Luka 23

Yesu vakumusindika kwa Pilato

(Matayo 27:1-2, 11-14; Maliko 15:1-5; Yohane 18:28-38)

1Neke ililugu mbelili pelimye ng'ani, vakumusindika kwa Pilato. 2Swe vivanga ukumutosa: vitigila, “Tumuwene umunu uyu peiyasa avanu vetu, nu kufunda avanu vabihile ukumuhomba imbemenenge Kaisali, kono we akwihala ulwa umwene ye Mutwa Kilisito.” 3Ndawe Pilato amuwusige itigila, “Veve ye veve Mutwa va Avayudaya?” Swe Yesu apitwe akumutigila, “Veve ulonzile.” 4Ndawe Pilato avalongelige avatambisi avavina mukilugu cha vanu, “Singuluwona lukani lwa uwananzi kulu munu uyu.” 5Neke avene vakalalile hilo vitigila, “Akuvasagasa avanu ni nzigiso sakwe, mu Yudaya mbeyili avanje mu Galilaya na lino de yeafikite na kono.”

Yesu agenda kwa Helodi

6Pilato ave ipulika iso, awusise ulwa “Kumbi umunu uyu va ku Galilaya?” 7Ave akulukagula ulwa uyu munu va muwutema wa Helodi, amusindike kwa Helodi; pakuva ulusika ulo Helodi nave easile mu Yelusalemu.

8Na Helodi ave akumuwona Yesu ahekelye hilo, pakuva uluhuma musika eapulike nzolofu sa umunu uyo, nambi awendige ukumuwona na ukwilavila yumwene Yesu peipiga imiitu. 9Ndawe amuwusige ng'ani nzolofu kwa musika, neke Yesu samupitwi. 10Avavina va avatambisi na avigisi va Indagilo vimaje nu kumutosa vavifile hilo. 11Ndawe Helodi na avanyigalu vakwe vamuhongele inyoni, na ukumwelanga vakumufwika imyenda ja Uwutwa, swe vakumupilula kwa Pilato. 12Ndawe ikimunyi kicho Helodi na Pilato vitepulige kinyawiyendi, pakuva pamwandi vevanya wutavangu.

Yesu ihigwa ukufwa

(Matayo 27:15-20; Maliko 15:6-15; Yohane 18:39—19:16)

13Ndawe Pilato avatang'asige avavina va avatambisi na avavina va avanu, 14swe akuvatigila, “Mumuletite umunu uyu kwa nene mwitigila ukuta muyasa vanu; nane pendimugosige hilo ulwa ulukani ulu panyenye, nda sindiluweni ulukani lwa uwananzi, kulumunu uyu ukwimila mbesili semukumutosa. 15Na yi Helodi nave saluweni lukani nambi amupilwe kwa nene. Mulavage sipololi lukani lwapigite uluvaje ukufwa. 16Ino ndagila atowe ngoda neke ndimulekese.” [ 17Pakuva lwe lumuvaje Pilato ukudindulila umunyandinde yumwi pa ikimunyi ikikomi icha uluhekelelo.]

18Neke pevayovele ng'ani vitigila, “Muhese uyu tudindulile Balaba!” ( 19Umunu yalasopitwe mundinde wimila ukusagasa iliyowo muboma, na uwuwulasi.) 20Pilato avalonje ulwa kavili pakuva awendige ukumulekesa Yesu; 21neke pevayovele ng'ani, “Mutumbike, mutumbike uyo!” 22Swe akuvalongela ulwa wudatu, “Mbi ananzile kiki? Sikololi lukani lweananzile ulumuvaje ahigwe ukufwa, sweno ndimutova ngoda, pambele swe ngumulekesa ibitile.”

23Neke pevevaginite hilo ukuyova vitigila, atumbikwagwe. Swe liyowo lyawo lipulisa. 24Neke Pilato alamwe vahigage lwe viwenda avene lupigike. 25Swe akumudindulila yula yeemudindile wimila ukusagasa iliyowo na uwuwulasi, akumutawula Yesu vamupigile mwe viwendela.

