ꠔꠃꠞꠣꠔ ১: ꠙꠄꠖꠣ ꠘꠣꠝꠣ 19
19
ꠍꠣꠖꠥꠝ ꠐꠣꠃꠘꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ
1ꠛꠣꠖꠦ ꠢꠣꠁꠘ꠆ꠎꠣ ꠛꠣꠟꠣ ꠢꠃ ꠖꠥꠁꠎꠘ ꠚꠤꠞꠤꠡ꠆ꠔꠣ ꠍꠣꠖꠥꠝ ꠐꠣꠃꠘꠅ ꠉꠦꠟꠣ। ꠁ ꠡꠝꠄ ꠟꠥꠔ ꠐꠣꠃꠘꠞ ꠝꠥꠟ ꠉꠦꠁꠐꠞ ꠉꠦꠍꠦ ꠛꠅꠀꠔ ꠀꠍꠟꠣ, ꠄꠞꠣꠞꠦ ꠖꠦꠈꠤꠀ ꠔꠣꠁꠘ ꠃꠛꠣꠁꠟꠣ ꠀꠞ ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠇꠁꠟꠣ, 2“ꠅ ꠀꠝꠣꠞ ꠝꠣꠟꠤꠇ ꠅꠇꠟ, ꠀꠝꠤ ꠝꠤꠘꠔꠤ ꠇꠞꠤ ꠇꠁꠀꠞ, ꠖꠄꠀ ꠇꠞꠤ ꠀꠙꠘꠣꠞꠣꠞ ꠅꠃ ꠉꠥꠟꠣꠝꠞ ꠊꠞꠅ ꠔꠡꠞꠤꠚ ꠀꠘꠤꠟꠣꠃꠇ꠆ꠇꠣ ꠀꠞ ꠀꠔ-ꠙꠣꠅ ꠗꠁꠀ ꠞꠣꠁꠔꠈꠣꠘ ꠇꠣꠐꠣꠃꠇ꠆ꠇꠣ। ꠛꠤꠀꠘꠦ ꠢꠤꠞꠛꠣꠞ ꠞꠅꠀꠘꠣ ꠅꠁꠛꠣꠘꠦ।” ꠄꠞꠣ ꠇꠁꠟꠣ, “ꠘꠣ, ꠀꠝꠞꠣ ꠅꠃ ꠐꠣꠃꠘꠞ ꠝꠄꠖꠣꠘꠅ ꠞꠣꠁꠔ ꠇꠣꠐꠣꠁꠝꠥ।” 3ꠔꠣꠁꠘ ꠎꠦꠛꠟꠣ ꠈꠥꠛ ꠝꠤꠘꠔ-ꠇꠣꠎ꠆ꠎꠤ ꠇꠞꠞꠣ ꠅꠃ ꠡꠝꠄ ꠄꠞꠣ ꠔꠣꠘ ꠛꠣꠠꠤꠔ ꠢꠣꠝꠣꠁꠟꠣ। ꠛꠣꠖꠦ ꠟꠥꠔꠦ ꠞꠥꠐꠤ ꠛꠣꠘꠣꠁꠀ ꠄꠞꠣꠞ ꠟꠣꠉꠤ ꠈꠣꠘꠣ-ꠖꠣꠘꠣ ꠎꠥꠁꠔ ꠇꠞꠟꠣ, ꠀꠞ ꠔꠣꠞꠣ ꠈꠣꠁꠟꠣ। 