Luk 22
22
1Wă jê̆ truh năr giĕng sa 'Bĕng Mi Ưh Kơ Đei 'Buih Pông mă đe kư̆m anăn Giĕng Năm Brih. 2Na lu 'bok soi tih hăm lu thây bơtho tơdrong juăt đe Juđê, lu sư chă đon wă kơ gơh tơtông rôp pơlôch Yêsu, yua kơ lu sư hli kơ rôp Yêsu 'bơ̆t anăp đe kon pơlei pơla.
Juđa wă plơ̆ plĕch Yêsu
3Kơplah noh yang Satan mơ̆t lăm jơhngơ̆m Juđa mă đe kư̆m anăn Ikariôt, bơngai minh 'nu đơ̆ng lăm mơjĭt-'bar 'nu bơngai pơhrăm păng Yêsu. 4Thoi noh na Juđa năm tơ lu 'bok soi tih păng lu kră linh gak hnam akŭm 'Bok Kei-Dei tơm wă chă tơdrong thoi yơ gơh rôp Yêsu jao kơ lu sư. 5Na lu 'bok soi păng lu kră linh noh lăp đon tơpă mah pơkă khan wă apah kơ Juđa jên. 6Na Juđa kư̆m pơkă kơ lu sư wă khŏm jao Yêsu kơ lu sư tơpă. Đơ̆ng noh Juđa chă tơdrong wă kơ gơh rôp Yêsu jao ăn kơ lu 'bok tih ei kơplah hrĕp wă kơ kon pơlei pơla ưh kơ băt.
Yêsu sŏng sa hơdai hăm lu bơngai pơhrăm păng Sư
7Trŏ kơ năr đe pơm giĕng boih, na rim kơ đe juăt kơ 'bet sa triu kơ Năr Giĕng Năm Brih sa 'Bĕng Mi Ưh Kơ Đei 'Buih Pông. 8Yêsu wơh Pêtrôs hăm Yôhan: “Biĕm năm hơmet kơ bơ̆n tơmam sa bĕ, yua kơ trŏ năr giĕng boih.”
9Bre sư jet Yêsu: “Ih wă kơ nhi hơmet kơ bơ̆n tơmam sa tơ yơ?”
10Yêsu khan: “Đơ̆ng âu biĕm mơ̆t tơ Pơlei Jêrusalem, tơ ei biĕm gô tơ'bơ̆p minh 'nu bơngai glơng ge đak, na biĕm kiơ̆ hloi sư. Sư mơ̆t tơ hnam ayơ, biĕm mơ̆t kiơ̆ sư tơ noh hloi mơ̆n. 11Na biĕm apinh tơ'ngla hnam noh thoi âu: ‘'Bok Thây athei nhi jet ih, tơ yơ anih Sư wă sŏng sa kơ Năr Giĕng Năm Brih, lu bơngai pơhrăm păng Sư kư̆m wă sŏng sa hơdai hăm Sư mơ̆n?’ 12Biĕm apinh sư thoi noh, sư gô tơ'bôh kơ biĕm minh pôm anih să tôch tơ kơpal ti, đei bơ̆n gơ'bang tang-dŏ sư hơmet lê̆ tôm boih, na biĕm hơmet kơ bơ̆n tơmam sa tơ ei.”
13Thoi noh boih na Pêtrôs hăm Yôhan năm tơ Pơlei Jêrusalem 'bôh tơpă dôm tơdrong Yêsu pơkă noh hei. Na bre sư hơmet lê̆ tơmam sŏng sa kơ Năr Giĕng Năm Brih tơ ei hloi.
