Mateu 8
8
Haga 8
Iesui Wẽtup Ok Hepihi Pihi Rakat Moehãite Hamuat
Maku 1.40-45; Iruka 5.12-14 Piat Ewy
1Miꞌi hawyi Iesui ipotꞌapyk i raꞌyn yityꞌok tote pyi turan miitꞌin sem tuwat kahato hewatꞌypmo. 2Miꞌi turan wẽtup ok hepihi pihi rakat tuut Iesui kape hawyi tuwepỹꞌãtutuk hawyi toꞌe -Uikaꞌiwat e uimoehãite teran pote uimoehãite En e. 3Miꞌi hawyi Iesui tuweponug hepihi pihi rakat ete hawyi -Taꞌi woromoehãite teran uhyt. Pyno koitywy ehãite raꞌyn. Mio tã e hawyi meremo tokãꞌã raꞌyn hepihi koꞌi.
4Miꞌi hawyi Iesui toꞌe -Pyno erewanetup uhehay kape uhyt. Pyno yt uwe pe teiꞌo ehenoi uiminug etiat e maꞌato waku ereto ro paꞌiria kape hawyi waku ehenoi ro paꞌiria kape. Miꞌi kaipyi ti aru ekuap taꞌyn wuatꞌi miitꞌin ehãite raꞌyn hap etiat e. Pyno waku ereto hawyi waku etum Tupana motypot hamuat aikotã Muisei mienoi ewy.
Iruka 7.1-10 Piat Ewy
5Miꞌi hawyi Iesui putꞌok e raꞌyn mekewat tawa Kawanaum totiat turan wẽtup ok Humanu esurara akag toto Iesui kape hawyi toꞌe -Pyno atikyꞌesat uhemiit iꞌahuu rakat moehãite hap uhyt e. 6Katupono ti uhemiit toineꞌen uiꞌyat pe iꞌahuu kahato. Yt tuwemokup kuap hin i raꞌyn teꞌyni pe sese raꞌyn tohoꞌopot e. 7Pyno areto eupi emiit moehãite hamo e Iesui. 8Mio tã e pote surara akag Humanu tiwesat -Yt uikaꞌiwat i katupono wẽtup ehay wo ereꞌe meiũpe pyi hawyi aru ihãite iraꞌyn uhemiit e. 9Katupono uito ti wy areineꞌen uhemiitꞌin poꞌoro hat pote tukupteꞌen uhesuraraꞌin uiꞌe hap upiat inug haria. Karãpe areꞌe wẽtup ok pe ereto ro kuepuo are pote toto. Iꞌewyte karãpe wẽtup ok pe areꞌe eriot ro meikowo areꞌe hawyi tuut. Iꞌewyte karãpe areꞌe uhemiit pe etunug no mesuwat areꞌe hawyi tutunug. 10Miꞌi hawyi karãpe Iesui tikuap mio tã e hap ihay hawyi tuwanetup kahato hawyi toꞌe toupiaria pe -Atikuap wyti mekewat miit poꞌog eikai uimohey hap ete katupono yt karãpe i miꞌi ewywuat arehaꞌat eiperia Isareu ywania pyꞌasetpe. 11Putꞌok iꞌatuꞌe ti aru iraniaꞌin ywania aat wẽtem hap kaipyi iꞌewyte aat minꞌe hap kaipyi. Miꞌiria ti aru teꞌeroꞌapyk mekewat yparakai wuatꞌi eꞌat piat rote Aparãu Isaki hawyi Iakoꞌin wywo. 12Maꞌato iraniaꞌin wyti ipoityꞌi kahato teꞌerepiat neꞌi taꞌatuieineꞌen wuatꞌi eꞌat piat hap rakaria ti toipugha hamuat raꞌyn iꞌypyryp hun sese pe hawyi miꞌiria toꞌokakꞌi kahato itote. Taꞌatuiãi ete aru kyryet kyryet iꞌatuꞌe. 13Mio tã e hawyi Iesui toꞌe -Mekewat Humanu ywania esurara akag me -Pyno mio waku eraꞌaipok i ro eꞌyat kape katupono emiit iꞌahuu rakat ihãite iraꞌyn mio epiat uimohey hap kaipyi mehin e. Mio tã e Iesui turan Humanu emiit ihãite iraꞌyn.
