St. Lawrence Island Yupik - WBT - (NT) Drama

St. Lawrence Island Yupik - WBT - (NT) Non Drama

Тама̄ни пилъыӷни иляңи югыт тама̄нтыфтут, уңипа̄тка̄т Иисус Пилатымун туқутысиманилюки иляңи Галилеяӷмӣт аҳқыша̄ӷумалюки Кияӷныӷмун. А̄ўитлъю акумутысиманилюки а̄ўитнун тыӷикусят. Иисусым а̄птыкӣ: «Сюмыҳпысинӣ та̄кут Галилеяӷмӣт сыӷлыҳқыңъа̄ӷатаӷаҳпыта̄т иляңитның Галилеяӷмӣның қаюҳлъяк таўатын туқутка̄лӷӣт? Уңипа̄тамси, нака̄! Авутыҳқылъюси сыӷлыҳқынъанӣмакуфси та̄ўа қамахлъюси лъпысилъю туқулъықуси лъңистун. Нықамикынӷистыкӣ Силоамыми қуля пиңаюның иңлюлык югыт башням улъыӷвиклъюки туқуқуқӣ? Сюмыҳпысинӣ та̄кут сыӷлыҳқыңъа̄ӷатаӷаҳта̄т Иерусалимыми кияҳлъыҳӣның? Уңипа̄тамси, нака̄! Авутыҳқылъюси сыӷлыҳқынъанӣмакуфси та̄ўа қамахлъюси лъпысилъю туқулъықуси лъңистун».

Та̄хкын Иисусым уңипаӷа̄ткӣ: «Югым пӣтысиӷаҳтыстыка̄ смоквам уқфига виноградымун пӣтысиӷаӷвигмини. Ысҳаӷьяҳтуӷақыхкаңа пӣтыстиманаюкан, иўырңа аваңитақылӷӣ. Ынка̄м пӣтысиӷаҳтыни пика̄: “Ӣи, пиңаюни аюмиқулъыӷни ысҳаӷьяҳтуӷақсяӷақа уқфик пӣтыстиманаюкан иўырңа аваңитақуқ. Кыпигу! Пӣтфигилъҳа̄кун”. Иўырңа пӣтысиӷаҳтым пика̄: “Югунӣқ, ўӣн хўани аюмиқулъыӷми авылӷаҳу. Увитаңа ля̄гнақақа, ынка̄м катагуӷвикылъықақа пӣнъа̄симың. Аюмиқун пӣткӯмакуми пиниҳлъықуқ, ынан пӣтыстинӷилъкан, кыпыснакын”».

Та̄хкын ата̄сими Субботам аӷныӷани, синагогами Иисус апыҳтуӷикақ. Таўантыфтуӷңуқ аӷнақ қуля пиңаюның иңлюлык аюмиқулъыӷни туӷныӷа̄м кая̄лыҳқыхка̄. Пакыгңастыка̄ ынка̄м таклъяӷрукыхлъюни ныкывигалңуқ. Иисусым ысҳаӷьямигу тахсиӷлюку пика̄: «Аӷнақ, итымутамкын кая̄лыҳқыңъылъыҳпының». Та̄хкын ся̄фтыка̄, ынка̄м таклъяӷрукхӯтңина̄маӷми пикақ, усюқикақлъю Кияӷныӷмың.
Синагогам иглыӷутистыңан угумиягутка̄ Иисус қаюҳлъяк на̄лъҳутилӷӣ Субботами. Ынка̄м пикӣ югыт: «Аӷвинлыгӯт аӷныӷыт қыпҳаӷвихкапут, ынка̄м тагӣқитык та̄куни аӷныӷни на̄лъҳутысқылъюси, нака̄н Субботами!»
Атанӷым пика̄: «Уюқ пинӣюгнық! Субботами, тамаҳаҳпыси вола налиӷмың осёлыси итымулъюки мыӷысяҳтуӷақаси. Уна аӷнақ киңунқа̄ Авраамым, Туӷныӷа̄м асиҳқыхкақа̄ қуля пиңаюның иңлюлыгни аюмиқулъыӷни. Ипапыста̄қ анахутылъҳунӷитуқ итымутылъыҳқа̄ Субботами!» Иисусым таўатын пийистың, қамахлъютың аңуяги кайңуюгуткат. Ынка̄м қамахлъютың югыт қуятыҳлъякат пиниӷракыхтаның апыӷӣқа̄ның.

Та̄хкын Иисусым а̄птыкӣ: «Натыта Кияӷныӷым Атаныҳпагулъҳа? Сямун иңлюнъақсикун? Горчицам пӣтутаңатун аюқуқ, югым тугулюку пӣтысиӷақаңа пӣтысиӷаӷвигмикун. Нагуялӷӣми уқфигуҳтыкақ, ынка̄м авая̄кун қаўа̄гыт уңлюсикат».

