San Juan 12
12
Ʉʉirau jʉ̃gdeeu Jesús bʉ sũgtarr
(Mt. 26:6-13; Mr. 14:3-9)
1Maimua mag phiesta Pascua burraag seis diaspai waaur nʉm eeta, ich Jesús Betania anʉmʉg mam dʉi maarjã wetjim. Mag Betania phobor eeta mag woundam Lázaro anʉm ichdeu phiriu autarrjã sĩejeejim. 2Mag i barbaimaawai maiguim khʉʉnau wajap phiejãb wauwia Jesús khopiju aphobaadewia chadcha waujierram. Maimua ya thum wau aaipa sĩsiewai chi Lázaro ʉ̃phʉi Martaau chi nemek thoi jijig khajim. Maagwai maar thach kho nʉm aig ĩchab ich Lazarojã dʉi thach kho sĩejim. 3Mag nʉmta ich Lázaro ʉ̃phʉi ãbakhai María jʉ̃gdee narrdo chaar den nem parhẽpagkham dʉi dubchejim. Mag dubchewia, chigagjã igba, agua Jesús bʉ sũgnaa deeu ich porbʉʉupai jʉʉupʉijim. Mag nem thũpag sĩewai mag irua Jesús bʉ agua sũgbaadee sĩi dijã enter thʉ̃ap joisijim. 4-5Mag oobaawai maar eem ãb maar khapeer Judas Iscariote a thʉ̃ʉrjerrau magjim:
—Eh, jãg jʉ̃gdee trescientos denariom gaai perpʉiju aai sĩerrta, ¿khanthee sĩi jãg ãr choobaadema, agua aphʉʉm khʉʉndamag nemdam audeeju aai sĩerrtá? ajim.
Ich mag Judaauta ewag pawiajã ich Jesús oomapha aajerr khʉʉnag i pʉr deeju ajiebma. 6Pari Judaau mag iekhatarr chan sĩi chadcha aphʉʉm khʉʉndam khĩirjuwia khaba, nem jĩgmie arr aawaita mag iekha sĩejim. Ichdeuta maach thumaam khʉʉn phatkhon di wai nʉrraajerr aawai õrau maachig deemam aukhermamjã ichdeu jĩgkham aig jĩgkhaajeejim.
7Judaau mag iekhabaawai Jesuu irig, —Ideu irig jʉ̃gdeeu mʉ bʉ sũgpibá ajim. Jã i den nau jopcha mʉ meebaadeewai agua mʉ kha phuraag sĩi ãkha wai sĩerr khabahab ajim irig. 8Magnaa, Aphʉʉm khʉʉnan ich mag pãrau pãach ee oo wai wenʉrraju; pari mʉ chan ich mag pãar khĩir chitabajugui ajim.
Judionaan chi pornaanau Lázaro thõoju khĩirju narr
9Mag Jesús Betania sĩeichemjã chi judionaan Pascua dichaag beetarr khʉʉnau khaug athaawai khapan i oon beejierram. Pari mag bee thʉnʉm chan i oogpaijã khaba, ich Jesuu Lázaro phiriu auwia maach ich mʉg sim oogpata bee naajim. 10-11Pari mag Jesuu i iiu autarr gaaimua, judionaan pom tag amach igar khaba jũrr Jesuu jaau nʉrrʉmta ʉkha thʉnʉisierr aawai, chi phadnaan pornaanau jũrr ich Lazaropata dʉi thõopʉijugui aphobaadejim.
Jesús Jerusalén phobor ee dubimatarr
(Mt. 21:1-11; Mr. 11:1-11; Lc. 19:28-40)
12Mag Jesús dʉi maar Betania paaukhachetarr noram Jerusalenmua ũrphobaadejim aajem, i barju. Maagwai ya õor pooma Jerusalén phobor ee thʉnaajim aajem, mag phiesta athee wettarr khʉʉn. 13Mag ũrphobaadeewai õrau sothark piujom thʉrrphenaa ag jua panhapha i khĩirphee beejierram. Maimua ich dʉicha oobaicheewai serereukhamua onegau, “Ʉucha abarm Ẽwandam. Ich mʉʉta pʉchdeu maar israelnaan athee pʉch jũrr pʉibarmʉu. Ichta maar Reikhaju aawai pʉchdeuta i ʉu wai chitajugui” aajeejim jũrram khʉʉnau.
14Mag wetumua ya ag nawe Ẽwandam iek phã sim gaai ich Jesús igwia jaau simjo, burrodam ʉ̃r waaidʉwia warag ag gaaita mamua phobor ee ich mag dubjim. Mag chi Ẽwandam iek phã sim gaai:
15“Sionpien, onee abat.