Peteru Hakitu Moehãite Hap Etiat
Maku 1.29-34; Iruka 4.38-41 Piat Ewy
14Itote pyi Iesui tote topotmuꞌe Peteru yat kape. Itote Iesui tipuẽti Peteru sakitu iꞌahuu kahato teꞌyni pe. 15Miꞌi hawyi Iesui topopytyk hawyi meremo ipiit sakup nik taꞌyn. Miꞌi hawyi ipoĩꞌam naꞌyn hawyi ipotpap taꞌyn Iesui eropat hap ete. 16Mekewat ewãtymꞌi turan taꞌatueropoꞌok kahato raꞌyn ahiag ipiit piat rakaria Iesui kape. Miꞌi hawyi miꞌiria kaipyi toiꞌatusopo kahato raꞌyn ahiagnia wẽtup tehay wo yn. Iꞌewyte toiꞌatumoehãite yne raꞌyn iꞌahuu rakaria.
17Pyno miꞌi tã ti Iesui tunug aikotã saꞌawyꞌi wuat Tupana ehay moherep hat Isaia toꞌe hap ewy toimoherep. Meiũran aru topiit emig hap kaipyi aru toimog yne aiꞌahuu hap koꞌi e hap ewy. Iꞌewyte aipo kĩꞌã hap koꞌi yne totioto pya aru aikai e saꞌawyꞌi Isaia e hap ewy 53.4 pe.
Niatpo Iesui Hewatꞌypmo Ereto Hawyi
Iruka 9.57-62 Piat Ewy
18Miꞌi turan Iesui tehaꞌat miitꞌin sem tewowiat õꞌẽ haria kape. Miꞌi pote toꞌe topotmuꞌeria kape -Toꞌiro ihyemyiꞌa sakpo watuwat uhytꞌin e. Katupono miitꞌin typyꞌi kahato raꞌyn uiꞌatupueri wo e. 19Mio tã e hawyi tuwehytꞌok yara pe turan putꞌok e yẽpeke wẽtup ok miit Muisei miwan kuap kahato hat. Miꞌi ti tuwẽpowat Iesui kape -Woꞌomuꞌe hat e uipap kahato eupi emiitno e. Areto teran aikopuo aikopuo ewyry hap upi e Iesui pe. 20Maꞌato Iesui tiwesat -Pyno ereto teran uhupi pote waku saꞌawyꞌi erewanetup kahato katupono ti Awahuru koꞌi ti tukupteꞌen taꞌatukaꞌa puo iꞌewyte weitaria ti tukupteꞌen taꞌatusok puo maꞌato Uito Miitꞌin Ykeꞌet pykai yt kat i uiꞌyat uiwemohy hamuat. 21Miꞌi turan wẽtup ok ipotmuꞌe toꞌe Iesui pe -Pywo ti rat uito areto teran eupi wen Uikaꞌiwat e maꞌato uiꞌywot neꞌi atiꞌapykok mesup. Maꞌato uiꞌywot ikuꞌuro hawyi ahyp hawyi areto teran eupi e Iesui pe. 22Maꞌato Iesui tiwesat -Toꞌiro uhupi uipotmuꞌe wo e katupono tukupteꞌen nat yt Tupana mohey haria i itote. Miꞌiria raꞌyn aru toꞌope ikuꞌuro rakaria toꞌosyp e.
