Kodaku

हेना तोलोग ईसु सब्द राः दिन रे चेला कुतय सुदा, गोहोम खेत तेकू चलोः दोहो एनु। अवुर चेला कुतय रँगेज ते बलित होड होड तेकू जोमे दोहो एनु। तहाँ फरीसिकू नआँ ञेंलकेते ईसु थरे कू कहनी तेडा, “ञेंलकुमू अमाःकू चेलाकू सब्द राः दिन रे जे नियम इदाना हेना ची लगड कू उजड़ यडा?” हेना वरी ईसु हेंकुय कहनी वडा, “अपे धरमग्रंथ कबोह मेने पे पड़हो गडा किदो? दाऊद अवुर गतितकू रँगेज तडकू रे चीय बनो तेडा? दाऊद भगवान ओड़ाः रे सेनकेनते, भेंट कू रकब तडा, हेना रोटिय जोम तेडा, नआँ हेंय अवुर गतितकू जोजोम लगड जयेज कोवाआ, हेना सीरिफ आजककू भर जोम सकोः दोहो एनु। अपे धरम नियम रे बेगर पे पड़होआ किदो? आजककू सब्द राः दिन रे मँडिल रे काम कोःते नियम कू टोविजा, हेंडे रेहो हेंकू थरे दोस मेने लगोआ। लेकिन इंञ अपे थरेंञ कहनी यडा, नआँ रे मँडिल वरी हो बडेअय इदाना। ‘इंञ बलिदान मेने, लेकिन दयाः हेनांञ बेस वआ’ मेनाआ, धरमग्रंथ रे इदान हेना टेबोः राः मतलोब पे जेर तेड रेदो, अपे निरदोसाय एरो पे दोस तेडिय मेनू। कहेकि इंञ होड़ होपोन सब्द राः दिन रेनिय हो परभु हवे।”


हेना वरी ईसु अहूदिकू राः आराधना ओड़ाः रेय सेनेना। हेना रे मियाँहोड़ तीत लोहोड़ तनय दोहो एना। अवुर हेंकू ईसु कू दोस लगड नआँ याःतेकू होंबोर तेडिया, “सब्द राः दिन रे कनय होड़ चिकन लगड जयेज इदाना किदो कोवानू?” तहाँ ईसु हेंकू थरेय कहनी तेडा, “मान ले अपे मेंडे कनय रेनिय मिनियेंटंग भेंड़ी इदानू, अवुर हेंय सब्द राः दिन रे कनर डोढहा रेय लोजोरुऊ, हेंय अपे सबकेय ते एरो पे उडूंग तेडिया किदो? होड़ दो भेंड़ी वरी हो किमती गिआयू! हेनाते सब्द राः दिन रे धरामुःऊ जयेज गिआ।” तहाँ तीत लोहोड़ तनय हेनी थरेय कहनी तेडा, “तीम मी सुहरू।” तहाँय सुहरू तेडा, अवुर लोहोड़ तना तीत, बढ़ियाँः तीत घयते चिकन यनु। तहाँ फरीसिकू बहेर हँडे उडूंग केनते, ईसु काःतेबू ञेंड गोजेया मेनते कू मतर एना।

तहाँ ईसु हेंकू मतर एन हेनाय पपाड़ियन ते हेना जघा वरिय चलो यनु। अवुर अखीर होड़कू हेंय तयोम तेकू सेनतेडा, अवुर हेंय सगोर रोगियाकू भर दोय चिकन तेडकुआ। अवुर हेंकू अलोपे देखारिञूँ मेनतेय, चेतवन तेडकुआ। भगवान होपोन तू राः बारे ते एसायाह भविस्यवक्‍ता राः दोवारा ते पहील तेय लाय तड हेना उतरो एना, हेंय न याःतेय कहनी तेडा,
“नेय ईञाअय सेवेखिया हवे, नेय इंञ चुनो केडिय हेनी हवे, नेय इंञ दुलारियाञूँ, इंञ नेय थरे खुस इदानिञाँ। नेय थरे ईञाः आत्मांञ डलोआ, अवुर नेय अनजातकू न्याय राः खभेरिय लाय वकुआ। नेय एरोय कलह एना, अवुर एरोय हल्ला तेडा, अवुर गली गली ते नेय राः आवाज कनय एरो कू अँजोम तेडा। जीत न्याय अनायीनिय ओवय मेन दिन, नेय धंगड़ा केड हेना सरफी एरोई टोविज तेडा, अवुर ईड़िज अपीजुः तन हेना बत्ती एरोई ईड़िज तेडा। अवुर सगोर जात रेनकू नेय ञुमू रेकू भरोसाया।”


