Urumeleŋgö Buŋa Kimbi Jöhöjöhö Dölökŋi

Burum-Mindik - 2020 (NT) Drama

Mewö malgetmö, beret yistŋi qahö miaŋgö sösöŋgaiŋi, qetŋi kun Pasowa kendon jimakzin, mi töriyök. Töriiga miaŋgöreŋ jike nup galöm aka Köna keugö böhi yeŋön ambazip kambu yeŋgö keŋgötŋini mötkeraŋgöra aka nanŋinök tokoba “Denöwö ahinga qeget kömumbawak,” jiba köna jaruba mötmöriget.


Nalö miaŋgöreŋ Satanöŋ Judasgö uruŋe geyök. Judas mi Jisösgö gwarekurupŋi 12 yeŋgöreŋök kun. Kariot mireyök kayöhaŋgöra qetŋi kun Iskariot qetket. Yaŋön jike nup galöm aka jikegö kiripo galöm bohonŋi yeŋgöreŋ anda Jisös mamalolo memba böröŋine almamgö keuŋi jiyök. Yeŋön mi möta “Ayop!” jiba uruŋinan ölöwahiga söŋgöröŋi moneŋ waŋgibingö keu jöhöget. Keu jöhögetka Judasnöŋ Jisös ölöŋ mamalolo memba böröŋine almamgö köna möt jaruba köiŋbiŋgöba malök. Mewö.


Beret yistŋi qahö miaŋgö kendon silim kunöŋ Pasowa lama qeba ohozema. Nalö miaŋön kam kuŋguyök. Jisösnöŋ Pitö aka Jon kewö jiba melaim etkiyök, “Iŋiri anda Pasowa lama mözözömgöyohotka nembin.”
Mewö jiiga qesim waŋgiyohot, “Mi denikeaŋgöreŋ anda mözözömgöbit?”
Qesim waŋgiyohotka kewö meleŋnök, “Mörohot! Iŋiri sitinöŋ aŋgorohotka azi kun o kimbut kunduta kaiga miwikŋaimahot. Miwikŋaiba i wuataŋgöba anda mire öŋgömawi, miaŋgöreŋ öŋgömahot. Öŋgöba miri toŋi kewö jiyohot mötma, ‘Böhinöŋ göhöra jiza: Ala mirigi denike? Neŋön ölöp miaŋgö uruŋe kaba gwarekurupni yembuk Pasowa lama nembin?’ Mewö jiyohotka möta miri qakŋe eu öŋgöba uruŋi ketaŋi kun kondel etkima. Miaŋgöreŋ dum tatat yuai mözözömgöget ahöza. Mi kondel etkiiga miaŋgöreŋ lama qeba ohomahot.”
Mewö jii anda Jisösnöŋ keu jiyöhi, miaŋgö dop miwikŋaiba kinda lama qeba ohom mözözömgöyohot. Mewö.


Nene nalöŋan kaiga Jisösnöŋ aposolurupŋi yembuk nene nembingö eta tatket. Tatketka kewö jii mötket, “Nöŋön Pasowa lama ki embuk nembingö gwötpuk ak niŋgiba malök. Nene ki nembagun mönö sihimbölö mötmam. Miaŋgö nalöŋan töriza. Mi törizawaŋgöra kewö jibi mötket: Nöŋön Pasowa lama kiaŋgöreŋ kun toroqeba qahö nemam. Könaŋgep nene semön kiaŋgö ölŋan aukŋe asuhumawi, mi Anutugöreŋ bemtohoŋ uruŋe euyaŋgöreŋ nemam.”
Mewö jiba wain qambi memba kötuetköba kewö jiyök, “Mönö ki memba nanŋinak aŋguba neme. Nöŋön kewö jibi mötket: Ni wain kösögö ölŋi kiaŋgöreŋ kunbuk toroqeba qahö nemam. Kunbuk nemami, mi Anutugöreŋ bemtohoŋ asuhum teköiga miaŋgöreŋ nemam.”
Mewö jiba beret memba kötuetköba mindipköba eŋgiba kewö jiyök, “Ki nani busuni. Ki eŋgöra aka tököm eŋgizal. Nemba ni mötmörim niŋgiba malme.” Mi eŋgii negetka mewöŋanök wain qambi memba kewö jiyök, “Qambi ki mi jöhöjöhö areŋ dölökŋi akza. Nöŋön amöt qem eŋgimamgöra aka sepni mokoba kömumam. Sep miaŋön mönö Anutugöreŋ jöhöjöhö areŋi mem köhöima.
“Mewö akzapmö, mötket, mamalolo mem niŋgimawaŋön mönö mohotŋe ki nene nemba tatzit. Ölŋa, Anutunöŋ jim kutuyöhi, Suep gölmegö azi ölŋan mönö miaŋgö dop gölme mosöta anma. Anmapmö, mamalolo mem waŋgimawi, yaŋgöra mönö wölziköba ‘Yei!’ jizal. Anutunöŋ mönö likepŋi öŋgöŋgöŋi meleŋ waŋgima.”
Mewö jiiga gwarekurupŋan könahiba sutŋine eraum qesim aŋguba jiget, “Neŋgöreŋök mönö daŋön mamalolo mem waŋgibawak?” Mewö.


