Mateu 4

Haga 4

Ahiag Tohãꞌãg Naꞌyn Iesui

Maku 1.12-13; Iruka 4.1-13 Piat Ewy

1Miꞌi hawyi Tupana Paꞌãu tioto Iesui yahig wato kape aikope yt uwe i ieineꞌen hap kape. Itote ahiag hãꞌãg kahato. 2Itote Iesui toineꞌen 40 eꞌat 40 ewãtym yt kat i hin i tutuꞌu. 3Miꞌi turan putꞌok e ahiag itote hãꞌãg hamo. Miꞌi hawyi toꞌe Iesui pe -Mehin e pywo Tupana Saꞌyru sese En mote etunug no meikowat nu koꞌi kawiat man emiꞌu wo e Iesui pe. 4Miꞌi hawyi Iesui tiwesat. Mio tã e -Katupono miwan me wyti mio tã e -Taꞌi yt miꞌu kaipyi miitꞌin tukupteꞌen maꞌato Tupana ehay nug hap kaipyi yn tukupteꞌen kuap miitꞌin e. Tupana saꞌawyꞌi miwan me Teturonamia 8.3 pe. 5Itote pyi ahiag tioto raꞌyn Iesui tawa wato Ierusarẽi kape raꞌyn hawyi totopag Iesui mekewat Tupana motypot yat koro poꞌog ywaiti kahato rakat tote. 6Miꞌi hawyi ahiag toꞌe tope -Mehin e pywo ti Tupana Saꞌyru sese En mote eꞌokhytꞌat ro meiũpe pyi yi kape katupono saꞌawyꞌi ti Tupana toꞌe -Atipoꞌoro aru atipy kaipyi eꞌokhytsat hamo e. Miꞌi pote eꞌokhytꞌat pykai yt ereꞌahyk hin i nu koꞌi ete e. E saꞌawyꞌi Tawi wepy hap 91.11-12 pe. 7Maꞌato Iesui tiwesat -Pywo maꞌato wẽtup miwan me toꞌe wy -Yt ehãꞌãg neiꞌo kaꞌiwat Tupana e Teturonamia 6.16 pe. 8Miꞌi hawyi ahiag tioto raꞌyn Iesui yityꞌok poꞌog ywaiti rakat kape. Miꞌi hawyi itote pyi ahiag timoherep tope wuatꞌi ywania mesuwat yi totiat sekat koꞌi. Mesuwat mytyyp yne iꞌatuporekuaria iꞌatuwepainug hap koꞌi. Toimoherep yne iwato hap oktan. 9Miꞌi hawyi toꞌe -Mehin e pyno mesuwat wyti atum yne teran epe erepỹꞌãtutuk uhewowi uimotypot hamo pote. 10Maꞌato Iesui tiwesat -Mutoro meiũpe pyi pya uiꞌyatypepyi e katupono saꞌawyꞌi wuat miwan me toꞌe -Etimotypot ro ekaꞌiwat e Tupana sese yn e. Waku miꞌi yn wateropat e Teturonamia 6.13 miwan me. 11Mio tã e hawyi ahiag toto raꞌyn Iesui yatypepyi. Miꞌi pykai Tupana mipoꞌororia tõꞌẽ raꞌyn atipy kaipyi Iesui powyro hamo.

Iesui Tuwat Raꞌyn Miitꞌin Muꞌe Hamo Karireia Totiat

Maku 1.14-15; Iruka 4.14 Piat Ewy

12Miꞌi hawyi Iesui taꞌaipok i raꞌyn aikope miitꞌin tukupteꞌen hap kape turan toikuap taꞌyn Iuwãu woꞌosetꞌok hat pyhik hap. Toikuap hawyi toto raꞌyn itote pyi yi Karireia kape raꞌyn. 13Maꞌato toineꞌen ni tawa Nasare pe maꞌato toto tawa Nasare pyi tawa Kawanaum kape. Putꞌok toꞌe itote hawyi toto tomotag hap tawa Nasare pyi tawa Kawanaum kape mekewat Karireia hyemyiꞌa ẽpe totiat tawa mekewat set Sepurum eꞌyi totiat tote. Iꞌewyte Natari eꞌyi totiat tawa pe toineꞌen. 14Pyno miꞌi tã ti tuwemoherep aikotã saꞌawyꞌi wuat Tupana ehay moherep hat Isaia e hap ewy raꞌyn. 15Meiũran ti aru Sepurum ywania eꞌyi Natari ywania eꞌyi mekewat yꞌy wato kawiatnuat mekewat Iutãu hy esokpuat Karireia pe tukupteꞌen iraniaꞌin ywania yt heTupana i rakaria tukupteꞌen. 16Miꞌi hawyi iꞌypyryp wiat ieineꞌen haria teꞌerehaꞌat raꞌyn hẽtyhot esaika hap kape. Miꞌi hawyi hẽtyhot mehit hap toineꞌen naꞌyn iꞌypyryp we taꞌatukuꞌuro hawe tukupteꞌen mekewat yi totiat turan. Isaia 9.1 pe. 17Itote ti Iesui haꞌawynug naꞌyn miitꞌin muꞌe hap. -Eweiwemorem no Tupana kape katupono yt pya hin i Tupana topyhuꞌat Miitꞌin Porekuatno sese hap e.

