San Juan 3
3
Jesús Nicodemo dʉi iyʉʉ arr
1Woun ãb sĩejim, Moiseeu Ẽwandam iek phã pʉatarr wajapcha ʉʉrkhaajem khʉʉn eem, Nicodemo a thʉ̃r sĩerr. Maan judionaan eem chi thethem ajim ĩchab. 2Mag wounau edaar Jesús aig beewia irig, —Maestro, marau khaphʉ nʉmgui ajim, chadcha Ẽwandamauta pʉ pʉijim, ich iek marag jaaumkhĩir. Í pʉ dʉi sĩewai merag chukhu simgui ajim, jãg ag na õrau nem ooba aajempa pʉchdeu wau sim gaaimua. Magba aawai ni ãbmuajã jãg pua nem wau simjo wauba nʉmgui ajim. Magua mʉ pʉ aigta beejimgui ajim, Ẽwandam chi Porkha sim aar jãga mʉ i dʉi chirsiju mʉchig khap jaaumkhĩir.
3Magbaawai Jesuu irig, —Pʉde ũrbarí, mua pʉrʉg jaaukhimgui ajim: Chi deeu eeupemjo thaababa sim chan pod Ẽwandam ichta chi Porkha sim aar oberbamgui ajim, i chaai khaba sĩewai.
4Magbaawai Nicodemoou irig jeeumamua, —¿Pari jãga ya mʉg maach chi jooi chirʉm deeu thaababarju? ajim. ¿Wa deeuta dich ãd bi ee dubju aai sĩwa ajim, ũwaai thaababaag?
5Magbaawai jũrr Jesuu deeu ũwaai, —Ʉ̃hʉ̃, mua chan sĩi thaabaa chaar thaaba nʉm jaauba chirʉmgui ajim. Mua mag eeupemjo thaabaju a chirʉmʉn, Juanau por choo simua jaaujerrjo Ẽwandam Akharag dich khĩirjug chi iiurig paapʉipi nʉmta jaau chirʉmgui ajim. Magbam chan pod Ẽwandam sim aar oberbam, agtha i den khaba sĩewai. 6Maach ãdau maach thaaba nʉmʉn sĩi mʉig eegarpai wenʉrraagau. Pari Ẽwandam Akhaar au nʉmuata deeu thaababarmjo nʉmʉn chadau jũrr ʉ̃gthar pawiajã ich mag wenʉrraagau ajim. 7Pari mua mag pãach thumaam khʉʉnta deeu thaabaju aai nʉm a chirʉm ũrwia oob atcha jʉ̃gderraa amgui ajim. 8Ẽwandam Akhaar au nʉmʉn phũ we thʉnʉmjota simgui ajim. Phũun parhooba ich wem aig nem theeg juu urum ũurjem, pari pod khaugba aajem, jammuata urú wa jamagta ma. Ich agjota simgui ajim, Ẽwandam Akhaarjã õor ee sĩeicheewai. Chi Akhaar bʉ̃ʉrjã ooba nʉm, pari mag simuata ich iiu aawai eeu thaababarmjo maach khĩirjug chi iiurig paapäaijemgui ajim irig.
9Magbaawai deeu ich Nicodemooupai Jesuug, —Pua mag sim aig, ¿jãga aawaíuma? ajim irig.
10Magbaawai Jesuu irig magjim:
—¿Pʉʉta israelnaan ee maestro aawai õrau iigjemta mʉg mua Ẽwandam Akharauta khĩirjug ajaug paapäaijem jaau chirʉmjã khaugbata chirab? 11Pʉde ũrbarí, pʉrʉg jaaukhimgui ajim: Maraun chadcha maachdeu khaphʉm nemta jaaunaa maach daúacha ootarrta jaaujem, mamʉ pãrau ʉkhamapha nʉmgui ajim. 12Magnaa irig, Mʉig eegarm nemdampai mua jaau chirʉmjã pãrau ʉkhamapha nʉm, ¿jãga ʉkhaagauma ajim, ya Ẽwandam khĩirjugcha mua pãachig jaaubaadeewai?
13’Agtha iwiir ãbjã ʉ̃gthar Ẽwandam sim aar maba sim, i khĩirjug khap aag; ãba i aarmua beetarr wounaupaita Ẽwandam khĩirjugan khaphʉ simgui ajim, õrag jawaag; wajapcharan mʉch chi Emkhooi Iewaama. Mʉch khabahab ajim, Ẽwandam aarmua beetarr aawai deeu i aar maju. 14Pari magaag atheyan, israelnaan õor maba aajem ee jãg Moiseeu phe wai nʉrraawai Ẽwandamau irig bronce den nemkhõrkha waunaa pa gaai ʉ̃gthaa jiirjoppi jaautarrjo, ich agjota ĩchab mʉch chi Emkhooi Iewaajã pa gaai jiirjopju aai chirʉmgui ajim, magbarmua õor peerdʉju ayaa amkhĩir. 15Wajapcharan mag nemkhõrkha wau sim pa gaai jiir wejorragta oobaawai monaaujerrjo, chi mʉrʉgta ich peerdʉ aupi sim khʉʉn peerdʉwia Ẽwandam aarcha oberwia ich mag iiu sĩerrajugui ajim.
Ẽwandamau maach khõsi arr
16’Pari magaagta Ẽwandamau oowai mʉg durr gaaim khʉʉn thum ya chi okhoomta nʉm khaphʉ arr aawai, ich garmuata am peerdʉ aum khõchgau mʉ ich Iewaa ãbpai khitʉmta am kõit thõmkhĩir pʉijimgui ajim, magbarm gaaimua chi mʉrʉgta amach peerdʉ aupi nʉm khʉʉn chan okhooba, mʉig eegarwejã ich denkhanaa ich aar oberwia ich mag ich dʉi wenʉrramkhĩir. 17Ẽwandamau mʉ pʉitarr chan, sĩi õor khaibag waupi jaaumkhĩir khaba, sĩi am peerdʉ aumkhĩirta mʉ pʉijimgui ajim irig.
18’Mʉch chi Ẽwandam Iewaa iekta ʉkhanaa mʉ ig sim woun chan Ẽwandamau isegwia khĩmie durr barpʉibam. Pari ar mʉ igba sim chan ya sĩi barpʉijupaita simgui ajim, ichdeu Ẽwandam Iewaa mʉchta ãbpai chitʉmta igba arr gaaimua ichdeupaita wir aig ich isegpi jaau simjo sĩewai. 19Mag amachdeupai wir aig amach isegpimjo nʉmʉn, nem khaigbamta waum khõchgau Ẽwandam Iewaa igba nʉm gaaimuau. Amach mag nʉm gaaimuata mag õor peerdʉ awaag õtdau paa dʉnʉmjo chirʉm beewaijã mʉ igba nʉmgui ajim, ich mag khĩchag eeta meraa nem wau nʉmjo naam khõchgau. 20Maguata ar thum Ẽwandam dau na nem khaigba wau nʉm khʉʉnan jũrr mag õtdau paa dʉnʉmjo chirʉmta oomapha aajemgui ajim. Mag mʉ oomapha naawaita mʉ igjã igba nʉm, mag amach meraa nem wau nʉm khaugam ugua awia. 21Pari magba ar jũrr nem wajapham appai waum khõsi aajem khʉʉnau chan mʉ isegba, warag mag õtdau paa dʉnʉmjo chirʉmta iigjerramgui ajim, Ẽwandamau khõsi simjota nem agcha wauju khaphʉnaa amachdeu mag wajapha nem wau nʉm bigaaum khʉʉnagjã khap amkhĩir.
Magta Jesuu Nicodemoog, jãga Ẽwandamta chi Porkha sim aar ijã chiraimaju aai chirʉ́ a jaaujim.
Juan chi õor por choomieu deeu Jesús igwia iekhatarr
22Mag phiesta Pascua dichtarr khur Jesuu maar phe arrjim Jerusalenmua chawag, ich ag Judea durr eepai. Maig nʉmua õor por choojeejim. 23-24Ich mag jaar ĩchab Juanaujã agtha õor por choo nʉrrajim aajem, maagwaiwe chan agtha i cárcel deg pʉiba narr aawai. Mag i õor por choo sĩerr aig Enón a thʉ̃r sim, Salim dakha. Maigta dodam naphʉ kherarr aawai õor por choojeejim aajem.
