Ixil - Chajul - 2016 Edition (No Drama - NT)

Ixil - Chajul - 2016 Edition (NT)

Atich val u vinaq uvaʼ Laasaroich ibʼij; oybʼaliche. Tul atich kaʼvaʼl tanabʼ. Vaʼl uvaʼ Malich ibʼij, vaʼt uvaʼ Tajich ibʼij. Tul aj Vetaaniaich u vinaq tuchʼ inqʼa tanabʼ. Antetzxh Male, u tanabʼ Laasaro, uvaʼ xamtel ex toksa vet u txʼumbʼisabʼal tiʼ toq Jesuus. Tul itzaqsa u toq Jesuus tuchʼ u xiʼl iviʼ.
Yaʼne taqʼ bʼen inqʼa tanabʼ Laasaro yol xeʼ Jesuus. Tul ech u yol ex alaxoq te Jesuus s-eche: —QuBʼaal, il Laasaro oybʼale uvaʼ atxh avaanima s-tiʼ, —xeʼt taqʼbʼ u yol.
Tabʼietz vet Jesuus u yol, tul ech tal Jesuus s-eche: —Eche u yaabʼil uvaʼe, tan yeʼl Laasaro laʼ kam taʼn. Pet qat ok u yaabʼil tiʼ Laasaro, tiʼ uvaʼ laʼ oksal iqʼij quBʼaal Tiuxh. Atz laʼ oksal inqʼij, tiʼ uvaʼ, in, iKʼaol quBʼaal Tiuxh, —xeʼt Jesuus.
Atichetzxh taanima Jesuus tiʼ Laasaro, atz tiʼ Taj, atz tiʼ Mal, poro yekich koq bʼen Jesuus uvaʼs tabʼit Jesuus u yol uvaʼ oybʼalich Laasaro. Pet ibʼan nalich Jesuus kaʼvaʼt qʼij tal uvaʼ atiche.
Paletz vet kaʼvaʼl qʼij, tul ech tal Jesuus te inqʼa nikich itxhus tibʼ s-kʼatza s-eche: —Koʼvaq tuulbʼal Judeea inpaqte, —xeʼt Jesuus.
Yaʼne ech tal inqʼa nikich itxhus tibʼ kʼatz Jesuus s-eche: —Txhusul qetz, yaʼn kuxh kol iyatzʼteʼl axh inqʼa iqʼesal uqʼeʼybʼal s-sivan. Tul ¡aʼ nik aal uvaʼ toq bʼenoq axh tzitzi inpaqte! —xeʼtaqe.
Yaʼne ech tal Jesuus s-eche: —Ee. Tan ech kuxh vatin, eche tuulbʼal invaʼl qʼij uvaʼ kabʼlaval oora tuul. Tuulbʼaletz u kabʼlaval oora, tul laʼ utxh ixaon u xaol s-tuulbʼal. Tul yeʼxhkam invaʼq laʼ ikʼ s-tiʼ, tan qʼiil. Echatetz kuxh ine, tan yeʼxhkam laʼ maqon in tiʼ ibʼanax u taqʼon quBʼaal Tiuxh. Pet ech koq vet u aqʼbʼal, tan kam kuxh laʼ ok vet u xaol s-tiʼ, tan tokto veteʼ, —xeʼt Jesuus.
Yaʼetz talt Jesuus u yol uvaʼe, tul ech tal Jesuus s-eche: —Il naq u qamiʼk Laasaro vatya. Pet maʼt inbʼey naq, —xeʼt Jesuus.
Yaʼne ech tal inqʼa nikich itxhus tibʼ kʼatz Jesuus s-eche: —QuBʼaal, oqetz vaty naq, tul toqetz tiqʼo tibʼ naqe, —xeʼtaqe. Tan aʼ nikich motx titzʼa uvaʼ yiqxh vataʼm nikich ibʼan Laasaro. Pet koq Jesuus, tan aʼ talvat Jesuus u yol, tiʼ uvaʼ maʼtich ikam vet Laasaro.
Yaʼne tal vet Jesuus inuqul u yol te inqʼa nikich itxhus tibʼ s-kʼatza. Tul ech tal Jesuus s-eche: —Qat kamy vet naq u Laasaro. Tul nik inchiibʼ s-tiʼ, tan jit een in tzitzi setuchʼ uvaʼs qat ikam naq. Pet echetz toq eqejte uvaʼ, in iKʼaol quBʼaal Tiuxh. Pet koʼvaq qil naq, —xeʼt Jesuus.
Yaʼne tzaqʼbʼ Maxh, uvaʼ ‹Xuʼm› chichich eʼli. Tul ech tal Maxh te inqʼa imol s-eche: —Koʼvaq. Tul ech tzum qukam tuchʼ Jesuus, —xeʼt Maxh.