14Trŏ jơ sŏng sa, na Yêsu hăm lu jơ̆ng 'bang Sư tơoei sŏng sa hơdai tơ gơ'bang tang-dŏ noh. 15Yêsu khan kơ lu sư: “Inh lăp đon hiôk tơpă đei sŏng sa kơ Năr Giĕng Năm Brih hơdai hăm iĕm hơdrol kơ Inh wă lôch. 16Inh khan kơ iĕm tơpă, Inh ưh pă đei sŏng sa tơdrong Giĕng Năm Brih thoi âu boih tơ̆p mă truh tơ năr 'Bok Kei-Dei pơgơ̆r ning-mônh 'mơ̆i, na sa dơ̆ng. Kơplah ei kơnh kon bơngai gô klaih rơngei tơpă.”
17Klaih kơ noh Yêsu iŏk minh pôm kơchŏk đak hơmu, krao khan bơnê kơ 'Bok Kei-Dei na khan: “Iĕm iŏk kơchŏk đak hơmu âu asong dih băl huch. 18Inh khan kơ iĕm tơpă, Inh ưh pă huch boih đak hơmu âu tơ̆p mă truh tơ năr 'Bok Kei-Dei pơgơ̆r ning-mônh 'mơ̆i.”
19Đơ̆ng rŏng kơ noh Yêsu iŏk 'bĕng mi krao khan bơnê kơ 'Bok Kei-Dei, na phĕ hloi 'bĕng mi noh asong kơ lu sư păng khan: “'Bĕng âu boih akâu Inh. Akâu Inh âu boih Inh ăn lôch tang kơ iĕm. Iĕm kư̆m athei pơm thoi âu ling-lang wă 'blŏk hơdơ̆r kơ Inh.”
20Kư̆m thoi noh mơ̆n, đơ̆ng rŏng kơ sŏng sa Sư iŏk minh pôm kơchŏk đak hơmu păng khan: “Kơchŏk đak hơmu âu boih pham Inh wă lĕch tang ăn kơ lu iĕm. Thoi noh na 'Bok Kei-Dei gô pơklaih iĕm đơ̆ng tơdrong yoch. 21Mă-lei bơngai wă plơ̆ plĕch kơ Inh, sư oei sŏng sa hơdai păng Inh dang ei. 22Inh Kon Bơngai gô lôch 'blep trŏ thoi 'Bok Kei-Dei pơkă, mă-lei mơnat kơ bơngai mă plơ̆ plĕch Inh 'noh đĕch pŭ tơdrong pơmat.”
23Na lu bơngai pơhrăm păng Sư tơjet dih băl khan: “Bu lăm lu bơ̆n wă plĕch kơ Yêsu kih?”
Lu bơngai pơhrăm păng Sư 'maih pơm tih
24Lu bơngai pơhrăm păng Yêsu pơjah pơjăng dih băl kơ tơdrong lăm lu sư bu tih hloh kơ tơduă sư. 25Na Yêsu khan kơ lu sư: “Lu 'bok pơtao dêh đe, lu sư chă wơh pơgŏ lu bơngai sư pơgơ̆r. Mă-lei sư kư̆m lăp đon kơ lu bơngai sư pơgơ̆r noh khan kơ sư bơngai 'lơ̆ng gơh tơgŭm kon tơring. 26Mă-lei iĕm 'nĕ kơ pơm rok lu 'bok pơgơ̆r noh hŏ. Bơngai bu 'maih pơm 'bok tih lăm lu iĕm, lei bơngai noh athei pơm iĕ hloh kơ đe. Dah bơngai bu 'maih pơm yŏng pơgơ̆r lăm lu iĕm, bơngai noh athei pơm thoi lĕ đĭch iĕm. 27Bơngai bu tih hloh kơ bre sư, bơngai mă awih awăn kơ yŏng sư sa noh, dah yŏng sư tih hloh? Yŏng sư boih tih hloh kơ đĭch sư. Mă-lei kơplah Inh oei hơdai păng lu iĕm, Inh dang đĭch awih awăn kơ iĕm.
