Taa -GP (NT) Drama

Wali yako etu samparia tau to siromu etu sira makore pei mangkeni i Yesu resi gubernur nto Roma, i Pilatus. Rata nja’u ria sira mula mampakasala i Yesu, sira manganto’oka i Pilatus, “Kami mangarata tau si’i mangampotundeka tau to bansa ngkita see sira damangewa pomarenta ngkomi. Ia manganto’oka sira ne’e mangabayar asele resi makole ngkomi, i Kaisar. Pasi Ia mampoanika Ia semo i Kerisitu, Makole parajanji i mPue Allah.”
Ojo karoonya sira manganto’o gombo etu, i Pilatus mampotanaka resi i Yesu, ia manganto’o, “Wimba, bara monso Korom semo Makole nto Yahudi?”
Wali i Yesu mangansono, “Monso ewa panto’o ngkomi.”
Wali roo see i Pilatus manganto’oka kepala-kepala nto pampue pasi tau boros, ia manganto’o, “Aku taa mangarata palaong to naika ntau si’i to masipato rahuku.”
Pei sira maroso wo’u loonya manganto’o, “Anu to Ia mampotundeka ojo mangarotai tau juku ri tana ngkita to Yahudi. Ia mula mangika palaong to etu nja’u Galilea seore panewa si’i-si’i Ia ratamo rire.

Wali ojo pangandonge i mPilatus gombo nsira etu, ia mampotanaka, “Wimba tau si’i bara tau Galilea?”
Wali sira mangansono, “Iya, Ia tau Galilea semo.”
Wali tempo i Pilatus mangansani i Yesu Ia yako ri Galilea, ia manganto’oka tau, “Keni i Yesu resi i makole Herodes.” Naka pei i Pilatus mangika ewa wetu apa kamonsonya i Herodes semo to mangkuasang tau Galilea, pasi i Herodes etu ia re’e seja ri Yerusalem tempo etu. Wali joa i mPilatus mangkeni i Yesu njo’u ria.
Wali ojo karata nsira resi i Herodes, i Herodes masanang kojo mangkita i Yesu. Naka pei ia masanang apa ia roomo mangandonge boros sarita mangkonong i Yesu see naka ia masaemo rani mangangkita. Pasi ia rani mangkita palaong to taa rapobiasa to naika i Yesu. Wali i Herodes boros pampotanaka to ia mampotanaka resi i Yesu, pei i Yesu taa kojo mangansono. Ia ojo maroti. Pei tempo etu kepala-kepala nto pampue pasi tau to mampoguru porenta i Musa sira makore seja ri tango i Herodes, wali sira maroso kojo naika mampakasala i Yesu. Panewa yako etu i Herodes pasi tentaranya mangarunes pasi mampokore i Yesu. See naka sira mamposunsuka Ia pake to magaya kojo ewa pake makole pei manganto’oka tau mangkeni muni Ia resi i Pilatus. Wali re’e katawanya eo etu i Herodes sira dua i Pilatus masimusu, pei ri eo etu semo sira mawali masingkatao.


Wali yako etu i Pilatus mampasiromunaka kepala-kepala nto pampue pasi tau tua nto Yahudi pasi tau boros. Ia manganto’oka sira, “Komi re’e mangkenika aku tau si’i apa komi manganto’o Ia mangarotai tau see sira damangewa pomarenta. Pei lo’a, aku roomo mamparesa Ia ri pangkita ngkomi pei aku taa mangarata salaNya to nuto’o ngkomi etu. Pasi i Herodes taa seja mangarata salaNya, see naka ia mampawolilika muni i Yesu resi kami. Wali manasa tare to naika ntau si’i to masipato Ia rahuku mate. See naka aku ojo damanganto’oka tau mangantidas Ia panewa mangalapa muni.” Naka pei i Pilatus manganto’o ia damangalapa muni i Yesu apa palaong etu nawali kono kojo tempo Roa. Pasi ane ewa ada nto Yahudi tempo etu ponto to’u, tempo napongika Roa etu, i Gubernur taa maya taa mangalapa samba’a tau to ratarungku.
Pei ojo pangandonge ntau boros gombo i mPilatus manganto’o ia damangalapa i Yesu etu, sira sakaboo manganto’o, “Pate yau tau etu! Lapaka kami i Barabas! (Wali i Barabas etu ia ratarungku apa saba ia mangika rotai ri kota etu mangewa pomarenta. Pasi ia re’e seja mampopate tau.)
Pei i Pilatus rani kojo mangalapa i Yesu, see naka ia mampogomboka wo’u tau boros mampeyaa mangawali yau pampobuuka nsira see ia maya mangalapa i Yesu. Pei sira ojo sakaboo wo’u, sira manganto’o, “Paku Ia ri kaju pasape! Paku Ia ri kaju pasape!”
Wali i Pilatus mampogomboka wo’u sira katogo ngkaninya, ia manganto’o, “Maka pei komi rani mangika palaong to etu? Kesaa anu to maja’a inikaNya? Aku taa kojo mangarata palaong to inikaNya to masipato Ia rahuku mate, wali see naka aku damanganto’oka tau mangantidas Ia panewa mangalapa muni.”
Pei tau boros pasi kepala-kepala nto pampue etu ojo maroso wo’u loonya sakaboo manganto’oka ia paku yau i Yesu ri kaju pasape. Makanano kojo sira see naka nangi i Pilatus. Wali ia mangika ewa wimba pamporani nsira etu. Ia mangalapa muni i Barabas to ratarungku apa saba mangika rotai pasi mampopate tau, panewa ia mangawaika yau i Yesu resi sira see sira maya mangika ewa wimba pamporani nsira resi Ia.