4ꠄꠞꠣꠞ ꠢꠥꠔꠤꠛꠣꠞ ꠀꠉꠦꠃ ꠍꠣꠖꠥꠝ ꠐꠣꠃꠘꠞ ꠢꠇ꠆ꠇꠟ ꠎꠥꠀꠘ-ꠛꠥꠠꠣ ꠛꠦꠐꠣꠁꠘ꠆ꠔꠦ ꠀꠁꠀ ꠢꠤ ꠛꠣꠠꠤꠞꠦ ꠛꠦꠞꠤꠟꠣꠁꠟꠣ, 5ꠀꠞ ꠟꠥꠔꠞꠦ ꠒꠣꠇꠤꠀ ꠇꠁꠟꠣ, “ꠀꠁꠎ ꠞꠣꠁꠔ ꠎꠦ ꠖꠥꠁꠎꠘ ꠝꠣꠘꠥꠡ ꠔꠞ ꠁꠘꠅ ꠀꠁꠍꠦ, ꠔꠣꠞꠣ ꠇꠁ? ꠅꠔꠣꠞꠦ ꠛꠣꠞ ꠇꠞꠤꠀ ꠀꠝꠞꠣꠞ ꠉꠦꠍꠦ ꠀꠘ। ꠀꠝꠞꠣ ꠅꠔꠣꠞ ꠟꠉꠦ ꠝꠃꠎ ꠇꠞꠔꠣꠝ।” 6ꠅꠃ ꠡꠝꠄ ꠟꠥꠔꠦ ꠖꠞꠎꠣꠞ ꠛꠣꠞꠦ ꠉꠤꠀ ꠔꠣꠘ ꠈꠞꠞ ꠖꠞꠎꠣ ꠛꠘ꠆ꠖ ꠇꠞꠤꠀ ꠔꠣꠞꠣꠞꠦ ꠇꠁꠟꠣ, 7“ꠜꠣꠁꠀꠁꠘꠞꠦ, ꠀꠝꠤ ꠝꠤꠘꠔ ꠇꠞꠤꠀꠞ, ꠔꠥꠝꠞꠣ ꠁꠟꠣ ꠛꠖ ꠇꠣꠝ ꠇꠞꠤꠅ ꠘꠣ। 8ꠖꠦꠈꠅ, ꠀꠝꠣꠞ ꠖꠥꠁꠐꠣ ꠡꠔꠤ ꠙꠥꠠꠤ ꠀꠍꠦ। ꠀꠝꠤ ꠛꠣꠞ ꠇꠞꠤꠀ ꠔꠥꠝꠞꠣꠞ ꠉꠦꠍꠦ ꠟꠁꠀ ꠀꠁꠀꠞ, ꠔꠣꠞꠣ ꠇꠥꠘꠥ ꠛꠦꠐꠣꠁꠘ꠆ꠔꠞ ꠉꠦꠍꠦ ꠞꠁꠍꠂꠘ ꠘꠣ, ꠔꠥꠝꠞꠣꠞ ꠎꠦꠔꠣ ꠝꠘꠦ ꠌꠣꠄ ꠇꠞꠅ; ꠔꠣ-ꠅ, ꠁ ꠝꠣꠘꠡꠞ ꠟꠉꠦ ꠔꠥꠝꠞꠣ ꠇꠥꠘ꠆ꠔꠣ ꠇꠞꠤꠅ ꠘꠣ, ꠄꠞꠣ ꠀꠝꠣꠞ ꠊꠞꠅ ꠀꠡꠞꠄ ꠟꠁꠍꠂꠘ।” 9ꠅꠁꠟꠦ ꠔꠣꠞꠣ ꠇꠁꠟ, “ꠎꠣ, ꠎꠣ, ꠙꠕ ꠕꠣꠇꠤ ꠢꠞ!” ꠔꠣꠞꠣ ꠀꠞꠅ ꠇꠁꠟ, “ꠅꠂ ꠛꠦꠐꠣ, ꠔꠥꠁ ꠄꠇꠟꠣ ꠛꠂꠔꠟ ꠅꠁꠀ ꠀꠁꠍꠍ ꠀꠞ ꠈꠣꠟꠤ ꠀꠝꠞꠣꠞ ꠃꠙꠞꠦ ꠘꠦꠔꠣꠉꠤꠞꠤ ꠇꠞꠞꠦ। ꠅꠈꠘ ꠄꠞꠣꠞ ꠌꠣꠁꠔꠦ ꠔꠞ ꠟꠉꠦ ꠀꠞꠅ ꠛꠦꠡꠤ ꠈꠛꠤꠍꠤ ꠇꠞꠝꠥ।” ꠇꠁꠀꠃ ꠔꠣꠞꠣ ꠟꠥꠔꠞꠦ ꠑꠦꠟꠤꠀ ꠢꠞꠣꠁꠀ ꠖꠞꠎꠣ ꠜꠣꠋꠉꠔ ꠌꠣꠁꠟ। 