Mateusi 10
10
Jesu opyteporo wemimo'ekwerà kõ remẽwarà
(Maku 3.13-19; Rukasi 6.12-16)
1Ajaire Jesu omuu wemimo'ekwerà kõ. Kee e'i ijupe kõ:
– Ije poropyteporo eremimo'earà kõ rõmõ tapeiko, e'i. Poroayvumokasiokatà. Ajawyi ãjãgaiwerà kõ pemoẽtà ojimoemija ee mãe kõ wyi eayvu rupi, e'i. Itekorã mãe kõ iteetejẽ pemokatutà teve eayvu rupi, e'i.
212 rõmõ Jesu remipyteporokwerà kõ, emimono rã kõ rõmõ. Kejõ kupa: Simão. A'e pè Peturu e'i Jesu ajamã'ẽ. Omotee erà. Ãmõ, Simão mõmirĩ, Aãtere. Ãmõ, Tiaku. Semeneu ra'yry a'e. Ãmõ, Juwão, Tiaku mõmirĩ. 3Ãmõ, Piripi. Ãmõ, Patoromeu. Ãmõ, Tome. Ãmõ, Mateusi. Tekoua repy moatyarerà tè a'e. Ãmõ Tiaku eu teve mã'ẽ. Aupeu ra'yry a'e. Ãmõ, Tateu. 4Ãmõ, Simão eu teve mã'ẽ. Kõi Juteu kõ yvy rè okãte'ã mã'ẽ eu ijupe. Ãmõ, Jutasi Sikarioti eu ijupe mã'ẽ. A'e kãramõ ome'ẽtà Jesu ijãpã kõ po pè karakuri repy rõmõ. [Mokopejõ Jesu remipyteporokwerà kõ emimono rã kõ rõmõ.]
Jesu wemimo'ekwerà kõ omonotà rã'ĩ remẽwarà
(Maku 6.7-13; Rukasi 9.1-6)
5-7Ajaire Jesu omonotà rã'ĩ wemipyteporokwerà kõ taa taa kõ rupi wenone rupi, ijayvu tomojenu amãtejẽ kupa. 12 rõmõ omono kõtà. Omuu kõ rã'ĩ ijayvumokasi kõ imono. Kee e'i ijupe kõ:
– Age'e poromonotà rã'ĩ eayvu rupi ky'y, e'i. Kee tapeiko peo remẽ. Isaeu kõ rena kõ rupi pekwa imo'e kõ, Juteu kõ mo'e. Kee pejẽtà: “Ke'ĩ Janejare'e ojikuwatà penõvijã e'eay mõ ekoi ky'y”, pejẽtà ijupe kõ, e'i. A'e kõ ojisyry ywe'e tite Janejare'e wyi oo. Ajawyi pekwa erojivy kõ eru, e'i. Juteu kõ gyty kõrijõ tè peotà age'e. Ãmõ kõ gyty napeo'ãi. Juteu rõwã mãe kõ rena kõ gyty napeo'ãi. Ãmõ, Samaria wãnà kõ rena kõ gyty napeo'ãi, e'i. Juteu kõ rena kõ gyty tè peotà, e'i.
[“Hoõ” e'i kupa.]
8– Kee tapeiko peo remẽ. Itekorã mãe kõ tapemokatu [Janejare'e kasia rupi]. Ãmõ, omãnõ mãe kõ tapemomoera imopõ'ã, e'i. Ãmõ, ipisĩsĩma mãe kõ tapemokatu teve, e'i. Ãmõ, ãjãg kõ tapemoẽ ojimoemija ee mãe kõ wyi, e'i. Tepy e'ãte a'evo tapeiko, e'i. Ãwitõ tepy e'ãte Janejare'e penereko katu, ãwĩvo ve, e'i.
