Mateo 14

Juanpan yorafo unu muran iquimapacutan nani cuscan

Mr 6.14-29; Lc 9.7-9

1-2Ascano nantian Herodes nan Galilea mai anoa ato niaifoan Jesushuunoa nicaquin ahuun oinmatifo yoini isca huaquin, —Nanfin Juanqui. Un tushtumayamua afanan man funia. Ascashofin Diospan curushuunshon tsoan atiroma cuscan huafafainiquin, —ishon ato yoini.

3-4Herodes Juan rutumanataima yoiqui isca huani, —Niaifo Herodes, min ushto Felipe ahuun ahuin min fia. Ascaquicai min shara huama. Nocon shuni Moisés Diosin tsain cunuqui isca huani, “Futsan ahuin min fitiromaran,” ishon Moisés cununiran, —ishon Juanpan Herodes yoini. Ascaiton nicai Herodes fasi sinacoinquin ahuun ranushumuafo yononi Juan achishon cunu muran iquimanonfo. 5Ascashon Herodes Juan ruturiscapaifiaquicai funa rutunima yorafoanmain Juan fuchipaiyaifoanfin. Ascashon nanfoanri yoinifo, —Juanfin Diospan tsain yoimisiquin, —ishon ahuunoa yoinifo. Ascacun Herodes shinanquin isca huani, —Un Juan rutucun ua yorafoan asca huatiroran, —ishon shinanni. Yorafoqui ratuquin Herodes Juan cunu muran iquimafiashocai funa rutunima.

6-7Ascano Herodes cainnitian yorafo ichananni fuusishcaquin. Ascashu ichananfoanno Herodías ahuun facu shomaya arusu aton ointaifi mononi. Nan Herodías Herodes ahuun ushto ahuin ini. Ascashu shomaya monoaino Herodes fasi unimacoinquin yoini, —¡Aicho! Min monoai cuscan un fasi miqui unimai. Ahuarashta fipaiquin ua yoihuu un mia inanon. Diosin tapia un mia icon yoiaiton min fipaiyai cuscan un mia inantiroran, —ishon yoini.

8Ascashon cashon shomayaton ahua yoini. Ascacun nan ahuan yoia cuscan nasocura niaifo Herodes yoini, —Juan nan yorafo unu muran iquimapacumisi tushtuhuu. Purato naratashon ahuun mapo ua inanhuun, —huaino. 9Niaifon Herodes puusinima. Puusitama ahuun nomuran shinanqui isca huani, —¡Ohua! Un Juan tushtumapaima. Ascafia yorafoan un shomaya yoia cuscan man nicafo. Ascacun un asca huapaiyamafiaqui un aquicairan, —ishon shinanni. 10Ascashon niaifoan ahuun ranushumua yononi, —Juan tushtushon ahuun mapo ua fushotahuun, —huani. 11Ascaino cashon ranushumuaton Juan tushtushon ahuun mapo purato naratashon funi. Fushon niaifo inancun nan niaifoanri shomaya inanni. Ascano shomayaton arifi ahua inanni. 12Ascashon afu rafumisifoan Juan nicacani focashon ahuun caya mai huanifo. Ascatan focanashu Jesusqui chaninifo.

Jesús cinco mil nocofunufo pimani

Mr 6.30-44; Lc 9.10-17; Jn 6.1-14

13Ascashon Herodes Juan tushtuma nicai Jesús shashon tsoa icama ano cani. Jesús caa nicacani pushufoti anoashu yorahuanrasiton naman mufainifo. 14Ascashu nocoquin Jesús oian yorahuanrasi oin atohuun ramapaini. Nannoshori isinincai futsafo ato cayahuapacuni.

15Ascano man fari caino non afu rafuafo aqui cashon non yoini, —Yorafo nichihuun. Man fari caiquin. Fonaincaniquin. Pushurasi ano yafi a chaima icafoanno ato nichihuun anoshon tushu huanonfo, —ishon non yoini.

16Ascaiton noco cumani, —Ma. Noncai ato nichima. Mafirocon ato piimacahuun, —noco huaiton. 17—Nonfin nuno misi siete yafi shiman rafu ayaquin, —ishon non yoini. 18Ascaiton, —Ua fishotacahuun, —noco huani. 19Ascashon yorahuanrasi yoini, —Nanno faasi camaqui tsaocahuun, —ato huani. Ascatan shiman rafu yafi misi mucu fustiti tsomashon nai ari foisinifoantan Apa Dios cufinquin, —¡Aicho! Upan, mihuunshon un ato pimai. Min fasi sharacoincun, —huatan. Misi torupacutan shiman rafu ya osishon noco inanni non ato pashcanan huapanon. 20Ascashon picani mayancoinnifo. A picaquin tushu huafo non afu rafumisifoan doce shihuati fospi huani. 21Nan piaifo cinco mil nocofunufoosi ini. Ainfofo yafi facufocai non tanan huanima. Asca nanfoanri ato futan piinifo.

Jesús unu fumancayan cani

Mr 6.45-52; Jn 6.16-21

22Ascashon ato pimaquin anaititan Jesús noco yoiquin isca huani, —Shashon rufofo oquiri pocui focahuun. Un na yorafo ato nichiyonon, —ishon noco yoini. 23Ascashon man ato nichiqui anaititan arus fusti machi ano caashon Apa Dios fu tsainni. Man fari caino arus fusti ini. 24Ascatan afu rafuafo shasho caino ian nushmancayan nocoqui fuuhuan noconi. Ascashu ian fuchoquin noco catima huani.

25Ascashu man faquishiaino non oian Jesús ian fumancayan nocoqui ofiaitocai non onannima. 26Onanshma ratucoin non fiisini. “Yoshiran,” icashu non fiisicaiton. 27—Unqui. Ratuyamacahuun, —ishon Jesús noco yoini.

28Ascaiton Pedronun yoini, —Ifon, minmainquin uarifi mia ano cunahuu. Urifi un ian fumancayan canon, —huaiton. 29-30—Ohuu, —Jesús huaino Pedro shasho naquinoashu fotopacucahuan ian fumancayan Jesús ari caafiain oian fuunhuaquin ian fuchoaiton oin ratui iquipacucahuanqui yoini, —Ifon, ua ari mutsoinifoanhuun, —Pedronun huani. 31Ascaiton Jesús samamashta mutsoinifoanquin yoini, —Miancai ua icoinra huacoinnama. Ahuuscaquimun mian icoinra huamaquin, —ishon Jesús yoini.

32Ascantan nan rafu shasho muran nanuinifoanafono fuu nishmapacufoanni. 33Ascano non shasho murannoafo fasi aqui unimacoinquin non yoini, —Iconfinquin min Diospan Facu, —ishon non yoini.

Genesaret anoshon Jesús isinincaifo ato caya huapacuni

Mr 6.53-56

34Ascatan ian pocufaini Genesaret ano non noconi. 35Ascashu non nocoaiton nannoafoan samamashta Jesús onancashon a chaima icafori ato tapimanaino nicafuracani fucaquin aton yora isinincaifo Jesusqui ihuunifo. 36Ascano fucashon Jesús yoinifo, —Noco yora isinincaifo min sahuuti cupanan fusti ato muumahuu cayanonfo, —ishon yoinifo. Ascatan ahuu sahuuti muuncanashu cayapacunifo.

Sélection en cours:

Mateo 14: mcd

Surbrillance

Copier