Lukas 22

Upakat momatoi so si Yisus

(Mat 26:1-5; Mrk 14:1-2; Yns 11:45-53)

1Iya oono, oduruk-o rami-rami nu lobuw Yaudi, ono yo Rami-Rami nu Baang-Baang D'ado Pongombang#22:1: Rami-Rami nu Baang-Baang D'ado Pongombang: Siowan Kamus Kitab. ingoranan nu Paska.#22:1: Rami-Rami Paska: Siowan Kamus Kitab.#Kin 12:1-27 2Muupokato yo sono ongo wowaidon nu imam om moomontuduk nu Ukum iiri nu momatoi so si Yisus nu d'ado koilo, so' lumaa' nosiro nu lobuw suang-i.

Inimpolonuan ni Yudas mongoraai si Yisus

(Mat 26:14-16; Mrk 14:10-11)

3Kinuasa yo sono si Yudas Iskariut nu Wowaidon nu Moinat. Si Yudas oono, ido kiat so opulu om duo mompomaid ni Yisus. 4Indadi, miano yo iyo so ongo wowaidon nu imam om moongipat nu Waloi Maayo nu Kinoringan-i, mokimuupakat nu kookom-okoman nosiro so si Yisus. 5Sobana ko nosudu'an nosiro om minongojanji nu taakan si Yudas nu siin. 6Si Yudas nga tinumaayun-o, om tumimpuuno yo sono iyo mokipopongindoraai so si Yisus nu dai oilaan nu lobuw wokon.

Monodia' nu iinokanon

nu Rami-Rami Paska

(Mat 26:17-25; Mrk 14:12-21; Yns 13:21-30)

7Nologa' yo sono Rami-Rami nu Baang-Baang D'ado Pongombang, ono yo runat pongogorasan nu dumba niusaa' so Kinoringan. 8Suuo yo sono ni Yisus si Yuanis om si Pitrus nu, “Ian kou yo monodia' nu iinokanon toko nu Paska,” koo.

9Duato yo nosiro si Yisus nu, “Siombo ka koinginan Mu ponodia'an mai nu ono?” koo.

10Sumombuto yo si Yisus nu, “Bang mian kou so Yirusalim om kosambat kou nu ido koyuwan kisinimban nu montaya kiasuw nu sungoi, waid kou ya so iyo so waloi loga'an niyo no, 11om tongaro muyu songapan nu waloi oono nu, ‘Mongoduat tuan mai no ong siombo nu bilik pongokanan mai nu iinokanon nu Paska?’ koo yo muyu ya. 12Nituduk-a ono nu songapan nu waloi-o ido bilik maayo so dilanggau, nosodia' yo kiawi' kosukupan, om sodiaa muyu yo kiawi' nai,” koo si Yisus.

13Miano yo si Pitrus om si Yuanis, om ombo yo po tinangar ni Yisus so nosiro ri, bana ya, om monodiaa yo sono nosiro nu iinokanon nu Rami-Rami Paska.

Minongokan si Yisus om mompomaid Niyo ri

(Mat 26:26-30; Mrk 14:22-26; 1 Kur 11:23-25)

14Nologa' yo po poongokanan nu iinokanon nu Paska, lumogaa yo sono si Yisus om murungo yo mongokan so mompomaid Niyo ri. 15Mutongaro yo si Yisus so nosiro nu, “Moingin Aku sobana mokimuurung so kou mongokan nu iinokanon nu Paska iitu nu dai po su matoi-o! 16Obaran Ku kou nu dai yo sono su kourung so kou mongokan koimbagu so Rami-Rami Paska, musingkointolang nu orati nu pongokan-ngokanan iitu, ono yo iya nu mogkuasa Aku so Pogkuosaan nu Kinoringan,” koo si Yisus.

17Kuyuti yo Niyo sawan kiasuw nu anggur-i om mongunsopoto yo so Kinoringan, om mutongaro yo so mompomaid Niyo ri nu, “Olapo muyu yo itu no om pususulang kou monginum, 18so' obaran Ku kou nu kiat kosiono, dai Aku yo monginum nu anggur so Rami-Rami Paska musingkologa' Ku koimbagu mogkuasa soko raja,” koo si Yisus.