9E'i jẽ Jesu:
– Kee a'e teve. Agyvo tè ikõ pekwa nẽ, a'e pejẽ, e'i. Karakuri naperaa'ãi. 10Ãmõ, penepãnakõ naperaa'ãi. Ãmõ, peyru je'arà rekovijarà rã. Ãmõ, pesãtaja rekovijarà. Ãmõ, pepytu naperaa'ãi teve. Wãisõ naperaa'ãi. Ãwitõ oposiko mã'ẽ jamoepy ipi, ãwĩvo ve penemi'õ rã eayvu mojenua repy rõmõtà peupe. [Pevote rõwã peotà. Aje Janejare'e kasia rupi tè peotà,] e'i.#1Kor. 9.14; 1Tim. 5.17-18
11E'i jẽ Jesu ijupe kõ:
– Tena mõ pè pevãe remẽ, peeka rã'ĩ ava pyri põ pepytatà. Ava mõ pemomyta remẽ, a'e pyri tè pepytatà peke. Ajaatetà pejisyrytà a'e taa pe wyi peo, e'i. 12Ãmẽ tetã mõ wyry pè pevãe remẽ, kee pejẽ ypytà rã'ĩ: “Janejare'e owaray tapenereko”, pejẽ a'e tetã jarà kõ pè, e'i. 13Ãmẽ a'e tetã wyry pewarà kõ pepota katu remẽ, Janejare'e owaray wereko kõtà peayvu rupi. Ajamã'ẽ na'evoi sõ remẽ, owaray noereko kõ'ãi peayvu rupi, e'i. 14Taa pè pevãe remẽ napepotai kupa remẽ. Ãmõ, tetã wyry pewarà kõ napepotai teve remẽ. Ãmõ, peayvu ve ywete si noenutai kupa remẽ. Tapejisyry kõrijõ ãmẽ a'e taa pe wyi, e'i. Ena pe wyi pejisyry peo remẽ, tapejipyrokape tyvyro rã'ĩ yvy ky'akwerà reity pepy re wyi peo, e'i. [“Nerepotai pekupa remẽ, moko pejẽ jẽ peiko” jaa tè a'evoa.]#J.K.R. 13.51
15E'i jẽ Jesu:
– Ajaa jaa maekwerà rè kee a'e pejẽ. Kãramõ Janejare'e pirujẽ okãjãma maekwerà kõ omomoeratà. Omoe'yi kõtà ekoawerà kõ rupi katu. A'evo remẽ ayvu noenu tari maekwerà kõ omomorijautà. Ãmẽ peayvu noenu tari maekwerà kõ ywesõ ojimomorijauvaytà Sotoma taa pè opa maekwerà kõ wyi. Ãmõ, Komora taa wãnerà kõ wyi.#10.15 Karamoe remẽ Janejare'e omoma Sotoma wãnà kõ tata wasu pè jimo'yjẽ, ijaiwererà kõ rewarà mõ. Komora wãnà kõ teve a'evo wereko. Jinõ. 19.24-28; Mat. 10.15; 11.24 Aje aepo a'e pejẽ, e'i Jesu.
“Ojikõ'õ mãe kõ pytery pè poromonotà”, e'i Jesu mã'ẽ
(Maku 13.9-13; Rukasi 21.12-19)
16E'i jẽ Jesu wemimono rã kõ pè:
– Peenu rã'ĩ esa. Iwasuaytà peupe nivoi mãe kõ pytery pè poromono remẽ, e'i. Ãwitõ kaneiru jamono jawarà ojãrõ mãe kõ gyty remẽ, ojãrõ kuwa kaneiru rè jawarà. Ãwĩvotà penereko kupa, e'i. Ajawyi kee tapeiko ipyterà kõ rupi peiko remẽ. Tapemoa'u jẽ ikõ peiko nẽ. Tapetekokuwavay ikõ peiko nẽ. Ivo ikõ tapeiko jẽ ipytery kõ rupi nẽ. Sãtãmy tè ikõ peiko nẽ, e'i.#Ruk. 10.3
