Luk 17
17
1Yêsu khan kơ lu bơngai pơhrăm păng Sư thoi âu: “Tơpă yơh iĕm gô đei tơdrong đe pơhlŭ iĕm wă kơ iĕm pơm yoch, mă-lei lu bơngai mă pơhlŭ iĕm noh sư gô pơmat-tat. 2Bơngai bu dang ei juăt pơhlŭ lu bơngai 'nao lui pơm yoch, pơtih gia đe dah chô̆ ako sư tơ tơpăl tơmo sơ̆, hơtat lê̆ sư tơ klŏng đak dơsĭ, lei sư hiôk 'biơ̆, yua kơ sư huay kơ gơh pơhlŭ đe pơm yoch dang ei. 3Na iĕm athei kơchăng. Dah 'nhŏng oh iĕm pơm yoch kơ iĕm, lei iĕm athei bơtho khan kơ sư. Dah sư lung iĕm mơnat tơdrong yoch sư, lei iĕm 'nĕ pă jô̆ yo kơ sư. 4Dah sư pơm yoch kơ iĕm tơpơh 'măng lăm minh năr, na rim 'măng sư yoch kơ iĕm sư kư̆m năm hơlêm iĕm, lei iĕm 'nĕ pă jô̆ yo kơ sư dơ̆ng.”
Gah tơdrong lui
5Lu jơ̆ng 'bang Kră Yang Yêsu khan kơ Sư: “Apinh Ih tơgŭm nhôn lui kơ 'Bok Kei-Dei kơjăp.”
6Na Kră Yang Yêsu khan kơ lu sư: “Dah tơdrong lui iĕm wơ̆ thoi găr sơ'bei, lei iĕm gơh sơkat kơ 'long tơpang âu khan: ‘Tơgloh pơtăm kơ e kơdih tơ đak dơsĭ to,’ na sư kư̆m chu ih mơ̆n.
7“Pơtih gia iĕm đei đĭch jang choh mir dah wei triu iĕm. Lăp sư wih đơ̆ng mir na iĕm hăm lah khan kơ sư: ‘Năm jah sa mơh e wă?’ 8Yŏng ưh kơ lah thoi noh ôh. Mă-lei yŏng juăt khan kơ đĭch sư thoi âu: ‘E hơmet kơ inh tơmam sa 'mơ̆i, đơ̆ng noh na e pôk kơ inh. Gô inh sa đang 'mơ̆i na e gơh sa.’ 9Lu đĭch sư jang kiơ̆ kơ tơdrong yŏng sư pơkă ră mă-lei yŏng sư ưh kơ lah kơ bơnê kơ sư ôh. 10Gah tơdrong iĕm kư̆m thoi noh mơ̆n. Lăp iĕm pơm tôm tơdrong 'Bok Kei-Dei pơkă, iĕm athei khan kơ Sư thoi âu đĕch: ‘Nhôn đĭch đam Ih ưh kơ hơnhŏ kơ Ih bơnê ôh, nhôn kư̆ jang kiơ̆ kơ Ih pơkă đĕch.’ ”
Mơjĭt 'nu bơngai 'bơm chin
11Kơplah Yêsu oei năm tơ Pơlei Jêrusalem, Sư năm sơlam dêh char Samri păng dêh char Galilê. 12Lăp Yêsu mơ̆t tơ minh pôm pơlei ei, đei mơjĭt 'nu bơngai jĭ chin năm tơ Sư. Lu sư oei ataih 'biơ̆ kơ Yêsu, 13na lu sư krao 'bơ̆r re thoi âu: “Ơ 'Bok Thây ơi, Ih mơnat kơ nhôn 'biơ̆ bĕ.”
14Yêsu 'bôh lu đe ei na Sư khan thoi âu: “Iĕm năm tơ'bôh akâu iĕm tơ 'bok soi bĕ, wă kơ sư lăng iĕm tam klaih kơ jĭ.” Đơ̆ng noh na lu sư năm. Kơplah lu sư oei năm rok trong, na jĭ lu sư klaih hloi. 15Đei minh 'nu lăm lu sư băt kơ tơdrong jĭ sư klaih boih, na sư wih dơ̆ng tơ Yêsu păng pơma re khan: “Bơnê kơ Kră Yang 'Bok Kei-Dei.”
16Sư kŭp kơ̆l bon 'bơ̆t jơ̆ng Yêsu păng khan: “Bơnê kơ Ih.” Bơngai noh đơ̆ng dêh char Samri, ưh kơ sĭ bơngai Juđê ôh. 17Yêsu pơma kơ đe kiơ̆ ei păng bơngai mă tơkan tơ Sư ei thoi âu: “Ưh kơ klaih tôm mơjĭt 'nu ôh hă? Bĭ tơsĭn 'nu noh hei tơ yơ? 18Kơlih kơ kiơ lu sư ưh kơ wă năm tơ âu na bơnê kơ 'Bok Kei-Dei 'biơ̆? Lăp minh 'nu bơngai âu, tơmoi tăm, mă-lei sư đei nơ̆r bơnê kơ 'Bok Kei-Dei.”