Pãade oobat: ar pãar Rey sĩi parhoobam khʉʉnjo burrodam gaaita urum” a sim. (Zac. 9:9)
16Eeu i mamag khabaadeewai chan maach chi dʉi wenʉrraajerr khʉʉnau chan marau bʉ̃ʉrjã khaugba naajim, jãgwiata mamag khajĩ. Maimua ya nassi pawia ich Aai aar ʉ̃gthar petarr khurta marau khaphʉ aphobaadejim, ya ag nawe i jãgju Ẽwandam iek phã sĩsidʉm gaai jãg jaau sim aawai juaujo jãgtarr.
17-18Mag õor pom Jesús khĩirphee oon beetarran, irua Lázaro chi meem ya jẽbdeg sĩerrta deeu phiriu autarr chi ootarr khʉʉnau jajaaukham ũrwia i oom khõchgauta mag i khĩirphee beejierram. 19Pari maagwain jũrr chi fariseonaanau amach khapeenagpaita, —Keena, pãrau oo nʉm, jãg sĩi amag iekha nʉmuapai chan maadeu pod maachig paa aubamgui aajeejim. Magnaa, Oojurauma, jãg thumaam khʉʉnta sĩi i igar paaukhamamgui aajeejim.
Judionaan khabam khʉʉnau Jesús jʉraan beetarr
20Mag Pascua ee õor pom Jerusalén wettarr khʉʉn ee ĩchab judionaan khabam khʉʉnjã thʉnaajim, Aai i jewaan beetarr khʉʉn. 21Makhʉʉnau Felipe aig beewia irigta, —Kake, marau Jesús dʉi iyʉʉ am khõsi nʉmgui aichejierram.
Mag Felipeegta jeeuchetarran amachjo judionaan khabam ee bãautarr aawai ajim, amach kõit Jesuug iekhamkhĩir. Chi Felipe phobordam Betsaida anʉm eem ajim.
22Magbaawai Felipeeu jũrr agjo maar khapeer ãb Andrés anʉmʉg jaauwia amach numiim khʉʉnau jũrr ich Jesús aarcha jawaan wetjim. 23Mag wetwia judionaan khabam khʉʉnau ich jʉr wenʉrrʉm a jaaubaicheewai amjã peerdʉ awaag ʉdʉraa ich thõopiju jaaubaademua magjim:
—Ya ĩsta chadcha mʉch chi Emkhooi Iewaa chikhamnau thõoju gayaa pamamgui ajim, mag amau mʉ thõobarmua mʉchta Ẽwandamau thumaam khʉʉn khãaijã ʉ̃rpai apieg. 24¿Pãrau ooba aajẽ ajim, nemjĩir dau ĩiu awaagjã jãga aajẽ? Jẽb ee jĩirbam chan maan ich mag sĩsim, bʉ̃ʉrjã ĩiuba. Magarrau jĩir sĩuwia ober sĩsiewain chadau chebaademua ich jĩirtarr khãaijã ʉ̃r aaujem. Ich agjota mʉjã meeju aai chirabahab ajim, mag mʉch meebarm gaaimua õor pom peerdʉ awaag. 25Ich agjo khaphʉ abat ajim: Ar mʉig eegar aawai mʉ gaaimua bʉ̃ʉrjã ich chig apimapha sim chan meewaijã ʉ̃gthar oberbam. Pari mʉ gaaimuata ich dau aphʉʉ ajujã khĩirjuba mʉ iek ʉkha nʉrrʉmʉn chadau meewiajã ʉ̃gtharchata oberwia mʉg atagjã ich mag iiu sĩerrajugui ajim. 26Maimua ĩchab chi chadcha mʉ chogkhanaa mʉ dʉi nʉrram khõsi simʉn, ichdeu khõchagpierr nem wauba, mʉchdeu nem waupim khõsimpaita wau nʉrraju aai sim. Mag amʉn magan am wenʉrrʉmpierr mʉchjã am dʉi chitajugui ajim. Ãbmua magta mʉ chogkha nem wau nʉrrʉmʉn, mʉ Ayaujã ich khĩircha i tho iekhajugui ajim.
Judionaanau ich thõoju Jesuu jaautarr
27Maimua mag jaaumamua ĩchab, —Ĩs chadcha thumaa khĩirjuwia mʉ okhĩirjug pooma chirʉmgui ajim, chikhamnau mʉch thõoju dakkha pamaawai. Mag chirab mamʉ am jua ee thõmaaugaujã mua mʉch Ayag, “Tata, mʉ peerdʉ athájã” abamgui ajim, warrjã mag atheeta mʉ beetarr aawai.
