Madiu 5
5
Yesu oya fafaline vemwamwala velemo'ena fa'ina givehawala.
Luke 6:20-23
1Tu Yesu yo'o gi'itadi-yo oya fafaline gilaka, au givetogana ada ana tomuliyamomo Bana againe hivaga'auta. 2Hivaga'auta-yo au givebutu givehawaledi gigayo,
3Gaveyao taudiyao nuwadiya hihawavekoyokoyoyedi, medema yadi vemwamwala gavatubuga!
Gavadi-yo? Au Yaubada yana itave'avina againe himimiyami, ase'asediya givehivehimeya.
4 #
Ha 7:17
Gaveyao yadi watagiya himimiyami, medema aimo yadi vemwamwala gavatubuga!
Gavadi-yo? Au Yaubada nuwadi ginakiveyamumuna.
5 #
Ef 4:2
Gaveyao umaumadiyao, medema yadi vemwamwala gavatubuga!
Gavadi-yo? Au babi lobama ana matatabuna adi du'u hinanuhagana.
6Gaveyao nuwanuwadi lakahina yadi nuwanuwa ginayegayega kaliva mafulauga o ka'i agotaina fa'ina nuwanuwadi lakahina a'a o gufa amine, medema yadi vemwamwala gavatubuga!
Gavadi-yo? Au Yaubada yadi nuwanuwa amine ginaveledi, nuwanuwa yegayegana ase'asediya ginase-'owona.
7 #
Ye 2:12-13
Gaveyao tobohiyadiyao hihinekalikaliyedi, medema yadi vemwamwala gavatubuga!
Gavadi-yo? Kadu Yaubada badi'iyao ginahinekalikaliyedi.
8 #
1Yn 3:2-3
Gaveyao ase'asedi yegayegana, medema yadi vemwamwala gavatubuga!
Gavadi-yo? Au Yaubada hina'itahalamanena.
9Gaveyao kaliva yadi vekwageya againe hikukuyedi, medema yadi vemwamwala gavatubuga!
Gavadi-yo? Au Yaubada ginahawavenatunedi.
10 #
1Fi 3:14
Gaveyao Yaubada yana nuwanuwa hidibudibumuhigena ada hidema fa'ina mali kaliva hikivekoyodi, medema yadi vemwamwala gavatubuga!
Gavadi-yo? Au Yaubada yana itave'avina againe himimiyami, ase'asediya givehivehimeya.
11 #
1Fi 4:14
Ka'i kaliva hinahawavelaigemi kadu hinakivekoyomi omi wamulimuliyeku fa'ina, au yami vemwamwala gavatubuga!
Kadu ka'i gaitoma moya'aina fa'ina hinahawavekoyoyemi tu hinafwaya amine, ka'i hidedemi agaimiya hinahuluva omi aku tomuliya fa'ina, au yami vemwamwala gavatubuga!
12 #
Ye 1:2
Au nuwami ginayamumu kadu wanavemwamwala fa'ina aimo lobameya ami laufata lakahina wananuhagana. Boi tuwai-mo'ena kaliva Yaubada bonana ana to'awatalatalaina hikivekoyodi-yo adi laufata yamumuna lobameya hinuhagana amine, meda anafaiweya omi'iyao kaliva yadi kivekoyo fa'ina ami laufata lobameya wananuhagana.
Yesu lehaga kadu mahala fa'ina gilukahihi.
Maki 9:50; Luke 14:34-35
13Omi vaita lehaga amine tomiyababi hinafadiya. Lehaga kevakeva yana madukoyo gihawatana amine, meda omi'iyao dewa koyona ana tubuga wanahawatana. Tu ka'i lehaga yana digadigaga gidahavaina digo, keke adafaiweya kadakivedigagi-havagileni, au keke-mo'a. Ada ka'i lehaga yana digadigaga keke, kadu yana faisewa keke. Au kadahegena be kaliva hidavagavebabina.
14 #
Yo 8:12
Kadu omi vaita mahala amine tomiyababi hinafadiya. Ka'i melala oya kabune hinave'alahina amine, keke adifaiweya yadi manuwa hinasevauyeni, au kabu'avane gidauda. 15#Mk 4:21Ka'i kaliva lamufa ginakabuna amine, keke avaeka againe ginavetalabodani, keke. Au ana abasewadi againe ginaselakahina be moya'aidi manuweya ginatuvemahalidi. 16#Ef 5:8-9; Yo 3:21; 1Fi 2:12Meda anafaiweya yami mahala, higa yami dewa yamumuna, kabu'avane wanasena be kaliva moya'aidi hina'itana. Yami dewa yamumuna hina'ita-yo au Tamami lobameya gimimiyami-ma ana egana hinakilakahina.
Mosese yana vehimeya fa'ina Yesu givehawala.
