Luk 19
19
1Yêsu drong mơ̆t tơ Pơlei Jêrikô. 2Tơ pơlei ei đei minh 'nu bơngai pơgơ̆r gah tơdrong iŏk jên thuê̆, măt sư Sachê. Sư mơdrŏng tih tơpă. 3Sư wă lăng hơbŏ Yêsu thoi yơ yua kơ sư ưh tam lah 'bôh. Mă-lei sư ưh kơ gơh 'bôh yua kơ sư bơngai kơđeh. 4Thoi noh na sư kơdâu ploi hơdrol kơ đe, hao tơ kơpal 'long hue tơ teh wă kơ gơh 'bôh Yêsu. 5Lăp Yêsu truh tơ noh Yêsu ngơk lăng tơ kơpal 'long na khan: “Ơ Sachê, ih jur tĕnh, Inh wă mơ̆t pơdơh tơ hnam ih năr âu.”
6Na Sachê jur hloi đơ̆ng 'long hloi anhăk ba Yêsu năm tơ hnam sư. Sachê 'nă hal, jơhngơ̆m sư hiôk chơt tơpă. 7Đĭ-đăng kơ đe 'bôh tơdrong noh na chă pơma kơdih khan: “Lơliơ Yêsu boih khan mơ̆t sŏng sa tơ hnam bơngai yoch?”
8Na Sachê iung khan kơ Kră Yang Yêsu: “Ơ 'Bok, dôm mŭk tơmam inh âu, inh wă asong kơ lu bơngai dơnuh hin minh puăt. Păng lu bơngai mă inh pơgŏ iŏk jên, tơmam sư, inh gô tơwih ăn kơ sư lơ hloh kơ đêl inh iŏk, puăn hơtăl.”
9Yêsu khan kơ sư: “Năr âu 'Bok Kei-Dei pơklaih hnam dơnŏ iĕm boih na ih, mă đe jô̆ thoi noh, ih kư̆m kon sâu Abraham thoi đe noh mơ̆n. 10Inh Kon Bơngai jur tơ ala teh âu wă chă lu bơngai mă kuơ̆l kơ trong wă pơklaih yoch sư.”
Yŏng sư ăn jên kơ bơngai năm mơdro sa
11Đang tơdrong noh na Yêsu pơma pơtih gia dơ̆ng kơ lu bơngai mă mơ̆ng Sư kiơ̆ ei. Sư oei tơ Pơlei Jêrikô wă jê̆ truh tơ Pơlei Jêrusalem boih. Lu bơngai ei ngêh kơ 'Bok Kei-Dei wă ăn Yêsu pơm 'bok Pơtao pơgơ̆r tơ ala teh âu kơplah noh hloi. 12Thoi noh na Sư khan kơ lu bơngai ei: “Đei minh 'nu bơngai pơm tih wă năm tơ dêh ataih wă tơ'bơ̆p 'bok pơtao tơm, yua kơ 'bok pơtao tơm wă pôk sư pơm phŏ sư wă pơgơ̆r dêh char sư kơdih, klaih kơ noh sư gô wih dơ̆ng. 13Hơdrol kơ sư wă năm, sư krao mơjĭt 'nu bơngai jang kơ sư. Sư pơjao ăn rim 'nu kơ lu bơngai jang kơ sư minh hlak jên hu so sơ̆. Sư pơkă athei chă blơ̆ sa kơdih kơdih truh tơ năr sư wih dơ̆ng. Lăp sư pơjao ăn kơ lu đe noh đang boih na sư năm. 14Đe băt kơ sư năm boih na lu tơring tơrang hil areh kơ sư, đe ưh kơ wă kơ sư pơm pơtao kơ lu sư; na lu sư wơh đe pơtruh kơ 'bok pơtao tơm, lu tơring tơrang ưh kơ wă kơ bơngai noh pơm pơtao lu sư.
