मत्ती 12
12
आराम टूङब दिनजे प्रभु
मर्कूस २:२३-२८; ३:१-६; लूका ६:१-११
1 #
व्यवस्था 23:25
त्याफे आराम टूङब दिनने येशू बली ख्यब रङ्जे लम् क्यूत्देबे ङूजे स्यूस्स्यायूप्रे प्रेन ख्य। येशूजे स्यूस्स्यायू ठीदेबे सेजे ट थोदेबे चने सुरु चीत्दे। 2तर फरिसीयूदे अम्ब तङ्देबे येशूने यदे, “ले, नैजे स्यूस्स्यायूदे आराम टूङब दिनने च चे अन्क्यूर ख्य हम्बने चीन्न ख्यङ्।”
3 #
१ शमूएल 21:1-6
तर येशूदे थमयूने यदे, “दाऊद मेस्ये ङूप्रे ख्यबयू ठीब दाऊदे च चीत्दे, च नमयूदे अन्छ्य्वे? 4#लेवी 24:9केर्बे ङूदे परमेश्वरजे कीम्नङ्ने क्योदेबे ङू मेस्ये ङूप्रे ख्यब मीयूदेये परमेश्वरने चेर्दीयेब क्यङ् चदे, हम्ब क्यङ् मोशाजे नियम अनुसार थमयूदे च अन्क्यूर ख्य, तर पूस्र्यायूदे त्या च क्यूर ख्य। 5#गन्ती 28:9,10या मोशाजे नियमने नमयूदे अन्छ्य्वे? आराम टूङब दिनने मन्दिरने पूस्र्यायूदे काम चीत्देबे अम्ब नियमने अम्मन्दे ख्यङ्, होरेक्यूल्लीने थमयू दोष त्वब ठर्तीय। 6तर ङ नमयूने यीय, मन्दिर यली थेप् केन् मीत्या अन्-याने ख्यङ्। 7#मत्ती 9:13; होशे 6:6तर ‘ङैने रोलाजे बलि दी, ङ्येमब सेम् चैदे ख्यङ्’ यब पोजे अर्थ कादेये नमयूदे स्येयलो दोष त्वब मीयूने नमयूदे दोष अन्चे ख्यङ्दे। 8चेनेयलो मीजे च आराम टूङब दिनजेये प्रभु ख्यङ्।”
9होर्दे योङ्देबे येशू थमयूजे सभा-कीम्ने गीलीदे। 10हैयाने ला खरेब मीत्या ख्य। येशूने दोष चेब सूर्दे, “आराम टूङब दिनने कोइ मीने तम् चीम्मेब ज्य क्यूक्क्या?” यदेबे थमयूदे येशूने लोत्दे।
11 #
लूका 14:5
येशूदे थमयूने यदे, “नमयू नङ्ने कोइ मीजे स्वान्त्या ख्यङ्, मेस्ये आराम टूङब दिनने हम्ब स्वान् लोम्ने तैल्बलो नदे हम्ब स्वान् चूङ्देबे फीने अन्-योन? 12स्वान्जे लूयली मी थेप् केन् ख्यङ्! होरेक्यूत्देबे नियम अनुसार आराम टूङब दिनने भलो चेब ज्य ख्यङ्।”
13होर्दे हम्ब मीने येशूदे यदे, “नैजे ला तान्ती।” ङूदे ला तान्तीदे, मेस्ये हम्ब ला त्याब लाप्रने ज्य क्यूरी। 14तर फरिसीयू फीने गीलीदेबे येशूने केर्बे नाश चे यदेबे ङूजे विरुद्धने मोतो चेने सुरु चीत्दे।
परमेश्वरदे सेवा चेब मी चून्देब
15होर्दे हम्ब पो था प्रेत्देबे येशू हैयादे गीलीदे। कूम मीयू ङूजे ङ्ये-ङ्ये रदे, मेस्ये येशूदे सू-सू नख्य हम्बयू क्वानेने तम् चीम्मीदे, 16होर्दे ‘ङैजे बारेने सूनेये चैत्याये अन्स्योल्लाची’ यदेबे येशूदे थमयूने आज्ञा पीन्दे। 17यशौया अगमवक्तादे येकब पो पूरा क्यूरने अम्ब क्यूर ख्यङ्,
18 #
यशैया 42:1-4
“ङैजे त्वो क्यूरने सेलेब त्या अन्-याने ख्यङ्, ङू ङैदे सोरो छेब ख्यङ्, ङूदे ङैजे सेम्ने सोरो सूग्लाबे चीम्मे ख्यङ्,
ङैजे आत्मा ङू फ्याने पूमीय,
मेस्ये ङूदे जात जातजेने न्यायजे उर्ती पूक्क्य।
19ङूदे च्य-फाये अन्ची बोङ्बे पाराये अम्-प्वी, सालम्यूने ङूजे के सूदेये अन्त।
20कूरेब म्याये ङूदे क्योस्स्ये त्वो,
मेस्ये सीब मेल्नब बत्ती सेस्स्ये त्वो, मेस्ये पात्ता ङ्येदे न्यायजे दिनने ट्यासे पीन्क्य।
21जात जातजे मीयू क्वादेने ङूजे मीन्ने आशा चीक्क्य।
येशू मेस्ये बालजिबुल
मर्कूस ३:२०-३०; लूका ६:४३-४५; ११:१४-२३
22होर्दे छेत् लादीकदेबे म्या अन्तङ मेस्ये लर क्यून्नब मीत्या येशू ट्याने रेत्दे। येशूदे ङूने तम् चीम्मे ङ्येदे हम्ब लर पो क्यम मेस्ये म्या तङ ख्वब क्यूत्दे। 23होर्दे मीहुल क्वाने हार्मन्दीदे यदे, “अम्ब दाऊदजे च क्यूर खूइया?”
