Matyu 7
7
Homkwe uwrsa har mo yor me peie nan anon anon ohruw-a o
(Luk 6:37-38,41-42)
1Jisas hiy makiy-mekow, “Hunkwe uwrsa har mo yor me piap eyn peie nan anon anon ohruw-a o, hne sawk liy-liy-aw senaw nan anon anon ohruw-a. #Ro 2:1; 1 Ko 4:5; Je 4:11-12 2Payhokuaw, hwon uwrsa har mo yor penkin nan anon anon ohruw-a e, hne kokwe seyr liy-liy-aw ma-sahre anon anon ohruw-a. Seyr hwon uwrsa mo yor me pankaw lira memeir e, hne kokwe seyr liy-liy-aw ma-lira memeir ohruw-a. #Mak 4:24
3Hai, hunkwe hno wayh so now-pay seir nopre hyo nene mon ma lwak sehe-aw panoke lira me o? Sawk now-pay aiopey hay hno nene arian mon ma lwak sokukwe lira pa, payhokuaw lwak o? 4Sawk hno nene arian hokwe now-pay aiopey hay hok lway komay ankin, hai hunkwe hno wayh se kokwe senkin payhokuaw kiy-me o, ‘Wayh ara, hakwe now-pay seir nopre hno nene mon ma lwak sokwe kiy-mon-say kow ley.’ 5Uwr woki seys non lohruw-a uwr sora, peyr hunkwe now-pay aiopey hay hno nene arian ko se kwa kandieys sow. Sa enekwei sohiy non kokwe hunkwe now-pay seir nopre hno wayh so nene ko me yaprue liy lira popriy mon-say kow.
6Hunkwe omeme pekney-weys God se ma liaup kow mokwe, nwoh piap-araw me peie kow o. Sawk hom hne senaw makiy-kankoum peyk hnar. Hunkwe seyr hno ihey mo huei-none yaprue yaprue mokwe huok me peie nak-opri say kow o. Sawk huok hom hmo sune non senaw lour sei kukawk ha.”
God se mesopok yor o, pawk yor o, lokin koko yor o
(Luk 11:9-13)
7“Kwa mesopok e, hne liy kow. Kwa pawk e, hunkwe liy lirway. A-pokre ke kwa lokin koko e, hne liy kampi kow. #Mak 11:24; Jon 14:13; Jon 16:23-24 8Payhokuaw, unsaney posokwaw mesopok e, liy lonok. Unsaney posokwaw pawk e, liy lirway. Seyr unsaney posokwaw lokin koko e, a-pokre ke liy kampi kow. #1 Jn 3:22; 5:14-15
9Hai, hmo prueyn hiykwe, hyo ney hiy hye ihey mo naw ke mesopok ankin, hmey, hyo ney se kokwe mein se liy kow ha o? Korey law. 10Hai, ney prueyn hiy hyo orih se an ke mesopok ankin, hmey, orih hiykwe sok piap-araw se liy kow o? Korey law. 11Ama, suw mo senkin, hom weynpaweyn piap-araw non lwak e hi, homkwe hmo ney me kokwe maym yaprue-ar me nuw-kow. Kwa lonuayk, hromo Aio nonkumey ko so yor mokwe, aio ki ko mo yor mo eir mon nuw-wak. Hakwe hme seme me, hmo Aio nonkumey ko hiykwe hyo ney hye ma mesopok seme, maym yaprue me liy kow. #Je 1:17 12Hunkwe uwrsa me weynpaweyn yaprue me kwa mon, weynpaweyn hwon uwrsa hom hne ma hiymon e ma nan senkin. Yor sokukwe God so sow o, profet mo ok o, sohom mo meyk-ar hok non.” #Mat 22:39-40; Luk 6:31; Ro 13:8-10
Yerki-wouk sowmsowm-ay o, yerki-wouk keipyakeip o
(Luk 13:24)
13“Homkwe yerki-wouk sowmsowm-ay mon-aw lyawriy e. Payhokuaw, yerki-wouk, yier laway ey mon ma ley hokwe keipyakeip, seyr yerki serey mon ley ey hokwe aiopey hay. Sawk uwrsa kraiar-ar homkwe yerki-wouk serey mon-aw lyawriy lowpway. 14Sawk yerki-wouk God so lwayr peyow peyow yier mon ley ey hokwe sowmsowm-ay, seyr yerki serey mon ley ey hokwe honon honon-ar, sawk uwrsa prueyn prueynyaw homkwaw lirway yawriy.”
