Mateo 6

Indi Kita Magpakita-kita Kon Galimos

1Nagpadayon pa gid si Jesus it pagturo. Hambae nana, “Mag-andam gid kamo nga indi kamo magpakita-kita ku inyong pagkamatarong sa mga tawo agod dayawon nanda kamo. Kon makaruyon ro inyong ginaobra hay sigurado gid nga owa kamo it premyo nga mabaton halin sa inyong Ama sa eangit.

2“Ngani kon magbulig ka sa mga kubos, ayaw pagpakita-kitaan pareho ku ginaobra it mga ipokrito. Makaruyon ro andang ginaobra idto sa mga sinagoga ag sa mga binit it karsada agod dayawon sanda it mga tawo. Matuod rang ginahambae kinyo nga ro pagdayaw it tawo kanda hay duyon eang ro andang premyo nga mabaton. 3Pero kon ikaw 't-a ro magbulig sa mga kubos, ayaw eon pagpasayra bisan ro imong pinakamaeueot nga amigo. 4Himua eang it hipos agod owa it ibang makasayod kundi ikaw eang. Ag ro imong Ama sa eangit nga nakasayod ku tanan nimong gin-obra hay magapremyo kimo.”

Indi Kita Magpakita-kita kon Nagapangamuyo

(Luc 11:2-4)

5Naghambae pa gid si Jesus, “Kon magpangamuyo kamo, ayaw kamo magtuead sa mga ipokrito. Naila ron sanda magtindog ag magpangamuyo sa sinagoga ag sa mga kanto nga abo kanda ro makakita. Matuod rang ginahambae kinyo nga ro pagdayaw it tawo kanda hay duyon eang ro andang premyo nga mabaton. 6Pero kon ikaw 't-a ro magpangamuyo, sueod sa imong kwarto ag manirado. Mangamuyo ka dayon sa imong Ama nga kaibahan mo idto, ag pagapremyuhan ka nana nga nakakita ku tanan nimong ginaobra.

7Kon magpangamuyo kamo hay ayaw kamo maghinambae it kaabo-abo nga owa man it kahueugan pareho sa ginaobra ku mga tawo nga owa nagakilaea sa Dyos. Eaom nanda hay pamatian gid it Dyos ro andang pangamuyo kon kaabo-abo ro andang ginahilinambae. 8Ayaw ninyo sanda pagtueara ay hasayran eon it inyong Ama ro inyong kinahangean bago pa kamo magpangayo kana. 9Ngani kon magpangamuyo kamo, hay makaraya ro inyong ihambae:

‘Ama namon sa eangit, kabay nga tahuron ag dayawon it mga tawo ro imong ngaean.

10Kabay pa nga magpasakop eon ro tanan nga mga tawo sa imong paghari sa andang tagipusuon. Kabay pa nga tumanon ro imong pagbuot iya sa kalibutan pareho inha sa eangit.

11Taw-i kami makaron nga adlaw it among ginakinahangean nga pagkaon.

12Patawara kami sa among mga saea dahil gintuman namon ro sugo nga dapat kami magpatawad sa tanan nga nagakasaea kamon.

13Ayaw kami pagpabay-i nga matentar kundi euwasa kami kay Satanas, ro ginahalinan it kaeainan.’#6:13 Sa ibang kopya it kasueatan sa Griniyego, daya hay gintapoe: “Mahimo mo ron ay ikaw ro makagagahom nga nagahari sa tanan ag daeayawon ka hasta sa owa it katapusan.”

14Kon inyong patawaron ro mga nagakasaea kinyo, patawaron man ku inyong Ama sa eangit ro inyong mga saea. 15Pero kon indi ninyo pagpatawaron ro mga nagakasaea kinyo hay indi man kamo pagpatawaron ku inyong Ama sa eangit.”

Indi Kita Magpakita-kita kon Nagapuasa

16Naghambae pa gid si Jesus, “Kon magpuasa kamo, ayaw kamo magtuead sa mga ipokrito. Owa sanda gapang-ayos-ayos ku andang kaugalingon agod masayran gid it mga tawo nga nagapuasa sanda. Matuod rang ginahambae kinyo nga ro pagdayaw it tawo kanda hay duyon eang ro andang premyo nga mabaton. 17Pero ikaw 't-a, kon magpuasa ka hay magpanghilam-os ka ag magpanudlay 18agod owa it ibang makasayod nga nagapuasa ka kundi ro Ama nga makakita ku tanan nimong ginaobra it sekreto. Imaw man ro magapremyo kimo.”

Indi Kita Magpinanikasog Para sa Manggad Iya sa Kalibutan Kundi Ro Para sa Eangit

(Luc 12:33-34, 16:13)

19Nagpadayon pa gid it pagturo si Jesus. Hambae nana, “Ayaw kamo it tinipon it manggad iya sa kalibutan, ay samaron man lang ron it sapat-sapat ag tuktuk ag takawon. 20Imbis nga magtinipon kamo it manggad iya sa kalibutan hay maghimo kamo it mga mayad nga buhat agod premyuhan kamo it Dyos pag-abot sa eangit. Ro premyo it Dyos ro minatuod nga manggad sa eangit, ag owa karon idto it sapat-sapat ag tuktuk nga makasamad ag owa man it makatakaw. 21Ngani tinguhai nga mangin imo ro minatuod nga manggad sa eangit dahil kon ano ngani ro mahaega gid kimo, idto man ro imong buot.”