17 #
Lo 3:31
Kadu'e keke wananuwanuwa vaita Iya gahobu'ela be Mosese yana vehimeya kadu Yaubada bonana ana to'awatalatalaina yadi vehawala ganahawatani, keke. Au Iya gahobu'ela be vehimeyai-nadi ana nuwanuwa ganaseyemaune-'owona ada au gana'alakakikakilina. 18#Lu 21:33Gagahe velemo'ena lobama be babi ginaduva-vagata amine, meda hida vehimeyai-nadi ana nuwanuwa ginaduva-vagata. E, keke tamo vehimeya kabi'ona o ka'i vehimeya kali'uhona hinahawatani, au ana nuwanuwa matatabuna ginalakayemu-'owoga. 19#Ye 2:10Ada au gava kaliva hida vehimeya ana nuwanuwa kabi'o-mo'ena keke ginadibumuhigeni, o ka'i kaliva ginavehawaledi be kadu badi keke hinadibumuhigeni, au medema ana egana kabi'ona Yaubada yana yo'ogaga agaidiya. Tu gava kaliva hida vehimeya ginadibumuhigena kadu mali kaliva ginavehawaledi be hinadibumuhigena, medema ana egana lakahina Yaubada yana yo'ogaga agaidiya. 20#Md 23:3; 2Ti 3:5Kadu gagahemi badi tonagona tafatafalolodiyao adi egana Falisi kadu Mosese yana vehimeya ana tovehawala kebuladiya hihuluhuluva tunutunugina. Ka'i yami huluva tunutunugina badi kalivai-dina yadi huluva keke ginatubuhegeni digo, keke amifaiweya Yaubada yana yo'ogaga agaidiya wanaluku.
Yesu nuwakoyo fa'ina gilukahihi.
21 #
Yem 20:13
Tu boi tuwai-mo'ena kaliva lakahidiyao agaidiya vehimeya sa'eyana gi'ela ada vehimeyai-nadi omi wahalamanena, higa gigayo, Keke kaliva unaluve'alikani, ada ka'i tamo hakwadi kaliva ginaluve'alikana, medema tovedewayauga matane ginamidi. 22#Ye 3:6; 1Yn 3:15Hidemi vehimeya gigahe tu Iya gagahemi gava kaliva tobohiyana againe ginanuwakoyo amine, medema tovedewayauga matane ginamidi, fa'ina nuwakoyo kadu luve'alika au sa'eyana Yaubada matane. Kadu gava kaliva tobohiyana againe ginagayo, O kwavakwava kwavakwava-mo'e, medema abavedewayauga lakahina againe ginakotu. Kadu gava kaliva tobohiyana ginahawave'iyohoyohoyena, medema ai gi'alata-vagata againe hinahegena.
23-24 #
Mk 11:25
Medema fa'ina ka'i manuwa-tafalolo againe unaluku be unavebutu tolama againe ya velekawowo Yaubada matane unaseni tu tobohiya o againiya ginuwakoyo-ma nuwa gina'afolena amine, au ya velekawowo ginamiya tu nagona unana tobohiya buye wanaveyao. Wanaveyao ginahavaina, o unayewa ya velekawowo unasena be Yaubada unahawadavadavana.
25Ka'i tamo hakwadi nuwanuwana o ginavekotu amine, unagaluvaluva abavedewayauga ana eda againe wananauna tu wanaveyao. Ka'i keke wanamaduveyao, tovedewayauga againe ginahegenauwe ada tovedewayauga filisimani nimadiya ginaseni be deliya hinanauwe. 26Gagahe velemo'ena keke hinamaduyau. Tu nagona a laufata unase-'owona, muliya hinayau.
Yesu kelele kadu viholili fa'ina gilukahihi.
Maki 10:11-12; Luke 16:18
27 #
Yem 20:14
Kadu hida vehimeya sa'eyana tuwai-mo'ena hisena-ma wahalamanena. Higahe higayo, Keke unakelele. 28Tu Iya gagahemi gava kaliva kwamayoku gina'italuvadigena be higa vaita buye hinadauda, medema ase'asene ahe gikelele. 29Ka'i mata i'ataginiya koyona againe ginavebe'u, mata unamwamwalina be unahegena. Ka'i talaini sa'eyana unanuhegena tu lobameya unaluku, medema vita kabi'ona tu ka'i wowo tauna abaga koyona againe ginaluku, medema vita lakahi-mo'ena. 30Kadu ka'i nima i'ataginiya koyona againe ginavebe'u, nima unabobona be unahegena. Ka'i talaini sa'eyana unanuhegena, medema vita kabi'ona tu ka'i wowo tauna abaga koyona againe ginaluku, medema vita lakahi-mo'ena.
31 #
2Veh 24:1
Kadu vehimeya sa'eyana tuwai-mo'ena hisena-ma higahe higayo, Ka'i kaliva vavinena ginakilowedi amine, bana anafaiweya yadi fefe ginaveledi, higa bana tauna yadi nagi gidabana-ma ana iya'iyaya. 32Tu Iya gagahemi gava kaliva vavinena keke hidakelele tu ginakilowe-kawowodi, medema yana kilowa fa'ina badi vaita nagi ana vehimeya keke hida'abini, higa ka'i kwamayoku hinanagi-havagi, au badi adi egana to'udo. Kadu kaliva velugana ginanagidi-ma bana ana egana to'udo.
Yesu wonadabadaba lakahina fa'ina gilukahihi.