Yesu itumbikwa mu musalaba

(Matayo 27:32-44; Maliko 15:21-32; Yohane 19:17-27)

26Na pevamusogosige vamwibete umunu uyumwi Simoni uva ku Kilene yahumige ku migunda, swe vakumutwika umusalaba amuteguse Yesu. 27Ililugu likomi lya avanu lyamufwatige na vala avang'inetu avamuvembelige. 28Neke Yesu avapitukile itigila, “Nyenye nye vang'inetu va mu Yelusalemu! Mutane ukumbembela nene, mwivembelage uwunu wenyu na avanenyu. 29Pakuva, mulavage, safyusa ifilo pesavatigila: ‘Vafunyilile avaguumba na amaleme gesigakwegala, na amavele gesigakoosa!’ 30Pepene pesavavanga ukufilongela ifidunda: ‘Mutugwile!’ na ifigang'amukila, ‘Mutugubike!’ 31Pevapigite isi mumubiki umudodi luva ndawuli ku mukafu?”

32Na avananzi avavili vasindikwe vakawulagwe pamwi na umwene. 33Vave vifika apono apitambulwa pa kibang'a, pepene pevamutumbike na vala avananzi uyumwi ulubali lwa kundyo na uyumwi ulubali lwa kung'igi. 34Swe Yesu atigile, “Dada, uvadegepele pakuva sivakulugula lwe vipiga.” Neke pevagavane imyenda jakwe kwa kutoosa isimbi. 35Neke avanu avevimile pala vilava na avalongola vakumwelanga vitigila, “Aponige avangi, ali lino iponiage yumwene, wone nachene ye Kilisito umuhagule va Nguluvi!” 36Na avanyigalu nawo vamwelange ndahihyo: na ukumuletela idifayi inzasamufu, 37kono wevitigila, “Wone veve ye veve mutwa va Avayudaya wiponiage yuveve.”

38Na pachanya pa musalaba pepandike, “Uyu ye Mutwa va Avayudaya.”

39Neke Uyumwi va vala avananzi, veve vatumbike amulisile itigila: “Mbi si nachene ye veve Kilisito? Apo wiponiage yuveve utuponie na hwehwe.” 40Neke yula uva kavili amupilule, akumukenyela itigila, “Veve sukumwogopa Nguluvi, nave wewuli muluhigilo lulo? 41Hwehwe ulu lutuvaje pakuva tukwanukila uluhombo ulutegine na ifipigo fyetu neke uyu nangi lusukuli lweananzile.” 42Swe akumutigila Yesu, “Nziwukage pukwingila mu wutwa wako.” 43Neke Yesu amulongele, “Nachene, ngukulongela namunyi de uva pamwi na nene kuchanya.”

Yesu ifwa mu musalaba

(Matayo 27:45-56; Maliko 15:33-41; Yohane 19:28-30)

44Lwave lwiva pipi na ikivalilo icha mutanda pamunyi, swe kwiva na lwisa mung'i mbeyili mbaka pa kivalilo icha igonza, 45na ilisuva pelipungite ikibupa cha itembeli chademwike nu kuhuma pavili. 46Neke Yesu, akoole itigila ve Dada, mumawoko gako ndivika inumbula yangu.” Pealonzile ulo umutima gwadumwike.

47Yula umuvina va avanyigalu avelige akusiwona isesiwonike pala, amusumye Nguluvi itigila, “Nachene umunu uyu ake mugolofu.” 48Na amalugu mbegali ga avanu avevakong'ine kukulava ing'ani iso pevasiwene isipigike vahele ukwawo viking'ina imambaga sawo vahuguve. 49Na mbevali avevisele nave, na vala avang'inetu avepamwi nave, uluhuma ku Galilaya, vimite pataali we vilava ing'ani iso mbesili.

Yesu itagwa

(Matayo 27:57-61; Maliko 15:42-47; Yohane 19:38-42)

50Lino aasile umunu ilitawa lyakwe Yosefu yee munu va pa wuhigilo umunu umunyandolo na uwugolofu, ( 51yesieahangiti mung'asi sawo) nave e munu va ku Alimataya; iboma iyimwi ya Avayudaya kangi asindilige uwutwa wa Nguluvi. 52Umunu uyo ahele kwa Pilato neke asuke umuvili gwa Yesu. 53Swe akwisa nu kugufwika isanda inofu na ukugutaga muwuvi wewe wuyave mwitalawe mwesiealatagwa munu. 54Ikimunyi icho che cha ukwigelanisa isabato pakuva yavangige.

55Na vala avang'inetu avevasile nave, uluhuma ku Galilaya, vafwatite na ukukiwona ichanga, na umuvili lwe gwavikigwe. 56Swe vipiluka, na ukugelanisa amafuta aginung'ila wunofu ga ukugubaka umuvili gwa Yesu.

Na ikimunyi cha isabato vasuupite ndawe lwelwelulagile mu ndagilo.

હાલમાં પસંદ કરેલ:

Luka 23: HeNT2004

Highlight

શેર કરો

નકલ કરો