Basketo - 2014 BSE (NT) Drama

Basketo - 2014 BSE (NT) Non Drama

ዬሱ̈ሲ ፌ ታማራንኮ “ዪንታ̇ ቡ̈ዲን ጫና̇ቂንታ̇ፖጋ̈ቤ፤ ጾ̈ሳ̇̇̈ባር ኣማ̇ኒንቲብቴ፥ ማ ታ̈ባራር ኣማ̇ኒንቲ̇ብቴ። ታ ባ̈ባ̈ ኣ̈ል ዶኢዝ ኬ̈ ዎይሊን ዎ፤ ቴ ዪንታ̇̇ቦ ዶኢዝ ቤስ̇ ጊ̈ጊሳንዳ̇ቦ ሉካ̇̈ሬ፤ ዪ̈ባይኮ ዎኒ ቴ ዪንታ̇ብ ሶ̈ላ̈ርዶ̈ን። ቴ ሉካ̇ራ ቤሲ̇ ጊ̈ጊ̇ሲኖፖ̇ ዓኒ ዪንታ̇ክ ማ̈ቃ̇ ዬ̈ንዳ̇፤ ማ̈ቃ̇ ዬ̈ራ ዪንቲ̇ ታባር ዎልኣ ዶኣምፔ̈ኒ ቴ ዎ ቤሲ̇ን ዪንታ̇ ኤካ̇ ሉካ̇ንዳ̇። ቴ ሉካ̇ዝ ቤሲ̇ን ዬልዝ ጎይሚን ዪንቲ̇ ኤሪ̈ሬ” ጌይዴ።
ቶ̈ማ̈ሲ ኢ̈ኮ “ጎዳ̈ዶ! ኔ ሉካ̇ዝ ቤሲ̇ን ኑ ኤሪባ̈ሴ፤ ዪዚ ጎይሚን ኑ̈ኒ ዎዛ̈ርታር ኤራንዳ̇ብ ዳንዳኢ̈ራ?” ጌይዴ።
ዬሱ̈ሳሬ ኢ̈ኮ “ኣሳቦ ኪንን ቤይሲዛ̈ዲኬ ሼምፓ ኢሚ̇ዝ ጎይ ታ̈ና፤ ቴ ባጋ̇ባር ማ̈ቃካ̇ይ ኣቴጌይን ሜላ ኦ ጎይባርካር ማ̈ቂ̇ን ቴ ባ̈ባ̈ኮ ዬይዝ ኣሲ ኦ̈ናካር ባዬ̇። ዪንቲ̇ ዎን ታ̈ና ኤሪኖኮ ቴ ባ̈ባ̈ዳር ኤሪ̈ርዶ̈ን፥ ዓት ዓኒፖ̇ ጌዳ ዪንቲ̇ ኢያ ኤሪ̈ሬ፤ ዪንቲ ኢያ ቤቂ̇ኔ” ጌይዴ።
ፊልጶ̈ሳር ኢ̈ኮ “ጎዳ̈ዶ! ኔ ኔ ባ̈ባ̈ ኑ̈ና ቤይሴጌይን ኑ̈ብ ጊዲ̈ሬ” ጌይዴ።
ዬሱ̈ሳር ኢ̈ኮ “ኣን ፊልጶ̈ሶ! ዓኖ̇ ዬላ̇ር ቴ ዪንታ̇ባር ዶኣምባ̇ራ ኔ ታ̈ና ኤራባሳ? ታ̈ና ቤቂ̇ኖ ኣሲ ቴ ባ̈ባ̈ ቤቂ̇ኔ፤ ኔ̈ኒ ዎዛርፌ̈ኒ ‘ኔ ባ̈ባ ኑ̈ና ቤይሳቤ’ ጋ̈ራ? ታ̈ኒ ቴ ባ̈ባባር ዎል ፔታ̇ን ማ̈ቂ̇ኖንዲፌ̈ኒ፤ ቴ ባ̈ባ̈ዳር ታባር ፔታ̇ን ማ̈ቂ̇ኖንዲፌ̈ኒ ኔ ኣማ̇ናባሳ? ቴ ዪንታ̇̇ብ ሶ̈ላዝ ቃ̈ሊን ሶ̈ላዚንዳ ቴ ሲልጣ̈ናባር ጊዳካ̇ዬ፤ ፌ ኦሲ̇ን ዎይ ኦ̈ዛዲ ታባር ዎ ታ ባ̈ባ̈ዳ። ታ̈ኒ ቴ ባ̈ባ̈ባር ዎ፥ ቴ ባ̈ባ̈ዳር ታባር ዎ፥ ጋ̈ር ዪንታ̇ብ ሶ̈ላዚን ኣማ̇ኒብቴ̇፤ ዪባዪኮ ቴ ኦ̈ዝ ኦ̈ሳ̇ንባራ ታ̈ና ኣማ̇ኒብቴ። ቴ ዪንታ̇ክ ኪን ጋ̈ሬ፥ ታ̈ና ኣማ̇ኒዝ ኣሲ ቴ ኦ̈ዝ ኦ̈ሲ̇ን ኢ ኦ̈ሬ፤ ታ̈ኒ ቴ ባ̈ባ̈ክ ሉካ̇ዚንኮታ̇ቦ ኢዝፓ̇ር ሺ ኦ̈ሬ። ባ̈ባ̈ዲ ፌ ናኣ ጎይባራ ቦንቺ̇ንታምፔ̈ኒ ዪንቲ̇ ቴ ሱ̈ምባር ጌሺዝ ባዝ ዎይ ቴ ዪንታ̇ብ ኦንዳ። ዪንቲ̇ ዎይ ባዝ ቴ ሱምንባር ጌሼጌይን ቴ ዪንታ̇ብ ኦ̈ንዳ” ጌይዴ።

“ዪንቲ̇ ታና ካርኮ ቴ ኪ̈ቲን ና̈ጊብቴ፤ ታ̈ኒ ቴ ባ̈ባ̈ ጌሻንዳ̇ ኢያሬ ሜናብ ዪንታ̇ባር ዶኢዝ ሜላ ዪንታ̇ ሚንዛዳ ዪንታ̇ብ ኢሚ̇ሬ። ኢያሬ ጾ̈ሳ̇̇̈ዲ ኢ ኪን ኦ̈ናኮ ኣሳብ ኤሪሲዝ ኣያ̇ና፤ ኣላማ ጋልዶ ኣሳን ኢያ ቤቃካ̇ዬ ማ ኢያ ኤሪባ̈ሶኮታ̇ቦ ኢንቲ̇ ኢያ ፌ ቡ̈ዳ ጋርታ̇ ኤካ̇ንዳብ ዳንዳኢባ̈ሴ፤ ዎቲናካሬ ዪንቲ̇ ኢ ዪንታ̇ባር ዎኮታ̇ብኬ ዪንታ̇ ጋርታ̇ ዶኣዚንኮታ̇ቦ ዪንቲ̇ ኢያ ኤሪ̈ሬ።
“ኢንዲክ ባ̈ቢክ ባዮ̇ ናኣንፌ̈ን ቴ ዪንታ̇ ባጚንዳባዬ̇፤ ቴ ዪንታ̇ክ ማ̈ቃ̇ር ዬ̈ንዳ̇። ጊላ̇ ቃማ̇ፖ̇ ዎሃ ኣላማ ጋልዳ̇ ዎ ኣሳን ታ̈ና ቤቂ̇ባ̈ሴ፤ ዎቲናካር ዪንቲ̇፥ ቴ ሼምፓባር ዎኮታ̇ብኬ ዪንታ̇ር ሼምፓባር ዶኢዛኮታ̇ቦ ታ̈ና ቤቂ̇̈ሬ። ታ̈ኒ ቴ ባ̈ባ̈ባር ፔታ̇ን ማ̈ቂ̇ኖንዶ̇ ዪንታ̇ር ታባር ፔታ̇ን ማ̈ቂኖንዶ̇ ታናር ዪንታ̇ባር ፔታ̇ን ማ̈ቂ̇ኖንዶ̇ ዪና̇ ኢዝ ቃሚ̇ን ዪንቲ̇ ኤሪ̈ሬ።
ቴ ኪ̈ቲን ሲስኪ̇ዛዲኬ ሲስኪኖን ኦ̈ሳ̇ ጋልዳ̇ ፌ̈ሺ̇ዝ ና̈ሳ ዪ̈ዳ ታ̈ና ካዛ̈ዲ፤ ታ̈ና ካዛ̈ዳ ቴ ባ̈ባ̈ ኢያ ካ̇̈ሬ፤ ታ̈ናር ኢያ ካ̈ሬ፤ ማ ቴ ታ̈ና ኢ̈ብ ኤሪሳ̈ሬ” ጌይዴ።