तहाँ होड़कू मियाँहोड़ अंद्हा गूँगा थरे भूत लगो तनय, ईसु थरे कू इदी तेडिया, अवुर ईसु हेंयिय चिकन तेडिया, अवुर हेंय गूँगा टेबोईयू, अवुर मेडतू हो चिकन यनु। हेना वरी सगोरकू अहचरज यन तेकू कहनियू, “नेय दाऊद खुटी खनदान रेनिय हवे जहानू?” नआँ अँजोम केते फरीसिकू कहनी तेडा, “नेय दो भूतकू रेनिय मुखिया बालजबूल राः सहेता ते भूतकुय उडूंग यडा।” हेंकू मन मन रेकू पसींद तेडा, हेना ईसु पपाड़ी केनते हेंकू थरेय कहनी तेडा, “जे जे राज रेनकू होड़कू एक जूट ते मेने कू दोहोना, हेना राज रेनकू होड़कू अलग तलग जोमाकू, अवुर हेना राज उजड़ जोमा; अवुर कनर सहर चहे ओड़ाः रेनकू एक जूट ते मेने कू दोहोना, हेंकू अलग तलग जोमाकू। अगर सयतान अनानेज रेनकू भूतकुय उडूंग रेदो, अनानेज रअय बिरोध यडा, फेर हेंय राः राज काःते बढ़ियाँ ते दोहोना? अगर इंञ सयतान राः सहेता ते भूत कुंञ उडूंग यड रेदो, अपे रेनकू चेलाकू ईया राः सहेता तेकू उडूंग यडकुआ? हेनाते अपे राः हेनकू न्यायेआ। अगर इंञ भगवान राः आत्मा राः सहेता ते भूत कुंञ उडूंग यड रेदो, भगवान राः राज अपे थरे मेजियाना। नेन घयते कनय बहगाँड़य ओड़ाः रे अन्‍न धन लुसी लगड कनय बोल रे, पहील ते मेनेय तोल टेकोविय रेदो काःतेय लुसी सकोआ? नेन घयते इंञ सयतान वरी बहगँड़ गिआञूँ।
इंञ गतर रे कोवाय हेनी होड़, ईञाः बिरोध रेया, अवुर इंञ सुदा मेनेय सकेलेआ, हेनी मीरिजेअयू। हेनाते इंञ अपे थरेंञ कहनी यडा, होड़कू राः सगोर पाप अवुर निंदा राः माफी ञँमुआँ, लेकिन पवितर आत्मा निंदाआ हेना राः माफी एरो ञँमेना। कनय होड़ होपोन राः बिरोध रे कनर टेबोईय टेबोआ, हेंय अगारिय पस्तोः रेदो माफी ञँमुआँ, लेकिन कनय पवितर आत्मा राः काम राः बिरोध रे कनर निंदा टेबोईय टेबोः रे अब हो माफी एरो ञँमेना अवुर कबोह माफी एरो ञँमेना।”


अपे दुबीत बढ़ियाँ गिआ मेनते पे कहनी वतन रेदो, जोओत हो बढ़ियाँ गिआ मेनते पे कहनिवा, चहे दुबीत बे-कमा गिआ मेनते पे कहनी वतन रेदो, जोओत हो बे-कमा गिआ मेनते पे कहनिवा; कहेकि दुबी जोओत ते चिन्हों जोमा; नेन घयते इंञ बढ़ियाँ गिअंञ किदो कोवानू, ईञाः काम तेपे चिन्हों विञूँ। ए बींञ होपोनकू, अपे खराब होड़कू रह ते बढ़ियाँः टेबोःपे टेबोः सकोआ किदो? कहेकि जे चीज कोठी कया रे भरो केना, हेनेना अहा वरी उडूंगुआ। बढ़ियाँअय होड़ अपन कोठी कया वरी बढ़ियाँआ टेबोईय उडूंगा, कहेकि हेंय राः कोठी कया रे बढ़ियाँ टेबोः ते भरो केना, अवुर खराब होड़ अपन कोठी कया रे भरो केना, खराब टेबोईय उडूंगा। इंञ अपे थरेंञ कहनी यडा, होड़कू जे जे खराब टेबोः कू टेबोआ, हेंकू न्याय होयाः चेका सगोर टेबोः राः हिसाब देहेक पड़ोआ। कहेकि अपे अनापे राः टेबोः ते निरदोस अवुर अनापे राः टेबोः ते दोसी पे ठहरोआ।