17– Tapemãrãmoa'u jẽ ikõ peiko nẽ, e'i. Ojikõ'õ mãe kõ pepyytà jõvijãgwerà kõ rovake peneraa. Jõvijã wasu kõ rovake peneraatà kupa, e'i. Penõpã nõpãtà teve kupa. Janejare'e ayvu rè jimo'ea retã mè a'evotà penereko kupa, e'i. 18Ekoty rewarà rõmõ pejẽ rewarà mõ ojimoãpãtà pene kupa. Ajawyi peneraatà jõvijã wasu kõ gyty. Nivoi mã'ẽ omo'y teywetetà pene jõvijã kõ rovake kupa, tapemomorijauoka kupa. Ãmẽ a'evo penereko kupa remẽ, eayvu pemojenutà a'e kõ pè, e'i. Juteu kõ pè rõmõ'ĩte rõwã aepo pemojenutà, e'i. Juteu rõwã mãe kõ pè teve pemojenutà, e'i. 19A'evo peneraa kupa remẽ, tapejimopirai e'ã ajamã'ẽ, e'i. “Manyvo a'età põkõ a'evo remẽ?” tapejẽ e'ã. A'evo remẽ tè katu Janejare'e omojikuwaokatà peayvu rã pejẽ. 20A'evo remẽ peayvu e'e pè rõwã peayvuvaja kõtà ãmẽ. Aje Janejare'e 'Ãg ayvu rupi tè peayvuvaja kõtà, e'i. A'e Papa 'Ãg tè peayvu rã oinõokatà pejẽ, e'i.#Ruk. 12.11-12
21E'i jẽ Jesu:
– Oikotà jane kõ kee ekoi mãe kõ. Ma'e. Teke'yry kõ omonotà omõmirĩ kõ sota kõ rovake tomojaiwe esa katu ijukaoka, e'i. Ojeovajarĩtà weke'yry reve kupa, e'i. A'evo ve janeruu kõ. Wãkarã kõ a'evotà wereko. Ojukaoka tary ve wãkarã kõ kupa, e'i. A'evo vetà ta'yry kõ uu rè, e'i. 22Pirujẽ yvy pewarà kõ napenesata'ãi erewarà mõ. Eremĩgwai kõ tè pejẽ rewarà mõ, pemomorijauvaytà kupa. Ajamã'ẽ a'evo ipe penereko kupa remẽ, tapejimomãatã jẽ ere peiko nẽ. Pemãnõa pe'ĩ tesõ pejirovija jẽ ere peiko remẽ, ãmẽ sõsi peiko karuarutà erena pè epyri, e'i.#Mat. 24.9,13
23– Tena mõ pè sõ pemomorijau kupa remẽ, kuise'ẽ tapejisyry ãmõ taa kyty peo. A'e pè tapemo'e jẽ ãmõ kõ eayvu rè, e'i. Peenu sikõ eayvu nẽ. Kee a'e pejẽ. Pirujẽ Isaeu kõ napemo'epaive remeve, ije, Janejare'e Remimuurerà ajimojane mã'ẽ rõmõ ajivy tarà mijẽ ajo. Aje ywete aepo a'e pejẽ, e'i.
24E'i jẽ Jesu:
– Kee tapekuwa. Temĩgwai kõ ywesõ rõwã oõvijã wyi ipi. Noapyrasa kuwa'ãi oõvijã kupa ipi. Ãwitõ tõvijã wereko kupa, ãwĩvo tary ve emĩgwai kõ wereko kupa. Temimo'earà ivo ve. Ãwitõ poromo'earà, ãwĩvo ve emimo'ekwerà kõ. Omo'earà 'arà kyty rõwãtà ekoi.#Ruk. 6.40; Juw. 13.16; 15.20 25Ajamã'ẽ i'ete otekokuwa paire, ojevo jẽ kuwa otekokuwa omo'earerà reve kupa. Ajawyi kee a'e pejẽ. Emomorijau kupa remẽ, napemoe'e'ãi kupa, eremĩgwai kõ rõmõ. Evo kwery pètà penereko kupa, e'i. Ajawyi pemomorijau kupa remẽ, “hoõ” tapejẽ kõrijõ ãmẽ, e'i. “Ta'evo nẽ ãmẽ”, tapejẽ kõrijõ. Kee a'e jẽ: “Ãjãgai rõvijã Peusepu#10.25 Satanasi pè Peusepu eu teve. Mat. 9.34; 12.24; Mak. 3.22; Ruk. 11.15 kasia rupi oposiko mã'ẽ”, e'i tite eupe emojaiwe kupa. Tysi tõ pejẽ! Aepo e'ità tè pejẽ kupa, e'i.