Iesui 4 Pira Pytyk Hanuaria Kay Kay Hamuat

Maku 1.16-20; Iruka 5.1-11 Piat Ewy

18Wẽtup eꞌat pe hawyi Iesui hewyry mekewat yi Karireia hyemyiꞌa ẽpe upi yi kyt upi. Miꞌi hap tote Iesui tehaꞌat typy ok kape mekewat mehin Simau wẽtup het Peteru e hap iꞌewyte iꞌywyt Ãtere kape. Miꞌiria tukupteꞌen taꞌatueꞌyara pe ihyemyiꞌa wato tote taꞌatuesuki wato wuat wemohapap pira pytyk hap etiat haria kape. 19Miꞌi hawyi Iesui iwẽpapꞌi iꞌatuewowi -Uiwyriaꞌin e toꞌiro uhupi e. Ahenoi mono miitꞌin pytyk Tupana watnuat hap ehepe e. 20Miꞌi hawyi taꞌatuꞌatoiat raꞌyn taꞌatuesuki wato itote hawyi meremo tuwat Iesui upi. 21Tuwat porapꞌi i raꞌyn turan Iesui tehaꞌat raꞌyn Sepeteu saꞌyruꞌin kape mehin Tiaku iꞌewyte iꞌywyt Iuwãu kape wesuki wato mog yara piat haria kape. Miꞌiria ti tukupteꞌen taꞌatuꞌywot wywo yara pe hawyi Iesui iwẽpapꞌi iꞌatuewowi -Toꞌiro uhupi mehinꞌin e typyꞌok takaria pe. 22Miꞌi hawyi tuwat meremo hupi. Taꞌatuꞌatoiat raꞌyn taꞌatuꞌywot iꞌewyte taꞌatuꞌeyara hawyi tuwat raꞌyn Iesui upi miitꞌin muꞌe hamo.

Iesui Tiꞌatumohãite Iꞌahuu Rakaria

Maku 1.38-39; Iruka 4.14-15 Piat Ewy

23Miꞌi hawyi Iesui toto i itote pyi yi wato Karireia piaria muꞌe hamo i raꞌyn. Toiꞌatumuꞌe kahato sehay wakuatno Tupana motypot yat pe. Iꞌewyte iꞌahuu rakaria toiꞌatumoehãite kahato aikotã aikotã iꞌatuꞌahuu rakaria toiꞌatumoehãite kahato itote. 24Miꞌi hawyi yi Siria piaria tikuap taꞌyn Iesui misepap koꞌi. Miꞌi hawyi tõꞌẽ tõꞌẽ pya wuaria. Taꞌatuerut kahato iꞌahuu rakaria torannia hawyi Iesui tiꞌatumoehãite kahato ipiit heg nakaria maꞌãu saꞌag koꞌi mimoesoꞌok koꞌi ipo kĩꞌã rakaria ipy kĩꞌã rakaria ikuꞌuro kuꞌuro rakaria taꞌatuerut hewowi hawyi toiꞌatumoehãite yne raꞌyn. 25Miꞌi hawyi miitꞌin sem tuwat tuwat hupi aikopuo aikopuo hewyry hap upi yi Karireia kaipywiaria tawa wato Ierusarẽi kaipywiaria mekewat Iutãu hy sakpuaria mekewat 10 tawa koꞌi kaipywiaria tuwat hupi. Iꞌewyte yi Iuteu kaipywiaria tuwat tuwat Iesui upi.

Sélection en cours:

Mateu 4: mav

Surbrillance

Copier