28“Đơ̆ng sơ̆ khơ̆ dang ei Inh đei lơ tơdrong đe chă pơm kơ Inh, mă-lei iĕm ưh kơ achăng lê̆ Inh ôh. 29Thoi noh na Inh gô ăn kơ iĕm pơgơ̆r đe kư̆m thoi 'Bă Inh ăn kơ Inh pơgơ̆r iĕm mơ̆n. 30Iĕm gô sŏng sa hơdai păng Inh kơplah Inh pơgơ̆r ning-mônh păng iĕm kư̆m pơm pơtao sek tơlang kơ mơjĭt-'bar khŭl bơngai Isơrael.
Yêsu roi tơdrong Pêtrôs wă sơngah kơ Sư
31“Ơ Pêtrôs, ih mơ̆ng Inh 'biơ̆ bĕ. Yang Satan apinh 'Bok Kei-Dei wă pơlong lăng tơdrong lui lu iĕm thoi lĕ đe wă um 'ba. 32Mă-lei Inh krao khan kơ 'Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu 'nhŏng oh ih âu wă kơ lu sư kư̆m lui kơjăp dơ̆ng.”
33Pêtrôs khan kơ Sư: “Ơ 'Bok, mă đe tah inh lăm hnam phak hơdai păng Ih, dah pơlôch inh hơdai păng Ih, mă-lei inh kư̆m ưh kơ wă sơngah kơ Ih ôh.”
34Na Yêsu khan kơ sư thoi âu: “Ơ Pêtrôs, Inh khan kơ ih tơpă, măng kơnh boih, hơdrol kơ iĕr wă ŏ, ih gô sơngah kơ Inh pêng 'măng khan ih ưh kơ băt kơ Inh.”
Yêsu athei lu bơngai pơhrăm păng Sư kơchăng kơ tơdrong gleh wă truh
35Na Yêsu khan kơ lu sư dơ̆ng: “Sơ̆ Inh wơh iĕm năm chă bơtho đe, na Inh khan kơ iĕm 'nĕ kơ chĕp ba jên, mă kơdŭng tah tơmam, dah chơkhŏ, na iĕm hăm kơ'bah kơ tơdrong kiơ ưh sơ̆?” Lu sư tơl: “Nhôn ưh kơ đei kơ'bah tơdrong kiơ ôh sơ̆.” 36Na Yêsu khan: “Mă-lei dang ei tơdrong gleh wă truh boih na bơngai bu lăm lu iĕm đei jên dah kơdŭng tah tơmam, lu iĕm athei chĕp ba tơmam iĕm noh. Bơngai bu ưh kơ đei đao athei tĕch ao sư na blơ̆ chă đao. 37Sơ̆p hla bơar 'Bok Kei-Dei khan sơ̆ thoi âu: Đe jô̆ kơ Inh bơngai yoch trŏ kơ pơlôch. Na bơ̆n gô 'bôh đe jô̆ kơ Inh thoi noh tơpă. Na dôm tơdrong đe chih lê̆ hơdrol sơ̆ gah Inh bơ̆n gô 'bôh tôm tơpă.”
38Lu sư khan: “Ơ 'Bok, Ih lăng, nhôn đei 'bar hlak đao boih.”
Yêsu khan: “Lei huay boih.”
Yêsu krao khan kơ 'Bă Sư
39Yêsu yak đơ̆ng ei năm tơ kông Ôliwơ kư̆m thoi brei mơsơ̆ mơ̆n. Lu bơngai pơhrăm păng Sư kư̆m kiơ̆ hơdai Sư. 40Lăp lu sư truh tơ ei, Yêsu khan kơ lu sư: “Iĕm athei krao khan kơ 'Bok Kei-Dei wă kơ iĕm huay kơ lui kơ yang Satan pơhlŭ.”
