Mat 5

Yesu abasi bidɔ ní lito le aʋa

1Agi Yesu amɔ anɔkpi la ɛ, emu ketokpaa lɛ eze ní kesea ɛ. Lɛ yɛ badɔkpasi ba bɛkpɛ likpɔ ní yɛ su i. 2Lɛ ekpese ba bidɔ kubasɛ si,

3“Isami iku banama gi bɛmɔ e gyesi si Ɔfuɛfuɛ nɔ mɛ kigagla kíma ní ba awla,

lɛ ese linu si lifunu ne Kaʋaŋaa ɛ, ba kanɛ kenu.”

4Isami iku banama gi bɛwa awowoe la ɛ,

lɛ ese linu si Aya aayɔ ba ina a.

5“Isami iku banama gi bɛbubɔ isu ya ɛ, ba kaŋasea kiaze kesea petee.

6Isami iku banama gi bɛpɛ si beze ní Aya yɛ kude gyɔgyɔ aʋa ɛ.

lɛ ese linu si Aya aaki si biakè.

7Isami iku banama gi bizedi banɔ dzedze ba asigaga la ɛ,

lɛ ese linu si Aya aadi ba asigaga a.

8Isami iku banama gi ba ina nɛ mɛ idra ɛ,

lɛ ese linu si ba biaze ní Aya aŋu na mɛ ɛ!

9Isami iku banama gi bizɛpɛ kusuyɔ ɛ,

lɛ ese linu si Aya aaxwa ba si yɛ bebi i.

10Isami iku banama su gi bɛyɔ kedu ní Aya yɛ liboe le aʋa kubitɛɔ loso o,

lɛ ese linu si ba kanɛ kenu Aya yɛ kaʋaŋaa a.

11“Isami iku mlo xegi banima beekpini mlo, loo bɛyɔ kedu ní mlɔ su, aloo bɛsɛ asia zimizi ɛkpɛ mlɔ awla gi mlalɛ ní mɛ kude loso o. 12Mlamɔ isami lɛ ese linu si bɛbla liʋɛ ʋidi itɔ ɛplɛ ki mlɔ ní lifunu ne. Kiliɛ gi bɛyɔ kedu ya ní mlɔ su i, nite ke lize ɛki Aya yɛ beboedoplɛ ba ní kanaa mɛ ɛ.

Yesu yɛ kude bezeno ba balɛ ŋwisi kumwɛ ani kani

13“Yesu apani si, “Mlalɛ ŋwisi kumwɛ ki kelea pɔ́. Pɔ̀ xegi ɔgyi nɔ eblo ní kɔ mɛ ɛ, batrátani ɔgyi nɔ kudzini ikpɛ ní kɔ mɛ tɔ ɔ. Kúpɛ ɛki kididɔ tɔ ɔ. Nite si biakyi ko bali kɔ banima bɛga ní kɔ aʋa ɛ.

14“Mlalɛ ŋwisi kani aki kelea mɛ. Ɔma gi bɛtsa ní lito aʋa ɛ, óʋikpo o. 15Lɛ ɔnɔnɔ ɔ́ʋisu kani xe izɛkɔ yɛ kpɛ kasɔʋi ese e. Boŋu i, bizɛkɔ yɛ ɛsu lifune kɔ ekle aki ɔnɔ kakaa ní kepea mɛ ɛ. 16Nite ke mlaki tɔ mlɔ kaniɛ okle ɔki banima, atɔ biamɔ mlɔ eboe gbã na, kɔ bɛkpɔ̀ mlɔ Ɔka yɛ ní lifunu ne e.

Yesu abasɛ bidɔ ní Ɔsã nɔ su u

17“Mlakígyo le edi si maba si míbu Mose yɛ Isã nɛ ni beboedoplɛ ʋa bidɔbasɛbasɛ ʋɛ etu eʋe e. Mába si míbu ʋe zanɔ ɔ, boŋu i maba si tɔ ba bidɔbasɛbasɛ ʋɛ biba bɛ mɛ. 18Sugba sugba mɛɛsi mlɔ si, agi lifunu ne ni kesea kalɛ ɛ, ɔplipami kyɛ ɔ́trado ní Ɔsã nɔ mɛ kɔzɛna ni eboe la mɛ libapoe le e. 19Lɛ loso e, ɔniliɛ klɔ gi aata ɔsã sisami nɔ ní isã nɛ kusi ese e, xe aabasɛ banɔ dzedze ba si ba kyɛ babitɛ nite e, ɔniliɛ klɔ aaze ɔsisami yɛ ní lifunu ne Kaʋaŋaa mɛ. Pɔ̀ ní kapɛ ʋlaa mɛ ɛ, ɔniliɛ gi aabitɛ ní isã nɛ aʋa a, xe abasi banɔ dzedze ba si ba kyɛ babitɛ nite e, yɛ aaze ɔnɔ ʋidi ní lifunu ne Kaʋaŋaa mɛ. 20Mɛɛsi mlɔ si xegi mlɔ kubitɛɔ ní Aya yɛ kupɛpɛɔ aʋa a, gi kɔ kiaki si mlɔ liboe liagyɔ ní Aya kɔ ɔ, xe kúsani Ɔsã nɔ badɔbasɛ ba ni Farisianɛ ma kiniɛ ɛ, mlatrátani kuti iku ní lifunu ne Kaʋaŋaa mɛ.