Bʼiitichetz kuxh vet taqʼbʼ Jesuus tu tal tenam Vetaania, tul tabʼi Jesuus uvaʼ kajvaʼlich vet qʼij imuqux Laasaro. Kamal vaʼlich kuxh oora ixoʼl u tal tenam Vetaania tuchʼ u tenam Jerusaleen. Tan naqlich kuxh ixoʼl. Poro mamala inqʼa tij imam Israeel maʼtichaq tul tiʼ ikʼuqbʼal ikʼuul Taj tuchʼ Mal, tiʼ uvaʼ tan, kam vixibʼen.
Tabʼietz vet Taj uvaʼ aalich vet taqʼbʼ Jesuus, tul bʼen vet Taj tiʼ ikʼulux Jesuus. Pet Mal, tan kaj Mal t-otzotz.
Yaʼne ech tal Taj te Jesuus s-eche: —InBʼaal, at koq axh tzitza, tul yeʼlebʼ vinxibʼen qat kami. Pet kʼuxhetz qat kamya, tan vootzaqle uvaʼ jankʼal uvaʼ toq aabʼi te quBʼaal Tiuxh, tul toq taqʼ see, —xeʼt Taj.
Yaʼne ech tal Jesuus s-eche: —Tetxhal kuxh toq itzʼeʼvoq vaxibʼen inpaqte, —xeʼt Jesuus.
Tul ech tal Taj s-eche: —Bʼantan vootzaqle uvaʼ, tetxhal laʼ itzʼeʼv vinxibʼen inpaqte uvaʼs laʼ titzʼeʼv inqʼa kamnaʼq s-kaqaayil timotxebʼal qʼij saq, —xeʼt Taj.
Yaʼne ech tal Jesuus s-eche: —Aʼ ine, u aqʼol qʼij saq uvaʼ yeʼl iyaʼebʼal imotxebʼal. Tul aʼ, ine, uvaʼ laʼ itzʼeʼvsan inqʼa kamnaʼq inpaqte. Tan jaʼl uvaʼ laʼ qeon in, kʼuxh laʼ kam vitxhiʼoʼl, tan laʼ itzʼeʼv inpaqte. Jankʼalxh ex, inqʼa itzʼlel ex, ex, uvaʼ laʼ qeon in, tan at qʼij esaq uvaʼ yeʼl iyaʼebʼal imotxebʼal laʼ ibʼana, kʼuxh maʼt ekameʼ. ¿Nik aqej u yol uvaʼ nik val see? —xeʼt Jesuus te Taj.
Tul ech tal Taj s-eche: —Ee. Nik inqejeʼ, inBʼaal. Tan nik inkʼuqbʼa inkʼuul uvaʼ, aʼ, axhe, u Kriisto, uvaʼ alel ka u tulebʼal vatz txʼavaʼ. Atz aʼ, axhe, viKʼaol quBʼaal Tiuxh, —xeʼt Taj.