“Tapekyje e'ã poromoai mãe kõ wyi peiko”, e'i Jesu mã'ẽ
(Rukasi 12.2-5)
26Jesu oporegeta jẽ wemimo'earà kõ pè.
– Ajawyi kee a'e pejẽ. Tapekyje e'ã, ava mõ pemomorijau remẽ. Noerovijari mãe kõ tyvija rupi teipe penereko ai remẽ, a'evoa Janejare'e okuwa jẽtà, pirujẽ rè omã'ẽ ipi rewarà mõ, e'i. Omojikuwaoka jẽtà pirujẽ jane kõ tokuwa ky'y.#Mak. 4.22; Ruk. 8.17
27– Age'e iteetejẽ mã'ẽ rè poromo'e, e'i. Ajawyi eayvu pekuwa katu ky'y. Ajamã'ẽ ãmõ kõ nokuwaive. Ajawyi, “Pekwa ãmẽ eayvu mojenu jenu”, a'e pejẽ. Pirujẽ janekwerà kõ pè pemojenu ky'y.
28– Tapekyje e'ã ikõ poromoai mãe kõ wyi nẽ, a'e pejẽ. “Ejukatà maevo kupa”, tapejẽ e'ã. Janejuka sõ kupa remẽ, janepirà tè ojukatà kupa. Nojuka kuwa'ãi jane 'ãg kupa. Janepy'a pewarà nojuka kuwa'ãi teve kupa. Pejuka paire manyvo ne'i'ãi penereko ai kupa ky'y. Janejare'e kõrijõ tè jane'ãg ojuka kuwa imonooka jimomorijau wasua rena kyty, janepirà revejẽ, e'i. Ajawyi Janejare'e kõrijõ tè tapemomojy, a'e pejẽ, e'i Jesu.
“Janejare'e oja'a katu janere ipi”, e'i Jesu mã'ẽ
(Rukasi 12.6-7)
29Kee e'i jẽ Jesu:
– Nijaja'ai kãpĩnà rè ipi. Temimota katu ywe'e rõwã. Epy rõmõ jame'ẽtà remẽ naepyi ipi. Ajamã'ẽ a'evo ipe remẽ Janejare'e oja'a katu jẽ ee kõ ipi. Ajaate o'a yvy kyty omãnõa pe'ĩ. 30-31Tysi tõ jane ky'y! Janere ywesõ Janejare'e oja'a kãpĩnà kõ wyi ipi. [Janerauvay wyi a'evo oja'a janere.] Janekuwa katuay ipi. Janeapira mosa'ãga kõ ve tesõ okuwa. Omoirõ irõma katu oja'a ee. Ajawyi tapekyje e'ã [poromomorijau mãe kõ wyi] ipi, Janejare'e okãte'ã pene rewarà mõ, e'i Jesu.
“Tapejinõsĩ e'ã ekoty rewarà rõmõ peiko”, e'i Jesu mã'ẽ
(Rukasi 12.8-9)
32E'i jẽ Jesu:
– Ajawyi kee a'e pejẽ. Tapejinõsĩ e'ã ikõ ewyi peiko nẽ! Ava mõ nosĩ, “Jesu koty rewarà tè ije”, javo jane kõ rovake remẽ, ije ve, “Aje, ekoty rewarà tè ãwĩ”, a'e tary ve Papa pè yva pè ãmẽ, e'i. 33Ãwĩvo ve ava mõ, “Erõvijã rõwã Jesu”, e'i sõ jane kõ rovake remẽ, “Eremĩgwai rõwã ãwĩ”, a'e tary ve Papa pè yva pè ãmẽ, e'i Jesu.#2Tim. 2.12
Nijajimo'ãgatui remẽwarà
(Rukasi 12.51-53; 14.26-27)
34Jesu e'i jẽ:
– Maevo kee pejẽ tite: “Jesu si poromojimoryokatà, ãwisõ pirujẽ ãmõ e'y e'yiwarà kõ tojimory ojee ky'y”, pejẽ tite ije. A'evoa rõmõ rõwã ajo. Ijai jẽtà kupa. Ojimoai ywete jẽtà kupa. Ojikõ'õ jẽtà ojee iko kupa. Age'e ywesõ si a'evotà, avãema rewarà mõ.