19Noopod iri, olapo yo Niyo baang-baang-i om mongunsopoto yo so Kinoringan. Kobi-kobio yo Niyo baang-baang iiri om taaki yo Niyo so nosiro maid nu mutangar nu, “Itu yo su koyuwan Ku, nitaak gumanti' so kou. Waalo muyu yo soko itu pongoondoman muyu so Aku,” koo. 20Noopod Iyo mongokan, taaki yo Niyo sawan-i so nosiro maid nu mutangar nu, “Itu yo sawan kiasuw nu raa' Ku nituntug pongolukat so kou, om raa' Ku oono ponapus nu janji owagu nu Kinoringan powiau nu lobuw.#Yir 31:31-34

21Nga siowi yo! Lobuw mokipopongindoraai so Aku no, songogoman so toko!#Lgu 41:9 22Notantu yo nai' nu Kinoringan nu matoi Aku, Anak nu Riniba, nga aagut sobana isai yo po mongoraai s'Aku no!” koo si Yisus.

23Muburung-burungo yo nosiro muduat ong isai so nosiro mongoraai sono so si Yisus.

Musisiwal ong isai su maayo pangkat

24Tumimpuun-o sono mompomaid ni Yisus musisiwal ong isai so nosiro su maayo pangkat kosiowan nu lobuw.#Mat 18:1; Mrk 9:34; Luk 9:46 25Mutongaro yo si Yisus so nosiro nu, “Iri yo po ongo raja nu bansa okon ko Yaudi nga osokakan mogkuasa so poranak nosiro, om moingin nosiro nu owarong totongaron nu poranak suat so nosiro. 26Nga kou yo po okon ko soko ono. Ala' nai', isai so kou mokipangkat, subai musimbaba', om ono wowaidon-o subai sumiliw nu soko lobuw gumaji.#Mat 23:11; Mrk 9:35 #Mat 20:25-27; Mrk 10:42-44 27Isai gaam su maayo, ono polakan-o ko' ono momolak-o? Tantu ono ya polakan-o su maayo. Nga, Aku dadan mido-ido so kou, om Aku yo su soko moomolak nu kookanan so kou.#Yns 13:12-15

28Nga suat so kou, otatap kou yo maid-waid so Aku so onu yo po kosonsora'an nololagan Ku. 29Om pagka tinaakan Aku ni Amo Ku nu kopogboya'an mogkuasa, Aku nga monaak-a nu kopogboya'an oono so kou. 30Om soko ono po, kowaid kou so Aku mongokan monginum ong mogkuasa Aku yo soko raja. Om mogkuasa kou nu solusuk nu opulu om duo inonakan ni Israil,” koo si Yisus.#Mat 19:28

Minomirasat si Yisus nu olimon

Iyo ni Pitrus

(Mat 26:31-35; Mrk 14:27-31; Yns 13:36-38)

31Mutongaro yo si Yisus so si Simun Pitrus nu, “Oo Simun, rongowo yo! Linila'an nu Kinoringan Wowaidon nu Moinat-o monginam so kou. Ponginaman niyo oono soko lobuw mongotap nu paroi popupinig nu apo om parang kalu ong soko apo ya apo koimaidan muyu. 32Nga suat so ikau, Simun, nobogdu'a Aku, su' dai ko mingkoyod maid so Aku. Om bang opiot ko yo koimbagu poimaid so Aku, subai pobosagon mu kouna'an mu no maid sobana so Aku,” koo.

33Sumombuto yo si Pitrus nu, “Oo Tuhan, nokosodia' aku yo jiilon om munung so Ikau matoi,” koo.

34Mutongaro yo si Yisus nu, “Oo Pitrus, Mongaabar Aku so ikau nu dai po mongingkukuuk piu' no nu awi tu, intolu ko yo mongolim dai ko kotondu' so Aku,” koo si Yisus.

