Yo 6
6
1Đunh 'biơ̆ đơ̆ng ei, Yêsu tŏk pah to đak dơsĭ Galilê mă đe kư̆m anăn dơsĭ Tiberia. 2Đei lơ bơngai tơpôl lơ kiơ̆ Sư kơlih kơ lu sư 'bôh tơdrong mơsêh mơyang Yêsu ming pơklaih lu bơngai jĭ jăn. 3Yêsu tŏk tơ kông oei hơdai lu bơngai pơhrăm păng Sư tơ kông noh. 4Hơtai ei wă jê̆ truh năr đe giĕng lu Juđê đe anăn Giĕng Năm Brih. 5Lăp Yêsu ngơk lăng na Sư tơmang 'bôh bơngai tơpôl lơ luh năm tơ Sư. Na Yêsu khan kơ Philip: “Bơ̆n răt tơmam sa đơ̆ng yơ wă kơ mah 'me bơngai dôm noh?”
6'Noh Yêsu jet pơlong Philip đĕch, yua kơ Yêsu băt kơdih boih thoi yơ Sư gô pơm kơnh. 7Philip khan: “Mă 'bar-hrĕng hlak jên hu kư̆m tam mah 'mơ̆i răt tơmam sa kơ lu sư, rim 'nu sa pơgia đĕch kư̆m ưh tam mah mơ̆n.”
8Minh 'nu bơngai pơhrăm păng Yêsu nai, anăn sư Andrê, sư oh Pêtrôs, sư khan kơ Yêsu: 9“Đei minh 'nu bơngai 'lơ̆p tơ âu mơ̆n, sư đei pơđăm tŏ 'bĕng mi hăm 'bar tŏ ka na liơ mah tôm kơ bơngai lơ?”
10Yêsu khan kơ lu bơngai pơhrăm păng Sư, athei lu bơngai tơpôl lơ ei tơoei kơpal 'nhĕt. Tơ ei 'nhĕt 'lơ̆p. Na đĭ-đăng bơngai tơpôl lơ ei tơoei. Lu bơngai ei jô̆ gah drŏ-nglo đĕch đei pơđăm-rơbâu 'nu bơngai. 11Klaih kơ noh Yêsu iŏk pơđăm tŏ 'bĕng mi ei krao khan bơnê kơ 'Bok Kei-Dei hơdrol, đơ̆ng noh asong kơ lu bơngai tơpôl oei lăm ei. Ka sư kư̆m asong lei-lăi thoi noh mơ̆n. Lu đe ei iŏk sa gô mơ̆ng kơ lu sư wă sa. 12Lăp lu bôl buăl sŏng sa phĭ boih Yêsu khan kơ lu bơngai pơhrăm păng Sư, khan: “Năm bĕ iĕm, dônh tah 'bĕng mi păng ka mă rơkah boih hŏ, kuă kơ hŭt lê̆ 'mêm.”
13Na lu sư dônh tah 'bĕnh mơjĭt-'bar tŏ bai 'bĕng mi mă rơkah đơ̆ng pơđăm tŏ 'bĕng mi đơ̆ng lu sư sŏng sa.
14Thoi noh na dôm lu bơngai tơpôl ei 'bôh Yêsu pơm tơdrong mơsêh mơyang Sư thoi noh na lu sư khan: “'Bok âu boih 'Bok mă bơ̆n chang gô đơ̆ng sơ̆ khan gô truh tơ ala teh âu wă pơtruh nơ̆r 'Bok Kei-Dei.”
15Yêsu băt kơ lu đe ei wă rôp pơgŏ Sư athei pơm Pơtao lu sư. Na Sư kơdâu ôn kơdrô̆ Sư tơ kông.
Yêsu yak kơpal đak
16Truh 'năr kơsơ̆ boih, lu bơngai pơhrăm păng Sư jur tơ jih đak dơsĭ. 17Lu sư tŏk thŏng-nan wă năm tơ Pơlei Kapernum. Kơplah ei 'năr mơ̆t boih măng mu, mă-lei Yêsu tam mă jur tơ lu sư ôh na lu sư wơ̆r wă tŏk pah to. 18Klaih kơ noh đei kial hơbŭt đak poh-yă tih tơpă. 19Lu sư wơ̆r thŏng-nan ataih dang pơđăm tơdrâu kơsô̆ boih na lu sư 'bôh hloi Yêsu yak kơpal đak dơsĭ năm jê̆ thŏng-nan lu sư. Lu sư hli krê tơpă. 20Yêsu khan hloi kơ lu sư: “Iĕm 'nĕ pă hli, Inh boih lah.”