10ꠅꠃ ꠡꠝꠄ ꠢꠃ ꠖꠥꠁꠎꠘꠦ ꠀꠔ ꠛꠣꠠꠣꠁꠀ, ꠟꠥꠔꠞꠦ ꠊꠞꠞ ꠜꠤꠔꠞꠦ ꠐꠣꠘꠤꠀ ꠘꠤꠀ ꠖꠞꠎꠣ ꠛꠘ꠆ꠖ ꠇꠞꠤ ꠖꠤꠟꠣ। 11ꠀꠞ ꠖꠞꠎꠣꠞ ꠛꠣꠞꠦ ꠃꠛꠣꠁꠟ ꠢꠥꠞꠥ-ꠛꠠ ꠢꠇꠟ ꠀꠈꠔꠣꠃ ꠀꠘ꠆ꠖꠣ ꠅꠁꠉꠦꠟ, ꠀꠞ ꠖꠞꠎꠣ ꠔꠥꠇꠣꠁꠔꠦ ꠔꠥꠇꠣꠁꠔꠦ ꠢꠦꠞꠣꠘ ꠅꠁꠉꠦꠟ।
12ꠛꠣꠖꠦ ꠢꠃ ꠖꠥꠁꠅꠎꠘꠦ ꠟꠥꠔꠞꠦ ꠎꠤꠇꠣꠁꠟꠣ, “ꠁꠘꠅ ꠔꠥꠝꠣꠞ ꠀꠞ ꠇꠦ ꠇꠦ ꠀꠍꠦ? ꠔꠥꠝꠣꠞ ꠙꠥꠀ-ꠙꠥꠠꠤ ꠀꠞ ꠖꠣꠝꠣꠘ꠆ꠖꠞꠦ ꠟꠁꠀ ꠁꠘ ꠕꠘꠦ ꠢꠞꠤꠀ ꠎꠣꠅꠉꠤ। 13ꠇꠣꠞꠘ ꠀꠝꠞꠣ ꠁ ꠎꠣꠉꠣꠞꠦ ꠍꠣꠞꠈꠣꠞ ꠇꠞꠤꠟꠣꠁꠀꠞ। ꠁꠘꠞ ꠝꠣꠘꠡꠞ ꠛꠤꠞꠥꠖ꠆ꠖꠦ ꠝꠣꠛꠥꠖꠞ ꠉꠦꠍꠦ ꠅꠃꠟꠣ ꠛꠦꠎꠥꠁꠔꠣ ꠘꠣꠟꠤꠡ ꠅꠁꠍꠦ ꠎꠦꠘ, ꠁꠇꠐꠣ ꠛꠤꠘꠣꠡ ꠇꠞꠣꠞ ꠟꠣꠉꠤ ꠔꠣꠁꠘ ꠀꠝꠞꠣꠞꠦ ꠙꠣꠑꠣꠁꠍꠂꠘ।” 14ꠅꠃ ꠟꠥꠔꠦ ꠛꠣꠞꠦ ꠉꠤꠀ ꠔꠣꠘ ꠖꠣꠝꠣꠘ꠆ꠖ ꠅꠇꠟꠞꠦ ꠇꠁꠟꠣ, “ꠀꠅ, ꠔꠥꠝꠞꠣ ꠁ ꠎꠣꠉꠣ ꠍꠣꠠꠤꠀ ꠛꠣꠞꠅ ꠇꠣꠞꠘ ꠝꠣꠛꠥꠖꠦ ꠁ ꠐꠣꠃꠘꠞꠦ ꠛꠤꠘꠣꠡ ꠇꠞꠣꠞ ꠟꠣꠉꠤ ꠔꠤꠀꠞ ꠅꠁꠞꠁꠍꠂꠘ।” ꠅꠁꠟꠦ ꠔꠣꠞꠣ ꠝꠘꠦ ꠇꠞꠟ, ꠔꠣꠁꠘ ꠁꠔꠣ ꠔꠣꠝꠡꠣ ꠇꠞꠞꠣ।