28Maimua sĩi ich Ayag, —Tata, muan mʉch gaaimuata sĩi thumaam khʉʉnaujã pʉrʉgta ãba ee apim khõsi chirʉmgui ajim.
Pari irua magbaawai ʉ̃gtharmuata woun iekjo, —Ya pʉ gaaimua õrau mʉrʉg ee abarm; pari ichiita warag mʉchig ee apijugui ajim.
29Pari edjã eemua Ẽwandamauta woun iekjo irig magbarm ũrbaawai aig õor narr khʉʉnau sĩi pagthʉmpii naajim. Maagwai ãaur khʉʉnau jũrr, —Ẽwandam chogauta ʉ̃gtharmua irig iekha sim khabahab aajeejim.
30Pari amau mag nʉm ee, ich Jesuu thumaam khʉʉnag iekhamamua magjim:
—Mʉg pãrau woun iekjo ũrbarm chan sĩi mʉchigpai ich iek ũrmkhĩir khabamgui ajim. Jãan jãg ich iek ũrpitarr gaaimua ichdeu mʉ iek ʉkha sim pãrag khap amkhĩirta pãrag jãg iekhajimgui ajim. 31Ya ĩsta chikhamnau mʉ thõoju gayaa pamam. Mag mʉ isegwi mʉ thõobarm gaaimuata khaigbam khʉʉn thumaam khʉʉn dʉi Ẽwandamau ichdeu khap ajugui ajim. Mag õor kõit mʉ thõobarm gaaimuata ĩchab mepeer mʉg durr gaai ichta chi porkha sĩerrʉmjã Ẽwandamau podpʉim iek podpʉijugui ajim. 32Pari ĩchab mag ʉ̃gthaa õor khapanag dakhĩir mʉ jiirjop sĩuwia thõobarmuata mʉch iek ʉkhamam khʉʉnan mua thumaa mʉchig paa aumajugui ajim.
33Jesuu mag iekhamarran mag dau aphʉʉ pakuls gaai ich thõju jaau sim ajim. 34Mamʉ irua mag iekhabarm ũrwia õrau irig, —Ẽwandam iek phã sim gaaimua marau khaphʉ nʉmgui ajierram, ich Ẽwandamaucha pʉibarm chan meeba ich mag sĩerraju a sim. Pari mag simta, pʉ iek mag pʉʉta ich Emkhooi Iewaa anʉmta, ¿jãga mag Emkhooi Iewaata ʉ̃gthaa pakuls gaai thõbarju? Magan, ¿ma khanim Emkhooi Iewaa agá? ajierram irig.
35Magbaawai Jesuu amag ejemplo jaaumamua warag ichta Emkhooi Iewaa ich Ẽwandamau pʉitarr khap amkhĩir magjim:
—Ĩsweran pãrau agtha õtdau paa dʉnʉmjo mʉ oo wai nʉmgui ajim. Pari nau jopcha ya tag pãar khĩir mʉ chitabaju. Magua agtha mʉ iek ũr nʉwe ʉkhabat ajim, khĩirjug khaigbamta pãach gaai ʉ̃rpam ugua. ¿Pãrau ooba aajẽ khĩchag ee wetum khʉʉn? Amau amach wenʉrrʉmjã khaugba aajem. Chi mʉ iek ʉkhaba nʉm khʉʉnjã ich agjota thʉnʉmgui ajim, amach okhoo nʉmjã khaugba. 36Magnaa ichdeupai ich igwia, Mag õtdaujo sim agtha pãach ee wai nʉwe ʉkhabat ajim, ich mag mʉ dʉi ararag ee wenʉrraag.
Mag iekha sĩewia õor eemua igbaadeeu i sĩeimamjã tag õrau khaugba, ãba maach appaita i dʉi naaimajim.
Jãgwi judionaanau Jesús iek ʉkhamapha naajĩ
37Parii Jesuu maach meeun judionaan khapan thʉnʉm dakhĩir nem khĩir pogkhe waumamua ich jua oopipi aajerrjã wajappai i iek ʉkhaba aajeejim. 38Pari mag amau ʉkhamapha narran, ich Ẽwandam i jaaumie Isaías khararrau phã pʉarr eyaa obermkhĩir ajim. Irua phã pʉarr mʉg ajim:
“Señor, parii pʉ iek jaau nʉmjã õrau ʉkhamapha ajugui” ajim.
