Luk 10
10
1Đơ̆ng noh Kră Yang Yêsu rơih tơpơh-jĭt 'nu bơngai, na wơh lu sư chă năm bơtho rim pơlei 'bơ'bar 'nu hơdrol kơ Yêsu wă năm. 2Yêsu pơma pơtih gia kơ lu sư gah tơdrong đei lơ bơngai tam mă lui đei hui bơngai năm bơtho lu sư: “'Ba lơ ră mă-lei hui bơngai năm kĕch ăn. Thoi noh na bơ̆n athei adrin krao khan apinh tơ'ngla tơm mir wă wơh lơ bơngai năm tơgŭm kĕch. 3Dang ei Inh wơh iĕm năm chă bơtho đe, na iĕm athei kơchăng hŏ, yua kơ dang lĕ wơh kon triu năm tơ kŏ-so. 4Iĕm 'nĕ kơ chĕp ba kơdŭng tah jên dah kơdŭng bĕng păng 'nĕ kơ chĕp hiă chơkhŏ săng-đal. Iĕm 'nĕ kơ hiơ̆ kơ pơma dơnuh kơ đe rok trong. 5Lăp wă mơ̆t tơ hnam đe, iĕm khan: ‘'Bok Kei-Dei ăn kơ hnam iĕm chơt hiôk.’ 6Dah bơngai lăm hnam ei bơngai 'lơ̆ng, lei 'Bok Kei-Dei gô ăn kơ sư chơt hiôk tơpă. Dah sư ưh kơ bơngai 'lơ̆ng, lei 'Bok Kei-Dei ưh kơ ăn kơ sư chơt hiôk ôh. 7Na iĕm kư̆ kơ oei tơ hnam noh khŏm khŏm. Iĕm lê̆ kơ sư 'me iĕm, yua kơ iĕm bơtho sư tơdrong 'Bok Kei-Dei, kư̆m dang lĕ jang tơgŭm sư mơ̆n. Iĕm 'nĕ chă oei jơ̆p jơ̆p kơ hnam đe. 8Pơlei ayơ sơng iŏk iĕm, lu sư 'me iĕm tơmam sa kiơ kiơ, iĕm kư̆ kơ sa đĕch, iĕm 'nĕ pơrơih. 9Na iĕm pơklaih lu bơngai jĭ jăn tơ noh păng tơbăt kơ lu sư khan: ‘'Bok Kei-Dei wă pơgơ̆r lu iĕm boih.’ 10Pơlei ayơ ưh kơ wă sơng iŏk iĕm, iĕm năm tơ cham pơlei noh na khan: 11‘'Bruih pơlei iĕm mă đom tơ jơ̆ng nhôn, nhôn sơpuih đĭ boih. 'Noh wă tơbăt kơ iĕm 'Bok Kei-Dei wă phak iĕm. Nhôn wă tơbăt kơ iĕm tơdrong 'Bok Kei-Dei wă pơgơ̆r iĕm ră mă-lei iĕm pơm ưh kơ chu.’ 12Inh khan kơ iĕm tơpă, truh năr 'Bok Kei-Dei wă sek tơlang ning-mônh, Sư gô phak kon pơlei Sôđôm hơiơch 'biơ̆ kơ pơlei mă ưh kơ sơng iŏk iĕm mă khan Pơlei Sôđôm pơm kơnê̆ dêh ră sơ̆.”
Yêsu lach kơ kon pơlei pơla ưh kơ wă lui
13Yêsu khan dơ̆ng thoi âu: “Ơ Pơlei Chơrasin, iĕm gô đei tơdrong pơmat tơpă ning-mônh. Ơ Pơlei 'Betsaiđa, iĕm kư̆m đei tơdrong pơmat tơpă mơ̆n ning-mônh. Dah Inh pơm lơ tơdrong mơsêh mơyang tơ Pơlei Tirơ hăm Pơlei Siđôn dang Inh pơm tơ pơlei iĕm ki, lei 'bar tŏ pơlei noh tơbral kơdih tơdrong yoch 'bônh đĕch, lu sư hrŭk hloi ao 'bi păng iŏk hloi tơnuh ŭnh pik tơ akâu lu sư wă kơ đe băt kơ lu sư sơ'ngon kơ tơdrong yoch lu sư tơpă. Mă-lei lu iĕm âu phara dêh, iĕm ưh kơ băt tơbral thoi noh. 14Truh năr 'Bok Kei-Dei sek tơlang ning-mônh, Sư gô phak Pơlei Tirơ păng Pơlei Siđôn hơiơch 'biơ̆ kơ pơlei iĕm mă khan 'bar tŏ pơlei noh pơlei dêh tơmoi. 15Bĭ iĕm ơ Pơlei Kapernum, iĕm tơchĕng iĕm tih dang yơ, iĕm tih atŏ truh tơ plĕnh ti hă? Mă-lei 'Bok Kei-Dei wă tơhuŏng lê̆ iĕm truh tơ dơnâu ŭnh sŭng.”
