Amatie 2

Bãŋrɩba sẽŋɛ ka yẽ Azezi

1Ba daan dɔgɛ Azezi la Bɛtelɛm n boe Zude so'olʋm, se'emwẽnnɛ tɩ A'erɔdɩ de naba la. Tɩ bãŋrɩba ze'ele dapɔa bɔba wa'am Zerizalɛm, 2wa soke yetɩ: «Bia la tɩ ba dɔgɛ la boe la bɛ, sɛka n wʋn dɛna Zifdõma naba la? Tõma yẽ la a wõrbiire dapɔa bɔba, bɛla ĩyã tɩ tõma wa'am tɩ tɩ nã'asɛ ẽ.» 3La naba A'erɔdɩ n daan wõm bɛla la, ẽŋa la Zerizalɛm dõma wuu yɛm n yɔɔrɩ. 4Tɩ A'erɔdɩ daan lagsɛ kãabgɔ kẽma nẽŋadõma, la lɔɔ karẽnsãandõma la wuu, soke ba yetɩ: «Tẽn-kãna tɩ ba wʋn dɔgɛ Krisi la?» 5Tɩ ba yele ẽ yetɩ: «Bɛtelɛm n boe Zude so'olʋm na, se'ere n soe la, Nawẽnnɛ nõtɔ'ɔsa la yʋʋn gʋlsɛ yele la wãna:

6‹Bɛtelɛm n de tẽn-pɩka,

fʋ ka pɔ'ɔgɛ Zude so'olʋm tẽn-kãra la pʋam,

se'ere n soe la,

nẽra n wʋn yese fõn pʋam dɛna nẽŋadãana bɩsra Ɩsrayɛlɩ dõma n de mam nẽrba la yelle.› »

7La A'erɔdɩ sʋgɛ mɛ wi bãŋrɩba la soke ba bãŋɛ wẽnse'ere tɩ wõrbiire la yese, 8dee tõm ba yetɩ: «Sẽŋɛ-ya Bɛtelɛm ka ɛ soke bãŋɛ bia la yelle sõŋa sõŋa, la ya sãn yẽ ẽ, ya leme wa'am wa yele mam tɩ mam mẽ sẽŋɛ ka nã'asɛ ẽ.» 9La ban wõm naba la yetɔga la, ba sẽnnɩ mɛ wɛ'ɛsa, darɛ le yẽ wõrbiire la tɩ ba daan yẽ dapɔa bɔba la n tole ba nẽŋa, tarɩ ba halɩ ka paagɛ bia la n boe zẽ'e-sɛka la ze'ele.

10La ban daan yẽ wõrbiire la, ba sũure ẽŋɛ yẽlʋm mɛ halɩ zozo'e. 11Tɩ ba kẽ yire la pʋam yẽ bia la, la a ma Amaari, ka dũma tẽŋa bia la nẽŋam nã'asɛ ẽ, dee lorge ba lɔgrɔ loose ban tarɩ sɛla la bɔ ẽ. Ba daan de la sãlma, la tɩdarɛ, la miiri n tarɩ yũuŋ-yẽlga.

12Tɩ Nawẽnnɛ daan kã'an ba zãasŋɔ pʋam yetɩ, ba da le doose naba A'erɔdɩ zẽ'am, bɛla tɩ ba daan doose sore ayẽma lebe kule ba tẽŋa.

A'erɔdɩ boorɩ tɩ a kʋ Azezi

13Bãŋrɩba la n fõrgɛ la, tɩ Nawẽnnɛ malɛka puke a mẽŋa pa'alɛ Azozɛfʋ zãasŋɔ pʋam, yele ẽ yetɩ: «Isge tarɩ bia la, la a ma la zoe sẽŋɛ Ezipti ka bɔna bilam halɩ tɩ m le wa yele fʋ se'ere. Se'ere n soe la, naba A'erɔdɩ wʋn ɛɛra bia la mɛ tɩ a kʋ.» 14Tɩ Azozɛfʋ isge yʋ'ʋŋɔ tarɩ bia la, la a ma la sẽŋɛ Ezipti, 15ka bɔna bilam halɩ tɩ A'erɔdɩ wa ki. La ẽŋɛ la bɛla, tɩ Zuudãana Nawẽnnɛ n yʋʋn botɩ a nõtɔ'ɔsa yele se'em na ẽŋɛ. A yʋʋn yetɩ:

«Mam wi m Dayʋa la n boe Ezipti la tɩ a wa'am.»

16La A'erɔdɩ n daan bãŋɛ tɩ bãŋrɩba la pã'asɛ ẽŋa mɛ na, a sũure n yĩige halɩ, tɩ a tõm nẽrba yetɩ ba sẽŋɛ Bɛtelɛm, la tẽn-sɛba n boe a kẽnkɛrsɩ la wuu ka kʋ budim-sɛba wuu n masɛ wʋ yʋʋma ayi, la sɛba n ka paagɛ bɛla la, wʋ ẽŋa n daan soke bãŋrɩba la bãŋɛ se'emwẽnnɛ tɩ wõrbiire la yese la.

17Bɛla tɩ Nawẽnnɛ nõtɔ'ɔsa Azeremi n yʋʋn yele se'em na ẽŋɛ. A yʋʋn yetɩ:

18«Ba wõm tagursi Rama tẽŋa,

kʋʋnɔ la fablɩgɔ zozo'e.

La de la Arasɛlɩ n kellɩ a kɔma yelle,

tɩ ba pã'asra ẽ tɩ a ka sakra tɩ a go'oge.

Se'ere n soe la, a kɔma la ka le bɔna.»

19La naba A'erɔdɩ daan wa ki mɛ, tɩ Zuudãana malɛka puke a mẽŋa pa'alɛ Azozɛfʋ zãasŋɔ pʋam Ezipti, yele ẽ yetɩ: 20«Isge tarɩ bia la, la a ma la lebe Ɩsrayɛlɩ tẽŋa, se'ere n soe la, sɛka n daan eerɩ bia la tɩ a kʋ la ki mɛ.» 21Tɩ Azozɛfʋ isge tarɩ bia la, la a ma la kule Ɩsrayɛlɩ tẽŋa.

22La a daan wõm mɛ tɩ Arkelawusi n sɔɔgɛ a sɔ A'erɔdɩ zẽ'am di Zude na'am. Tɩ a daan zoe dabeem ka sẽŋɛ Zude so'olʋm. Tɩ Nawẽnnɛ kã'an ẽ zãasŋɔ pʋam, tɩ a sẽŋɛ Galile so'olʋm. 23A daan sẽŋɛ ka kẽ'era la tẽŋa yʋ'ʋrɛ n de Nazarɛtɩ. Bɛla tɩ Nawẽnnɛ nõtɔ'ɔsrɩba la n daan yele se'em na ẽŋɛ. Ba daan yetɩ: «Ba wʋn wi'ira Krisi la tɩ Nazarɛtɩ nẽra.»

હાલમાં પસંદ કરેલ:

Amatie 2: gurDBL

Highlight

શેર કરો

નકલ કરો