Wali sira mangkeni i Yesu darapopate yau. Tempo sira yau etu sira simparata pei samba’a tau to owo rata ri Yerusalem yako nja’u longko. Ngkai etu sanganya i Simon pasi ia tau to yako ri kota Kirene. Wali tempo sira simparata pei i Simon etu sira mangansoko ia pei mampakasaaka ia mamposa’a kaju darapangampaku i Yesu. Roo see sira manganto’oka ia mangalulu ri payu i Yesu mamposa’a kaju etu. Wali tempo i Yesu rakeni etu, boros kojo tau to mangalulu ri payuNya. Pasi ri oyo ntau boros etu re’e bara sawei mba’a tau we’a to tumangi mangantangis i Yesu. Pei i Yesu mangandolika tangoNya resi sira pei manganto’o, “Indo-indo, komi to Yerusalem, ne’e mangantangis Aku. To tao-tao komi mangantangis koromu ngkalio pasi ngana ngkomi. Apa darata temponya tau damangarata kasesa, see naka sira damanganto’o, ‘Masanang kojo tau we’a to apa, pasi tau we’a to tawa riana, pasi to tawa re’e mamposusu ana kodi!’ Ewa see danato’o ntau apa saba kasesa to narata nsira etu. Pasi tempo etu sira damanganto’oka tongku, ‘Tampok yau kami!’ pasi sira damanganto’oka pantana, ‘Bombong yau kami!’ Wali naka pei kasesa etu damawali apa tempo si’i tau mangahuku Aku to tare salangKu. Palaong etu raporapaka ewa tau mangantunju kaju to tawa mangau. Wali ane ewa see, taa manto’o palaong to damawali resi komi to Yahudi to re’e sala, komi to raporapaka ewa kaju to mangaumo! Mapari wo’u palaong to damawali resi komi!” Etu semo to nato’oka i Yesu tau we’a to tumangi etu.
Wali tempo i Yesu rakeni etu, re’e seja dua mba’a tau to maja’a to rakeni seja darapopate yau. Wali yako etu sira rata nja’u pantana to rato’oka Wuku Wo’o. Rata nja’u ria tau to mangkeni i Yesu mangampaku Ia ri kaju pasape. Pasi sira mangampaku seja tau maja’a dua mba’a etu ri kaju pasape panewa kaju pasapenya rapokore ri awe nu ngkaju pasape i Yesu, samba’a ri sambalinya tondo ngkana, pasi samba’a wo’u ri sambalinya tondo ngkii.
Wali tempo i Yesu re’e ri kaju pasape etu, Ia manganto’oka i Pue Allah, “O Pa’angKu, lapa sala ntau si’i, apa sira taa mangansani batuanginya palaong to naika nsira si’i.” Ewa wetu nato’o i Yesu. Panewa tau to mangampaku Ia etu mampobata’aka yau pakenya.
Wali tempo etu tau boros makore mangalo’a-lo’aka palaong to mawali. Pasi re’e seja tau tu’a nto Yahudi, sira mampokore i Yesu. Sira manganto’o, “Ia nakoto mampalaes tau to yusa, wali biakamo Ia mampalaes koroNya ane monso pu’u Ia Kerisitu, Makole to napilis i mPue Allah.”
Pasi tentara seja mangampago i Yesu pei mampokore Ia. See naka sira mangkenika Ia ue nu anggur to mapodimo. Pasi sira manganto’oka Ia, “Ane monso pu’u Korom Makole nto Yahudi, palaes Korom yako ri kapateMu!”
Wali tempo i Yesu rapaku ri kaju pasape, ri wawo mbo’oNya sira mamposaka anu to ratulis ewa biasa naika nsira mampakanasaka tau boros sala ntau to rapaku etu. Anu to ratulis etu manganto’o, “SI’I SEMO MAKOLE NTO YAHUDI”. Wali gombo etu ratulis ri raya basa Yunani, basa Latin pasi basa Ibrani.
Wali samba’a tau maja’a to ipaku sindara-ndara pei i Yesu, ia mampokore seja i Yesu, ia manganto’o, “Bara si’anya Korom i Kerisitu, Makole parajanji i mPue Allah? Ane ewa see, gete, palaes Koromu pasi palaes seja kami!”
Pei yunu ntau maja’a etu manganseko ia. Ia manganto’o, “Gete! Maka pei korom magombo ewa wetu? Wimba, korom bara taa meka danahuku i mPue Allah? Kita togo sewaju huku to narata ngkita. Pasi masipato kojo kita dua mangarata huku to si’i apa si’i semo huku to masipato narata ntau to mangika palaong to kita nangika. Pei ane tau si’i, Ia tare mangika sala.”
Wali roo see tau etu manganto’oka i Yesu, “O Pue Yesu, ne’e mangkalingan aku tempo Komi ma’i mawali Makole.
Wali i Yesu manganto’oka ia, “Aku manganto’oka korom, monso pu’u seo si’i korom dasiwaka pei Aku ri tampa to bae kojo kayawanya, to rato’oka bonde i mPue Allah.”


