Kabiye - 1995 Edition (NT)

Pʋcɔ Ɛsɔ pazɩ kedeŋa labʋ lɛ, weyi payaɣ se Tɔm yɔ, ɛɛwɛɛ. Ɛɛwɛ Ɛsɔ cɔlɔ, ɛnʋ lɛ Ɛsɔ. Ɛɛwɛ Ɛsɔ cɔlɔ nɛ pʋcɔ ɛ́lɛ́ la kedeŋa. Ɛ-yɔɔ Ɛsɔ tɩŋnaa nɛ ɛla pɩtɩŋa payɩ. Nabʋyʋ fɛyɩ se Ɛsɔ labɩ-pʋ nɛ ɛtatɩŋnɩ ɛ-yɔɔ. Ɛ-cɔlɔ wezuu wɛɛ nɛ kiyeki se ɛyáa ɛwɛɛ ñalɩmɩyɛ taa. Ñalɩmɩyɛ lakɩ nɛ pɩnaɣ cɩkpɛndʋʋ taa, ɛlɛ́ cɩkpɛndʋʋ tetisi ñalɩmɩyɛ ńɖɩ́ ɖɩ-tɔm.
Nakʋyʋ wiye Ɛsɔ tiyi abalʋ nɔɔyʋ, payaɣ-ɩ se Yohanɛɛsɩ. Etiyi-i se ɛlɩzɩ ñalɩmɩyɛ ńɖɩ́ ɖɩ-aseɣɖe nɛ ɛyáa wɛnɩ lidaʋ ɖɩ-yɔɔ. Yohanɛɛsɩ ɛnʋ, pɩtɛkɛ ɛ-tɩ tɩŋa lɛ ñalɩmɩyɛ. Ɛlɛ́, ɛkɔm se ɛlɩzɩ ñalɩmɩyɛ aseɣɖe. Ńɖɩ́ lɛ ñalɩmɩyɛ siŋŋ, ɖɩkɔm kedeŋa yɔɔ se ɖɩñalɩ paa weyi ɛ-yɔɔ. Weyi payaɣ se Tɔm yɔ, ɛkɔm kedeŋa yɔɔ. Ɛ-yɔɔ Ɛsɔ tɩŋnaa nɛ ɛlabɩ-kɛ. Ɛlɛ́, kɔ-yɔɔ ñɩma tasɩm-ɩ. Ɛkɔm ɛ-maɣmaɣ ɛ-tɛ, ɛlɛ́, ɛ-ñɩma tamʋ-ɩ. Piyele mbá patɩŋa payɩ pamʋ-ɩ nɛ pɛwɛnɩ lidaʋ ɛ-yɔɔ yɔ, ɛha-wɛ ɖoŋ se papɩsɩ Ɛsɔ piya. Patalʋlɩ-wɛ ɛzɩ ɛyáa sɔɔlʋʋ nɛ palʋlʋʋ pe-piya yɔ. Ɛlɛ́, Ɛsɔ hanɩ-wɛ wezuu kɩfalʋʋ.
Weyi payaɣ se Tɔm yɔ, ɛpɩsɩ ɛyʋ nɛ ɛkɔɔ ɛwɛɛ ɖɛ-hɛkʋ taa. Ɛkɛ lootiye tʋ siŋŋ nɛ ɛtɛ ɛkɛ toovenim tʋ siŋŋ. Đɩna e-koboyaɣ, kɛwɛ ɛzɩ Caa Pɩyalʋ ɛgbamɩyɛ ñɩŋga yɔ.