“Amau khaug aubajugui” ajim, “mag nem wau nʉm gaaimua puata pʉch jua theeg oopi sim.” (Is. 53:1)
39Magta chadcha ʉkhaba naajim. Amau mag ʉkhabaju igwia ich Isaiaaupai ĩchab,
40“Ẽwandamau am dau khĩpinaa kach theegjã apiju” a phãjim, “oo nʉmjo nʉmta oobamjo amkhĩir, maimua ũr nʉmjo nʉmta ũrbamjo amkhĩir.
Magba akhiin amau amachdeu oonaa ũr nʉmjã khaphʉ aawai, amach khaibag ãsie ewag khĩirjuwia Ẽwandamag amach peerdʉ aupiju” a phãjim Isaiaau ich Ẽwandamaucha ichig jaaumatarr. (Is. 6:10)
Pari Ẽwandamau judionaan mag thãar theeg apitarran, año khapan par ich iek ũrpitarrjã ʉkhamapha arr aawaita magpijim.
41Isaiaau ag nawe ichdeu ootarrjo magta phã pʉajim, ya Cristo mʉig eegar maach ich mʉg sĩeicheewaijã õrau i dau aphʉʉ wauwia thõoju khaphʉ sĩerr aawai. Pari magʉm ãba, Ẽwandamau ichta thumaam khʉʉn khãaijã ʉ̃rpai apijujã khaphʉ sĩejim. 42Mag judionaan thumaam khʉʉnau chan Jesús iek ʉkhabajierrab mamʉ, ãaur khʉʉnaun ʉu i iek ʉkhajierram; chi ʉkha narr khʉʉn ee chi thierrnaanpa thʉnaajim. Pari mag ʉkha nʉmta chi fariseonaanau, tag amach culto ee dubpimaaugau amach jʉr werppʉiju ogkhawia, amach khaugpiba aajeejim. 43Maagjeejieb mamʉ amachdeu mag ʉkha nʉm anʉmjã tagam khʉʉnagjã khaugpimapha narran, Ẽwandamau khõsimjo aju khãyau, sĩi mʉg dich khapeen ãba thʉnʉm khʉʉnagta amach eugar khaigba iekhapimaaugau ajim.
Amachdeu isegtarr iek igwiapai Ẽwandamau deeu am khĩir phʉʉrju
44Biek ãb ijẽjẽbkhamua judionaan ich iek ũr narr khʉʉnag Jesuu thet magjim:
—Chi mʉ iek ʉkha simuan mʉ iek appai ʉkhaba ĩchab mʉ Aai iekpata ʉkha simgui ajim, ich iek jaaupitarrta mua jaau chitaawai. 45Maagwai mʉ oobarmuan ĩchab ich chi mʉ pʉitarrchata ya oobarmjo simgui ajim, maar ich ãba naawai. 46Mʉʉta mʉg durr gaai thum khĩchag eemjo jooba nʉm khʉʉn athee õtdaujo beejimgui ajim, maagwai chi mʉ iekta ʉkha nʉm khʉʉn chan sĩi tag khĩchag ee okhoo wenʉrrʉmjo khaba ararag eeta wenʉrramkhĩir. 47Pari ar mʉ iek ũr nʉmjã mʉ ipierraa aba nʉm khʉʉn chan, mʉ mag warrjã mʉg durr khaibag wawaagta beeba arr aawai, mua khabam ajim am khaibag waupi jaauju. Mʉʉn sĩi õor peerdʉ awaagta beejimgui ajim. 48Pari mag chi mʉ isegnaa mua nem jaau chirʉm ipierraajã khaba nʉm khʉʉnan, sĩi amachdeupaita wir aig amach khaibag waupi jaaubarm, amachdeu isegtarr iekhaupaita Ẽwandamau õor i agkham edjã deeu am khĩir phʉʉrju aawai. 49Chi mʉ iek iseg nʉm khʉʉnaun khaphʉ aju aai nʉmgui ajim, sĩi mʉch khĩrauta mʉch iekham aig iekhaba chitʉm. Mʉ Ayauta mʉ pʉitarr aawai, ichdeuta mua iekhamajujã jajawag maawai, ich agpierrpaita jaau chitʉmgui ajim. 50Mua mʉchdeujã khaphʉ chirʉmgui ajim, chi mʉ Ayau nem jaaupʉi sim ipierraa nʉm khʉʉnan ʉ̃gthar oberwiajã ich mag i dʉi iiu wenʉrraju. Magua, mua nem jaau chitʉmʉn, mʉch Ayau mʉchig jaaupi jaautarrjota jaau chitʉmgui ajim.
હાલમાં પસંદ કરેલ:
San Juan 12: noaA
Highlight
શેર કરો
નકલ કરો
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
