Mwanzo 6
6
Ubaya wa binadamu
1Wakati wanu pawakizidi kongezeka duniya na wákiwapongola wanawaka, 2basi majini#6:2 “Majini” kufasuli kwengine ndi “wana wa Nlungu”. Mana ake viyumbe sawawoneka fala siwo malaika. pawákiwawona wanawaka ware kuwa wema, wakiwatwala wawákiwajibu pakulu onse wakiwalomba. 3Mola wetu akisema javi: “Roho yangu aikala na mwanadamu daima milele, konta iye ndi mwiri mwepepe tu, basi aainshi zaida ya myaka miya na shirini.” 4Kwa nowo wakati-wo na ikisa tena, eyi duniya-yi wákiwapo mitimwi au majini#6:4 Kiebraniya: “wana wa Nlungu” ewo wâwalomba wanadamu na wâpongola nawo wana. Ewa wana-wa ndi mitimwi yawenye wawere wanu wa kusifiwa wakati wa mida.
5Mola wetu duniya paawawónire wanu kuzidi ubaya pakulu na myoyo yawo kwijala mawazo a mipango ya ubaya ntupu, 6akisikitika sana kwa kumumba binadamu duniya-yi akirishuku pakulu futi. 7Basi Mola wetu akamuru akisema javi: “Níwapoteza wanadamu piya waniwómbire níwalainisa duniya: wanadamu, manyama, nyuni na wadudu piya wa kurikweta pansi. Nisikitika konta nijiwa niwómbire futi duniya-yi.” 8Falakini Mola wetu ákinnang'aniza sana Nnu.
Nabii Nnu akwamuriwa kulunda safina
9Eyi ndi hadisi ya mainsha a nabii Nnu. Nnu ákiwa mwananlume wakweli, na ákiwa yeka basi saakosire wakati wa mainsha ake. Iye ákipatana na Mwenyezimungu. 10Nnu ákiwa nawo wana watatu wakwitiwa Shemu, Hamu, na Yafeti.
11Sambi, ulumwengu dainfu mbere ya Mwenyezimungu, ukijala ukakatima. 12Mwenyezimungu akinang'aniza ulumwengu, katajabu kawona udainfu kamana wanadamu piya wenenda namuna ya udainfu mulumwengu. 13Ikisa Mwenyezimungu kamwambira Nnu akamba: “Omi nílamula javi: Niwaribu wanu piya, konta wejaza dhuluma#6:13 “Dhuluma” mana ake ndi maanswi. nduniya na nitakuwaribu pakulu futi pamoja na duniya. 14Lunda safina na mbawo za ntumbati, ujenge nyumba nkati, wawanye visusi, udeni balaki panja na nkati. 15Vyaujuzi kutenda ndi javi: pima 133 za urefu, pima 22 za upana, na pima 13 za ujunda. 16Uvike pajulu ya safina na wase ando mmoja kiyasi ca palumu mbiri na nusu kulawa julu yaufinike kuja nkipama. Upande utende nryango na gorofa ziwe natu, ya kwanza, ya piri, na ya tatu. 17Ardhi piya nímpereka mwanalukaya wa kuzidi, awáribu wanu mulumwengu piya wari sini ya binguni, kila kiyumbe mwenye kupumuzika. Piya wenye mainsha mulumwengu wakufwa. 18Falakini nísaka kutula miyadi ya kupatana nowe. Újuzi wingire nsafina uwe, nkawako, wanawo na wakwezo. 19Wakija manyama, uwase wengire nkati ya safina wainshi nawe pamoja, kila namuna ya nyama na nyuni, awepo muka na nlume. 20Kila namuna ya nyuni, kila namuna ya ndudu wa maulu mane na wengine tena wa kurikweta pansi, wákufika wawiri-wawiri kusakula uwape mainsha wainshi. 21Ukusanye cakuriwa conse cingi uture, ca kukutosha uwe na wadudu.” 22Nnu katenda piya sawa-sawa kamba Mwenyezimungu vyaantumire kutenda.
હાલમાં પસંદ કરેલ:
Mwanzo 6: wmwBI
Highlight
શેર કરો
નકલ કરો
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.