Ɛ-yɔɔ Yohanɛɛsɩ lɩzɩ aseɣɖe nɛ ɛma kubuka se: «Ɛ-tɔm mɔyɔɔdaɣ se: ‹Ma-wayɩ lɛ, weyi ɛkɔŋ yɔ, ɛkɩlɩ-m, mbʋ́ pʋyɔɔ yɔ, ɛɛwɛɛ nɛ pʋcɔ palʋlɩ-m.› » Meheyiɣ-mɩ se ɛha ɖatɩŋa payɩ mbʋ́ ɛwɛna yɔ pʋ-hɔɔlʋʋ nakʋyʋ, ɛlaba ɖatɩŋa lootiye siŋŋ, nɛ ɛwɛɛ pʋ-yɔɔ paa ɖooye. Toovenim lɛ, Mooyiizi yɔɔ Ɛsɔ tɩŋnaa nɛ ɛɖʋ-ɖʋ paɣtʋ. Ɛlɛ́, Yesu Krɩstʋ yɔɔ ɛtɩŋnaa nɛ ɛlabɩ-ɖʋ lootiye nɛ ɛwɩlɩ-ɖʋ toovenim. Nɔɔyʋ tana Ɛsɔ wiɖiyi kaʋ. Ɛlɛ́, ɛ-Pɩyalʋ ɛgbamɩyɛ nɖɩ́ ɖɩ nɛ Caa pɛwɛ ɖama taa nɛ ɖɩkɛ Ɛsɔ yɔ, ńɖɩ́ wɩlɩnɩ-ɖʋ mbʋ́ Ɛsɔ kɛnaa yɔ.


Yuda ñɩma ñʋndɩnaa kʋsɩ pɔ-cɔjɔnaa nɛ Leevi liɖe taa ñɩma nɛ Yeruusalɛm nɛ petiyi-wɛ se powolo pɔpɔzɩ Yohanɛɛsɩ se: «Ña lɛ anɩ?» Ɛlɛ́, ɛlɩzɩ aseɣɖe patɩŋa pɛ-ɛsɩndaa yem kpayɩ se: «Pɩtɛkɛ ma lɛ Weyi Ɛsɔ Lɩzaa Yɔ.» Peeɖe patasɩ-ɩ pɔzʋʋ se: «Ña lɛ anɩ kpem? Ña lɛ Elii yaa we?» Ecosi se: «Aayɩ.» Peeɖe patasɩ-ɩ pɔzʋʋ se: «Ña lɛ náyʋ weyi ɖɩɖaŋaa yɔ yaa we?» Ecosi se: «Aayɩ.» Ɛlɛ́, patasɩ-ɩ pɔzʋʋ se: «Ña lɛ anɩ kpem yɔ? Heyi-ɖʋ nɛ ɖiwolo ɖiheyi mbá petiyi-ɖʋ yɔ. Ña-maɣmaɣ lɛ, ŋmaɣzɩɣ se ŋkɛ anɩ kpem?» Peeɖe Yohanɛɛsɩ cosi-wɛ se ma lɛ weyi náyʋ Ezaayii yɔɔdɩ ɛ-tɔm yɔ. Ɛyɔɔdaa se:
«Nɔɔyʋ susuu lakʋ taa se pɔñɔɔzɩ Kɩpaɣlʋ
nʋmɔʋ nɛ pala nɛ kʋtʋʋzɩ camɩyɛ.»
Mbá petiyi-wɛ Yohanɛɛsɩ cɔlɔ yɔ, Farɩsɩ ŋgbɛyɛ taa ñɩma kɛwɛ pa-taa. Paba pɔzɩnɩ-ɩ se: «Ŋtɛkɛ Weyi Ɛsɔ Lɩzaa Yɔ yaa náyʋ weyi ɖɩɖaŋaa yɔ yaa Elii lɛ, pɩlabɩ ɛzɩma nɛ ŋlakɩ ɛyáa lɩm sɔʋ sɔnzɩ?» Ɛlɛ́, Yohanɛɛsɩ cosi-wɛ se: «Ma lɛ, malakɩ ɛyáa lɩm sɔʋ sɔnzɩ. Ɛlɛ́, nɔɔyʋ wɛ mɩ-hɛkʋ taa, ɩtasɩm-ɩ. Ma-wayɩ lɛ, ɛnʋ kɔŋna. Ɛkɩlɩ-m, mantamʋna se moluŋ nɛ mɛyɛɖɩ ɛ-naataŋgbala tɔnzɩ.» Pʋnɛ pɩtɩŋa payɩ pɩlakaɣ tɛtʋ cikpetu ndʋ́ payaɣ se Betaanii yɔ, tɩ-taa ɖenɖe Yohanɛɛsɩ lakaɣ ɛyáa lɩm sɔʋ sɔnzɩ yɔ. Tɛtʋ ńdʋ́, tɩɩwɛ Yɔɔrdaŋ pɔɔ wayɩ.