Yaʼetz kuxh vet Taj tiʼ talax u yol te Jesuus, tul qʼaʼv vet Taj. Tul jutx kuxh talt Taj viyol te Mal s-junal. Tul ech tal Taj te Mal s-eche: —Il Jesuus, u Txhusul qetz, uy veteʼ. Tul il axh nik ijaq axh Jesuus, —xeʼt Taj.
Taʼnetzxh tabʼi Mal u yol, tul nal kuxh itxakp Mal. Tul yekich vet Mal tal uvaʼ atich Jesuus. Tan yeʼnaqich aqʼbʼoq Jesuus tu tal tenam. Tul antxh atich Jesuus tal uvaʼ ex kʼuluxik Jesuus taʼn Taj.
Eenichetz jolol inqʼa tij imam Israeel t-totzotz Mal tiʼ taqʼax kʼuqlebʼ ikʼuul Mal. Tul tilaq veteʼ uvaʼ nal kuxh itxakp Mal, atz bʼeneʼl. Tul okaq vet bʼen tiʼ Mal. Tul ech motx tal s-eche: —Yeklebʼ Mal oqʼoq tal uvaʼ muqel vixibʼen, —xeʼtaqe.
Aqʼbʼetz vet Mal tal uvaʼ atich Jesuus, tul ijoqbʼa kuʼ tibʼ Mal vatz Jesuus. Tul ech tal Mal te Jesuus s-eche: —InBʼaal, atich koq axhe tzitza, tul yeʼlebʼ vinxibʼen kami, —xeʼt Mal.
Tiletz vet Jesuus toqʼ Mal, atz tilat vet Jesuus toqʼ inqʼa iqʼesal tuqʼeʼybʼal inqʼa tij imam Israeel, inqʼa txhʼuyich tiʼ Mal, tul yekichxh txumun taanima quBʼaal Jesuus. Atz txhoʼn vet s-te.
Yaʼne ech tal Jesuus s-eche: —¿Taletz emuqvat vitxhiʼoʼl Laasaro? —xeʼt Jesuus.
Tul ech motx tal s-eche: —QuBʼaal, avuleʼ. Tul ul eeleʼ, —xeʼtaqe. Tul oqʼ vet Jesuus.
Tiletz vet inqʼa iqʼesal tuqʼeʼybʼal inqʼa tij imam Israeel toqʼ Jesuus, tul echaq motx tal vet s-eche: —¡Jay, sibʼich bʼakxh taanima Jesuus tiʼ Laasaro! —xeʼtaqe.
Pet echaq motx tal jolt s-eche: —Oq aʼ naqe uvaʼe saqinsan val u tzot, tul aʼetz koqebʼ yeʼich laʼ oleʼvik naq, tiʼ uvaʼ yeʼl Laasaro laʼich ikuy naq ikameʼ, —xeʼtaqe.

Yaʼne tira txhoʼn taanima Jesuus t-txumuʼm. Tul bʼen vet Jesuus tal uvaʼ muqtxʼik Laasaro. Tul aʼ ex muqlik Laasaro tuul val u jul vatz val u pejoʼn. Tul atich ok val u mamaʼ sivan titziʼ u jul.{*}
Yaʼne ech tal Jesuus s-eche: —Eesavaq el u sivan, —xeʼt Jesuus.
Tul ech tal Taj, u tanabʼ Laasaro, s-eche: —InBʼaal, ¡xev veteʼe!, tan kajvaʼx vet qʼij ikameʼ, —xeʼt Taj.
Tul ech tal Jesuus s-eche: —Yetz qat vall see uvaʼ oq laʼ aqej u yol uvaʼ nik val see, tul toq eel u mam tiqleʼm quBʼaal Tiuxh, —xeʼt Jesuus.
Yaʼne eesal vet el u sivan titziʼ u muqbʼal kamnaʼq tal uvaʼ muqlik Laasaro. Tul saqin jaʼ Jesuus t-amlikaʼ. Tul ech tal Jesuus s-eche: —InBʼaal Tiuxh, nik vaqʼ taʼntiuxh see, tan kam uvaʼ qat injaq see, tul nik abʼaneʼ. Atz vootzaqle uvaʼ bʼenamen aabʼit in tiʼ kam uvaʼ nik vabʼi see. Pet nik val u yol, tiʼ uvaʼ laʼ motx iqej inqʼa xaol, inqʼa at sinkʼatza, uvaʼ axh qat txhaqon tzaan in, —xeʼt Jesuus.
Yaʼetz kuxh talt Jesuus u yol, tul taqʼ jaʼ Jesuus tiʼ iqul. Tul ech tal Jesuus s-eche: —¡Laasaro, aveluʼl! —xeʼt Jesuus.
¡Eletz vet ul Laasaro, uvaʼ maʼtich ikameʼ! Tul sutimich ok vaʼl qinkin bʼuʼq tiʼaq toq Laasaro. Atz qitzich ok vaʼt qinkin bʼuʼq tiʼ iqʼabʼ Laasaro. Tul sutimich ok vaʼl bʼuʼq tivatz Laasaro inpaqte.
Yaʼne ech tal Jesuus s-eche: —Chitvaq el inqʼa bʼuʼq tiʼ Laasaro. Tul laʼ utxh ixaon vet Laasaro, —xeʼt Jesuus.