35Mongoduato yo si Yisus so nosiro nu, “Gulu ri, sinuu' Ku kou popanou d'ado jumpit, d'ado ombubut, d'ado kasut. Kisimpit kou ka nu onu-onu ya nu laid iiri?” koo.#Mat 10:9-10; Mrk 6:8-9; Luk 9:3; 10:4

Sumombuto yo nosiro nu, “Dai kai ya insan osimpit,” koo.

36Monolig-soligo yo si Yisus so nosiro nu, “Nga kosiono tu, isai kijumpit om kiombubut subai owiton. Om isai d'ado badung, subai powoli nu sabung su' kowoli nu badung, soko lobuw sumodia' nu kologa'an nu alod-alod niyo. 37Obaran Ku kou, kinomuro pona nga subai ourug-a iri tinangar nokosurat so Buuk nu Kinoringan suat so Aku ri nu, ‘Pokoraayon Iyo nu lobuw,’ koo ri. Nadi sumodia' yo, so' dai yo olaid otuman pinutangar so Buuk nu Kinoringan suat so Aku oono,” koo si Yisus.#Yis 53:12

38“Siowi Tuhan, tudi kuwai duo badung,” koo mompomaid Niyo ri.

“Kinaman po ono! Okon-a ko muwintos su tomodon,” koo si Yisus.

Minogdu'a si Yisus so Bulud Jaitun

(Mat 26:36-46; Mrk 14:32-42)

39Lumombuso yo si Yisus kiat so Yirusalim mian so Bulud Jaitun soko koopotan, om mompomaid Niyo ri nga minaid-a. 40Nokologa' yo po si Yisus so bulud ono, mutongaro yo Iyo so nosiro nu, “Pogdu'a kou yo su' bang kolalag kou nu ponginaman, dai kou mingkoyod maid so Aku,” koo.

41Nopupus iri, miano yo Iyo so dirawu'-rawu' ri, om sinumorukud mogdu'a nu, 42“Oo, su Amo Ku Kinoringan, bang moingin Ko, kodi Aku yo poirosaa nu kosonsora'an oono. Nga okon-a ko mongowaid nu koinginan Ku, sondiang ko koinginan Mu,” koo Iyo. 43Minintolang-o sono ido susuu'on nu Kinoringan pobasag so Iyo. 44Pagka owogat sobana kosonsora'an Niyo no, monginoontob nai' sono Iyo mogdu'a om umos-umosan Iyo soko raa' morontitiik#22:44: morontitiik; intawa: morontitiis so tana'.#22:43-44: Tinu-tinu solinan dai noporuang nu ayat 43-44.

45Nopupus Iyo mogdu'a, mululio yo Iyo so mompomaid Niyo ri. Nosunsungan Niyo nosiro moimpomoturuw, so' sobana ko oogutan nosiro. 46Tongaro yo Niyo nosiro nu, “Nokuro ka su moturuw kou? Rios kou yo om pogdu'a kou yo su' bang kolalag kou nu ponginaman, dai kou mingkoyod maid so Aku,” koo si Yisus.

Inakom si Yisus

(Mat 26:47-56; Mrk 14:43-50; Yns 18:3-12)

47Dai po nopupus si Yisus mutangar, lumogaa yo sono lobuw suang inowit ni Yudas. Si Yudas-o po ido kiat so opulu om duo mompomaid ni Yisus. Mogtuui mobio si Yudas dii si Yisus om singudi yo niyo mongowaid nu adat nosiro ong sumambat nu una'. 48Nga tongaro yo iyo ni Yisus nu, “Oo Yudas, ono yo pala su tomod mu moningud so Aku, Anak nu Riniba,” koo.

49Noilaan-o po nu mompomaid ni Yisus ong onu ourug, mutongaro yo nosiro so Iyo nu, “Oo Tuhan, lumawan kai ya momakai nu badung!” koo. 50Wintoso yo sono nu ido mompomaid ni Yisus, uripon nu Imam Maayo ri, noutas tolingo wanan-i.