15“Mă-lei 'bok pơtao tơm lăp đon kơ sư tơpă, na ăn kơ sư pơm pơtao. Klaih kơ noh na sư wih. Sư krao lu mơjĭt 'nu bơngai jang kơ sư mă đêl sư pơjao ăn jên wă kơ băt lu sư blơ̆ sa bu lơi dôm yơ. 16Bơngai mă mônh năm tơ yŏng sư khan: ‘Ơ 'bok, sơ̆ inh iŏk minh hlak jên ih, inh năm mơdro sa đei lơi jing mơjĭt hlak dơ̆ng.’ 17Na yŏng sư khan: ‘Ơ dăm, ih jang kơ inh 'lơ̆ng tơpă. Ih ưh kơ lê̆ ôh dôm tơdrong jang inh. Yua kơ ih jang 'lơ̆ng, na mă khan tơdrong jang ih iĕ, inh gô ăn kơ ih jang tơdrong tih 'biơ̆, pơjao ăn kơ ih wei-lăng lăm mơjĭt tŏ pơlei.’ 18Bơngai mă 'bar kư̆m pơma lei-lăi khan: ‘Ơ 'bok, sơ̆ ih ăn kơ inh minh hlak jên hu, inh năm mơdro sa đei lơi pơđăm hlak.’ 19Na yŏng tơ'ngla sư khan: ‘Ơ dăm, ih jang kơ inh 'lơ̆ng tơpă. Ih ưh kơ lê̆ ôh dôm tơdrong jang inh. Yua kơ ih jang 'lơ̆ng, na mă khan tơdrong jang ih iĕ, inh gô ăn kơ ih jang tơdrong tih 'biơ̆, pơjao ăn kơ ih wei-lăng lăm pơđăm tŏ pơlei.’
20“Minh 'nu bơngai jang kơ sư nai dơ̆ng pơtruh kơ yŏng sư khan: ‘Ơ 'bok, âu jên ih. Sơ̆ ih athei inh mơdro ră, mă-lei inh 'nŭng 'măn lê̆ lăm che ling-lang. 21Inh hli kơ ih na inh 'nŭng 'măn lê̆ yua kơ inh băt kơ ih bơngai chă pơgŏ nhôn, na ih athei nhôn năm mơdro ăn kơ ih thoi bơngai nai pơtăm 'ba, na ih gô kĕch iŏk.’ 22Na yŏng sư khan: ‘Ơ dăm, ih bơngai ưh kơ chu dêh. Ih jô̆ kơ inh iŏk jên đơ̆ng iĕm mơdro thoi lĕ bơngai kĕch iŏk 'ba đơ̆ng đêl đe pơtăm hă? 23Lei ih kuă kơ kiơ ăn kơ đe mơng, wă kơ đei lơi. Mưh inh năm iŏk na ih pơdrĕo jên mă inh ăn păng jên mă ih lơi noh?’
24Thoi noh boih na yŏng sư athei bơngai mă jang kơ sư iŏk jên đơ̆ng bơngai kơchu noh hei, ăn thim tăm kơ bơngai đei mơjĭt hlak jên hei. 25Lu bơngai jang kơ sư khan: ‘Ơ 'bok, sư đei mơjĭt hlak jên boih lah, liơ ih khan wă ăn kơ sư dơ̆ng?’ 26Na 'bok pơtao khan kơ lu sư: ‘Inh khan kơ iĕm tơpă, bơngai bu jang pơnam đei tơmam lơ, Kră Yang mơnat rai ăn pơthim tăm. Bơngai bu alah, tơmam ưh kơ đei lơ, rai hiong tơmam đơ̆ng sư kơdih tăm. 27Gah lu bơngai mă ayăt kơ inh, ưh kơ wă kơ inh pơm pơtao pơgơ̆r lu sư, iĕm dui anhăk lu sư tơ âu, pơlôch lu sư 'bơ̆t anăp inh.’ ”
Yêsu mơ̆t tơ Pơlei Jêrusalem
28Yêsu bơtho tơdrong noh đang boih na Sư năm tơ Pơlei Jêrusalem, Sư yak hơdrol kơ lu đe tơpôl noh. 29Lăp Yêsu wă jê̆ truh Pơlei Betphagê păng Pơlei Bethani, 'bơ̆t kông Ôliwơ, Yêsu đei wơh 'bar 'nu bơngai pơhrăm păng Sư khan: 30“Biĕm mơ̆t tơ pơlei tơpăt anăp biĕm to. Lăp biĕm truh tơ noh biĕm 'bôh minh pôm aseh iĕ dăm đe chô̆ 'bơ̆t noh. Aseh noh ưh tam đei bu hao ôh đơ̆ng sơ̆. Biĕm yaih dui anhăk aseh iĕ noh tơ âu. 31Dah đe khan: ‘Biĕm iŏk pơm kiơ?’ Biĕm khan kơ sư thoi âu: ‘Kră Yang wă yua 'biơ̆.’ ”
32Lăp bre sư năm truh tơ noh 'bôh 'blep tơpă thoi lĕ Yêsu khan hei. 33Lăp bre sư yaih iŏk aseh iĕ noh, na tơ'ngla aseh iĕ noh jet bre sư: “Biĕm iŏk pơm kiơ kơ aseh iĕ noh?”
