Mateo 6

Jesús Ye'yaye, De'oyerepa Yo'oye Ayere

1Pa̱ini de'oye yo'oyere i̱ñoñu'u cajë yo'oma'pë pa'ijë̱'ë. Ja̱je cuasajë yo'ocohua'ire cato mësaru ja'quë ma'tëmo pa'iquëpi de'huacaisi co'amaña i̱siye peoji. 2Ja̱je pa'ina, mësarupi peocohua'ini co̱caisicohua'i pani si'a pa̱i asaja̱jë cajë caroja̱ima'pë pa'ijë̱'ë, coa cacohua'i yo'oyeje̱. Ja̱ohua'i cato pa̱i tsi'sisi huë̱'ñana cui'ne ma'añana caroja̱icohua'i a'ë, pa̱ipi de'ocohua'i a'ë, caja̱jë cajë. Ja̱je pa'ina, yë'ë mësarute nuñerepa cayë, ja̱je yo'ocohua'i cato tsoe payë, i̱ohua'i yo'o do'ire i̱si cua̱ñose'e pa̱i sihuacaiyere. 3Ja̱je pa'ina, më'ëpi peocohua'ire co'amaña i̱siquë pani, më'ëse'e yahuerepa i̱si tëjijë̱'ë, më'ë de'o cajeireje̱ quëaye peoye. Coa ne ma'ñeje pa'i pa'ijë̱'ë. 4Coa yahue yo'ojë̱'ë. Cui'ne më'ëpi ja̱je yahue yo'oquëna, më Ja'quëse'e ñasiquëpi më'ëre co'amaña i̱sisipi, de'huacaise'ere.

Jesupi Ye'yapi Se̱ñere

(Lc 11.2-4)

5Cui'ne mësarupi se̱cohua'i pani coa cacohua'i yo'oyeje̱ yo'oma'pë pa'ijë̱'ë. Coa cacohua'i cato pa̱i tsi'sisi huë̱'ñana huëni nëcani cui'ne ma'aña so̱nohuëapi se̱ñere yëcohua'i a'ë, pa̱ipi ñajajë cajë. Care payë, ja̱ yo'ose'epi tsoe payë, i̱ohua'i yo'o do'ire i̱si cua̱ñose'e pa̱i sihuacaiyere. 6Ja̱je pa'ina, më'ëpi se̱quë pani më'ë tu'rihuëna cacani eta sa'ro si̱oni më ja'quë më'ë ja̱'re co̱ni pa'iquëni se̱jë'ë, ja̱ropi. Ja̱ maca më'ë ja'quë më'ë yahue yo'oye ñaquëpi, më'ëre de'huacaisi co'amañare i̱sija̱'quë api.

7Maija'quëre se̱ maca cui'na yë'ore ca co̱ma'pë pa'ijë̱'ë, do'i peoyepi. Maija'quëre sehuoma'cohua'ipi jaiye te'oni cajëna, Diusu asacasipi cajë cuasacohua'i a'ë. 8Ja̱ohua'ije̱ pa'iohua'i pa'ima'pë pa'ijë̱'ë, mësaru cato. Mësaru ja'quë cato tsoe ñaji, mësarute caraye ja̱ yë'ta'a mësaru i̱te se̱ma'në. 9Ja̱je pa'ina, mësarupi se̱cohua'i pani ñeje se̱jë'ë:

‘Ma'tëmo pa'iquë yëquë ja'quë,

De'oyere pa'ë case'e pa'ija̱quë, më'ë mami.

10Më'ë cua̱ñeñepi daija̱quë yëquëna.

Më'ë yëyepi yo'oye pa'ija̱quë, iye yejaje̱ ja̱ro ma'tëmo yo'oyeje̱ pa'ye.

11Yurepi i̱sijë̱'ë, a̱o mañaje yëquëre caraye.