15ꠙꠔꠣꠛꠣꠟꠣ ꠢꠃ ꠚꠤꠞꠤꠡ꠆ꠔꠣꠄ ꠟꠥꠔꠞꠦ ꠔꠣꠉꠖꠣ ꠖꠤꠀ ꠇꠁꠟꠣ, “ꠃꠑꠅ, ꠎꠟꠖꠤ ꠇꠞꠤ ꠔꠥꠝꠣꠞ ꠛꠃ ꠀꠞ ꠁ ꠖꠥꠁꠅ ꠙꠥꠠꠤꠞꠦ ꠟꠁꠀ ꠅꠘ ꠕꠘꠦ ꠎꠣꠅꠉꠤ। ꠘꠣꠁꠟꠦ ꠅꠃ ꠉꠎꠛꠞ ꠝꠣꠎꠦ ꠙꠠꠤꠀ ꠛꠤꠘꠣꠡ ꠅꠁꠎꠤꠛꠣꠄ।” 16ꠟꠥꠔꠦ ꠎꠣꠁ-ꠎꠣꠁꠞꠣꠝ ꠅꠃꠟꠣ ꠇꠞꠞꠣ। ꠅꠁꠟꠦ ꠝꠣꠛꠥꠖꠞ ꠝꠣꠄꠀ ꠔꠣꠘ ꠃꠙꠞꠦ ꠀꠍꠤꠟ ꠇꠞꠤ ꠢꠃ ꠖꠥꠁꠅꠎꠘꠦ, ꠔꠣꠁꠘ ꠀꠞ ꠔꠣꠘ ꠛꠃ ꠀꠞ ꠔꠣꠘ ꠖꠥꠁꠅ ꠙꠥꠠꠤꠘ꠆ꠔꠞ ꠀꠔꠅ ꠗꠞꠤ ꠐꠣꠘꠤꠀ ꠐꠣꠃꠘꠞ ꠛꠣꠞꠦ ꠟꠁꠀ ꠀꠁꠟꠣ। 17ꠢꠇꠟꠞꠦ ꠛꠣꠞ ꠇꠞꠤꠀ ꠀꠘꠣꠞ ꠛꠣꠖꠦ ꠔꠣꠞꠣ ꠇꠁꠟꠣ, “ꠛꠣꠌꠔꠦ ꠌꠣꠁꠟꠦ ꠜꠣꠉꠅ, ꠈꠞꠦꠖꠤ ꠌꠣꠁꠅ ꠘꠣ, ꠜꠣꠉꠤꠀ ꠙꠣꠠꠅ ꠎꠣꠅ, ꠁ ꠕꠟ ꠎꠣꠉꠣꠞ ꠇꠥꠘꠥꠈꠣꠘꠅ ꠃꠛꠣꠁꠅ ꠘꠣ ꠀꠞꠘꠣꠄ ꠔꠥꠝꠞꠣꠅ ꠝꠞꠛꠣꠄ।” 18ꠅꠃ ꠟꠥꠔꠦ ꠇꠁꠟꠣ, “ꠅ ꠀꠝꠣꠞ ꠝꠣꠟꠤꠇ ꠅꠇꠟ, ꠁꠟꠣ ꠇꠞꠂꠘ ꠘꠣ ꠎꠦꠘ; 19ꠖꠦꠈꠃꠇ꠆ꠇꠣ, ꠀꠙꠘꠣꠞ ꠁ ꠉꠥꠟꠣꠝꠞꠦ ꠀꠙꠘꠦ ꠝꠦꠢꠦꠞꠛꠣꠘꠤ ꠇꠞꠍꠂꠘ, ꠀꠞ ꠀꠝꠣꠞ ꠎꠣꠘ ꠛꠣꠌꠣꠁꠛꠣꠞ ꠟꠣꠉꠤ ꠀꠙꠘꠦ ꠀꠝꠣꠞꠦ ꠝꠢꠣ ꠖꠄꠀ ꠖꠦꠈꠣꠁꠍꠂꠘ। ꠅꠁꠟꠦ ꠀꠝꠤ ꠜꠣꠉꠤꠀ ꠙꠣꠠꠅ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ। ꠢꠄꠔ ꠁ ꠛꠤꠙꠖ ꠀꠁꠀ ꠀꠝꠣꠞꠦ ꠎꠣꠔꠣ ꠝꠣꠞꠤ ꠗꠞꠟꠦ, ꠀꠝꠤꠅ ꠝꠞꠝꠥ। 20ꠖꠦꠈꠃꠇ꠆ꠇꠣ, ꠜꠣꠉꠤꠀ ꠎꠣꠁꠔꠦ ꠔ ꠅꠃ ꠢꠥꠞꠥ ꠉꠣꠃꠐꠣ ꠇꠣꠍꠣꠔ ꠀꠍꠦ। ꠎꠣꠘ ꠛꠣꠌꠣꠁꠛꠣꠞ ꠟꠣꠉꠤ ꠀꠝꠣꠞꠦ ꠅꠘꠅ ꠙꠣꠑꠣꠁ ꠖꠦꠃꠇ꠆ꠇꠣ। ꠉꠣꠃꠐꠣ ꠢꠥꠞꠥ-ꠝꠥꠞꠥ ꠀꠍꠦ।” 21ꠔꠣꠁꠘ ꠇꠁꠟꠣ, “ꠑꠤꠇ ꠀꠍꠦ, ꠀꠝꠤ ꠔꠥꠝꠣꠞ ꠁ ꠀꠞꠎꠤ ꠝꠣꠘꠟꠣꠝ। ꠔꠥꠝꠤ ꠎꠦ ꠉꠣꠃꠞ ꠇꠕꠣ ꠇꠁꠟꠣꠄ, ꠁꠐꠣ ꠀꠝꠤ ꠗꠋꠡ ꠇꠞꠔꠣꠝ ꠘꠣꠄ। 22ꠎꠟꠖꠤ ꠇꠞꠤ ꠢꠤꠘꠅ ꠎꠣꠅ। ꠔꠥꠝꠤ ꠢꠘꠅ ꠘꠣ ꠙꠃꠍꠣꠘꠤ ꠙꠞ꠆ꠎꠘ꠆ꠔ ꠀꠝꠤ ꠇꠥꠘ꠆ꠔꠣ ꠇꠞꠔꠣꠝ ꠙꠣꠞꠤꠀꠞ ꠘꠣ।” ꠟꠥꠔꠞ ꠇꠕꠣꠞ ꠟꠣꠉꠤ ꠢꠃ ꠉꠣꠃꠞ ꠘꠣꠝ ꠅꠁꠟ ꠍꠥꠀꠞ [ꠝꠣꠘꠤ, ꠢꠥꠞꠥ]। 23ꠟꠥꠔꠦ ꠎꠦꠛꠟꠣ ꠍꠥꠀꠞꠅ ꠉꠤꠀ ꠙꠃꠍꠟꠣ ꠁ ꠡꠝꠄ ꠡꠥꠞꠥꠎ ꠃꠑꠤꠉꠦꠍꠦ।
24ꠄꠞꠛꠣꠖꠦꠃ ꠝꠣꠛꠥꠖꠦ ꠀꠍꠝꠣꠘ ꠕꠣꠇꠤ ꠍꠣꠖꠥꠝ ꠀꠞ ꠀꠝꠥꠞꠣꠞ ꠃꠙꠞꠦ ꠀꠉꠥꠁꠘ ꠀꠞ ꠉꠘ꠆ꠖꠇꠞ ꠉꠎꠛ ꠍꠣꠠꠤꠟꠣ। 25ꠔꠣꠁꠘ ꠢꠤ ꠐꠣꠃꠘ ꠅꠇꠟ, ꠢꠇꠟ ꠕꠟ ꠎꠣꠉꠣ, ꠢꠇ꠆ꠇꠟ ꠝꠣꠘꠥꠡ ꠀꠞ ꠢꠤ ꠝꠣꠐꠤꠞ ꠃꠙꠞꠞ ꠢꠇ꠆ꠇꠟꠔꠣ ꠗꠋꠡ ꠇꠞꠤꠟꠣꠁꠟꠣ। 