34Bre sư khan: “Kră Yang wă yua 'biơ̆.”
35Na bre sư dui anhăk aseh iĕ noh tơ Yêsu. Na lu bơngai pơhrăm păng Sư lơ̆k ao lu sư kơdih tơ rŏng aseh iĕ, na atŏk Yêsu hao aseh iĕ. 36Kơplah Yêsu oei hao aseh iĕ nơnăm rok trong na đei lơ bơngai lơ̆k ao lu sư kơdih rok trong wă kơ mă rŏ. 37Kơplah lu sư jur đơ̆ng kông Ôliwơ, na đei lơlap lơlang lu bơngai lui lu sư chhôk na pơma re 'bơ̆r wă ư-ang kơ 'Bok Kei-Dei, yua kơ lu sư băt Yêsu Kon 'Bok Kei-Dei gơh pơm lơ tơdrong mơsêh mơyang tơpă. Na lu sư khan:
38“Bơnê kơ Pơtao bơ̆n truh tơ âu yua kơ Kră Yang wơh wă ăn kơ bơ̆n hiôk-hian.
Bơnê kơ 'Bok Kei-Dei kơpal plĕnh ti.”
39Na đei lu khŭl Pharisi hơdai năm lăng tơ noh. Lu sư khan kơ Yêsu: “Ơ 'Bok Thây, khă lu bơngai lui kơ Ih 'nĕ pă pơma ư-ang thoi noh.”
40Na Yêsu khan tơwih kơ lu sư: “Inh khan kơ iĕm tơpă, dah lu sư thĕng, lei lu tơmo kư̆m gô pơma ư-ang mơ̆n ưh kơ lê̆ ôh.”
Yêsu nhơ̆m hmoi mơnat kơ Pơlei Jêrusalem
41Yêsu năm wă jê̆ truh tơ Pơlei Jêrusalem. Lăp Sư tơmang 'bôh Pơlei Jêrusalem Sư nhơ̆m hmoi mơnat kơ Pơlei Jêrusalem. 42Sư nhơ̆m hmoi rah pơma rah thoi âu: “Ơ Pơlei Jêrusalem, năr âu dah iĕm băt kơ Inh Bơngai wă pơklaih iĕm, lei iĕm hiôk dêh, ưh kơ đei tơdrong gleh truh kơ iĕm năr noh kơnh ôh. Mă-lei iĕm ưh kơ hlôh tơdrong Inh wă pơklaih iĕm dang ei.
43“Ning-mônh lu bơngai ayăt kơ iĕm gô wang tăp dăr kơ pơlei iĕm. Lu sư gô pơgăn trong iĕm păng ưh kơ ăn iĕm jăk achăng pơlei iĕm ôh.
44“Lu sư gô blah pơchah pơlei pơla iĕm păng pơlôch lu kon pơlei pơla iĕm. Lu sư blah pơchah pơlei pơla iĕm ưh pă đei tơmo ayơ mă tơklep băl dơ̆ng, yua kơ iĕm ưh kơ băt 'Bok Kei-Dei wă pơklaih iĕm dang ei.”
Yêsu pơpuh đe mơdro lăm hnam akŭm 'Bok Kei-Dei tơm
45Yêsu mơ̆t tơ hnam akŭm 'Bok Kei-Dei tơm na Sư pơpuh đe mơdro lăm noh. 46Yêsu khan kơ lu sư thoi âu: “Đe chih roi nơ̆r 'Bok Kei-Dei lăm sơ̆p hla bơar sư thoi âu: ‘Hnam akŭm kơkuh kơ Inh, wă lê̆ kơ đe krao khan kơ Inh lăm noh.’ Mă-lei lu iĕm mơdro lăm noh, pơgŏ athei đe răt kăp jên, iĕm pơm kơ hnam akŭm âu thoi lĕ kơ anih hnam đe tơtông klĕ.”
47Yêsu bơtho rim năr tơ lăm hnam akŭm 'Bok Kei-Dei tơm. Na lu 'bok soi tih, lu thây bơtho tơdrong juăt păng lu đe kră pơlei wă rôp pơlôch Sư ră.
48Mă-lei lu sư ưh kơ gơh rôp thoi yơ, yua kơ lu sư hli kơ kon bơngai 'bĕnh-'bang hưch hanh wă mơ̆ng Sư bơtho tơpă.
Bu ăn kơ Yêsu pơpuh đe mơdro đơ̆ng hnam akŭm?
હાલમાં પસંદ કરેલ:
Luk 19: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