12Yëquë co'aye yo'ose'ere oi ne de'huacaijë̱'ë, yequëre co'aye yo'osicohua'ire yëquë oijë ne de'huacaiyeje̱ pa'ye.

13Yëquëre neñañepi daina, coa ñama'ë, co'ayere esa nejocaijë̱'ë. Më'ë tse̱ a'ë cua̱ñeñe, jerepa pa'i pa'iye cui'ne de'oyerepa, caraja̱iñe peoyerepa. Ja̱je pa'ija̱quë.’

14Ja̱je pa'ina, mësarute co'aye yo'ocohua'ire oijë ne de'huacaijë̱'ë. Mësarupi ja̱je yo'ocohua'i pa'ito, Diusu ma'tëmo pa'iquëje̱ mësaru tayoyere oi ne de'huacaija̱'quë api. 15Ja̱je pa'iquëta'are mësarupi yecohua'ire co'aye yo'oyere oijë pa'ija̱quë cajë ne de'huacaiye pa̱to mësaru ja'quë ma'tëmo pa'iquëje̱ mësaru tayo yo'oyere oi ne de'huacaiye pa̱sipi.

A̲oma'pë Se̱ñe

16Ja̱je pa'ina, mësarupi a̱o a̱ima'pë se̱cohua'i pani coa cacohua'i yo'oyeje̱ pa'ye oiyeje̱ pa'i tsia neni yo'oma'pë pa'ijë̱'ë. Ja̱je yo'ocohua'i cato pa̱ipi a̱o a̱ima'cohua'ipi yo'oyë caja̱jë cajë yo'oyë. Care payë, ja̱je yo'oni tsoe iye yejana payë, de'huacaisi co'amaña. 17Ja̱je pa'iquëta'are më'ëpi a̱o a̱ima'quëpi se̱quë pani, tsia si̱'sini cui'ne nañaje de'oye yojë̱'ë. 18Më'ë a̱o a̱ima'quëpi se̱ñe pa̱ije ña ti̱'añe pa̱ja'cohua'ire, coa më'ë ja'quë më'ë ja̱'re co̱ni pa'iquëse'e asaja̱quë, më'ëre de'huacaisi co'amaña i̱sija̱'quëse'e.

Ma'tëmo Co'amaña

(Lc 12.33-34)

19Iye yejana jaiye co'amaña tsiso ti̱mëma'pë pa'ijë̱'ë, pu'ju a̱i hue̱'ñana, co'amaña ne huesë hue̱'ñana, co'amaña ñacohua'i cacajë i̱ma hue̱'ñana. 20Ai jerepa ma'tëmo co'amañana tsi'so ti̱mëjë'ë, pu'juje̱ a̱ima'tona, co'amañaje ne huesëma'tona, cui'ne co'amaña yahue i̱mama'tona. 21Ja̱ maca yureta'a mësaru joyopi co'amaña pa'i hue̱'ñare cuasajë pa'ija̱'cohua'i a'ë, më'ë.

Mai Ca̱përe Miacaiye

(Lc 11.34-36)

22Më ñaco ca̱ cato më'ë ca̱pë miacaiye a'ë. Ja̱je pa'ina, më'ë ñaco ca̱pi de'oye pa'ito, si'ao më'ë ca̱pëje̱ i̱o miacaiyere pasipi. 23Ja̱je pa'iquëta'are më'ë ñaco ca̱pi co'ayere cuasaquë ñañe pa'ito, si'a më'ë ca̱pëje̱ nea hue̱'ñare pa'iji. Ja̱je pa'ina, më'ë ñañepi nea'ñere pa'ito, ¡ñaco ca̱ neañe jerepa neañe pa'iji, yequeje̱!

Diusu Cui'ne Curiquë

(Lc 16.13)

24Te'ipi caya ëjaohua'ire necani ti̱'añe peoji. Ja̱je pa'ina, yo'o jujani yequëni coequë, yequëni oiye pa'iji pa̱nita'a yequëni de'oye sehuoquë, yequëni de'oye sehuoma'ë sa̱ñope caye pa'iji. Ja̱je pa'ina, Maija'quëre cui'ne curiquëre necani ti̱'añe peoji.