21Lu sư kơtơ̆ng thoi noh na lu sư hiôk chơt na atŏk Sư kơpal thŏng-nan. Na thŏng-nan lu sư truh hloi tơ jih dơsĭ trŏ hloi kơ anih lu sư wă năm hei.
Kon pơlei pơla chă Yêsu
22Năr đơ̆ng rŏng dơning lu bơngai tơpôl oei pah to cheng đak dơsĭ, lu sư tam mă tŏk pah âu dơsĭ. Na năr brei lu sư 'bôh lăp minh pôm thŏng-nan đĕch tơ ei păng lu sư kư̆m băt kơ Yêsu ưh kơ tŏk thŏng-nan ei hơdai păng lu bơngai pơhrăm păng Sư ôh. Bơngai pơhrăm năm kơdrô̆ lu sư đĕch. 23Mă-lei năr đơ̆ng rŏng đei lơ thŏng-nan nai đơ̆ng Pơlei Tiberia năm truh tơ anih Kră Yang Yêsu krao khan bơnê kơ 'Bok Kei-Dei na asong kơ lu bơngai tơpôl tơmam sa. 24Lu sư ưh kơ băt Yêsu tơ yơ păng ưh kơ 'bôh lu bơngai pơhrăm păng Sư tăm. Na lu bơngai tơpôl ei tŏk thŏng-nan plơ̆ng ei wơ̆r năm tơpăt tơ Pơlei Kapernum wă chă Yêsu.
Yêsu jơ̆ tơmam sa mă ăn kon bơngai arih
25Lu sư tŏk hloh pah âu dơsĭ boih, na lu sư 'bôh hloi Yêsu na jet hloi: “Ơ 'Bok Thây, Ih năm tơ âu layơ?”
26Yêsu khan kơ lu sư: “Inh khan tơpăt kơ iĕm, iĕm chă Inh ưh kơ sĭ yua kơ iĕm 'bôh Inh pơm tơdrong mơsêh mơyang wă tơbăt kơ iĕm Inh đơ̆ng 'Bok Kei-Dei ôh. Iĕm chă Inh yua kơ iĕm sŏng sa phĭ mah đơ̆ng Inh ăn kơ iĕm tơmam sa. 27Iĕm 'nĕ chă tơmam sa mă jing ôm hach. Iĕm athei adrin chă tơmam sa sot, săt 'lơ̆ng ling-lang, ưh kơ đei layơ ôm hach, wă 'me iĕm arih ling-lang. Tơmam sa ei, Inh mă jur jing kon bơngai, Inh asong ăn kơ lu iĕm. 'Bă Inh 'Bok Kei-Dei pơjao ăn kơ Inh thoi noh păng Sư kư̆m tơbăt ăn kơ kon bơngai tơdrong noh ră mơ̆n.”
28Lu sư khan kơ Yêsu: “Lei nhôn pơm thoi yơ wă kơ 'Bok Kei-Dei lăp đon?”
29Yêsu khan kơ lu sư: “'Bok Kei-Dei wă thoi âu: Sư wă kơ iĕm lui kơ Inh âu mă đơ̆ng Sư wơh.”
30Lu bơngai tơpôl ei khan: “Lei Ih pơm tơ'bôh kơ nhôn tơdrong mơsêh mơyang Ih bĕ, na nhôn lui kơ Ih. Ih wă pơm kơ nhôn tơdrong mơsêh mơyang kiơ? 31Môis pơm ăn kơ yă 'bok bơ̆n 'bĕng mana tơ char glă sơ̆, đŏk kiơ̆ thoi đei chih boih thoi âu: ‘Sư ăn kơ lu sư tơmam sa đơ̆ng plĕnh, wă 'me lu sư.’ ”
32Yêsu khan tơwih kơ lu sư: “Inh khan tơpăt wă kơ iĕm hlôh: Tơmam sa đơ̆ng plĕnh noh sơ̆ ưh kơ trŏ kơ Môis ôh ăn. 'Bă Inh ăn tơmam sa noh sơ̆. Păng 'Bă Inh ăn kơ iĕm tơmam sa, mă tơmam sa ei pha, tơmam sa ei kăl hloh tơpă gơh arih kon bơngai ling-lang, 33kơlih kơ tơmam sa đơ̆ng 'Bok Kei-Dei ei na gơh jur đơ̆ng plĕnh wă ăn kon bơngai jơ̆p kơ teh arih.”
34Lu sư khan kơ Yêsu: “Ơ 'Bok Thây, asong nhôn tơmam sa ei ling-lang bĕ.”