Yesu abasi bidɔ ní kusuyeʋi su u

21“Mleenu gi bɛsi kana mɛ banɛ ma si, ‘Wukíye ɔnɔ ɔ. Ɔniliɛ gi aaye ɔnɔ ɛ, biaxwa litsi ni yɛ.’ 22Pɔ̀ abla ɛ, mɛɛsi mlɔ si ɔniliɛ klɔ gi aamɔ kusuyeʋi ní yenemi su i, biaxwa litsi ni yɛ. Ɔniliɛ gi aasi yenemi ye si, ‘Wɔ́pɛ ɔki kididɔ ɛ!’ biahe ye ɔtsinɔ ní otsixwaklɔ. Lɛ ɔniliɛ klɔ gi aakpinì yenemi ye si ɔga ɛ, aaze kuxixa mɛ kí kifu monimoni ye me kutrɛtrɛ. 23Lɛ loso e, xegi wɔɛtrɛ ní bidɔ ɔpɔʋi kɔ ní ɔdɔpɔʋisuʋɔ lɔ aʋa ɛki Aya a, xe wɔplɛ aŋu si liboe lilɛ ní wɔ onemi ye me ni wɔ ɛ, 24yurɔ wɔ bidɔ mɛ plɛ ní ɔdɔpɔʋisuʋɔ lɔ ɔtɔ nɔ atɔ zɛbitɛ kusuyɔ ni yɛ kyɔŋ. Lɛ kede e, dzi ba atɔ gapɔʋi wɔ bidɔ mɛ ki Aya.

25“Xe ɔnutɔ akɔ liboe ní wɔ su ní otsixwakɔ ɔ, xe lipoe le lilɛ ɛ, ye liboe le nì yɛ xe litsixwawe le liana a. Xegi aní nite e, xe mleku otsixwaklɔ ɛ, aakɔ̀ wɔ kukpɛ awla ki otsixwa yɛ, kɔ yɛ kyɛ akɔ wɔ akpɛ awla aki bewukpɛ ʋa ɛ. Niteme si biakpɛ wɔ ligba. 26Sugba sugba ɛ, níklɔ wɔaze kɔkpɛni lipoe lɛ gi wɔatsa liʋɛ kakaa gi bɛnya ɛki wɔ ɛ.

Yesu abasi bidɔ ní ádzɛboe nì enyimeboe su u

27“Mleenu gi bɛpani si, ‘Mlakílɔ̀ ádzɛboe nì enyimeboe.’ 28Pɔ̀ abla ɛ, mɛɛsi mlɔ si ɔnɔ kakaa gi aadi ɔdzɛ ɛ, xe aaku yɛ kule si yifɛ ni yɛ ɛ, afɛ ni yɛ ní yɛ ɔna nɔ mɛ kooko. 29Lɛ loso e, xe wɔ kaŋaa mɛ kimbi ye kiaki si wɔata kese e, bu ke tuʋe e! Liapɛ ki wɔ si lila wɔ kapɛatɔ sani si tɔ bakɔ wɔ ɔnɔse lo petee aŋwia kpɛ kifu monimoni ye me e. 30Lɛ ɛ, xegi wɔ ɔŋawla lɔ aaki si wɔata kese e, tsa lɔ tuʋe. Liapɛ ɛki wɔ si lila wɔ kapɛatɔ sani si tɔ bakɔ wɔ ɔnɔse lo petee aŋwia kpɛ kifu monimoni ye me e.

Yesu abasɛ bidɔ ní ɔdzɛ kugbegbe su u

31“Bɛpani fɛ si, ‘Ɔnɔ kakaa gi aayurɔ yedze e, ɔŋwlimi kadzɛgbeplekpa aki yɛ.’ 32Pɔ̀ abla ɛ, mɛɛsi mlɔ si, xegi onyime ayurɔ yedze e, gi aní enyimeboe alɔ ɛ, kɔ onyimee yɛ aki si ɔdzɛɛ alɔ enyimeboe xegi ɔdzɛɛ atrɛ onyime dzedze kɔ ɛ. Lɛ onyime liɛ klɔ kɔ gi ɔdzɛɛ atrɛ ɛ, yɛ kyɛ alɔ ádzɛboe.