Wali tempo i Yesu re’ewa rapaku ri kaju pasape, yako ntongo eo rata jam togo rede eo, juku tana etu mawuri rao. Mata nu eo tamo re’e pananya. Pasi tempo etu semo kodi majoli rindi ronto ri raya banua i mPue Allah rasia dua yau. Roo see i Yesu maroso loonya kaboo, manganto’o, “Pa’angKu, toniingKu Kusarumakakamo resi Komi.” Wali ojo karoonya i Yesu manganto’o gombo etu Ia mampakapura nosaNya.
Wali kepala ntentara to mangkepalang tentara to satu kaborosinya, ia mangkita palaong to mawali etu. Wali ojo pangkitanya etu ia mangabarong i Pue Allah, pasi ia manganto’o, “Monso pu’u tau si’i tare salaNya.” Pasi tempo etu re’e seja boros tau to yusa to makore nja’u ria pei mangalo’aka palaong to mawali, sira mangkita seja anu to mawali resi i Yesu etu, see naka sira mangantopo-ntopo dadanya mawolili muni apa sira mawo kojo rayanya. Pei samparia tau to masinsani kojo pei i Yesu, sira tawa yau muni sira ojo maroo-roo makore nja’u longko. Pasi ri oyo nsira re’e seja bara sawei mba’a tau we’a to mangalulu i Yesu yako nja’u Galilea. Wali samparia palaong to mawali etu, sira seja mangangkita.


Wali ri tempo ngkapate i Yesu, re’e ri Yerusalem samba’a tau to yako kota Arimatea, sanganya i Yusup. Ia tau to matao pasi to sangkani mangika anu to masipato raika, pasi ia mangampeas temponya i Pue Allah mawali Makole ri lino. Ia seja samba’a to pobotus nu agama nto Yahudi, pei ia taa singkonong pei songka pasi palaong to naika nu yununya mangkonong i Yesu. Wali i Yusup etu ia yau mamporapika resi i Pilatus, to’onya, “Waika aku lemba i Yesu dakupongkeli.” Wali i Pilatus mangabiaka ia yau damangoko lemba i Yesu.
Wali yako etu i Yusup yau mantauraka lemba i Yesu yako ri kaju pasapeNya panewa ia mangawungusika kain lena. Panewa roo see ia mangkeni tau mate etu njo’u wayau to raika ri woto mbatu pei mampoduli nja’u rayanya. Wayau etu dabouwa, tawa re’e tau mate rapoduli nja’u rayanya. Wali tempo palaong to etu mawali, tempo etu semo eo to napangampasilonga nto Yahudi pangkoni pei to yusa-yusanya to darapake ri Eo Rapandoo, apa damulamo Eo Rapandoo.
Wali tempo i Yusup mampongkeli i Yesu, tau we’a to re’e mangalulu i Yesu yako ri Galilea, sira mangalulu ri payu i Yusup pei mangkita dayo i Yesu pasi mangkita seja ewa wimba naika i Yusup mampoduli tau mate ri rayanya. Roo see sira mawolili muni ri banua nsira pei mampasigena minya pasi soga to magaya waunya to darapalasika ri lemba i Yesu mangalulu ada nsira. Pei ane ri Eo Rapandoo sira tare mangika bara kesaa apa sira mampolaika porenta i Musa.

Listen to Lukas 23