Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

ईसू क्यो, “हाँची अंगूरा की वेलड़ी मूँ हूँ अन बापू परमेसर ईं बाग को माळी हे। ज्याँ डाळी मारा में हे अन फळ ने लावे हे, वो वींने काट नाके हे अन ज्या फळ देवे हे, वींने वो छांगे हे, ताँके वाँ साप वे सके अन ओरी फळ लावे। थाँ तो वणा बचनाँने मानबा का मस ज्यो में थाँकाऊँ क्यो हे पेल्याऊँ साप हो। थाँ मारा में बण्या रेवो अन मूँ थाँकामें बण्यो रेऊँ। जस्यान डाळी यद्याँ अंगूरा की वेलड़ी में लागी ने रेवे हे तो आपणाँ खुदऊँ ने फळ सके हे। वस्यानीस थाँ मारा बना फळ ने ला सको।”
“मूँ अंगूरा की वेलड़ी हूँ, थाँ डाल्याँ हो, ज्यो मारा में बणी रेवे हे अन मूँ वाँमें वाँ हेला फळ देवे हे। काँके माराऊँ न्यारा वेन थाँ कई भी ने कर सको हो। ज्यो मारा में बण्यो ने रेवे, वो वणी बेकार डाळी का जस्यान हे जिंने तोड़न हूँकबा का वाते फेक दिदो जावे हे। अस्यी डाळ्याँ बळीता का वाते काम आवे हे। यद्याँ थाँ मारा में बण्या रेवो अन मारा बचन थाँकामें बण्यो रेई, तो ज्यो भी छावो माँगो वो थाँका वाते वेजई। परमेसर की मरजी का जस्यान काम करो अणीऊँ मारा बापू परमेसर की मेमा वेई, तद्याँई थाँ मारा चेला केवावो।
“जस्यान बाप माराऊँ परेम किदो, वस्यानीस मूँ थाँकाऊँ परेम राकूँ हूँ। मारा परेम में बण्या तका रेवो। यद्याँ थाँ मारी आग्या मानो, तो मारा परेम में बण्या रेवो जस्यान के, मूँ आपणाँ बाप की आग्या मानी हे अन वाँका परेम में बण्या रेवूँ हूँ।
“में ईं बाताँ थाँकाऊँ ईं वाते किदी, ताँके मारो आणन्द थाँने मले अन थाँको आणन्द पूरो वे जावे। मारी आग्या या हे के, जस्यान में थाँकाऊँ परेम किदो हे वस्यानीस थाँ भी एक-दूजाऊँ परेम राको। अणीऊँ मोटो परेम कस्योई ने हे के, कुई आपणाँ दोस्त के वाते आपणो जीव दी देवे। ज्या आग्या मूँ थाँने देवूँ हूँ, यद्याँ वींने मानो तो थाँ मारा दोस्त हो। अबेऊँ मूँ थाँने दास ने केवूँ, काँके दास ने जाणे हे के, वाँको मालिक कई करे हे। पण थाँने मूँ दोस्त केन बतळाया हे, काँके में ज्यो बाताँ आपणाँ बापऊँ हूणी, वीं हारी थाँने बता दी हे। थाँ मने ने चुण्यो पण में थाँने चुण्या हे अन थाँने ठेराया हे के, थाँ अस्या फळ-फळो जीं हमेस्या बण्या रेवे। तद्याँ थाँ मारा नामऊँ ज्यो कई बापऊँ मांगो, वो थाँने दे। ईं वाते में थाँने आग्या दिदी हे के, थाँ एक-दूजाऊँ परेम राको।”

“यद्याँ दनियाँ थाँकाऊँ दसमणी राके हे तो थाँ जाणो हो के, वाँ थाँकाऊँ पेल्या माराऊँ दसमणी राके हे। यद्याँ थाँ दनियाँ का वेता, तो दनियाँ थाँकाऊँ परेम राकती। पण ईं वाते के, थाँ दनियाँ का ने हो पण में थाँने दनियाँ मेंऊँ चुण लिदा हे ईं वाते दनियाँ थाँकाऊँ दसमणी राके हे। ज्यो बाताँ में थाँकाऊँ किदी ही के, दास आपणाँ मालिकऊँ मोटो ने वेवे हे। वाँने आद राकज्यो। यद्याँ वणा मने हतायो हे, तो थाँने भी हताई। यद्याँ वणा मारी बाताँ मानी, तो थाँकी भी मानी। पण वीं यो हारोई मारा नाम का मस थाँका हाते करी, काँके वणा मने खन्दाबावाळा ने ने ओळक्यो हो। यद्याँ मूँ ने आतो अन वाँकाऊँ बाताँ ने करतो, तो वीं पापी ने वेता, पण अबे वाँका नके वाँके पापऊँ बचंबा का वाते कई आळको ने हे। ज्यो माराऊँ दसमणी राके हे, वो मारा बापऊँ भी दसमणी राके हे। यद्याँ मूँ वाँका में वीं काम ने करतो, जिंमें किदो, तो वीं पापी ने बणता। पण अबे वाँकाणी वणा कामाँ ने देक्या हे, तद्याँ भी वीं माराऊँ अन मारा बापूऊँ दसमणी किदी। यो ईं वाते व्यो के, वो बचन पूरो वे, ज्यो वाँके सास्तर में लिक्यो तको हे के, ‘वाँकाणी माराऊँ फालतू में दसमणी किदी।’
“पण जद्याँ वो हण्डाळी आई, जिंने मूँ थाँका नके बाप का आड़ीऊँ खन्दाऊँ, ईंको मतलब हाँच की आत्मा ज्यो बाप का आड़ीऊँ हे, तो वाँ मारी गवई देई। अन थाँ भी मारा गवा हो, काँके थाँ ठेटऊँ मारा हाते रिया हो।

Listen to यहुन्ना 15