Tɛʋ fema lɛ, Yohanɛɛsɩ na Yesu wokaɣ ɛ-cɔlɔ. Peeɖe eheyi ɛyáa se: «Ɩna Ɛsɔ Heɣa. Ŋ́gá mʋʋnɩ ɛyáa tɩŋa payɩ kɩwɛɛkɩm. Kɔ-tɔm mɔyɔɔdaɣ se ma-wayɩ lɛ, nɔɔyʋ kɔŋ. Ɛlɛ́, ɛkɩlɩ-m, mbʋ́ pʋyɔɔ yɔ, ɛɛwɛɛ nɛ pʋcɔ palʋlɩ-m. Mantaasɩm-ɩ. Ɛlɛ́, mɔnkɔm mala ɛyáa lɩm sɔʋ sɔnzɩ se Izrɛɛlɩ ñɩma tɩŋa ɛsɩm-ɩ.»
Yohanɛɛsɩ tasɩ yɔɔdʋʋ se: «Mana Fezuu Kiɖeɖeu, kɩlɩnɩ ɛsɔdaa ɛzɩ halikuku yɔ nɛ kitii kɩcaɣ ɛ-yɔɔ. Mantaasɩmdɩ-ɩ. Ɛlɛ́, Ɛsɔ weyi etiyi-m se mala ɛyáa lɩm sɔʋ sɔnzɩ yɔ, eheyi-m se: ‹Ŋkɔŋ naʋ Fezuu Kiɖeɖeu tiba nɛ kɩcaɣ nɔɔyʋ yɔɔ. Ɛnʋ kɔŋnɩ ɛyáa labʋ sɔnzɩ nɛ Fezuu Kiɖeɖeu ɖoŋ.› Lɛɛlɛɛyɔ mana ḿbʋ́, pʋ-yɔɔ mankaɖɩɣ-mɩ toovenim se ɛnʋ lɛ Ɛsɔ Pɩyalʋ.»

Tɛʋ fema lɛ, Yohanɛɛsɩ nɛ ɛ-tɔmkpɛlɩkɩyaa taa naalɛ papɩsɩ lone ńɖɩ́ ɖɩ-taa peeɖe. Pɩkɛdaa lɛ, Yohanɛɛsɩ na Yesu ɖɛɣaɣ. Peeɖe eheyi-wɛ se: «Ɩna Ɛsɔ Heɣa.»
Ɛ-tɔmkpɛlɩkɩyaa ḿbá panɩ ḿbʋ́ lɛ, pakʋyɩ patɩŋ Yesu wayɩ. Yesu kisaa nɛ ɛna patɩŋaɣ-ɩ ḿbʋ́ lɛ, ɛpɔzɩ-wɛ se: «Ɛbɛ ɩñɩnɩɣ?» Paba ñɔpɔzɩ-ɩ se: «Raabii! Le ŋwɛɛ?» Raabii tɔbʋʋ se Wɩlɩyʋ. Ɛlɛ́, ecosi-wɛ se: «Ɩkɔɔ nɛ ɩna.» Peeɖe patɩŋ-ɩ ɖɔɖɔ nɛ powolo pana ɖenɖe ɛwɛɛ yɔ nɛ pa nɛ ɩ pacaɣ peeɖe kɩyakʋ ŋ́gʋ́. Đanaɣ wɩsɩ wɛlʋʋ pɩlakaɣ ḿbʋ́.
