Isaya 65
65
Basizibi bayoojana mulandu, pele baluleme bayoojana coolwe munyika impya iiti lengwe
1 #
Int 22:27; Is 2:2,3; Ef 2:12,13; Is 63:19; Rom 10:20 Ndakayanda kuyandaulwa kulibaabo ibatakali kundibuzya, ndakayanda kujanwa kulibaabo ibatakali kundiyeeya. Ndakaamba kuti, Mpondi, mpondi, kumusyobo iwa takali kukomba izina lyangu. 2#Dt 32:5; Int 36:4; Rom 10:21Buzuba boonse buyo ndakatambika maanza aangu kucisi cacinguni, bantu beenda munzila iitali imbotu cakutobela miyeeyo yabo beni, 3#Lev 17:5; Is 1:29bantu bandikalazya lyoonse kumeso aangu, batuula zipaizyo mumyuunda akutenta tununkilizyo atala azitina, 4#Dt 18:11; Lev 11:7bakala mutubanda akoona mumasena aasisidwe, balya nyama yangulube, amusinza wanyama iisesemya muuli muzilido zyabo, 5#Mt 9:11; Lk 5:30; Jud 1:19baamba kuti, Tantamuka okuno, utasweni afwiifwi kulindime, nkaambo tulaandeene ayebo. Bantu bali obo bandikataazya mbuli busi mumpemu, mbuli mulilo uuyaka buzuba boonse. 6#Dt 32:34; Mal 3:16Amubone! Makani alilembedwe kubusyu bwangu, Nsikooyooumuna pe, njoobabweedezya inkoto yabubi. Ncobeni njoobabweedezya muzyamba zyabo inkoto yabubi, 7#Lev 26:39; Int 106:6; Dan 9:8; Mt 23:32inkoto yamilandu yabo beni ayamilandu yabamawisi yoonse, mbwaamba Jehova. Nkaambo kakuti bakatenta tununkilizyo atala lyazilundu akundisampaula atulundulundu, njooeleka muzyamba zyabo inkoto yabubi bwancito zyabo zyakale.
8 #
Joel 2:14
Mbuboobu mbwaamba Jehova. Mbubonya mbuli musinza uulwela mbuujanwa mucikungo camisaansa, elyo muntu ulaamba kuti, Utacinyonyooni, nkaambo muli coolwe mulincico, nzoocita mbubonya obo kubalanda bangu. Nsikooyoobanyonyoona boonse pe, 9#Mt 24:22Njoobusya lunyungu muliJakobo, amumukowa wa-Juda njoobusya basikuvuba zilundu zyangu. Bantu mbonsalide mbobati zivube, abalanda bangu bayookala mpoonya awo. 10#Hos 2:15; Jos 7:24-26Saroni uyooba macelelo aambelele, akuti lya-Akori liyooba mabutelo aaŋombe. Zyoonse ziyooba zyabantu bangu bandiyandaula. 11#Ezk 23:41; 1 Kor 10:21Pele inywe numuleka Jehova akuluba cilundu cangu cisalala, inywe numubamba intafule yanjuka akutilila muzimu wacoolwe bukoko, 12#Tus 1:24; Is 66:4; Jer 7:13; Zek 7:7coolwe ncinti mubambile ndipanga; muyookotama nyoonse kukujayigwa, nkaambo nindakaita mwakabula kuvuwa, nindakaamba mwakakaka kuswiilila. Mwakacita zintu zibi mumeso aangu akusala zintu zitandibotezyi.
13Nkaambo kako mbuboobu mbwaamba Mwami Jehova. Balanda bangu bayoolya, pele inywe muyoofwa inzala. Balanda bangu bayoonywa, pele inywe muyoofwa nyota, Balanda bangu bayoosekelela, pele inywe muyoousa insoni. 14Balanda bangu bayooimba cakukondwa mumoyo, pele inywe muyoolila mumause aamyoyo yanu, muyoomoka mukupenga kwamyuuya yanu. 15#Tus 10:7; Inc 11:26Izina lyanu muyoolisiila basalidwe bangu libe citukizyo. Mwami Jehova uyoomujaya, abalanda bakwe uyoobaulika izina limbi. 16Lino kufumbwa uulilongezya munyika uyoolilongezya muzina lya-Leza walusinizyo, ayooyo uukonka munyika uyookonka muzina lya-Leza walusinizyo, nkaambo mapenzi mataanzi alilubidwe, alisisidwe kumeso aangu.
17 #
Is 66:22; 2 Pet 3:13; Ciy 21:1 Nkaambo amubone! Ndalenga ijulu ipya anyika impya. Ezyo zyakusaanguna tazikooyooibalukwa limbi nikuba kuyeeyegwa. 18Pele amukondwe akusekelela lyoonse nkaambo kaceeci ncinsi lenge, nkaambo ndalenga Jerusalemu, ube cikondelezyo, abantu bawo, babe cibotezyo. 19#Ciy 21:4; 7:17Njoosekelela Jerusalemu akukondelwa bantu bangu, Tamukooyoomvwigwa limbi mulinguwo ijwi lyakulila niliba ijwi lyakupenga. 20#Muk 8:12Tamukooyooba limbi mulinguwo mucece uufwa natana kukula, nanka mucembele uufwamba kufwa niitana kuzulila myaka yakwe. Mwana uyoofwa naamana myaka iili mwanda. Pele sizibi uuli amyaka iili mwanda uyooba mutusi.
21 #
Lev 26:16
Lino bayooyaka maanda akukala mulingao, bayoobyala myuunda yamisaansa akulya micelo yayo, 22Maanda ngebayaka taakooyookalwa umbi, amicelo njibabyala tiikooyooligwa umbi pe, nkaambo mazuba aabantu bangu ayooba mbuli mazuba aamusamu, abantu mbensalide bayoongozya milimo yamaanza aabo. 23#Dt 28:41; Hos 9:12Tabakooyoobeleka cabuyo nikuba kubelekela mapenzi, nkaambo bayooba bana bacoolwe ca-Jehova, alunyungu lwabo mbubonya. 24#Int 32:5; Dan 9:21; Mt 6:8; Inc 4:31Lino nibatana kwiita njoobavwiila, nibacili mukwaamba njooswiilila. 25#Matl 3:14; Rom 16:20; Is 2:2; Dan 2:35; Ciy 14:1; Is 11:6-9Umpe akabelele, zyoonse ziyoolya mucilido comwe; mulavu uyoocela bwizu mbubonya mbuli iŋombe; anzoka, bulongo buyooba cilyo cayo. Tabakooyooluma nikuba kunyonyoona moonse mucilundu cangu cisalala, mbwaamba Jehova.
Sélection en cours:
Isaya 65: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.
