Luka 10

Yesu aa tuma erongwa yenthzi

1Munyima thzeyo, Fumu ayepo hangura erongwa imweya yo makumi mutanu na edi nerongwa idi no ku wa tuma aidi aidi ku citangethza mu maumbo no mandau amweya aa a fotire ku hungerithsa. 2Ayepo i ambera ci: “Dicora po dikuru, unone akwakucora apu. Mweyo, mu rombe kwa Fumu o dicora ci a tume akwakucora owangi mu dikanda dyenthzi. 3Mu thze, naa mi tuma eci mangu mu kaci ko winthzi. 4Mwa shimba thsipaupau, mukotana nji mashangu, karo mwemana mu dikuñwa ku vumenena munu.

5“O ku mwingena mu mwanda, mu ambe tango ci: ‘Thsiyaro thsa Nyambi thsikare nenu muno mu mwanda.’ 6Ngeci mwaa di munu o ku fota thsiyaro, thsiyaro thsenu kenge thsikara nenthzi. Unone ngeci mwithsa, kenge thsi mi hukera. 7Mwikare omo mu mwanda, mu dye no ku nwa eyi a mi pa yoihe, inene ngamba aa roera ku piwa ethsi a na kwamena. Mwa endaura mu myanda thzimweya, mwikare pofoci.”

8“Ngeci mwa engena mu diumbo, karo awopo a mi tambura ko moko edi, mu ka dye yoihe eyi a mi yumbura. 9Mu porithse akwakukora awa a dimo no ku wa tongwera ci Kutumina kwa Nyambi pepi ku di nenu. 10Unone kamona mu kuma mu diumbo omu a na kana ku mi tambura, mu thze mu makuñwa mu wa tongwere kuninga ci: 11‘Twaa mi kukumwena dikungu dyo diumbo dyenu edi di na tu rambera kwidyato, ku mi monithsa ci Nyambi kenge a ku mi pa murandu, shaanga kengeyo, mu dimuke ci Kutumina kwa Nyambi pepi ku di.’ 12Naa mi tongwera yoshemwa ci mu diyuwa dyo raturo kenge kwa kwikara tangonaho ku Sodoma kupita edyo diumbo.

Maumbo aa a kanine ku tawa

(Mat 11.20-24)

13“Mwakwothsimo amwe mwakwa Korazini na Betisaida, inene ekomokithsa eyi na i kwamiwa mu matunga enu nga mu Sidoni na Tire, nga na cere kare no ku vata mathsaka no ku ciwethsa mututwi ku monithsa ku cera evi yo. 14Shaanga kengeyo, mu diyuwa dyo raturo kenge ya kwikara tangonaho ku Tire na Sidoni kupita amwe. 15Owe o Kapenauma ne, ene waa anekera ci kenge wa ku thzinekiwa ku wiru nji? Dyombo, kenge wa ku huweriwa pashi apa di afu!”

16Ayepo ambera erongwa yenthzi ci: “O ku mi yuvera aa ni yuvera name, o ku mi kana aa ni kana name, o ku ni kana aa kana noyu naa ni tumu.”

Awaya o makumi mutanu na edi nanu aidi aa ka huka

17Awa o makumi mutanu na edi nanu aidi (72) ou a ka hukire a nyanyukire nene no ku amba ci: “Fumu, shaanga mathzimu aa cihuthsa kushi thzetu yoihe tu kwamithsa dithzina dyoe.”

18Wa tawire ci: “Shime naa mona Satana o ku wa ku wiru eci kwethsa ko mvura. 19Mu teerere, na ni mi pa okoro o ku dyata mayoka no nge, karo no peuru thzokoro ouhe wa mukwathsithzimbo, kwithsa ethsi nga thsi mi kurura. 20Mwa nyanyuka pakuninga ci mathzimu aa cihuthsa kushi thzenu. Unone mu nyanyuke nene pa ku dimuka ci mathzina enu a na ñoriwa mu wiru.”

Thsinyanyu thsa Yesu

(Mat 11.25-27; 13.16-17)

21Kethsiya thsikati, Yesu wa yarire thsinyanyu ko Mupepo Oukenu, no ku amba ci: “Naa ku shangara Tata, Fumu o diwiru no kaye, naa kanderera ku koe pa ku horeka eyi enu kowa owanyanyami nakwakucirongithsa, no ku i hokora kowa o kuninga eci anuke owaonye. Ii, Tata, no kwama kengeyo, inene modiyo no fotera.