24 #
मत्ती 9:34; 10:25 तर अम्ब पो तदेबे फरिसीयूदे यदे, “छेत्जे नोबो बालजिबुलदे बोङ् पीन्देबेत्यामे अम्ब मीदे छेत्यूने ताल्बे ख्यङ्।”
25तर येशूदे थमयूजे सेम्जे पो था प्रेत्देबे थमयूने यदे, “कम्ब देशनेयली रङ्से रङ्सेने अन्थून क्यूत्देयलो हम्ब देशजे नाश क्यूप्पीय। होरप्रने कम्ब सहरनेयली या कम्ब कीम् म्हीतीनेयली अन्थून क्यूत्देयलो हम्ब कीम्-म्हीती मेस्ये सहरये टीक्ते अङ्खू। 26कादेये शैतानदे शैतानने योन्देयलो, हम्ब रङ्से रङ्सेजे विरुद्धने अन्थून क्यूक्क्य होरेक्यूत्देयलो हम्बजे राज्य केरे टीक्ते खूइय? 27कादेये छेत्जे नोबो बालजिबुलदे बोङ् पीन्देबे ङैदे छेत्यू ताल्पीय यलो नमयूजे मीयूदे सूजे बोङ्दे हम्ब छेत् ताल्पीय? होरेक्यूल्लो नमयूजे न्याय चेब रङ्सेजे मीयू क्यूक्क्य। 28तर कादेये परमेश्वरजे आत्मादे बोङ् पीन्देबे ङैदे छेत्यू ताल्पीय यलो परमेश्वरजे राज्य नमयू ट्याने रेकब क्यूक्क्य।
29“खूम् कीम्जे बोल्यो मीने अन्ख्यादासेमे, ङूजे कीम्नङ्ने क्योदेबे कीम्जे सम्पत्तियू केरे टेल्के खूइय? हम्ब बोल्यो मीने ख्याजेन मेस्येत्या ङूजे कीम्जे सम्पत्तियू टेल्के खूइय।
30 #
मर्कूस 9:40
“सू ङैप्रे अन्लादी, ङू ङैजे विरुद्धने क्यूक्क्य, मेस्ये सूदे ङैप्रे रूप् प्वेने अन्तोङ्मी, ङूदे स्वा थर्पीय। 31होरेक्यूत्देबे ङ नमयूने यीय, मीयूदे चेब पापयू मेस्ये परमेश्वरने ले-तपब क्वाने क्षमा क्यूक्क्य, तर पवित्र आत्माजे विरुद्धने ले-तपब क्षमा क्यूस्स्ये त्वो। 32#लूका 12:10कोइदे ‘मीजे चजे’ विरुद्धने चत्या-यदेयलो ङूने क्षमा क्यूक्क्य, तर पवित्र आत्माजे विरुद्धने सूदेने क्यम्लीने हम्बने अम्ब जूग्ने मेस्ये सूजो जूग्नेये क्षमा पीन्स्येत्वो।
33 #
मत्ती 7:20; लूका 6:44 “कादेये तोङ्बो सोरो ज्य क्यूल्लो स्यीये ज्यने लोय। कादेये तोङ्बो अन्ज्य क्यूल्लो सीये अन्ज्यने लोय। चेनेयलो सीदेने तङ्बो कर ख्यङ् यदेबे स्येय। 34#मत्ती 3:7; 23:33; लूका 3:7; मत्ती 15:18; लूका 6:45ओ र्वेजे पीचयू! नमयू अन्ज्य ख्यङ्यलो सोरो ज्य पो केर्बे क्यम खूइय? चेनेयलो सेम्ने च ख्य हम्ब पोयूने ङूर्दे योङ्रीय। 35सोरो ज्य मीदे रङ्सेजे सेम्नङ्जे सोरो ज्य पोयूने योन्क्य, तर अन्ज्य मीदे रङ्से सेम्-नङ्ने ख्यब अन्ज्य पोयूने योन्क्य। 36नमयूने ङ यीय, काम अन्लादेब पो सूमीयूदे क्यम्क्य, न्यायजे दिनने थमयूदे हम्ब पोजे लेखा पीन पर्दीय। 37चेनेयलो न्यायजे दिनने नैजे पोयूदेने न दोष त्वब ठर्दीय, मेस्ये नैजे पोयूदेने न दोष ख्यब ठर्तीय।”
च्यूनू लेने सेम्चेब
मर्कूस ८:११-१२; लूका ११:२९-३२
38 #