35Keetà ajo rewarà mõ. Ma'e. Kwaima'e opokotà uu rè. Wãivĩ opokotà teve oy rè. Otija rè opokotà teve. “Epy'a rupi katuwarà rõwã ene ky'y”, e'ità ojiupe kupa. Wãisõ nojimory'ãi ojee kupa ky'y. [Pe'ĩ ekoty rewarà tè. Ãmõ, ekoty rewarà rõwã. Ajawyi a'evotà ekoi kupa.] 36Ajawyi pirujẽ ojetãrã teipe remẽ, ojimoãpã jẽtà maevo ojee ky'y. Pirujẽ maevo ojikõ'õtà ee kõ, ekoty rewarà kõ rõmõ tè ekoi kupa rewarà mõ.
37– Kee a'e teve pejẽ. Erupi peotà remẽ, ije ywesõ terau penetãrãgwerà kõ wyi pekupa. Penuu wyi. Ãmõ, pey wyi. Ãmõ, peãkarã kõ wyi. Pirujẽ penetãrã kõ wyi. A'e kõ ywesõ peau sõ ewyi remẽ, ni'ei eremĩgwai rõmõ peiko, e'i.
38– Ãmẽ ava mõ sõ opota pejuka eayvu rupi peiko rewarà mõ remẽ, tapekyje e'ã iwyi. Tapenearai e'ã eayvu wyi. Tapeity e'ã eayvu. Penerekoa rã tapeity e'ã teve. Peity sõ remẽ, ni'ei eremĩgwai rõmõ peiko, e'i.#Mat. 16.24; Mak. 8.34; Ruk. 9.23
39– Ava mõ sõ pejukatà erewarà mõ remẽ, ikatu jẽtà peupe. Janejare'e pyri tè ajaire peiko jẽtà. Mãerã tè peiko karuarutà ipyri, e'i. Ajamã'ẽ pejisyrytà sõ peikoa rã wyi remẽ, ãmẽ sõsi nikatu'ãi peupe. Napeiko karuaru'ãi Janejare'e pyri ãmẽ, e'i.#Mat. 16.25; Mak. 8.35; Ruk. 9.24; 17.33; Juw. 12.25
“Ava mõ oryvay pene remẽ, ere oryvay tary ve”, e'i Jesu mã'ẽ
(Maku 9.41)
40E'i jẽ Jesu ijupe kõ:
– [Eremĩgwai kõ rõmõ peotà jane kõ pyri.] Ajawyi ava mõ oryvay pene remẽ, ere oryvay tary ve, eremimono kõ tè pejẽ rewarà mõ. Ãwĩvo ve ava mõ oryvay ere remẽ, Emuuarerà rè oryvay tary ve.#Ruk. 10.16; Juw. 13.20; Mak. 9.37; Ruk. 9.48
41– Ãmẽ ava mõ kee e'i pejẽ remẽ, Janejare'e orytà ee ãmẽ: “Janejare'e ayvu mojenuarà tè ene. Ajawyi ajimorytà nere”, e'i peupe remẽ. Janejare'e wepyme'ẽtà ãmẽ. Ãwitõ wayvu mojenuarà wereko katutà kãramõ, a'evo tary ve ee ojimorytà mã'ẽ, e'i. Ojevo jẽ wereko katutà, e'i.
42– Kee jaa rè tapeja'a. Janejare'e wauvay eremĩgwai kõ ipi. Ajawyi ava mõ yy ome'ẽ eremĩgwai mitikwerà pè to'u remẽ, eupe omẽ'ẽ maevo sõ tite. Ajawyi oryvaytà Papa ee epyme'ẽ. Aje ywete a'evotà, e'i Jesu wemimo'ekwerà kõ pè.
હાલમાં પસંદ કરેલ:
Mateusi 10: oymNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