41Đơ̆ng noh na Yêsu năm ataih ataih 'biơ̆ kơ lu đe noh na Sư sơtơ̆p kŭl-tăng krao khan kơ 'Bă Sư 'Bok Kei-Dei. 42Sư khan: “Ơ 'Bă, dah gơh, lei ăn kơ Inh gơh klaih đơ̆ng tơdrong gleh âu. Mă-lei Ih 'nĕ pơm kiơ̆ kơ Inh, pơm kiơ̆ kơ Ih đĕch.”
43Na đơ̆ng noh blư kơ minh 'nu linh jang 'lơ̆ng đơ̆ng plĕnh jur tơ Sư wă tơgŭm Sư. 44Yêsu hli sơ'ngon tơpă, na Sư rai adrin krao khan kơ 'Bok Kei-Dei rai dêh mah tuh bơuh bơang thoi lĕ kơ pham lĕch đơ̆ng akâu Sư.
45Yêsu iung đơ̆ng krao khan wih tơ lu bơngai pơhrăm păng Sư 'bôh lu sư oei tep, yua kơ lu sư sơ'ngon dêh. 46Na Yêsu khan kơ lu sư: “Yua kơ kiơ iĕm tep? Iung adrin krao khan 'biơ̆ bĕ, wă kơ iĕm huay kơ lui kơ yang Satan pơhlŭ.”
Đe rôp Yêsu
47Kơplah Yêsu oei pơma na blư hloi kơ lu bơngai lơ truh tơ Sư. Juđa, bơngai mă đơ̆ng lăm mơjĭt-'bar 'nu bơngai pơhrăm păng Yêsu ră, sư anhăk ba lu bơngai wă năm rôp Yêsu. Na Juđa năm hloi tơ Yêsu wă chŭm Sư kiơ̆ thoi đe Juđê juăt kơ kơkuh dih băl. 48Na Yêsu khan hloi kơ sư thoi âu: “Ơ Juđa, lơliơ mă ih pơm pơrŏ chŭm Inh wă plơ̆ plĕch Inh Kon Bơngai?”
49Lăp lu bơngai pơhrăm păng Yêsu 'bôh đe wă năm rôp Yêsu boih na lu sư jet Yêsu thoi âu: “Ơ 'Bok, Ih hăm wă kơ nhôn koh lu sư păng đao?”
50Na minh 'nu lăm lu bơngai pơhrăm păng Yêsu hloch hloi đao koh kơtĕch hloi hla đon gah 'ma đĭch 'bok soi tơm. 51Yêsu khan kơ sư: “Iĕm 'nĕ kơ koh lu sư.” Na Sư pel đon đĭch 'bok soi, na klaih hloi. 52Yêsu khan kơ lu 'bok soi tih, hăm lu kră linh gak hnam akŭm tơm păng lu đe kră mă năm rôp Sư, thoi âu: “Lơliơ iĕm năm tơ âu chĕp tak đao 'long tơnôn dang lĕ đe wă rôp bơngai tơtông klĕ? 53Bĭ rim năr Inh oei tơ tŏk-bŏk lu iĕm tơ lăm hnam akŭm tơm, na iĕm kuă kơ kiơ kơ rôp Inh tơ noh lĕ? Mă-lei iĕm oei kiơ̆ kơ yang Satan mă oei pơgơ̆r dôm lu bơngai oei lăm măng mu na trŏ năr iĕm rôp Inh boih.”
Pêtrôs sơngah kơ Yêsu
54Na lu sư rôp hloi Yêsu anhăk Sư tơ hnam 'bok soi tơm. Na Pêtrôs kiơ̆ lăng Sư đơ̆ng rŏng đơ̆ng rŏng Sư ataih ataih. 55Đe rŭk ŭnh tơ tŏk-bŏk cham 'bok soi tơm, na đe oei nhur ŭnh. Na Pêtrôs kư̆m năm nhur ŭnh tơ ei hơdai hăm lu sư mơ̆n. 56Đei minh 'nu drŏ-kăn đam 'bok soi tơm oei ngôi kiơ̆ cham ei, sư kơnăl kơ Pêtrôs nhên yua kơ hơdah ŭnh, na sư 'bloh lăng Pêtrôs khan hloi: “Bơngai âu kư̆m oei hơdai păng Yêsu mơ̆n.”