“Gwarek neŋgöreŋök galöm bohonŋi mi daŋön akza?” mewö jigetka miaŋgöra mewöyök sutŋine goranora asuhuyök. Mi asuhuiga Jisösnöŋ kewö jii mötket, “Gölmegö kantriŋi kantriŋi mieŋgö kiŋinan mönö azi kembu tandök aka galöm köl eŋgimakze. Yeŋgö pom jembonŋinan mönö keu jim kutuba könagesöŋini mindiŋgöm eŋgigetka welenŋini qeba ‘Azi ölöpŋi!’ jiba möpöseim eŋgimakze. Mewö ahakzemö, eŋön miaŋgö dop kude akŋe. Eŋgö sutŋine kunŋan ketaŋamŋini akzawaŋön mönö eretŋaŋgö dop aka malma. Galöm bohonŋan mönö welenqeqe ewö aka malma.
“Kunöŋ tata nene neiga kunŋan nene köl waŋgiba anda kamakzawi, yetköreŋök öŋgöŋgöŋi mi daŋön? Ölŋa, ‘Tata nene nezawaŋön mönö öŋgöŋgöŋi akza.’ Mewö jiget mörakzinmö, nöŋön eŋgö sutŋine welenqeqe ewö aka maljal.
“Mewö malbi esapköm niŋgigetka wahöjaliŋ wahösömbu uruŋe aŋgotpiga iŋini töndup kapaŋ köla nömbuk qekötahöba mala kotze. Iwinan jim kutum niŋgiiga nöŋön yaŋgö bemtohoŋi kukösum qakŋe galöm kölakzal. Miaŋgöra nöŋön toroqeba jim kutum eŋgibiga iŋini mewöyök kukösum qakŋe ambazip kiŋ ewö galöm köl eŋgimakŋe. Miaŋgöra iŋini ölöp nöŋgö bemtohoŋne aŋgota nene dumni liliköba tata o aka nene nemba malme aka azi kembu tatatnöŋ tata Israel ambazip kambu 12 yeŋgö keuŋini kewöta jim teköm eŋgime.” Mewö.


Jisösnöŋ jiyök, “O Saimon Saimon! Mötnöŋ! Kölkömöt azinöŋ wit padi kötŋi joutnöŋ ala uturuköiga kamböŋi deŋda erakzawi, Satanöŋ mönö miaŋgö dop eŋön löwöriba yaŋgö böröŋe gemegöra uturuköba esapesap al eŋgimamgö kapaŋ köla jöjöröza. Jöjörözapmö, göhö mötnaripkan sörauba pömsöm qebapuköra nöŋön göhöra köuluköba malal. Miaŋgöra nalö kungen urugi meleŋda nöŋgöreŋ kamani, miaŋgöreŋ mönö mötnarip alaurupki naŋgöba mem köhöim eŋgiman.”
Mewö jiiga Saimonöŋ meleŋnök, “Kembu, nöŋön göbuk kösö mire anbitkö aka mohotŋe kömumbitkö jöjöröba maljal.”
Mewö jiyökmö, Jisösnöŋ jii mörök, “Pitö, nöŋön kewö jibi mötnöŋ: Kuruknöŋ merak qahö qeriga göŋön mutuk ni möt niŋgimamgö qaŋ kölnöŋga indimŋi karöbut akŋa.