19Klaih kơ noh Yêsu khan kơ sư: “Iung brŏk kơ ih bĕ. Tơdrong jĭ ih, yua kơ ih lui, na klaih.”
Inh Kon Bơngai gô jur dơ̆ng
20Lu bơngai Pharisi jet Yêsu: “Layơ 'Bok Kei-Dei wă pơgơ̆r teh đak?” Yêsu tơl: “'Bok Kei-Dei pơgơ̆r bơ̆n ưh kơ 'bôh păng măt ôh. 21Ưh kơ đei bu gơh khan: 'Noh, 'Bok Kei-Dei pơgơ̆r boih, yua kơ 'Bok Kei-Dei pơgơ̆r lăm jơhngơ̆m bơ̆n.”
22Klaih kơ noh Yêsu khan kơ lu bơngai pơhrăm păng Sư: “Ning-mônh iĕm chang gô Inh Kon Bơngai jur dơ̆ng păng khan: ‘Ô kuă kơ kiơ Yêsu jah jur dang ei lah?’ Mă-lei kơplah ei kơnh iĕm tam mă 'bôh Inh jur ôh. 23Na đe gô khan kơ iĕm: 'Bok Krist tơ âu boih. 'Bok Krist tơ to boih. Iĕm 'nĕ kiơ̆ sư năm lăng hŏ, 24yua kơ năr ei kơnh đĭ-đăng kon bơngai gô 'bôh Inh jur thoi lĕ kơmlat, chêr 'blêt 'bôh jơ̆p-jang kơ teh đak, mă đơ̆ng hơlĕch truh tơ bơmơ̆t.
25“Mă-lei blŭng-a dang ei Inh gô đei tơdrong anat tơpă 'mơ̆i yua kơ lu bơngai jơhnơr ahrei ưh kơ wă kơ Inh.
26“Na Inh Kon Bơngai gô jur ning-mônh thoi lĕ đak lip kơplah jơhnơr Nôê sơ̆. 27Hơdrol kơ đak lip sơ̆ kon bơngai kư̆m oei pơm sa et pơrŏ, thoi et pơkong, et sa tơdrong noh nai dang lĕ kơ năr oei hiôk-hian thoi krô hmă; truh tơ Nôê mơ̆t lăm duk, lu sư kư̆m ưh tam mă băt 'mơ̆i, na truh hĭ kơ đak lip, lu sư lôch đĭ. 28Kơplah jơhnơr Lot sơ̆ kư̆m thoi noh mơ̆n. Kon bơngai kư̆m oei pơm et sa pơrŏ, kư̆m oei chă pơm mơdro sa, chă pơtăm bơ̆n pro amrĕ, pơm bơ̆n hnam. 29Na lăp năr 'bok Lot lĕch jăk đơ̆ng Pơlei Sôđôm boih, na 'Bok Kei-Dei tơjruh hloi ŭnh đơ̆ng plĕnh soh Pơlei Sôđôm, lu sư lôch đĭ. 30Năr Inh Kon Bơngai jur dơ̆ng ning-mônh, kư̆m lei-lăi thoi noh mơ̆n. Kon bơngai ưh kơ ê Inh wă jur, na 'bơ̆t ei boih Inh jur hloi.
31“Kơplah ei kơnh bơngai oei ngôi tơ 'ngoaih hnam, sư 'nĕ pă mơ̆t iŏk tơmam sư lăm hnam. Bơngai bu oei jang tơ mir, 'nĕ pă brŏk tơ hnam iŏk tơmam sư tơ hnam. 32Iĕm hăm 'blŏk kơ akăn Lot lôch kơ kiơ sơ̆? 33Bơngai bu ưh kơ chu lôch yua kơ tơdrong Inh, bơngai noh lôch hoh hoh đĕch. Bơngai bu chu lôch yua kơ tơdrong Inh, sư 'noh gô arih ling-lang. 34Kơplah măng ei kơnh đei 'bar 'nu bơngai tơdăm 'bĭch hơdai, na linh jang 'lơ̆ng gô iŏk anhăk minh 'nu mă lui, minh 'nu ưh kơ lui lê̆ 'bơ̆t noh. 35Đei 'bar 'nu bơngai drŏ-kăn peh 'ba, linh jang 'lơ̆ng gô iŏk minh 'nu mă lui, minh 'nu ưh kơ lui lê̆ 'bơ̆t noh.
36“'Bar 'nu bơngai drŏ-nglo oei jang hơdai tơ mir, linh jang 'lơ̆ng gô iŏk minh 'nu mă lui, minh 'nu ưh kơ lui lê̆ 'bơ̆t noh.”
37Na lu bơngai pơhrăm păng Yêsu jet Sư: “Ơ 'Bok, tơdrong noh tơ yơ?”
Yêsu khan: “Bơngai lôch tơ yơ, pă jor grơ̆ gô jur sa tơ ei.”
Tơdrong yă adro apinh 'bơ'bel 'bok sek tơlang tơdŏng sư
હાલમાં પસંદ કરેલ:
Luk 17: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