Maija'quë I̱ Mamajëre Ñacaiye

(Lc 12.22-31)

25Mësarute cayë, ¿jere a̱ija'cohua'i a'ni? ¿jere u̱cujë pa'ija̱'cohua'i a'ni? pa̱nita'a ¿jere ca̱ña ju'ija̱'cohua'i a'ni? cuasajë co'a ju̱'ima'pë pa'ijë̱'ë, caquë. Mësaru pa'iyepi a̱o a̱iñe jerepa do'i quë'ye a'ë. Cui'ne ca̱pëpi ca̱ña jerepa do'i quë'ye a'ë. Ja̱je pa'ito ¿me airepa co'a ju̱'iñe'ni? 26Ñajë'ë, pi̱'ani peo de'oto cu'icohua'ini a̱o ta̱ma'cohua'ita'a, tëama'cohua'ita'a tëani huë'ena de'huama'cohua'ita'a, de'hue mësaru ja'quë ma'tëmo pa'iquëpi a̱oquëna, pa'icohua'ini. Mësaru cato pi̱'a jerepa do'icohua'i a'ë. 27Ja̱je pa'ina, mësaru aquë ¿nepi ai jerepa co'a ju̱'i do'ipi jerepa tsoaquë ai de'oja̱'quë a'ni?

28Ja̱je pa'ito ¿Me yo'ojë ca̱ña ju'iyere cuasajë co'a ju̱'iñe'ni? Ñajë'ë, airo de'o joro mëañere, co'amaña ne ma'ñepi cui'ne oya ma'ñeta'a, 29pa̱i ëjaë Salomón maca ju'ise'e se̱ña maca de'o joro a'ë. De'o hue̱'ñare pare pa'inije jorohuëje̱ pa'irepa ju'iye pa̱pi. 30Ja̱je taya je̱'quë esa pani to̱meñeta'a Maija'quëpi de'o joro su̱ñacaiji, se ñataquëna, toapi ëo ja̱'ñeta'a. Ja̱je pa'ina, mësaru pa̱ire pare sëte Maija'quë jerepa de'oye ñacasipi. ¡Necaiye pa̱ja'quë api, cuasacohua'i maña! 31Ja̱je pa'ito, co'a ju̱'ima'pë pa'ijë̱'ë, ‘¿i̱quere a̱ija'cohua'i a'ni, cajë pa̱nita'a i̱quere u̱cuja̱'cohua'i a'ni, cajë pa̱nita'a i̱quere ju'ija̱'cohua'i a'ni?’ cajë. 32Iye yeja pa̱i cato ja̱je cajë oijë pa'iyë. Ja̱je pa'iquëta'are mësaru cato payë, ja'quëre, ma'tëmo pa'iquëre, si'aye mësarute caraye ñaquë pa'iquëre pani. 33Ja̱je pa'ina, Maija'quë quë'rore cuasajë cui'ne i̱ yëyere de'oye yo'ojë pa'ijë̱'ë, Ja̱je cuasajë yo'ocohua'ini si'aye i̱ti caraye i̱sija̱'quë api. 34Ja̱je pa'iye sëte co'a ju̱'ima'pë pa'ijë̱'ë, ñamina'a pa'i ja̱'ñere. Ñamina'a cato yeque co'a ju̱'iñere i̱sija̱'coa. Ja̱je pa'ina, ñamina'a pa'i ja̱'ñere se co'a ju̱'ima'pë pa'ijë̱'ë. Ja̱je pa'ina, mu'seña ñape ti̱ñe co'a ju̱'ijë ai yo'oye daji.

Sélection en cours:

Mateo 6: sey

Surbrillance

Copier