Jisösnöŋ gwarekurupŋi kewö qesim eŋgiyök, “Nöŋön iŋini mutuk gösö qahö, moneŋ gösö qahö, köna esu qahö mewö melaim eŋgibi angeri, miaŋgöreŋ yuai kungöra osiget me qahö?” Qesim eŋgiiga “Yuai kungöra qahö osiin,” jiget.
Jigetka kewö toroqeba jiyök, “Mutuk mewö aketmö, nalö kewöŋe kungöreŋ gösö aka moneŋ gösö tuŋi ahözawi, mi ölöp memba teŋgöba malma. Bimgö sou ketaŋi mi kungöreŋ qahö ahöza, yaŋön mönö malukuŋi bohonŋi memegöra ala moneŋ miwikŋaiba sou mi bohonŋi mema. Nöŋön miaŋgöra kewö jibi mötket: Anutugö keu nöŋgöra jigeri, mi körek pakpak köhöim teköma. Miaŋgö nalöŋan mönö kam kuŋgumamgö akza. Buŋa keu kun kewö ohoget ahöza, ‘Yaŋön bölöŋi meme yeŋgö kambuŋine ahöma, jiget.’ Miaŋgöra jizal: Keu miaŋgö ölŋi mi nöŋgöreŋ asuhum teköma.”
Mewö jiiga gwarekurupŋan jiget, “Kembu eknöŋ, bimgö sou ketaŋi yahöt ki ahözahot.” Mewö jigetka “Mi dop kölja,” jiba meleŋ eŋgiyök. Mewö.


Jisösnöŋ miri mosöta silikŋi wuataŋgöba Oil ip kunduŋe öŋgöiga gwarekurupŋan andöŋe anget. Öŋgöba miaŋgöreŋ aŋgota kewö jii mötket, “Esapesapnöŋ et eŋgubapuköra mönö köuluk nup meme.”
Mewö jiba eŋgömosöta köt gilin anakzawi, miaŋgö dop anda simin köla köuluköyök Köuluköba kewö jiyök, “Iwini, göŋön urusihimgi mötzan ewö, sihimbölögö qambiŋi kiaŋön mönö nöŋgö qakne öŋgöbapuköra noaŋgitman. Noaŋgitman me qahö, mi mönö nangi jit keugahö dop asuhuma. Mi nöŋgö sihimgö dop qahö.” Mewö köuluköiga garata kunŋan Suepnöhök asuhuba mem köhöim waŋgiyök. Mem köhöim waŋgiiga köŋjiliŋ öŋgöŋgöŋi möta mönö kapaŋ köla uruŋi qezaköba köuluköyök. Köuluköiga nöŋgöpŋi mi sep jöjöl ewö tiŋgita gölmenöŋ etket.
Köuluköm teköba wahöta gwarekurupŋi yeŋgöreŋ anök. Anda miwikŋaiba eŋgehi wösöbiriknöŋ mem et eŋgii sörörauba gaun ahöget. Ahögetka jiyök, “Mönö wuanöŋgöra gaunök ahöze? Mönö wahöta esapesapnöŋ et eŋgubapuköra köuluköget.” Mewö.


Jisösnöŋ mewö jiba kiniga miaŋgöreŋ azi kambu kaŋgotket. Gwarekurupŋi 12 yeŋgöreŋök kun qetŋi Judas yaŋön jitŋemem eŋgiba Jisösgöreŋ kaŋgota numbuŋi yöhötim neyök. Yöhötim neyökmö, Jisösnöŋ kewö jii mörök, “Judas, gi numbuni yöhötim nemba mewö miaŋön Suep gölmegö azi ölŋi mamalolo mem waŋgizan me?”
Mewö aiga tosatŋan Jisös liliköm waŋgiba kingeri yeŋön yuai asuhumamgö ahi mi eka jiget, “Kembu, nini bimgö sou ketaŋan eŋguin me?” Mewö jiba yeŋgöreŋök kunŋan jike nup galöm bohonŋaŋgö welenqeqeŋi qeba kezapŋi ölŋi köteköi erök.
Erökmö, Jisösnöŋ meleŋda “Mönö mosötket!” jiba welenqeqegö kezapŋi yandiyöhi, mi misiriiga ölöwahök.
Ölöwahiga kinda jike nup galömurup, jikegö kiripo galöm bohonŋi aka kantrigö jitŋememe yeŋön Jisös membingö kaŋgotkeri, mi kewö jii mötket, “Ni kegwek-kahasililiŋ azia qahöpmö, töndup nöŋgöra mewö möta bimgö sou ketaŋi aka liŋgip memba kaŋgotze. Nöŋön wehön dop jöwöwöl jikenöŋ embuk malbiga iŋini böröŋini böraŋda ni qahö nömiget. Mi qahöpmö, dölki söŋaupkö ösumŋan luhut ala aukŋe asuhuiga eŋgö nalöŋinan kam kuŋguza.” Mewö.