16Yêsu khan dơ̆ng kơ lu bơngai pơhrăm păng Sư: “Bơngai bu mơ̆ng iĕm, sư 'noh dang mơ̆ng Inh mơ̆n. Bơngai bu ưh kơ wă mơ̆ng iĕm, sư 'noh kư̆m ưh kơ wă mơ̆ng Inh mơ̆n. Bơngai bu ưh kơ wă mơ̆ng Inh, sư 'noh kư̆m dang ưh kơ wă mơ̆ng 'Bok Kei-Dei mă wơh Inh mơ̆n.”
Lu tơpơh-jĭt 'nu noh năm bơtho đe na wih tơ Yêsu dơ̆ng
17Lu tơpơh-jĭt 'nu noh năm chă bơtho đe păng chă pơklaih lu bơngai jĭ jăn. Klaih kơ noh lu sư wih tơ Yêsu. Lu sư khan: “Ơ 'Bok, nhôn gơnang kơ anăn Ih, mă lu yang kơnê̆ kư̆m chu kơ nhôn mơ̆n.”
18Na Yêsu khan kơ lu sư: “Trŏ boih, Inh 'bôh yang Satan, yŏng yang kơnê̆, huŏng đơ̆ng plĕnh hrĕnh dang kơmlat. 19Inh ăn boih kơ iĕm gơh juă 'bih păng aguăt. Inh kư̆m ăn dôm tơdrong yang kơnê̆ thuơ kơ iĕm ngăl, ưh pă đei bu pơ̆n pơm kơ iĕm boih. 20Iĕm 'nĕ chhôk kơ yang kơnê̆ chu iĕm, mă-lei iĕm athei chhôk kơ 'Bok Kei-Dei chih anăn iĕm tơ Pơlei 'lơ̆ng.”
Yêsu hiôk na krao khan kơ 'Bok Kei-Dei
21Kơplah noh Yang Bơhngol 'Lơ̆ng ăn kơ Yêsu hiôk na Sư krao khan: “Ơ 'Bă, Ih boih Kră Yang plĕnh teh. Inh bơnê kơ Ih yua kơ dôm tơdrong Inh bơtho, Ih tơbăt kơ lu bơngai âu mă băt gơnang kơ Ih thoi lu hơ'lơ̆p băt gơnang kơ mĕ 'bă păng Ih ưh kơ tơhlôh kơ lu bơngai mă gơnang kơ akâu sư kơdih hŏk hơgei. Ơ 'Bă, Ih pơm thoi noh trŏ tơpă, kiơ̆ thoi Ih lăp đon.
22“'Bă Inh jao ăn kơ Inh tôm tĕch tơdrong, minh 'nu 'Bă Inh đĕch băt kơ Inh păng minh 'nu Inh đĕch băt kơ Sư. Na dôm lu bơngai mă Inh tơbăt ăn kơ lu sư, băt kơ 'Bă.”
23Đơ̆ng noh na Yêsu hue tơ lu bơngai pơhrăm păng Sư na Yêsu khan kơdrô̆ lu sư: “Dôm lu bơngai 'bôh tôm tơdrong iĕm 'bôh Inh pơm ahrei, lu sư hiôk tơpă. 24Inh khan kơ iĕm tơpă, đei lơ bơngai pơtruh nơ̆r 'Bok Kei-Dei păng lu đe 'bok pơtao sơ̆ 'maih 'bôh tơpă dôm tơdrong mă iĕm 'bôh dang ei ră, mă-lei lu sư ưh kơ đei 'bôh ôh. Lu sư 'maih mơ̆ng dôm tơdrong iĕm kơtơ̆ng dang ei ră, mă-lei lu sư ưh kơ đei kơtơ̆ng ôh.”
Bơngai Samri mơnat kơ bơngai Juđê
25Đei minh 'nu 'bok thây bơtho tơdrong juăt đe Juđê iung jet pơlong lăng Yêsu thoi âu: “Ơ 'Bok Thây, inh pơm thoi yơ wă kơ arih ling-lang?”
26Yêsu khan kơ sư: “Bĭ đe chih lăm sơ̆p hla bơar tơdrong juăt 'Bok Kei-Dei thoi yơ? Ih hlôh hla bơar noh thoi yơ?”