35Yêsu khan kơ lu sư: “Inh boih jing tơmam sa mă ăn kon bơngai arih ei. Na bơngai bu năm tơ Inh, bơngai 'noh ưh kơ layơ pơngot; bơngai bu lui kơ Inh, bơngai 'noh ưh kơ layơ rơhing. 36Kư̆m thoi Inh đei khan kơ iĕm boih: Iĕm 'bôh Inh boih mă-lei iĕm ưh kơ wă lui kơ Inh. 37Đĭ-đăng dôm lu bơngai mă 'Bă Inh ăn kơ Inh, lu sư gô lui kơ Inh. Păng bơngai bu lui kơ Inh, Inh ưh kơ tŭk sư ôh. 38Inh jur đơ̆ng plĕnh ưh kơ sĭ wă pơm kiơ̆ thoi Inh wă ôh. Inh jur đơ̆ng plĕnh wă pơm kiơ̆ thoi 'Bă Inh wă, kơlih Sư wơh Inh. 39'Bă Inh mă wơh Inh Sư wă kơ Inh huay kơ tơhiong dôm lu bơngai mă Sư pơjao ăn kơ Inh. Na truh năr tôch ning-mônh Inh gô tơiung arih lu sư. 40'Bă Inh wă thoi âu: Ăn dôm lu bơngai mă 'bôh Inh Kon Sư na lui hloi kơ Inh, lu sư gô đei arih ling-lang. Inh tơiung arih lu sư năr tôch ning-mônh.”
41Lu bơngai Juđê pơma tơduă lu sư bơbrơ̆k bơbrăk hil kơ Yêsu kơlih kơ Yêsu khan: “Inh boih tơmam sa mă jur đơ̆ng plĕnh.” 42Lu sư khan: “Bơngai âu ưh kơ trŏ Yêsu ôh hă, mă kon Yôsep? Bơ̆n băt kơ mĕ 'bă Sư. Mă-lei liơ Sư khan: ‘Inh jur đơ̆ng plĕnh?’ ”
43Yêsu khan kơ lu sư: “Iĕm 'nĕ bâu roi Inh thoi noh. 44'Bă Inh athei Inh truh tơ âu, na ưh kơ đei bu truh tơ Inh ôh, dah 'Bă Inh ưh kơ ăn lu sư truh. Bơngai bu mă 'Bă Inh ăn truh tơ Inh, lu bơngai 'noh đĕch truh tơ Inh, na Inh gô tơiung arih lu sư năr tôch ning-mônh. 45Lu 'bok pơtruh nơ̆r 'Bok Kei-Dei chih lăm sơ̆p hla bơar lu sư sơ̆ thoi âu: ‘'Bok Kei-Dei gô bơtho đĭ-đăng bơngai.’ Inh khan kơ iĕm, bơngai bu mơ̆ng nơ̆r 'Bă Inh păng lui kơ nơ̆r Sư bơtho, lu bơngai 'noh gô truh tơ Inh. 46Mă-lei ưh kơ đei bơngai bu 'bôh 'Bă Inh ôh. Pôm Inh Kon Sư mă jur đơ̆ng plĕnh đĕch 'bôh kơdih 'Bă.
47“Inh khan tơpăt tơpă kơ lu iĕm, bơngai bu lui kơ Inh sư gô arih ling-lang păng 'Bok Kei-Dei tơpă. 48Inh boih tơmam sa mă ăn kon bơngai gơh arih. 49Lu yă 'bok iĕm sa 'bĕng mana tơ char glă sơ̆, lu sư kư̆m lôch mơ̆n. 50Mă-lei âu tơmam sa jur đơ̆ng plĕnh mơ̆n. Dah bơngai bu sa tơmam sa âu sư huay kơ lôch hiong ôh. 51Inh boih tơmam sa arih kơ kon bơngai mă jur đơ̆ng plĕnh; bơngai bu sa tơmam sa âu sư gô arih ling-lang. Tơmam sa mă Inh ăn noh wă khan sĕch akar Inh ăn kơ kon bơngai arih.”
52Kơlih kơ Yêsu pơma thoi noh na lu bơngai Juđê pơma pơjah pơjăng dih băl. Lu sư khan: “Lơliơ bơngai âu gơh ăn kơ bơ̆n sĕch akar Sư wă kơ bơ̆n sa?”