हेना वरी कुछ एहूदी नियम चेचेडकू अवुर फरीसिकू ईसु कू होंबोर तेडा, “ए गुरू, अम वरी कनर मियाँटंग चिन्ह ञेंल गिसन यडलेआ।” तहाँ ईसु कहनी वडकू, “नआँ जबाना रेनकू खराब अवुर लंद फाँदुःकू चिन्ह कू ञँम बेड़ाआ, लेकिन इंञ जोना भविस्यवक्‍ता राः चिन्ह छोड़ अवुर कनर चिन्ह एरोंञ तिबवड कुआ। जेयसे जोना तीन दिन, तीन रात बडेअय हकु लाज रेय दोहो एना, हेन घयते होड़ होपोन हो ओतेत भीतर रे तीन दिन तीन रातिय दोहोना। नीनवे सहर रेनकू होड़कू न्याय होयाः चेका चड़ाँ कोःते नआँ जबाना रेनकू होड़कू थरे दोस कू लगोआ, कहेकि नीनवे रेनकू जोना राः परचार अँजोम केते मन कू मिड़ाः तेडा, अवुर अँजोम पे, नआँ रे जोना वरी हो बडेअय इदाना। लेकिन अपे ईञाः टेबोः अँजोम केते घली मन मेने पे मिड़ाः यडा। न्याय होयाः चेका सिबा देस रेनिय रानी नआँ जबाना रेनकू होड़कू सुदाय चड़ाआँ, अवुरिय दोस कुआ, कहेकि नेय धरती राः छोर वरी सुलेमान राः टेबोः अँजोम लगाडिय मेजेना। अवुर अँजोम पे, नआँ रे सुलेमान वरी हो बडेअय इदाना।”


“कनय होड़ वरी भूत उडूंग जोमा, तहाँ लुड़ूः लगड पुयूर ओतिय छपा बेड़ाआ, लेकिन हेंय जघा मेनेय ञाँमेआँ। तहाँय कहनियाँ, ‘जे ओड़ाः वरिंञ उडूंग एना, हे-ना ओड़ाः रे फेरिंञ मिड़ाः सेनुआँ।’ मिड़ाः मेजुः तहाँ हेंय हेना ओड़ाः सुनहर, साफ सुथरा अवुर सजोता तोलोगिय ञाँमेआँ। तहाँ हेंय सेनकोःते अनेज वरी हो जरजठ भूतकू, अवुर सात गोटागिंय अगदरताआ। अवुर हेंकू हेंय होड़ थरे लगो कोःतेकू रसो बसो जोमा। अवुर हेंय होड़ राः दसा पहीलाः वरी हो बेहेज जोमा। नआँ जुग रेनकू खराब होड़कू राः दसा हो नेन घयते होयाआ।”


ईसु होड़कू सुदाय टेनेबोः दोहो एनु, तहाँ इंगत अवुर बोहोत एडकू बहेर हँडे कू चड़ाँ तना, अवुर हेंय सुदा टेबोः मेनते कू एमेल तेमेलुः दोहो एनु। तहाँ कनय हेंय थरेय लाय तेडा, “बहेर हँडे इंगम अवुर बोहोम एडकू चड़ाँ केना, अवुर अम सुदा कू टेबोः मेनते।” ईसु नआँ अँजोम केते ललायय थरेय कहनी तेडा, “काय हवे इंञ ईगाञूँ? अवुर करकू हवे बोहोंञ एडकू?” तहाँ अनेज रेनकू चेलाकू हनते इसारा केडतेय कहनी तेडा, “ईगंञ अवुर बोहोंञ एडकू नेकू हवे। कहेकि जे जे सरग रेनिय अपुंञ राः मरजी तेकू से-नेआँ, हेनकू बोहोंञ अवुर मिसींञ अवुर ईगंञ हवे।”

Listen to मत्ती 12