Yesu abasɛ bidɔ ní kedoplɛ aʋa kubitɛbitɛ su u

33“Mlenu gi bepani dzɛ si, ‘Mlakíta mlɔ kedoplɛ ese, pɔ̀ mlabitɛ ní mlɔ bitamu bɛ aʋa kí Ɔkaɛ.’ 34Pɔ̀ abla ɛ, mɛɛsi mlɔ si xegi mlɛbitɛ kedoplɛ ɛ, mlakíta ka ese. Mlakítani lifunu ne e, lɛ ese linu si lɛ linu Aya yɛ likusigbo le e. 35Mlakítani kesea, lɛ ese linu si ka kenu Aya yɛ ikli lɛ odu klɔ ɔ. Mlakítani Yerusalem kyɛ ɛ lɛ ese linu si onu Okusi ʋidi ye yɛ ɔma. 36Lɛ ɛ, mlakítani mlɔ etukpo la kyɛ ɛ, lɛ ese linu si mlatrátani kuya pititi tule loo kukpikpi tule kubitɛ ɛ. 37Mlɔ kiboedoe ko kize si, ‘Ee’ aloo ‘Oo’. Liboe kakaa gi mlapani lɛ ya kede e, lidɔ ní Ozimizi ye klɔ ɔ.

Yesu abasi bidɔ ní kuwleʋiʋi su u

38“Mleenu gi bɛpani si, ‘Xegi wɔyaʋi ɔnutɔ kimbi i, linu si bayaʋi wɔ kiniɛ kyɛ.’ Lɛ ɛ, xegi wɔvini ɔnutɔ line e, biavini wɔ lini nɛ kyɛ. 39Pɔ̀ mɛɛsi mlɔ abla si mlakíʋi kuwle aki ɔnɔnɔ ɔ. Xe ɔnutɔ ábɔ wɔ bidɔ ní ɔŋawla lɔ kutu yɔ mɛ ɛ, ki tɔ ɔbɔ wɔ ní kaʋaa kuni yɔ mɛ kyɛ. 40Lɛ xegi ɔnutɔ akɔ liboe nì wɔ ní otsixwakɔ si tɔ yizɛ wɔ liwu le ese lini nɛ ɛ, yurɔ lɛ aʋa lini nɛ kyɛ ki yɛ. 41Lɛ xegi ɔgũta ɔtɔ emi wɔ aʋa si tu yɛ lidɔtu le ki yɛ ɔtiplɛkɔ tole e, tu le itiplɛkɔ tiʋa. 42Xe ɔnutɔ eʋi wo kiditɔ ɛ, ki yɛ kɛ. Xe ɔnutɔ apɛ si yidɔ kiditɔ ní wɔ awla ɛ, dɔ kɛ̀ ki yɛ.

Yesu abasi bidɔ si banima ba dimɛni ni ba ahwafianɛ ma

43“Mleenu gi bɛpani si, ‘Mlalɔ mlɔ ahanuglɔ ba atɔ mlekyri mlɔ ahwafianɛ ma.’ 44Pɔ̀ mɛɛsi mlɔ abla a si: mlalɔ mlɔ ahwafianɛ ma lɛ mlapɛ Aya ligbã aki banama gi bɛyɔ kedu ní mlɔ su i. 45Atɔ mlaadzi mlɔ Ɔka yɛ ní lifunu ne yɛ bebi. Lɛ ese linu si yɛ izɛki yɛ kuweo kuzekle ɛki banɔ zimizi ba ni banɔ gbã ba pɔ́. Lɛ ɛ, izɛki dzeni ye izɛdɔ ɛki banɔ gbã ba ni banɔ zimizi ba. 46Xegi banama gi bɛdimɛ ni mlɔ ko mlɔ kyɛ mlɛdimɛ nɔ ɛ, mlakígyo le edi si Aya aatsa liʋɛ tɔtɔ ɔki mlɔ ɔ. Lɛ ese linu si ligbãzeze lɛ klɔ elu lilɛ babɔgyɔ ba fɛ mɛ ɛ. 47Lɛ xegi mlɔ baʋia nɛ ba ko mlezeegu kunugu yo nɔ e, kiboebitɛ gbã woli lu mlɛsa kubitɛ ɛ? Banama gi béte Aya ɛ, ani nite ko ba kyɛ bizɛbitɛ ɛ? 48Mlaki si mlɔ kizezee me kiflɔ ŋwisi kiliɛ gi mlɔ Ɔka yɛ ní lifunu ne aflɔ kinɛ ɛ.

હાલમાં પસંદ કરેલ:

Mat 5: avn

Highlight

શેર કરો

નકલ કરો