मत्ती 16:1; मर्कूस 8:11; लूका 11:16 होर्दे पन्डेयू मेस्ये फरिसीयूनङ्ने कोइ-कोइदे येशूने यदे, “गुरुज्यू, ङीने नैजे बोङ्दे हार्मन्दीलाबे चेब च्यूनू त्या लेत्तीङ् र ख्यङ्।”
39 #
मत्ती 16:4; मर्कूस 8:12 येशूदे थमयूने जवाफ पीन्दे, “दुष्ट मेस्ये वेश्य पुस्ताजे मीयूदे च्यूनू मेल्क्य, तर अम्ब पुस्ताने अगमवक्ता योनाजे च्यूनूत्यामे पीन्क्य सूजो च्यूनू चैये पीन्स्ये त्वो। 40#योना 1:17चेनेयलो योनादे केर्बे फत्य-केन् ङजे लो नङ्ने नो सोम् मून् सोम् टूङ्दे, होरप्रने मीजे चदेये नो सोम् मून् सोम् पृथ्वीजे स नङ्ने टूङ पर्दीय। 41#योना 3:5न्यायजे दिनने निनवे सहरजे मीयू दीनीजे पुस्ताजे मीयूप्रे-प्रे मेर्क्य, मेस्ये दीनीजे पुस्ताजे मीयूने दोष चीक्क्य, चेनेयलो योनादे प्रचार चीप्प निनवेजे मीयूदे पश्चात्ताप चीत्देबे परमेश्वरतेले ल्वार ख्य, तर ले, योनायली थेप् केन् मीत्या अने ख्यङ्। 42#१ राजा 10:1-10; 2 इतिहास 9:1-12न्यायजे दिनने दक्षिण देशजे केन् मूरुम् मदी दीनीजे पुस्ताजे मीयूप्रे-प्रे मेर्क्य, दीनीजे पुस्ताजे मीयूने दोष चीक्क्य, चेनेयलो मूरुम् सोलोमनजे ज्ञानजे पो ङ्यीनने हम्ब मूरुम् मदी सोरो चीन्तङ् देशदेये रदे। तर ले, सोलोमनयलीने थेप् केन् मीत्या अने ख्यङ्।
43“कन्छ्वाब अशुद्ध आत्मा मीजे ङ्वदे योङ्देबे प्रीय, आराम चेबने मेलेमेले ओबोनो नेतेले हम्ब ट्वाबीनीय, तर केनेये ने-प्रेस्स्ये त्वो। 44होर्दे ङूदे यीय ‘ङ केर्दे योङ्रदे हम्ब ङैजे कीम्ने ङ ल्वाबीय। ल्वारब ङूदे कीम् थैन्देन्, खम्सङ् चीतेब मेस्ये झीलीली चीतेब तूय। 45होर्दे हम्ब प्रीय मेस्ये रङ्सेयली थेप् अन्ज्य सूजो छेत् आत्मा ङ्यी रङ्सेप्रे रेक्क्य, मेस्ये नङ्ने क्योदेबे थमयू हैयाने टूङ्क्य, हम्ब मीजे ङ्येजे दसा खूम्जेयलीने झन् थेप अन्ज्य क्यूक्क्य। अम्ब अन्ज्य पुस्ताजे मीयूये येरप्रने क्यूक्क्य।”
येशूजे म मेस्ये च्योन्यू
मर्कूस ३:३१-३५; लूका ८:१९-२१
46येशू मीहुलप्रे क्यम्न बीलने येशूजे मप्रे च्योन्यू फीने फ्योरदे। थमयू येशूप्रे बात् सेब सेम् चीत्देबे फीने मेर्न ख्य। 47होर्दे मीत्यादे येशूने यदे, “नैजे म मेस्ये नैजे च्योन्यू फीने मेर्न ख्यङ्, मेस्ये नैप्रे बात् सेमे ख्यङ्।” 48येशूदे पो स्योट्टब मीने यदे, “सू ङैजे म ख्यङ्? सू ङैजे च्योन्यू ख्यङ्?” 49होर्दे रङ्से स्यूस्स्यायूतेले ला तन्देबे येशूदे यदे, “ले, ङैजे म मेस्ये ङैजे च्योन्यू अम्बने ख्यङ्। 50चेनेयलो स्वर्गने ख्यब ङैजे पजे आज्ञा सूदे मन्दीय, हम्बने ङैजे च्योन्, ङैजे स्यङ्, मेस्ये ङैजे म क्यूक्क्य।”
હાલમાં પસંદ કરેલ:
मत्ती 12: सर् कबुल
Highlight
શેર કરો
નકલ કરો
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