22“Tata na a paka enu yoihe mu moko ange, kwithsa oyu na dimuka ci mwana ne edye, shime Tata pohuma, karo kwithsa oyu na dimuka ci Tata ne edye, shime Mwana nowa na a hangura Mwana ku mu hokora kukwo.”

23Yesu wa thsiurukerire kwirongwa yenthzi no ku i ambera ku mukunda ci: “A thsiyauthzi meho o ku mona eyi mu na mono! 24Naa mi ambera ci akwakukethza no mafumu oangi a fotire ci nga a na mono eyi mu mona, unone ka i monine; no ku yuva eyi mu yuva, unone ka i yuvire.”

Musamaria o muwawa

25Mukwakutongonona murao o Thsijuda wemanine ko ku ereka Yesu no kwipura ci: “Murongithsi,” “Ine eyi ni na roera ku tenda ci ni wane mwoyo o diyere?”

26Yesu wa mwipurire ci: “Ine eyi i na ñoriwa mu murao? Waa varamo ine?”

27Aye wa tawire ci: “O shime Fumu Nyambi woe ko mucima woe ouhe, ko mwoyo woe ouhe, kokoro woe ouhe, ko maano oe oahe,#Mali 19.18. no ku shima muenthzoe eci edi wa cishima othsinda.”#Mura 6.5.

28Yesu wa mu amberire ci: “O na tawa nawa, o tende kengeyo ci wa ku yoye.”

29Ko ku fota ku cimonithsa ci muwawa, wepurire Yesu ci: “Muenthzange ne edye?”

30Yesu wa mu tawire ci: “Munu yumweya wa urumukire ku tunda ku Yerusalema ku thza ku Jeriko awopo a mu kweceka ethzi. A mu shupurire evata yenthzi no ku mu fura shime ku fota ku fa, no ku mu thsia.

31“Mupurisita wa endire mwedyo dikuñwa, ou a mu monine wa mu kondorokire. 32Mulivi naye wa endire mwedyo dikuñwa, ou a mu monine wa mu kondorokire.

33“Unone kwa keyire Musamaria oyu wa endire ruendo. Ou a mu monine wa mu yuverire ñekeñeke. 34Wa mu henyenine no ku yoa peronda yenthzi no maathzi no waine, wa mu thzingirepo eto no ku mu paka pa thsindongi thsenthzi. Wa mu twarire ku nthzio thzenda oku a ka mu nyungerire. 35Anaci mathsiku wa pire thsinda thsa nthzio miwayawaya thzidi thzo silivera.#10.35 Miwayawaya thzidi thzo madinari po nedi madi o ku kwamena mayuwa edi. Wa mu amberire ci: ‘Mu u ni nyungere oyu munu. Ou na ku ka huka kenge na ku na ku kura yoihe eyi ya ku civungithsapo.’ ”

36Yesu wepurire oyo mukwakutongonona murao o Thsijuda ci: “Edye kwawo anu ahatu oyu o na anekera ci yo muenthza oya munu a kwecekire ethzi?”

37Wa mu tawire ci: “Oyu na mu yuvera ñeke.”

Yesu ayepo mu ambera ci: “O thze nowe o ka tende kengeyo.”

Yesu aa hungerithsa Mareta na Madiya

38Yesu nerongwa yenthzi o kwa di mu ruendo rwo ro ku thza ku Yerusalema, wa pitire mu diumbo dimweya omu mwekarire mbuyama oyu wethsiwire Mareta, wa mu tamburire nawa mu mwanda wenthzi. 39Wekarire no minenthzi o dithzina dyo Madiya, oyu wekarire ku mauru a Fumu o ku teerera eyi a rongithsire. 40Unone Mareta kuma a vendanine nene kekwama eyi a kwamine. Wa keyire kwa Yesu no ku na amba ci: “Fumu, eyi ne iwa ci minange a ni thsiere ekwama nofoci? O mu tongwere ci naa ni kwamithseko.”

41Fumu wa mu tawire ci: “Mareta, Mareta, waa cithzekera no ku shupeka kenu yoingi, 42unone ethsi thsi na fotiwa po thsofoci pohuma. Madiya po na hangura thsinu thsothsiwa karo mbera ka mba a thsi nyangiwa.”

Sélection en cours:

Luka 10: mho

Surbrillance

Copier