26ꠄꠞꠝꠣꠎꠦ ꠟꠥꠔꠞ ꠛꠃꠄ ꠈꠞꠦꠖꠤ ꠚꠤꠞꠤꠀ ꠌꠣꠅꠀꠄ, ꠔꠣꠁꠘ ꠄꠇꠐꠣ ꠘꠥꠘꠞ ꠌꠣꠇ꠆ꠇꠣ ꠅꠁꠉꠦꠟꠣ।
27ꠛꠣꠖꠞ ꠖꠤꠘ ꠁꠛ꠆ꠞꠣꠢꠤꠝꠦ ꠛꠤꠀꠘꠦ ꠃꠑꠤꠀ ꠢꠃ ꠎꠣꠉꠣꠔ ꠉꠦꠟꠣ ꠎꠦꠘꠅ ꠀꠉꠞ ꠖꠤꠘ ꠔꠣꠁꠘ ꠝꠣꠛꠥꠖꠞ ꠉꠦꠍꠦ ꠃꠛꠣꠁꠍꠟꠣ। 28ꠔꠣꠁꠘ ꠔꠟꠦ ꠍꠣꠖꠥꠝ, ꠀꠝꠥꠞꠣ ꠀꠞ ꠢꠇꠟ ꠕꠟ ꠎꠣꠉꠣꠞ ꠛꠣꠄ ꠌꠣꠁꠀ ꠖꠦꠈꠟꠣ, ꠁꠐ-ꠜꠣꠐ꠆ꠐꠣ ꠕꠣꠇꠤ ꠎꠦꠟꠣ ꠗꠥꠝꠣ ꠛꠣꠞꠅꠄ, ꠅꠃ ꠟꠣꠈꠣꠘ ꠢꠃ ꠄꠟꠣꠇꠣ ꠕꠣꠇꠤ ꠗꠥꠝꠣ ꠃꠠꠦꠞ।
29ꠀꠞ ꠟꠥꠔꠦ ꠎꠦꠈꠣꠘꠅ ꠛꠡꠔ ꠇꠞꠔꠣ, ꠢꠃ ꠕꠟ ꠎꠣꠉꠣꠞ ꠐꠣꠃꠘ ꠅꠇꠟ ꠗꠋꠡ ꠇꠞꠣꠞ ꠡꠝꠄ, ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞ ꠇꠕꠣ ꠝꠘꠅ ꠇꠞꠤꠀ ꠟꠥꠔꠞꠦ ꠢꠤꠘꠞ ꠉꠎꠛꠞ ꠝꠣꠎ ꠕꠣꠇꠤ ꠢꠞꠣꠁꠀ ꠀꠘꠟꠣ।
ꠝꠥꠀꠛ ꠀꠞ ꠛꠤꠘ-ꠅꠝ꠆ꠝꠤ ꠎꠣꠔꠤꠞ ꠈꠛꠤꠍꠤ ꠙꠄꠖꠣ
30ꠍꠥꠀꠞ ꠉꠣꠃꠔ ꠞꠁꠔꠦ ꠒꠞꠣꠁꠟꠣ ꠇꠞꠤ, ꠟꠥꠔꠦ ꠔꠣꠘ ꠖꠥꠁꠅ ꠙꠥꠠꠤꠞꠦ ꠟꠁꠀ ꠢꠤꠘ ꠕꠣꠇꠤ ꠛꠣꠞ ꠅꠁꠀ ꠙꠣꠠꠅ ꠀꠁꠀ, ꠄꠇ ꠉꠣꠔꠞ ꠜꠤꠔꠞꠦ ꠞꠁꠟꠣ। 