Mewö aiga yarö azi yeŋön Jisös memba jöhöba waŋgita jike nup galöm bohonŋaŋgö mire anget. Angetka Pitönöŋ andöŋine sikepsikep eŋguataŋgöba anök. Miaŋgöreŋ anda jakömbuak mirigö kiripo uruŋe geba sombem bibiŋe könöp ohoba mohotŋe tatket. Pitönöŋ mewöŋanök yeŋgö sutŋine tarök. Tari welenqeqe ambi kunŋan Pitönöŋ könöp kösutŋe tari ehiba kewö jiyök, “Azi kiaŋön mönö mewöyök yambuk malök.”
Mewö jiyökmö, Pitönöŋ qaŋ köla kewö jiyök, “Ambi, ni i qahö möt waŋgizal.”
Mewö jiba tari kude köriiga azi kunŋan eka jiyök, “Gi mewöyök yeŋgöreŋök kun akzan.” Mewö jiyökmö, Pitönöŋ meleŋnök, “Alani, ni qahö.”
Aua mohotkö dop teköiga kunŋan keu mi kunbuk kapaŋ köla jiyök, “Azi kiaŋön mewöyök ölŋa yambuk malök. Yaŋön mönö Galili azia akza.”
Mewö jiyökmö, Pitönöŋ meleŋnök, “Azi, keu jizani, mi köndatzal.” Mewö jiba kiniga miaŋgöreŋök kuruk qerök.
Qeriga Kembunöŋ liliŋgöba Pitö uba ehiga miaŋgöreŋök keuŋi kewö jiyöhi, mi mötmöriyök, ‘Gi merak indimŋi karöbut qaŋ köl niŋginöŋga kuruknöŋ qetma.’ Keu mi mötmöriba wösöŋi julmamgö aiga yaigep geba sahöt böliyök. Mewö.


Yarö azi Jisös memba jöhögeri, yeŋön mepaqepaik ak waŋgiba kinda qeapköget. Qeapköba jemesoholŋi esuhuba qesiba jiget, “Gi kezapqetok azia akzanaŋgöra daŋön guhuzawi, mönö yaŋgö qetŋi qetnöŋ!” Mewö jiba gwötpuk tereŋqereŋda ilita jim qetal waŋgiget. Mewö.


Jim qetal waŋgiba malgetka miri giaŋiiga kantrigö jitŋememe aka jike nup galöm aka Köna keugö böhi yeŋön tokoba Jisös waŋgita Juda yeŋgö jike kaunsöl kambu yeŋgö jeŋine alget.
Miaŋgöreŋ algetka jiget, “Göŋön Amötqeqe Toŋi Kraist akzan ewö, mi mönö aukŋe paŋ jinöŋga mötpin.” Mewö jigetka meleŋnök, “Mi jibi mötpeaha kun, mi mönö qahö möt narime. Me qesim eŋgibileŋaha kun, mi mönö qahö meleŋ niŋgime. Mewö mötzalmö, nalö kewöŋeyök könahiba Suep gölmegö azi ölŋi yaŋön mönö Anutu, kukösum Toŋaŋgö böröŋi ölŋe tata malma.”
Mewö jiiga miaŋgöreŋök körekŋanök kewö jiba qesiget, “Ölŋa, gi Anutugö nahönŋa akzan me qahö?” Mewö qesigetka kewö meleŋ eŋgiyök, “Mi akzalaŋgö keuŋi mönö nanŋinak jize.” Meleŋ eŋgiiga jiget, “Nanŋak uŋemuŋem (guŋemguŋem) keuŋi mönö nanŋi numbuŋan jiiga möt teközin. Miaŋgöra tosatŋan keuŋi naŋgömegöra mönö wuanöŋgöra kunbuk qesim eŋgibinak?” Mewö.

Listen to Luk 22