Tul mamala vet inqʼa tij imam Israeel, inqʼa ex aqʼon kʼuqlebʼ ikʼuul Mal, qeon Jesuus uvaʼ, aʼich Jesuus u Kriisto. Tan motx til u mam kaebʼal aanima ibʼan Jesuus. Poro atich jolt inqʼa tij imam Israeel uvaʼ yekich vet tiʼ talax inqʼa yol te inqʼa fariseeo tiʼ kam uvaʼ ibʼan Jesuus.
Yaʼne ibʼekʼ vet inqʼa iqʼesal oksan yol tuchʼ inqʼa fariseeo tul inqʼa iqʼesal aqʼol kuʼ yol tinuqul. Tul echaq motx tal vet s-eche: —¿Kam toq qubʼan setuchʼ? Tan mamala kaebʼal aanima nik ikʼutxh naq u vinaq uvaʼe xoʼl inqʼa xaol. Oqetz toq kuxh saqinoq oʼ, tul oq yeʼ toq qumaq naq s-tiʼ, tul mamala xaol toq motx qeon naq. Yaʼne toq motx uloq inqʼa aj Rooma tiʼ isotzsal el u qutenam. Atz toq ul isotzsa el u qutxaichla atibʼal, —xeʼtaqe.{*}
Atichetz ok Kaifaas s-mam iqʼesal oksan yol vatz Tiuxh tuulbʼal u yaʼbʼ uvaʼe, tul ant Kaifaas atich s-xoʼl. Tul ech tal Kaifaas s-eche: —Tira yeʼ nik ibʼen inqʼa yol sete. Tul aʼl bʼaʼn s-qe uvaʼ vaʼl kuxh vinaq laʼ yatzʼax el, tul jit jankʼal oʼ tuchʼ u qutenam laʼ sotzeʼl, —xeʼt Kaifaas.
Poro el koq kuxh u yol tiviʼ Kaifaas. Pet, tiʼ uvaʼ, aʼ Kaifaas atich ok siqʼesal oksan yol vatz Tiuxh tuulbʼal u yaʼbʼ uvaʼe. Echetz ibʼanbʼel Kaifaase taʼn quBʼaal Tiuxh tiʼ ibʼaxabʼsal talaxeʼ, uvaʼ tetxhal laʼich kam Jesuus tiʼ jankʼal u tenam, inqʼa tij imam Israeel. Atz jit kuxh taʼn tiʼ inqʼa tij imam Israeel, pet tiʼ jankʼal inqʼa xaol s-kaqaayil, inqʼa talaq kuxh jeqlel vatz u txʼavaʼ. Tan aʼ isaʼ quBʼaal Tiuxh uvaʼ vaʼl kuxh vet inqʼa niman tetz laʼ ibʼana. Echetz antxh tuulbʼal u qʼij uvaʼe, tul xeʼtaq vet inqʼa iqʼesal uqʼeʼybʼal tiʼ inukʼux u yol tiʼ kam laʼich motx tulbʼe iyatzʼax el Jesuus.
Echetz yeʼl Jesuus nikich ikʼutxh ipal vet vatz inqʼa tij imam Israeel. Pet yekich el vet tzaan Jesuus tuulbʼal u tenam Jerusaleen. Tul yekich vet Jesuus t-vaʼt u txʼavaʼ uvaʼ naqlich kʼatz val u tzaqa txʼavaʼ uvaʼ yeʼlich xaol s-tuul. Tul bʼen t-invaʼl u tenam uvaʼ Efraiinich ibʼij. Tul tzitzi atink vet Jesuus tuchʼ inqʼa nikich itxhus tibʼ s-kʼatza.
Toqnaʼqichetz opoonoq vet viqʼiil inimat inqʼa tij imam Israeel u nimla qʼij Ipal Aanxel. Tul mamala vet xaol tzaj tuulbʼal u txʼavaʼ uvaʼe, inqʼa een jeqlich t-inqʼa talaq tenam, tul motx aqʼbʼ vet tu tenam Jerusaleen tiʼ inimal inqʼa txʼajo ibʼ vatz quBʼaal Tiuxh. Tan echxh nikich motx ibʼane uvaʼs yeʼnaq aqʼbʼoq u nimla qʼij tetz Ipal Aanxel.
Poro maʼtich talt inqʼa iqʼesal oksan yol vatz Tiuxh tuchʼ inqʼa fariseeo uvaʼ jabʼil laʼich abʼin tal uvaʼ atich Jesuus, tul laʼich ul tal te inqʼa iqʼesal. Yaʼne laʼich bʼen txeypoq vet Jesuus. Tul nikich itxhokox Jesuus tu nimla atibʼal tuulbʼal u tostiuxh taʼn inqʼa xaol. Tan ech nikich motx tal s-vatzaq s-eche: —¿Kam eyol? ¿Maq tul naqe tu nimla qʼij nik enatxheʼ?, pet ¿maq yeʼle? —chichichaqe.

Listen to Xhun 11