31ꠄꠇꠖꠤꠘ ꠔꠣꠘ ꠛꠠ ꠙꠥꠠꠤꠄ ꠢꠥꠞꠥ ꠛꠁꠘꠞꠦ ꠇꠁꠟ, “ꠛꠣꠛꠣ ꠔ ꠝꠥꠞꠛ꠆ꠛꠤ ꠅꠁꠉꠦꠍꠂꠘ। ꠀꠞ ꠎꠉꠔꠞ ꠡꠝꠣꠎꠞ ꠘꠤꠅꠝ ꠝꠔ ꠀꠝꠞꠣꠞꠦ ꠛꠤꠀ ꠇꠞꠣꠞ ꠟꠣꠉꠤ ꠁꠘꠅ ꠇꠥꠘꠥ ꠛꠦꠐꠣꠁꠘꠅ ꠘꠣꠄ। 32ꠔꠦ ꠀꠄ, ꠀꠝꠞꠣ ꠛꠣꠛꠣꠞꠦ ꠡꠞꠣꠛ ꠈꠣꠅꠀꠁꠀ ꠔꠣꠘ ꠇꠣꠍꠣꠔ ꠞꠁ। ꠔꠦꠃ ꠛꠣꠛꠣꠞꠦꠖꠤ ꠀꠝꠞꠣꠞ ꠛꠋꠡ ꠛꠣꠌꠣꠁꠔꠣꠝ ꠙꠣꠞꠝꠥ।” 33ꠅꠃ ꠔꠣꠞꠣ ꠖꠥꠁꠅꠎꠘꠦ ꠞꠣꠁꠔꠞ ꠛꠣꠟꠣ ꠔꠣꠘꠞꠦ ꠡꠞꠣꠛ ꠈꠣꠅꠀꠁꠀ ꠐꠣꠟ ꠛꠣꠘꠣꠁꠟ। ꠛꠣꠖꠦ ꠛꠠ ꠛꠁꠘ ꠛꠣꠚꠞ ꠉꠦꠍꠦ ꠢꠥꠔꠤꠔ ꠉꠦꠟ, ꠅꠁꠟꠦ ꠇꠥꠘ ꠡꠝꠄ ꠢꠥꠔꠤꠟ ꠀꠞ ꠇꠥꠘ ꠡꠝꠄ ꠃꠑꠤꠟ, ꠛꠣꠚꠦ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ। 34ꠛꠣꠖꠞ ꠖꠤꠘ ꠛꠠꠉꠥꠄ ꠢꠥꠞꠥꠉꠥꠞꠦ ꠇꠁꠟ, “ꠖꠦꠈ, ꠇꠣꠁꠟ ꠞꠣꠁꠔ ꠀꠝꠤ ꠛꠣꠛꠣꠞ ꠉꠦꠍꠦ ꠢꠥꠔꠤꠍꠟꠣꠝ। ꠀꠄ, ꠀꠁꠎ ꠞꠣꠁꠔꠅ ꠔꠣꠘꠦ ꠅꠃꠟꠣ ꠡꠞꠣꠛ ꠈꠣꠅꠀꠁꠀ ꠐꠣꠟ ꠛꠣꠘꠣꠁ, ꠛꠣꠖꠦ ꠔꠥꠁꠅ ꠉꠤꠀ ꠔꠣꠘ ꠉꠦꠍꠦ ꠢꠥꠔꠤꠍ। ꠔꠦ ꠛꠣꠛꠣꠞꠦꠖꠤ ꠀꠝꠞꠣꠞ ꠛꠋꠡ ꠛꠣꠌꠣꠁꠔꠣꠝ ꠙꠣꠞꠝꠥ।” 