Now piap-araw homkwe now-i piap-araw me leip
(Luk 6:43-44; 13:25-27)
15“Hunkwe okrei-profet me kwa nuw-hok. Uwr senkin somokwe mo owh kumay ko mokwe sipsip me hieyn lira. Sawk hmo uron ouon-ar ko mokwe nwoh kaman piap-araw me hieyn. #Mat 24:24; Ap 20:29; 2 Pi 2:1 16Uwrsa senkin mokwe penkin uwrsa lwak e, ayay hom ma leip sawan kreik me-aw lira nonkway. Hmey, uwr homkwe wain-i mokwe ur inan non ko me liy lowr o? Korey law. Hai, now-fik-i mokwe pan piap-araw ko me liy lowr o? Korey law. #Ga 5:19-22; Je 3:12 17Suw mo liy-liy-aw, now yaprue hiykwe now-i yaprue me-aw leip, seyr now piap-araw hiykwe now-i piap-araw me-aw leip. 18Now yaprue hiykwe now-i piap-araw me liy leip ley. Seyr now piap-araw hiykwe now-i yaprue me liy leip ley. 19Now lowpwarowp ayay yaprue me ma leip lopa somokwe, lowk say nok, ya mon inon say mu ok. #Mat 3:10; Luk 3:9; Jon 15:6 20Suw senkin lwak, okrei profet mokwe, ayay hom ma leip sawan kreik me-aw lira nonkway. #Mat 12:33
21Homkwe senkin peie nanpanan o, uwrsa hane enekwei enekwei Hakamay-ok ma me somokwe, hom lowpwarowp Nonkumey so Wayr-hre-yier mon lyawriy ey. Korey law. Sawk uwrsa hano Aio nonkumey ko so uron ko so meyki ma ley sohomkwaw lyawriy ey. #Luk 6:46; Je 1:25 22God so enekwei pariawey-ar hiy lousne ankin, uwrsa poya-poya homkwe hane kokwe senkin nuw-me ey, ‘Hakamay ara, hromkwe profet-ok hno uru non papo mesor. Hno uru non kokwe hromkwe now-awruw me papo me-su ha, seyr mey krai non kraiar senkin nak-meio ousne.’ 23Sawk enekwei sohokwe hakwe senkin me-kumay ey, ‘Enekwei, enekwei hakwe hme nonkway pa. Homkwe yor piap-araw me mon uwrsa moma, hane kwa lokriy hain.’” #Sng 6:8; 2 Ti 2:19
A meio yor kreysyar hiy non
(Luk 6:47-49)
24Jisas hiykwe owhnan-ok kamon ke senkin ma-mesor kow, “Uwrsa hano ok me ma lonuayk, seyr meyki ma nakey kraipakrai somokwe, hakwe hme kokwe senkin me memeir ey, homkwe uwr prueyn nonkway yaprue non, hyo a se peir eir mon ma meio se hieyn. 25Sawk sueyr hiy lows, seyr poniy-hu hiy laye, seyr howniy aiopey hay hok a se amnuw-sway liok. A sohokwe sa pase nak-makuayk e. Payhokuaw, a sohokwe peir aiopey hay ko eir mon po nuw-meio kraipakrai.
26Seyr uwrsa lowpwarowp hano ok me ma lonuayk somokwe, meyki nakey lopa lwak ankin, hakwe hmekwe senkin kiy-me meir ey, homkwe lapala-uwr prueyn, hyo a wosion mon ma meio se hieyn. 27Sawk sueyr hiy lows, seyr poniy-hu hiy laye, seyr howniy aiopey hay hok a se amnuw-sway. Sawk a sohokwe nuw-makuayk. Sawk a sehe ma nuw-makuayk hokwe, piap-araw-arar.”
28Jisas hiy ok seme hiy-mesor lowpway menkin, uwrsa popua hay homkwe sawk hyo hiymon sorasor weyn me lonuayk kowkyay. 29Payhokuaw, hiykwe uwrsa seme ma hiy-mon sorasor mokwe, Juda mo sow ke hiymon-sorasor uwr me hieyn hiy-mon sorasor pa. Hiykwe uwr, uru ipey-ar non se hieyn hiy-mon sorasor. #Mak 1:22; Luk 4:32
હાલમાં પસંદ કરેલ:
Matyu 7: aau
Highlight
શેર કરો
નકલ કરો
Want to have your highlights saved across all your devices? Sign up or sign in
© 2006, Wycliffe Bible Translators, Inc. All rights reserved.