57Mă-lei Pêtrôs sơngah khan: “Ơ duch, inh ưh kơ băt kơ Sư ôh.”
58Lăp đunh 'biơ̆ kơ noh đei minh 'nu bơngai nai dơ̆ng 'bôh sư khan hloi: “Ih kư̆m khŭl Yêsu mơ̆n lah.”
Mă-lei Pêtrôs khan: “Ơ ma, inh ưh kơ sĭ khŭl Sư ôh.”
59Đơ̆ng rŏng kơ noh dang minh jơ đei minh 'nu bơngai nai dơ̆ng khan thoi âu: “'Nâu kư̆m bơngai oei hơdai păng Sư tơpă yua kơ sư kư̆m bơngai đơ̆ng dêh Galilê thoi Yêsu mơ̆n.”
60Mă-lei Pêtrôs khan: “Ơ ma, inh ưh kơ băt ôh ih wă pơma kơ inh tơdrong kiơ ră.” Kơplah Pêtrôs oei pơma sơngah kơ tơdrong ei, lêk kơ iĕr ŏ hloi. 61Na Kră Yang Yêsu hue lăng Pêtrôs, na Pêtrôs 'blŏk hơdơ̆r kơ nơ̆r Kră Yang Yêsu pơma pơkă lê̆ hơdrol hei khan: “Măng kơnh boih hơdrol kơ iĕr wă ŏ ih gô sơngah kơ Inh pêng 'măng.”
62Thoi noh na sư lĕch hmoi ơh kơdih sư.
Đe che bơle kơ Yêsu
63Lu bơngai gak Yêsu tôn teh che bơle kơ Sư. 64Lu sư đơ̆p muh măt Yêsu păng che na tŭr akâu Sư păng khan: “Ih mơsêh, Ih mơyang na dang ei roi lăng kơ nhôn bu tŭr Ih.”
65Lu sư pơma che bơle kơ Sư tôm tĕch. 66Lăp 'brưch hơdah til pơgê 'nei, lu 'bok soi tih păng lu 'bok thây bơtho tơdrong juăt đe Juđê, hăm đĭ-đăng lu kră nai mă pơgơ̆r bơngai Juđê akŭm dih băl. Na đe anhăk ba Yêsu tơ anăp lu sư. Na lu sư khan kơ Yêsu thoi âu: 67“Dah Ih 'Bok Krist tơpă, Ih jah roi kơ nhôn bĕ.”
Na Yêsu khan kơ lu sư thoi âu: “Mă Inh roi kơ iĕm, iĕm kư̆m kuă kơ lui kơ Inh. 68Mă Inh jet iĕm tơdrong kiơ kiơ, iĕm kư̆m kuă kơ drơ̆ng Inh mơ̆n. 69Đơ̆ng âu truh tơ ning-mônh Inh Kon Bơngai gô oei gah 'ma kơ 'Bok Kei-Dei mă mơsêh mơyang tơpă na pơgơ̆r.”
70Na đĭ-đăng lu sư jet Yêsu: “Lei Ih hăm trŏ Kon 'Bok Kei-Dei tơpă dah ưh?”
Na Yêsu tơl sư khan: “Trŏ tơpă yơh.”
71Na lu sư khan: “Bơ̆n mah kăl kơ kiơ chă bơngai nai wă jâu Sư dơ̆ng, yua kơ đĭ-đăng kơ bơ̆n kơtơ̆ng boih Sư pơma blông kơ 'Bok Kei-Dei.”
Yêsu dơ̆ng 'bơ̆t anăp 'bok tih Pilat
હાલમાં પસંદ કરેલ:
Luk 22: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