ዪሁዳ ኣስቆሮ̈ታ ጊዳካ̇ይዶ̈ኒ ሜላ ዪሁዳ ጌይዝ ኢ ታማ̈ራ̈ዲ ዬሱ̈ሳኮ “ጎዳ̈ዶ! ኔ ኔ̈ና ኣላሚን ጋልዳ̇ ዎ ኣስንቦ ጊዳካ̇ይዶ̈ን ኑ̈ብ ሙታ̇ ዎዛርታ̇ር ቤንታ̇̈ራ?” ጌይዴ።
ዬሱ̈ሳር ኢ̈ኮ “ታ̈ና ካዝ ኣሲ ቴ ቃ̈ሊምቦ̇ ኪ̈ቲንቲ̇ሬ፤ ቴ ባ̈ባ̈ዳር ኢያ ካሬ፤ ኑ ኢ̈ክ ዬ̈ሪ ኢባር ዎልኣ ዶኢ̈ሬ። ታ̈ና ካባሶዲ ቴ ቃ̈ሊምቦ̇ ኪ̈ቲንቲ̇ባ̈ሴ፤ ዓና̇ ዪንቲ̇ ሲስካ̇ዝ ቃ̈ሊንዳ̇ ታ̈ና ኪ̈ታ̇ር ሚሺኖ ቴ ባ̈ባ̈ ቃላዶኬ ቴዪ ጊዳካ̇ዬ።
ዓት ቴ ዪንታ̇ባር ዎንባራ ባዛን ዪን ዎይ ቴ ዪንታ̇ብ ሶ̈ሊኔ። ቴ ባ̈ባ̈ዲ ቴ ሱምባር ሚሺዛ ሚንዛ ጌ̈ሻ̇ ኣያ̇ና̈ዲ ኢ ዎይ ባዝ ዪንታ̇ ታማ̈ሪሲሬ፥ ቴ ዪንታ̇ብ ሶ̈ሊኖ ባዛን ዎይ ዪንታ̇ብ ኤልቅ ዎቲ̈ሬ። ታ̈ኒ ሳሪቲ ዪንታ̇ ቡ̈ዲን ጋርታ̇ ዶኣምፔ̈ን ዎታንዳ̇፤ ቴ ቴ ሳሪቲን ዪንታ̇ብ ኢማ̇ንዳ፤ ቴ ዪንታ̇ብ ኢማ̇ዝ ሳሪቲንዳ ኣላሚን ዪንታ̇ብ ኢማ̇ዚንዲፌ̈ን ጊዳካ̇ዬ። ዪንቲ ጫና̇ቂንታ̇ፒ̇ቴ፤ ማ ኢጫፒ̇ቴ። ‘ታ̈ኒ ሉካ̇̈ሬ፤ ማ ማ̈ቃ ዪንታ̇ክ ዬ̈ሬ’ ጌይኖን ዪንቲ̇ ሲስኪ̇ኔ። ዪንቲ̇ ታ̈ና ካ̈ርኮ ቴ ቴ ባ̈ባ̈ኮ ሉካ̇ዚንዳ ዪንታ̇ ኡፋይሳ̇̈ርዶ̈ን፥ ኣባ ጌይን ቴ ባ̈ባ̈ዲ ታ̈ፖ̇ ሺ̈ሬ። ቴ ዪንታ̇ብ ሶ̈ሊኖ ባዚን ፎቲንቲ̇ን ቤቃ̇ር ዪንቲ̇ ኣማናንፔ̈ኒ ኢዛ ፎቲንታካ̇ይዶን ቲ̈ኒታር ቴ ዪንታ̇ብ ሶ̈ላዴ። ዓና̇ ኣላሚምቦ̇ ላ̈ ሴ̈ጣኖ ዬይዛኮታ̇ቦ ዓኒፖ̇ ጌዳ ቴ ዪንታ̇ባር ዎይሊን ሶ̈ሊንታባሴ። ኢ ቴ ጋልዳ ኣባክ ፔቲ̇ ባዝ ዎታንዳብ ሲልጣ̈ና ኢ̈ብ ባዬ̇። ዎቲናካሬ ታ̈ኒ ቴ ባ̈ባ̈ ካዚን ኣላሚን ጋልዳ ዎ ኣሳን ኤራምፔ̇̈ኒ ቴ ባ̈ባ̈ ታ̈ና ኪ̈ቲ̇ኖ ባዛን ዎይ ፎታ̈ሬ፤ ዓት ዲንዲ̇ብቴ፥ ዓንዳፖ̇ ሉኪ̇ስቶ” ጌይዴ።

Listen to ዋ̈ኒ̇ሳ 14