22Nagpadayon sa pagturo si Jesus. Hambae nana, “Ro imong mata hay parehas it lampara nga nagatao it kahayag kimo. Mawron nga kon owa it diperensya ro imong mata, mahayagan gid ro imong bilog nga eawas. 23Pero kon madueom ro imong panueok, apektado man ro imong bilog nga eawas. Ngani kon eaom mo hay nahayagan ro imong paino-ino pero sa minatuod hay nadueman gali, una gid sa grabi nga kadueom ro imong kahimtangan.#6:23 Ro buot hambaeon ni Jesus dikara hay ro aton nga kabubut-on hay pareho it mata. Ro mata nga owa it diperensya hay nagabulig gid katon nga makakita it mayad. Makaruyon man ro kabubut-on nga gusto eang magtao it kalipay sa Dyos. Nagabulig ron katon nga magkabuhi nga kuntento ag malipayon. Pero kon may diperensya ro atong mata, maeain kara ro epekto sa atong kabuhi. Pareho man ron sa tawo nga nagatuman eang sa anang gusto. Bisan eaom nana nga ro anang pagkabuhi hay mangin mayad ro dangatan, gali't-a hay maeain ag puro eang mas-ot it buot ag sa ulihi hay pina it Dyos.

24“Owa it sueuguon nga makaserbi it dungan sa daywang ka amo. Tungod ro matabo hay ana nga kaugtan ro sambilog ag higugmaon ro sambilog, ukon ana nga apinan ro sambilog ag baliwalaon ro sambilog. Indi ka puyding magserbi sa Dyos it husto ag paeabihon mo man ro pagmanggad.”

Indi Kita Magpalitik sa Atong mga Kinahangeanon Kundi Unahon Ta ro Pagbuot it Dyos

(Luc 12:22-31)

25“Ngani ginahambae ko kinyo nga ayaw ninyo pagpalitiki it ueo ro inyong mga kinahangeanon sa kabuhi, kon ano ro inyong kan-on ag imnon o kon ano ro inyong isuksuk. Bukon abi it mas importanti pa kaysa sa pagkaon ro kabuhi nga gintao nana kinyo? Ag bukon abi it mas importanti pa kaysa sa eambong ro eawas nga gintao nana kinyo? Ngani sigurado gid nga taw-an man nana kamo ku inyong kinahangeanon. 26Tan-awa tuo ninyo ro kapispisan. Owa ron sanda gatanom, owa man gaani, owa man gatago it andang pagkaon sa bodega o tambobo pero ginapakaon man sanda ku inyong Ama sa eangit. Bukon abi it mas mahaega pa kamo kaysa sa mga pispis? 27Ag isaea pa, sin-o iya kinyo ro makapaeawig ku anang kabuhi it bisan sang oras eang paagi sa pagpinalitik ku anang ueo?

28“Ham-an it nagapinalitik man kamo kon ano ro inyong isuksuk? Tan-awa tuo ninyo ro mga bueak sa taeon nga nagatubo ea't-a. Owa man ron sanda gapatueo it hueas o gaobra it eambong agod may isuksuk. 29Pero ginahambae ko kinyo nga bisan ngani si Haring Solomon sa kaabuon ku anang manggad hay owa pa gid nakasuksuk it eambong nga makaruyon it nami sa mga bueak. 30Kon ro mga hilamunon nga owa man gabuhay, nga buhi makaron ag hin-aga hay eaay eon ag ginapanggatong eang hay ginapanami it Dyos paagi sa andang mga bueak, bukon baea it mas mapaeambungan nana kamo? Kueang 't-a gihapon ro inyong pagtuo kana.

31“Ngani ayaw eon kamo magpinalitik ku inyong ueo kon ano ro inyong kan-on o imnon ukon isuksuk 32dahil ro mga tawo eang iya sa kalibutan nga owa nagakilaea sa Dyos ro nagahinimakas para sa mga butang ngaron. Pero kamo't-a hay sigurado nga ro inyong Ama sa eangit hay nakasayod nga kinahangean ninyo ro mga bagay ngaron. 33Imbis nga ruyon ro inyong pag-inisipon hay unaha ninyo eabaw sa tanan ro pagpasakop permi sa paghari it Dyos sa inyong tagipusuon, ag ro paghimo it matarong sa anang panueok. Ana dayon kamo nga taw-an ku tanan ninyong kinahangeanon. 34Ngani ayaw kamo magpinalitik kon ano ro inyong aeatubadngon hin-aga. Hin-aga lang ron atubadnga. Ro mga problema nga gaabot kada adlaw hay bastanti eon. Ayaw eon pagdugangi.”

Sélection en cours:

Mateo 6: akl

Surbrillance

Copier