Алъямың Иисусым а̄птыкӣ: «Сямун иңлюнъақсикун Атаныҳпагулъҳа Кияӷныӷым? Закваскатун аюқуқ аӷнам акӯтутақыхкаңа авляўаҳлъягмун, ынка̄м акӯтаҳлъяк ҳӯҳтыстыҳлъяка̄».

Иисус агля̄ткылъюку Иерусалимымун, апыҳтуӷимаӷми пикақ нынилъю, ныңӣҳаӷнилъю. Китум а̄птыка̄: «Атанық, палясқуҳа̄ўа̄т югыт югулияҳқат?»
Иисусым кӣмсиқӣ: «Сягиқлъюси итыӷнақитык кахпыста̄ҳаҳқун амихкун. Уңипа̄тамси, угля̄пихлъыӷӣт югыт итыӷнақуткулъықут, та̄ўаңинақ итыҳпагниңитут. Мыңтыӷам юган макылъюни амик умыгьяҳтуҳлъықа̄. Ынка̄м тысқакмани ныкывӷалъықуси, тыңлюхтуҳлъықусилъю хўатын пимаҳпыси: “Атанық, қылъпыӷутаҳтикут!” Кӣмсиҳлъықӣси: “Налъюкамси, налъюкақалъю накын пиңустык”. Та̄хкын пилъықаҳси: “Ныӷылгусиӷақамкынлъю, мыӷылгусиӷақамкынлъю, апыҳтуӷика̄гутынлъю тумымнъи”. Иўырңа пиля̄таҳлъықӣси: “Уңипа̄тамси, налъюкамси, налъюкақалъю накын пиңустык. Иқилъяӷа̄тык хўаңамның лъпыси сыӷлытун пистыни!” Та̄хкын қия̄ӷўаҳлъяхлъықуси, хутысилъю тышқита̄хта̄мӣта. Таўатын пилъықуси ысҳақуфсики Авраамылъю, Исаакалъю, Иаковылъю, қамахлъюкилъю ӯкналиқистыт. Лъңит Атаныҳпагулъҳанилъықут Кияӷныӷым, иўырңа лъпыси ыслъятмун милю̄лъықӣси! Ынка̄м югыт тагилъықут асиваӷмың, пакфалъямың, айўа̄ның, икываӷмың. Та̄хкын ақумылъықут қаюӷвигыгни Атаныҳпагулъҳани Кияӷныӷым. Нагатаҳтыкқун, тама̄кут укалӣт мыгнунаҳсяҳқа̄гут, ынка̄м мыгнуналӷӣт укалӣҳсяҳқа̄гут».

Таўани пилъыӷми иляңита Фарисеит такулюку Иисус пика̄т: «Ма̄кын иқилъютын натмун аӷуляқи қаюҳлъяк Иродым туқутыстысюгақа̄тын».
Иисусым пикӣ: «Уңипа̄сяҳтуҳтыху та̄на кавӣқ: “Нагатын, аӷныӷми а̄нысқӯгуңа туӷныӷаӷның, на̄лъҳуқӯгуңалъю қинуюлӷӣның. Уна̄милъю таўатыҳпигақ пилъықуңа. Та̄хкын пиңая̄ни аӷныӷым қыпҳақақа апыӷӣҳлъықақа”. Нақамлъю иглыҳсяҳқапыста̄ӷӯңа аӷныӷми, уна̄ми, аўакаӷа̄нилъю, қаюҳлъяк итагнанӷитуқ ӯкналиқиста туқусяҳқа̄люни нани алңунак иўырңақун Иерусалимыми.
Ка̄й Иерусалим, Иерусалим! Туқуқуқақатын ӯкналиқистыт, милюҳпага̄таӷлюкилъю туқуқуқақатын Кияӷныӷым каяхтыкӣ лъпынун. Угля̄пихлъюку қырңуҳсюгақсяӷанка юхтын хўаңамнун, катам таўатын қаўа̄гым яқугми асиңанун қырңуҳтылъҳатун ама̄ӷани. Иўырңа таўатын пистысимаңитаҳпыңа! Нагатын, мыңтыӷа̄н па̄ҳқӣлъықа̄ қаюҳлъяк Кияӷныӷым унинъақа̄тынлъю, пақнӣҳсяӷнаниӷнақа̄тынлъю. Уңипа̄тамкын, ысҳаӷна̄нӷитаҳпыңа кынляңа хўатын пилъыҳқаҳпынун: “Кияӷныӷым қуяслъигу тагилӷӣ а̄тҳакун Атанӷым!”»

Listen to От Луки 13