53Yêsu khan kơ lu sư: “Inh khan kơ iĕm tơpăt, dah iĕm ưh kơ sa sĕch akar Inh Kon Bơngai păng ưh kơ huch sa pham Inh, lei iĕm ưh kơ đei arih ôh, iĕm dang lĕ lôch đĕch. 54Bơngai bu sa sĕch akar Inh păng huch sa pham Inh, bơngai 'noh Inh gô tơiung arih sư ning-mônh na sư gô đei arih ling-lang. 55Inh wă khan kơ iĕm dơ̆ng, sĕch akar Inh tơmam sa kon bơngai tơpă; pham Inh kư̆m đak nhă kon bơngai tơpă. 56Bơngai bu sa sĕch akar Inh păng huch sa pham Inh, bơngai 'noh sư oei păng Inh, Inh oei lăm sư. 57'Bă Inh mă arih ling-lang, Sư wơh Inh na Inh oei arih yua kơ 'Bă Inh. Thoi noh mơ̆n bơngai mă sa sĕch akar Inh, sư gô oei arih yua kơ Inh. 58Tơmam sa âu boih jur đơ̆ng plĕnh, ưh kơ thoi tơmam sa mana mă yă 'bok iĕm sa mă lôch sơ̆ ôh. Tơmam sa âu bơngai bu sa sư gô arih ling-lang.”
Đei lơ bơngai achăng lê̆ Yêsu
59Yêsu bơtho tơdrong âu tơ hnam akŭm Pơlei Kapernum. 60Lăm lu bơngai mă kiơ̆ Sư đơ̆ng sơ̆ đei lơ 'nu kơtơ̆ng tơdrong Sư bơtho noh na khan: “Tơdrong Sư bơtho noh anat tơpă. Bu gơh pơm thoi noh?”
61Mă-lei Yêsu băt kơdih lu bơngai ei pơma mơmơnh kơ tơdrong Sư bơtho hei. Na Yêsu khan kơ lu sư: “Inh bơtho thoi noh hei trŏ tơpă, mă-lei iĕm ơh hă? 62Tơdah iĕm ơh kơ tơdrong Inh bơtho 'noh hei, lei iĕm gô 'bôh Inh Kon Bơngai, na Inh wih tŏk tơ anih Inh mă oei kơpal plĕnh ti sơ̆, na iĕm tơchĕng liơ dơ̆ng đơ̆ng noh?
63“Dah jơhngơ̆m đon iĕm lui kiơ̆ tơdrong Inh, lei iĕm gô arih ling-lang. Dah iĕm kiơ̆ tơdrong akâu akar đĕch, lei ưh kơ đei yua kiơ ôh. Dôm nơ̆r Inh bơtho khan ăn kơ iĕm gah tơdrong sa sĕch akar Inh, Inh wă ră kơ jơhngơ̆m đon iĕm lui kiơ̆ kơ Inh na iĕm gô arih ling-lang; lei ră. 64Mă-lei lăm lu iĕm mơ'nah ưh kơ wă lui kơ Inh.” Yêsu băt hơdrol tơpă; lu bơngai ayơ mă ưh kơ wă lui kơ Sư, Sư băt mơ̆n; bơngai ayơ wă plơ̆ plĕch kơ Sư, Sư kư̆m băt mơ̆n. 65Yêsu wih khan kơ lu sư dơ̆ng: “Iĕm ưh kơ lui kơ Inh, noh kư̆m thoi Inh khan kơ lu iĕm hei: Ưh kơ đei bu gơh truh tơ Inh, dah 'Bă Inh ưh kơ ăn.”
66Đơ̆ng năr noh boih lơ bơngai achăng lê̆ Yêsu ưh pă kiơ̆ Sư dơ̆ng.
67Na Yêsu jet mơjĭt-'bar 'nu bơngai pơhrăm păng Sư: “Bĭ lu iĕm hăm wă achăng lê̆ Inh?”
68Pêtrôs khan kơ Sư: “Ơ 'Bok, nhôn wă kiơ̆ bu dơ̆ng lĕ? Tơdrong Ih bơtho khan wă ăn kơ nhôn gô arih ling-lang tơpă. 69Nhôn lui boih kơ Ih. Nhôn băt kơ Ih Kon 'Bok Kei-Dei mă 'lơ̆ng tơpăt.”
70Yêsu khan kơ lu sư: “Inh rơih mơjĭt-'bar 'nu lu iĕm mă-lei minh 'nu lăm lu iĕm dang lĕ yang kơnê̆.”
71Yêsu pơma thoi noh, Sư pơma jô̆ kơ Juđa kon Simôn đơ̆ng Pơlei Ikariôt. Sư boih lăm mơjĭt-'bar 'nu ei, mă-lei sư wă plơ̆ plĕch kơ Yêsu ning-mônh.
Yêsu păng lu oh Sư
હાલમાં પસંદ કરેલ:
Yo 6: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