Tɔmkpɛlɩkɩyaa naalɛ mbá Yohanɛɛsɩ yɔɔdɩ Yesu tɔm nɛ panɩɩ nɛ patɩŋ Yesu ɛnʋ ɛ-wayɩ yɔ, payaɣ pa-taa lɛlʋ se Andree. Ɛnʋ lɛ Siimɔɔ Pɩyɛ neu. Mbʋ́ Andree ɛnʋ ɛcalɩ labʋ yɔ lɛ se: ɛñɩnɩ ɛ-ɖalʋ Siimɔɔ nɛ eheyi-i se: «Đɩna Meesii.» Meesii tɔbʋʋ se Weyi Ɛsɔ Lɩzaa Yɔ.
Peeɖe ɛkpaɣ-ɩ nɛ ewoni-i Yesu cɔlɔ. Patalaa lɛ, Yesu cɔnɩ-ɩ pɩŋŋ nɛ ɛtɔ se: «Ña lɛ Yohanɛɛsɩ pɩyalʋ weyi payaɣ se Siimɔɔ yɔ, pɔkɔŋ-ŋ yaʋ se Sefaasɩ.» Sefaasɩ tɔbʋʋ se Pɩyɛ.
Tɛʋ fema lɛ, Yesu ɖʋ se ewoki Galilee egeetiye taa. Ɛɖɛɣaɣ lɛ, ɛna Filiipu nɛ eheyi-i se: «Tɩŋ ma-wayɩ.» Filiipu tɛ lɛ Bɛtsayɩda tɛtʋ cikpetu taa. Andree nɛ Pɩyɛ pɛ-tɛ lɛ peeɖe ɖɔɖɔ. Pʋwayɩ lɛ, Filiipu na Nataanayɛɛlɩ nɛ eheyi-i se: «Đɩna weyi Mooyiizi ma ɛ-tɔm paɣtʋ takayaɣ taa nɛ náyaa yɔɔdɩ ɛ-tɔm ɖɔɖɔ yɔ. Ɛnʋ lɛ Nazarɛɛtɩ tʋ Yozɛɛfʋ pɩyalʋ weyi payaɣ se Yesu yɔ.» Ɛlɛ́, Nataanayɛɛlɩ pɔzɩ-ɩ se: «Pʋyʋ kɩbanʋ pɩzɩɣ pɩlɩɩnɩ Nazarɛɛtɩ yaa we?» Filiipu cosi-i se: «Kɔɔ nɛ ŋna.»
Yesu na Nataanayɛɛlɩ wokaɣ ɛ-cɔlɔ lɛ, ɛtɔ se: «Ɩna Izrɛɛlɩ pɩɣa maɣmaɣ. Kaamuluu nɔɔyʋ kaʋ.» Peeɖe Nataanayɛɛlɩ pɔzɩ Yesu se: «Ɛzɩma ŋlaba nɛ ŋsɩm-m?» Yesu cosi-i se: «Mana-ŋ alɩwaatʋ ndʋ́ ŋŋwɛ hiyuú tɛɛ yɔ nɛ pʋcɔ Filiipu ya-ŋ.» Peeɖe Nataanayɛɛlɩ heyi-i se: «Wɩlɩyʋ! Ña lɛ Ɛsɔ Pɩyalʋ. Ña lɛ Izrɛɛlɩ ñɩma wiyaʋ.» Yesu cosi-i se: «Ceeke meheyuu-ŋ se mana-ŋ hiyuú tɛɛ yɔ ŋtisaa se ma lɛ Ɛsɔ Pɩyalʋ yaa we? Meheyiɣ-ŋ se ŋkɔŋ naʋ mbʋ́ pɩkɩlɩ ḿbʋ́ yɔ.» Yesu tasɩ yɔɔdʋʋ se: «Toovenim lɛ, mankaɖɩɣ-mɩ se ɩkɔŋ naʋ ɛsɔdaa tʋlaa nɛ Ɛsɔ tiyiyaa tɩŋɩɣnɩ Ɛyʋ Pɩyalʋ ma mɔ-yɔɔ nɛ pakpaɣ nɛ petiki.»

Listen to Yohanɛɛsɩ 1