25Pari õrau jaauwai mag nʉm ee ĩchab ãaur Juan dʉi wenʉrraajerr khʉʉn garmua jũrr judío ãb aig sĩerr dʉi chikham ipeer ahaukhamua, “Magan ¿khaíu por choobarmta wajapcha sĩ, Jesuu por choobarm wa maar maestroou choobarmwa?” anaajim anʉm. 26Mag ijẽjẽb nʉʉ awia warag ich Juan aarcha wetwia ichigcha, —Maestro, ar chum Jordán igaau edau obeerjem igar, pʉchdeucha marag jaauwai Ẽwandamau pʉitarr a sĩerr wounaujã ĩchab õor por choo nʉrrʉm aajemgui ajim anʉm. Maagwai õor pom ʉ̃rcha i aarta phẽphẽeukham aimajierram aajem irig.
27Magbaawai Juanau amag, —Oob iekkhõr waumiet ajim anʉm. Ẽwandamauta ichdeu khap õrag jaauba aajeeb, ichdeu khõsi simjota nem waumkhĩir. Mag sĩewai ichdeuta juau irig jãgpi sĩebahab ajim anʉm. 28Pãach jʉ̃gʉucha khabá pãrau ũr naajimgui ajim anʉm, ar mua “Mʉ chan warrgarwe ich Ẽwandamau pʉiju a jaaujerr khaba, sĩi i beeju na i jaau chitʉmʉu” a chiraawai. Magua mag i aarta ʉ̃rcha õor phẽphẽeu awiajã mʉ onee chirʉmgui ajim anʉm. 29Pãrau ooba aajẽ ajim anʉm, jua pʉr nʉm khʉʉnjã: chi ʉʉi dʉi nawe iek deewi simta chi jayau; pari chi mag eeu pa nʉm khʉʉn paairinkha sim dʉi am bigaau simjã ĩchab onee aajem. Maarjã ich agjota naabahab Jesús dʉi. I jãg sim aig woun ãb eeu ʉʉi au simjota sĩebahab. Magua amau jãg i aarta phẽphẽeukham aig, mʉjã dʉi ĩchab onee chirʉmgui ajim anʉm, sĩi õrag i jaau chitʉmua. 30Iita mʉ khãaijã warag thʉ̃rphoo pamaawai mʉ jũrr i khãai eeg papagmam; pari mag nʉm aig ʉu sim a iekhamajim aajem, ich chi õor por choomieu Jesús igwi.
Ʉ̃gtharmuacha beetarrta chi jua thierriu
31Maimua mag iekhamamua ich Juan chi por choomieupai Jesús igwia, —Iita ʉ̃gtharmuacha beetarr aawai ichta chadcha maach thumaam khʉʉn khãyaujã ʉ̃rʉʉcha sĩebahab ajim anʉm. Pari mʉ magba sĩi pãachjo mʉig eegarmpai aawai mʉg eegarm khʉʉn denjopaita jaau chirʉmgui ajim aajem. 32Mamʉ irua magba, mʉ khãaijã ʉ̃gtharmta ichdeucha oowia ichdeucha ũrtarrta jaau sĩebahab ajim anʉm Jesús igwia. Mamʉ magʉmjã khapancha khaba nʉm i iek ʉkha durrum khʉʉn. 33Pari ar ʉu i iek ʉkha durrum khʉʉnaun mag ʉkha nʉmua, “Ẽwandamaun chadchata iekha sĩerrʉm” anʉm khabahab ajim anʉm, Jesús igwia i Iewaa a iekhaawai. 34Í chadcha ich Ẽwandamauchata pʉitarr aawai ich Ẽwandam khĩirjugta jaau simgui ajim anʉm, magamkhĩirta irig ich Akhaarjã phẽs dee sĩewai. 35Chi Ayaujã ich Chaai jãsene wai sĩewai nem thʉnʉmjã thum ãba irigta jaaubajieb. 36Magtarr aawai chadcha chi Ẽwandam Iewaagta ich peerdʉ aupi sim khʉʉn mʉg eegarwejã ya ich denkha sĩsimgui ajim anʉm, i aar oberwia i dʉi ich mag nʉrraag. Pari Ẽwandam Iewaa iekta ʉkhaba abarm chan i aarjã oberba, warag i gaaita Ẽwandamau ich khĩir machag meeupʉijugui ajim aajem, ich Juanau ich dʉi wenʉrraajerr khʉʉnag.
Magta Juan chi õor por choomieu Jesús tho iekhamajim aajem.
હાલમાં પસંદ કરેલ:
San Juan 3: noaA
Highlight
શેર કરો
નકલ કરો
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