27'Bok thây ei khan: “Lăm sơ̆p hla bơar tơdrong juăt khan: ‘Bơ̆n athei 'mêm kơ 'Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng. Păng bơ̆n athei 'mêm kơ bôl buăl thoi bơ̆n 'mêm akâu bơ̆n kơdih.’ ”
28Yêsu khan kơ sư: “Tơdrong ih tơl noh trŏ tơpă. Ih pơm kiơ̆ hloi bĕ na ih gô arih ling-lang.”
29Mă-lei 'bok thây noh sư ưh kơ 'mêm kơ đĭ-đăng khŭl bơngai na sư apinh Yêsu dơ̆ng: “Lu đe bu bôl buăl inh?”
30Yêsu khan kơ sư pơtih gia thoi âu: “Đei minh 'nu bơngai Juđê yak đơ̆ng Pơlei Jêrusalem wă năm tơ Pơlei Jêrikô. Kơplah sư năm rok trong sư tơ'bơ̆p lu bơngai răp tơgar. Na lu bơngai răp tơgar ei tơgar iŏk jên tơmam hơbĕn ao sư đĭ păng teh sư rơka jĭ jơ̆p-jang kơ akâu. Klaih kơ noh lu bơngai noh kơdâu weh achăng kơdrô̆ sư lôch mol 'bơ̆t noh. 31Đơ̆ng rŏng 'biơ̆ kơ noh đei minh 'nu 'bok soi Juđê năm rok trong noh 'bôh sư ră, mă-lei sư năm yoh đĕch. 32Đơ̆ng rŏng kơ noh dơ̆ng đei minh 'nu bơngai Juđê khŭl đe Lêwi mă jang tơ hnam akŭm 'Bok Kei-Dei tơm, sư kư̆m năm rok trong noh mơ̆n 'bôh sư ră, sư kư̆m năm yoh đĕch. 33Tơpo hơtuch đei minh 'nu bơngai dêh đe Samri kư̆m năm truh tơ noh. Sư 'bôh bơngai noh na sư đei đon 'brơ̆k mơnat. 34Sư thar pik đak pơgang 'bơ̆t rơka jĭ păng pơ̆n hloi jĭ noh, klaih kơ noh atŏk sư kơpal kơdŭ aseh sư kơdih, chơ ba sư tơ hnam tơmoi tep wă tơgŭm wei-lăng sư tơ noh. 35Truh pơgê dơning sư ăn kơ tơ'ngla hnam tơmoi noh 'bar hlak jên hu păng pơkă khan: ‘Ih wei-lăng bơngai jĭ âu hŏ. Dah jên âu ưh kơ mah lei gô inh wih tơ âu dơning dơmônh inh gô ăn pơthim kơ ih dơ̆ng mă tôm.’ ” 36Na Yêsu jet 'bok thây noh: “Lăm pêng 'nu bơngai noh, ih lăng bơngai ayơ bôl buăl păng bơngai mă jĭ kơ lu bơngai tơtông teh noh?”
37Na 'bok thây ei khan: “Bơngai mă băt mơnat kơ bơngai jĭ noh yơh.”
Yêsu khan kơ sư dơ̆ng: “Ih băt thoi noh boih na ih pơm kiơ̆ hloi bĕ.”
Yêsu năm hơpong kơ bre Mathê hăm Mari
38Kơplah đe Yêsu oei rok trong wă năm tơ Pơlei Jêrusalem, lu sư drong mơ̆t tơ minh pôm pơlei ei, na minh 'nu drŏ-kăn anăn sư Mathê sơng iŏk Yêsu mơ̆t tơ hnam sư. 39Mathê đei minh 'nu oh drŏ-kăn anăn sư Mari. Na Mari tơoei 'bơ̆t jơ̆ng Yêsu mơ̆ng Sư bơtho. 40Mathê ưh kơ hiôk ôh yua kơ sư đei tơdrong jang lơ, na sư năm tơ Yêsu khan: “Ơ 'Bok, oh inh tŭk inh jang kơdrô̆ inh gleh dêh, lơliơ ih ưh kơ mơnat kơ inh ôh hă? Athei sư iung tơgŭm inh 'biơ̆.”
41Na Kră Yang Yêsu khan thoi âu: “Ơ Mathê, ih mah tơchĕng kiơ kơ dôm tơdrong jang noh dêh? 42Đei minh tơdrong mơ̆ng nơ̆r 'Bok Kei-Dei đĕch kăl. Mari sư wă kơ mơ̆ng tơdrong 'Bok Kei-Dei na Inh ưh kơ wă achăng sư ôh.”
Yêsu bơtho gah tơdrong krao khan
હાલમાં પસંદ કરેલ:
Luk 10: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
