ba minh 'nu bơngai hơwen hơwo kơpal anhŭn. Lu sư wă mơ̆t tơ hnam ei wă tơ'bĭch sư 'bơ̆t anăp Yêsu ră, 19mă-lei lu sư ưh kơ gơh mơ̆t ôh yua kơ đei lơ bơngai dêh lăm hnam noh. Na lu sư tŏk tơ bơbŭng hnam, bơbŭng ei đe pơm păng găch. Na lu sư yuih tơklă Yêsu hloi, tơjur bơngai hơwen ei păng anhŭn 'bơ̆t anăp Yêsu lăm lu bơngai tơpôl ei.
20Lăp Yêsu 'bôh lu sư đei đon lui thoi noh, na Sư khan kơ bơngai jĭ ei thoi âu: “Ơ ma, tơdrong yoch ih Inh pơklaih đĭ boih.” 21Lu thây bơtho tơdrong juăt đe Juđê păng lu bơngai kiơ̆ tơdrong Pharisi kơtơ̆ng Sư pơma thoi noh na lu sư mơmơnh lăm to khan: “Bơngai bu âu pơm pơma blông kơ 'Bok Kei-Dei dêh? Bu mă gơh pơklaih yoch bơ̆n? Pôm 'Bok Kei-Dei đĕch gơh pơklaih yoch bơ̆n.”
22Yêsu băt hloi kơ lu sư pơma mơmơnh lăm to, jô̆ kơ Sư tơdrong noh na Yêsu khan thoi âu: “Yua kơ kiơ iĕm pơma mơmơnh lăm to iĕm thoi noh lĕ? 23Inh khan kơ bơngai hơwen hơwo âu tơdrong yoch sư Inh pơklaih đĭ boih; tơdrong 'noh dah iĕm 'bôh Inh athei sư iung yak, na sư iung yak hloi, 'noh iĕm kư̆m băt kơ Inh gơh pơklaih yoch sư mơ̆n. 24Na dang ei Inh wă pơklaih jĭ sư, wă tơbăt ăn kơ iĕm băt kơ Inh Kon Bơngai gơh pơklaih tơdrong yoch kon bơngai ala teh âu.” Na Yêsu khan kơ bơngai hơwen hơwo ei thoi âu: “Inh khan kơ ih, dah iung bĕ, chĕp ba anhŭn ih brŏk tơ hnam.”
25Na bơngai hơwen hơwo ei iung hloi 'bơ̆t anăp đe tơpôl, na chĕp ba anhŭn đêl đe tung sư ei wih hloi tơ hnam. Sư pơma ư-ang kơ 'Bok Kei-Dei tơpă. 26Đĭ-đăng lu bơngai oei kiơ̆ ei sơleng kơ đon tơpă na pơma ư-ang kơ 'Bok Kei-Dei. Lu sư kư̆m hli dêh na khan: “Bơ̆n 'bôh tơdrong hlĭch tơpă năr âu iih?”
Yêsu pơtơm Lêwi kiơ̆ Sư
27Đơ̆ng noh Yêsu lĕch yak ataih 'biơ̆ đơ̆ng ei, na Sư 'bôh Lêwi oei jang 'bơ̆t hnam thuê̆. Na Yêsu pơtơm sư khan: “Bĕ kiơ̆ Inh.”
28Na Lêwi ei gruih iung kiơ̆ hloi Yêsu, achăng tŭk pơđĭ tơmam sư 'bơ̆t ei.
29Đơ̆ng noh Lêwi pơtơm Yêsu sŏng sa tih lăm hnam sư. Na đei lơ bơngai iŏk jên thuê̆ păng lu bơngai nai sŏng sa hơdai păng sư mơ̆n. 30Na lu bơngai Pharisi păng lu 'bok thây bơtho tơdrong juăt đe Juđê khan kơ lu bơngai pơhrăm păng Yêsu thoi âu: “Yua kơ kiơ iĕm sŏng sa hơdai hăm lu bơngai iŏk jên thuê̆ păng lu bơngai pơm yoch?”
31Na Yêsu khan kơ lu sư: “Lu bơngai mă liĕm akâu ưh kơ kăl kơ 'bok pơgang ôh. Pôm lu bơngai jĭ jăn đĕch kăl kơ 'bok pơgang. 32Inh jur tơ âu ưh kơ sĭ kơ Inh wơ̆n chă lu bơngai 'lơ̆ng wă tơbral kơdih tơdrong yoch ôh. Inh jur tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.”
Đe apinh Yêsu tơdrong ơ̆t kơ por
33Đe apinh Yêsu thoi âu: “Lu bơngai pơhrăm păng Yôhan pơrơ̆ng ơ̆t kơ por wă krao khan ling-lang păng lu bơngai kiơ̆ tơdrong Pharisi kư̆m pơm thoi noh mơ̆n, mă-lei lu bơngai pơhrăm păng Ih oei sa et đĕch, ưh kơ ơ̆t kơ por ôh.”
34Na Yêsu pơma pơtih gia kơ lu sư thoi âu: “Kơplah đe pơkong kơ bơngai mă iŏk akăn, lu bôl bơngai mă iŏk akăn noh, lu sư ưh kơ đei bu ơh sơ'ngon ơ̆t kơ por ôh. 35Pôm ning-mônh đĕch, lăp đe rôp anhăk bơngai mă iŏk akăn noh đơ̆ng bôl sư, 'bơ̆t ei kơnh trŏ kơ lu bôl sư ơh sơ'ngon ơ̆t kơ por.”
Yêsu khan Sư bơtho tơdrong 'nao phara kơ tơdrong đe juăt sơ̆
36Yêsu pơma pơtih gia gah tơdrong đêl lu sư jet noh hei thoi âu: “Kơbĭ bu 'maih hek che ao 'nao wă sĭt pơklĕp tơ ao so. Tơ̆ng đe pơm thoi noh lei sư pơrăm ao 'nao păng che 'nao mă đêl sư sĭt pơklĕp hăm che so noh ưh kơ layơ lei-lăi băl ôh. 37Kư̆m thoi noh mơ̆n kơbĭ bu 'maih tring sik 'nao 'băt kơtang mong tơ kơdŭng akar so. Tơ̆ng đe tring thoi ei, pă jor kơdŭng akar so 'noh gô pơchah, na sik gô lĕch hiong, kơdŭng kư̆m gô pơchah răm. 38Tơ̆ng bu wă tring sư athei tring mong sik 'nao tơ kơdŭng akar 'nao, yua kơ kơdŭng akar 'nao 'noh kơjăp. 39Bơngai bu 'maih et sik so, sư kuă kơ et sik 'nao, yua kơ sư đêl juăt kơ et sik so khan 'lơ̆ng hloh.”
Yêsu bơtho tơblang tơdrong kơ̆m lăm năr pơdơh Sa'bat
હાલમાં પસંદ કરેલ:
Luk 5: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