Maku 4.35-41; Iruka 8.22-25 Piat Ewy
23Miꞌi hawyi Iesui teke raꞌyn yara pe temiitꞌin wywo hawyi tuwat raꞌyn ihyemyiꞌa wato upi. 24Tuwat turan ywyt uato putꞌok e raꞌyn iꞌatuete. Ihytꞌokmoĩ watoꞌin kahato raꞌyn ihyemyiꞌa wato tote. Miꞌi pote teke teke kahato iꞌatueꞌyara pe. Miꞌi pykai Iesui toket neꞌi yara pe. 25Miꞌi pote ipotmuꞌeria tokokaꞌat hewowi hawyi taꞌatuhymut raꞌyn hawyi teꞌeroꞌe -Urukaꞌiwat urupowyro ro En. Watoꞌopytꞌat hamuat iꞌatuꞌe. Miꞌi pote watopap hamuat uhyt iꞌatuꞌe. 26Miꞌi hawyi Iesui toꞌe -Kat poteĩ eweikenꞌẽ. Uimohey hit kahato apo eipe. Mio tã toꞌe hawyi ipoĩꞌam naꞌyn hawyi toꞌe haty wo ywyt uato pe -Epoꞌinik to yꞌy epoꞌinik to ywytu e hawyi meremo yꞌy ihy nik taꞌyn. 27Miꞌi hawyi hemiitꞌin teꞌeruwanetup kahato iminug kapiat teꞌerehaꞌat hawyi -Uweĩ meiũ miit iꞌatuꞌe toꞌope. Kat pote som ywytu iꞌewyte yꞌy toimoperupꞌi kuap kahato iꞌatuꞌe toꞌope.
Iesui Tipoꞌoro Ahiag Koꞌi Raꞌyn Miit Piit Pyi Hamaut Koꞌi Kape
Maku 5.1-20; Iruka 8.26-39 Piat Ewy
28Miꞌi hawyi karãpe Iesui putꞌok e raꞌyn yi Katarene tote mekewat ihyemyiꞌa Karireia wã tote. Miꞌi turan putꞌok iꞌatuꞌe typyꞌok miit ahiag ipiit piat rakaria Iesui kape. Miꞌiria ti tõꞌẽ woꞌosyp hap kaipyi. Katupono ti itote miꞌiria tukupteꞌen. Miꞌi pote miꞌiria yt naku i sese rakaria pote mekewat muap upi yt uwe kuap i miit tokosap. 29Miꞌiria ti iꞌatuehay pirik kahato itote -Uruikuap taꞌyn En Tupana saꞌyru. Kat som etikyꞌesat urukaipyi sio eriot meikowo uruꞌapiheg hamo urukuꞌuro hap yian mete iꞌatuꞌe. 30Miꞌi turan tukupteꞌen itote yt pya hin i hamaut sem teꞌerenuk itote. 31Miꞌi pote mekewat maꞌãu ipiit piat rakaria teꞌeroꞌe Iesui pe -Pyno urupoꞌorenoꞌẽ teran En pote urupoꞌoro ro mekewat hamaut koꞌi kape iꞌatuꞌe. 32Miꞌi pote eꞌe hap ewy urutuwat iꞌatuꞌe. Mio tã iꞌatuꞌe hawyi Iesui toꞌe maꞌãu saꞌag koꞌi pe -Pyno eweiwat ro e hamaut asuwai koꞌi kape e. Miꞌi hawyi tuwehytꞌok taꞌyn hamaut asuwai piit pe maꞌãu saꞌag hawyi iꞌatuesoꞌok taꞌyn hawyi hewo raꞌyn yꞌy pe mekewat yityꞌok akag tote pyi hawyi topap taꞌyn. 33Miꞌi turan tukupteꞌen itote miitꞌin hamaut asuwai apykok haria. Miꞌiria ti tuwat meremo mekewat tawa kape. Itote taꞌatuhenoi henoi aikotã tuwemoherep taꞌatuhũria etiat hap. Iꞌewyte taꞌatuhenoi aikotã mekewat typyꞌok maꞌãu saꞌag ipiit piat rakaria etiat. 34Miꞌi hawyi meremo mekewat tawa piaria ieineꞌen haria tuwat Iesui kape. Miꞌi hawyi putꞌok iꞌatuꞌe raꞌyn hawyi teꞌeroꞌe Iesui pe -Mehin waku eraꞌaipok i ro meiũwat iꞌatuꞌyi tote pyi meiũpe iꞌatueꞌyi tote pyi iꞌatuꞌe taꞌatuehay pirik wo teꞌerokenꞌẽ popuo.
Sélection en cours:
Mateu 8: mav
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2017, Wycliffe Bible Translators, Inc. All rights reserved.
