Popular Bible Verses from Matius 16

શેર કરો

Turus, Yesus bilang pa Dia pe murit-murit, “Sapa yang mo iko pa Kita, dia tara bole iko dia pe mau. Dia musti siap menderita sampe mati karna iko pa Kita, itu sama deng dia pikul dia pe salib, kong iko pa Kita.

Karna itu, Kita kase nama pa ngana Petrus, yang pe arti, batu fandasi yang kuat. Kong di atas batu fandasi itu Kita mo kase badiri Kita pe jemaat. Kong Kita pe jemaat itu akan ada turus, tarada apa-apa yang mampo kase berenti pa dorang, biar itu kuasa kematian.

Kita mo kase pa ngana hak untuk pimpin Kita pe jemaat. Itu sama deng Kita kase pa ngana kunci sorga, supaya apa yang ngana larang di dunia ini, itu lagi yang Tuhan Allah larang. Bagitu lagi deng apa yang ngana kase ijin di dunia ini, itu lagi yang Tuhan Allah kase ijin.”

Karna sapa yang mo hidup cuma untuk dia pe diri sandiri, dia itu akan mati tapisa deng Tuhan Allah slama-lamanya. Tapi, sapa yang kase dia pe hidup karna iko pa Kita, dia itu akan dapa hidup deng Tuhan Allah slama-lamanya.

Tarada dia pe untung to, kalu satu orang dapa samua harta di dunia ini, tapi dia tara dapa hidup deng Tuhan Allah slama-lamanya. Pasti tarada yang bole dia kase untuk dapa hidup deng Tuhan Allah slama-lamanya.

Turus, Yesus bale tanya pa dorang, “Kong kalu menurut ngoni, Kita ini sapa?” Kong Simon Petrus jawab, “Guru itu suda Mesias, Raja yang Tuhan Allah janji mo kase slamat pa manusia. Guru itu Anak Allah yang hidup!”

Kong Yesus bilang pa Simon, “Simon, Yunus pe ana! Ngana paling sanang suda, barang yang ngana bilang itu bukang manusia yang kase tau, tapi Kita pe Bapa di sorga yang kase tau.