33 #
Yem 20:7
Kadu'e, tuwai-mo'ena kaliva lakahidiyao agaidiya vehimeya sa'eyana gi'ela ada vehimeyai-nadi omi wahalamanena, higa gigayo, Yami wonadabadaba wana'itave'avina, au gavaimi Kaiwabu againe wawonadabadaba, medema wanahuluvina. 34#Ye 5:12Tu Iya gagahemi yami gahe againe keke Tomiyagetane ana egana wanayakahini. E, yami gahe vaita velemo'ena ma wanayemaunena fa'ina, keke lobama ana egana wanayakahini, fa'ina lobama medema Yaubada yana didiga'u'u. 35Kadu keke babi ana egana wanayakahini, fa'ina medema Yaubada agena ana abasewadi. Kadu keke Yelusalema ana egana wanayakahini, fa'ina medema Yaubada yana melala kikaiwabuna. 36Meda anafaiweya yami gahe vaita velemo'ena ma wanayemaunena fa'ina, keke u'umi ana egana wanayakahini, fa'ina omi'iyao keke amifaiweya u'umi kukwauhina sa'eyana wanakivesiuni o ka'i siusiuna sa'eyana wanakivekwauhini, au hidedemi Yaubada anakaibe ana tagalowalowa. 37Auwe, ka'i nuwanuwami yami gahe velemo'ena ma tovanenega hinahalamanena, au wanagaheye-mo'ena. Ka'i ehe digo, “Ehe.” Ka'i keke digo, kadu “Keke.” Ka'i Tamada ana egana buye wanayakahina, medema dewai-nadi inubana Setani againe.
Yesu koyona ana laufata fa'ina gilukahihi.
Luke 6:27-31
38 #
Yem 21:24
Kadu hida vehimeya sa'eyana tuwai-mo'ena hisena-ma ahe wanogalina. Higahe higayo, Ka'i tamo hakwadi o mata ginakifuwana, au kadu bana matana unakifuwana. Ada ka'i tamo hakwadi o nigo ginakimwanuna, au kadu bana nigona unakimwanuna, higa nimana unafatana. 39#Lo 12:19Tu Iya gagahemi ka'i tamo hakwadi ginakivekoyomi, keke nimana wanafatani. Ka'i tamo hakwadi navanavami i'atagimiya ginatafina, au navanavami i'imawamiya wanahawahegena be ginatafina. 40#1Ko 6:7Kadu ka'i tamo hakwadi nuwanuwana ginavekotumi be ami seti ginavaina fa'ina, au ami seti kadu ami aikeva vewabana buye wanavelena. 41Kadu ka'i tolugaviya sa'eyana ginakive'avimi be yana lokoloko omi ginave'avalami, higa vaita bai sa'eyana wanawahina, au bai luhei wanawahina. 42Ka'i kaliva sa'eyana tamo gavadi fa'ina ginave'o'olemi, au wanavelena. Ka'i kaliva sa'eyana nuwanuwana tamo gavadi yami lokoloko fa'ina ginave'o'ola be aimo ginaveleyewena au wanahawahegena.
Yesu tokivekoyo adi nuwakabubu fa'ina gilukahihi.
43 #
1Veh 19:18
Kadu hida vehimeya sa'eyana tuwai-mo'ena hisena-ma wanogalina. Higahe higayo, Badi buye wavetobohiyana-ma wananuwakabubuyedi tu badi hitalahagiyemi-ma wanakilowedi. 44#Af 7:60; Lo 12:14,20Tu Iya gagahemi badi hitalahagiyemi-ma wananuwakabubuyedi ada badi hikivekoyomi-ma fa'idiya wanave'o'ola. 45#Ef 5:1Hidede amine wanahuluva be kaliva hinahalamanena omi Tamami lobameya nunune wananauna. Au Bana givehimeya be yana kauwana tokoyona kadu toyamumu meda sa'eyana gituvemahalidi, ada wehi gi'iveninisena be toyegayegana kadu tokoyona meda sa'eyana agaidiya gihobuhobu. 46Ka'i tonuwakabubugaga adi loi wananuwakabubuyedi tu keke tonuwalolona wananuwakabubuyedi, keke hida huluva fa'ina laufata yamumuna Yaubada nimane wananuhagani. Au takesi ana toyaudi kiki'afudiyao tu hidedemi taudiyao tobohiyadiyao hinuwakabubuyedi. Tu omi'iyao ma yami nuwakabubu badi takesi ana toyaudi yadi nuwakabubu gidatubuhegena. 47Kadu ka'i tobohiyamiyaogaga wanalusiuleyedi tu kaliva-kawowo keke wanalusiuleyedi, keke wananuwanuwa vaita yami huluva yamumu-mo'ena. Au yo'o tulidiyao kalivai-dina nuwadi keke mahamahalina amanadi tu hidedemi tobohiyadiyaogaga hilusiuleyedi. 48#1Fi 1:16Au Tamami lobameya yana nuwanuwa mahamahali-'owogina ada meda gilubodami be yami nuwanuwa ginamahali-'owona.
હાલમાં પસંદ કરેલ:
Madiu 5: viv
Highlight
શેર કરો
નકલ કરો
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