35ꠅꠃ ꠟꠣꠈꠣꠘ ꠔꠣꠞꠣ ꠢꠃ ꠞꠣꠁꠔꠅ ꠔꠣꠞꠣꠞ ꠛꠣꠚꠞꠦ ꠡꠞꠣꠛ ꠈꠣꠅꠀꠁꠀ ꠐꠣꠟ ꠛꠣꠘꠣꠁꠟ, ꠀꠞ ꠢꠥꠞꠥ ꠙꠥꠠꠤ ꠔꠣꠁꠞ ꠛꠣꠚꠞ ꠉꠦꠍꠦ ꠢꠥꠔꠤꠟ। ꠔꠣꠁ ꠇꠥꠘ ꠡꠝꠄ ꠢꠥꠔꠤꠟ ꠀꠞ ꠇꠥꠘ ꠡꠝꠄ ꠃꠑꠤꠟ, ꠁꠔꠣ ꠔꠣꠁꠘ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ। 36ꠅꠃ ꠘꠝꠥꠘꠣꠄ ꠟꠥꠔꠞ ꠖꠥꠁꠅ ꠙꠥꠠꠤꠞ ꠙꠦꠐꠅ ꠛꠣꠚꠞꠦꠖꠤ ꠢꠥꠞꠥꠔ꠆ꠔꠣ ꠀꠁꠟ। 37ꠛꠣꠖꠦ ꠛꠠ ꠙꠥꠠꠤꠞ ꠊꠞꠅ ꠙꠥꠀ ꠅꠁꠟꠦ, ꠄꠞ ꠘꠣꠝ ꠞꠣꠈꠟ ꠝꠥꠀꠛ [ꠝꠣꠘꠤ, ꠛꠣꠛꠣꠞ ꠉꠦꠍ ꠕꠘꠦ]। ꠅꠃ ꠝꠥꠀꠛꠃ ꠅꠈꠘꠇꠥꠞ ꠝꠥꠀꠛꠤ ꠅꠇꠟꠞ ꠝꠥꠟ ꠛꠣꠚ। 38ꠀꠞ ꠢꠥꠞꠥ ꠙꠥꠠꠤꠞꠅ ꠄꠇ ꠙꠥꠀ ꠅꠁꠟ, ꠄꠞ ꠘꠣꠝ ꠞꠣꠈꠟ ꠛꠤꠘ-ꠅꠝ꠆ꠝꠤ [ꠝꠣꠘꠤ, ꠀꠝꠣꠞ ꠝꠥꠟ꠆ꠟꠥꠇꠞ ꠙꠥꠀ]। ꠢꠦ ꠅꠈꠘꠇꠥꠞ ꠛꠘꠤ-ꠀꠝ꠆ꠝꠣꠘꠞ ꠝꠥꠟ ꠛꠣꠚ।
હાલમાં પસંદ કરેલ:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 19: sylN
Highlight
શેર કરો
નકલ કરો
Want to have your highlights saved across all your devices? Sign up or sign in
© Ahle Kitab Society. All rights reserved.