51Mutongaro yo si Yisus nu, “Adang-o lumawan!” koo. Topopo yo Niyo tolingo wanan nu uripon iiri, om sonduun-duun-a noulit.

52Mutongaro yo si Yisus so lobuw minongaakom so Iyo ri nu, “Ponontaman muyu bo gaam ong lobuw raai Aku su linumoga' kou maid nu badung bangkau? 53Runat-runat mido-ido Aku so kou so natad nu Waloi Maayo nu Kinoringan, nga dai muyu ya Aku inakom. Nga runat-o iitu posimaidan kou nu Kinoringan monuman nu koinginan nu Wowaidon nu Moinat,” koo si Yisus.#Luk 19:47; 21:37

Inolim ni Pitrus si Yisus

(Mat 26:57-58,69-75; Mrk 14:53-54,66-72; Yns 18:12-18,25-27)

54Okomo yo nosiro si Yisus mongowit so waloi nu Imam Maayo ri, om muut-suut-a si Pitrus so nosiro. 55So natad nu waloi oono, kiapui pinurakit nosiro, om mogom-ogom lobuw mintarang nai. Sumimpor-o yo sono si Pitrus mintarang. 56Ido uripon woinoi nokosiou so si Pitrus mogom-ogom so obi' nu apui-i. Bontongi yo iyo nu woinoi iiri om mutongaro yo nu, “Lobuw iitu nga nosiou ku ya maid-waid so si Yisus,” koo.

57Nga mongolimo yo si Pitrus nu, “Au! Dai ku ya otondu'an lobuw oono ong isai,” koo.

58Dai po olaid, nosiou-o iyo nu ido koyuwan om minutangar nu, “Ikau nga moongowaid-a so si Yisus!” koo.

Nga sumombuto yo si Pitrus nu, “Au! Okon-a ko aku kuanon mu no!” koo.

59Kiro-kiro sonjaam kiat nu iri, mutongaro yo ido koyuwan nu, “Bana ya bo nu lobuw iitu gugumayud-a so si Yisus, so' lobuw-a iyo nu Galilia!” koo.

60Nga sumombuto yo si Pitrus nu, “Au! Dai ku ya oorotian ong onu tongaron mu no!” koo.

Laid po ni Pitrus malak-galak-i, mongingkukuuko sono piu' ri. 61Kumowiio yo si Yisus momontong so si Pitrus. Noondoman-o sono niyo tinangar ni Yisus so iyo ri nu, “Dai po mongingkukuuk piu' no, intolu ko yo mongolim nu dai kotondu' ko s'Aku,” koo ri. 62Lumobuso yo sono si Pitrus kiat dii om monginoontobo yo tumangi'.

Sinoruru om linubak si Yisus

(Mat 26:67-68; Mrk 14:65)

63Soruruo yo si Yisus nu ongo lobuw minongipat so Iyo ri om tinampar. 64Tombolon po nosiro mato ni Yisus om duaton nai' nu, “Tokodo ong isai mongolubak so Ikau-o?” koo. 65Osuang po pinutangar nosiro sondiang, mubaag so si Yisus.

Binisara' si Yisus so Poongobisora'an

nu Ugama

(Mat 26:59-66; Mrk 14:55-64; Yns 18:19-24)

66Susuab-i, muimpugo yo ongo wowaidon nu lobuw Yaudi, wowaidon nu imam om moomontuduk nu Ukum-i om owito yo si Yisus so Poongobisora'an nu Ugama. 67Duato yo Iyo nosiro nu, “Obari kai yo ong Ikau-o su Raja Nijanji nu Kinoringan?” koo.

Sumombuto yo si Yisus nu, “Niabar Ku pona so kou, nga dai kou ya poimaid. 68Om bang mongoduat Aku so kou, tantu dai kou ya sumambut. 69Nga dai yo olaid om koogom Aku yo, Anak nu Riniba so umpak wanan nu Kinoringan maid so Iyo mogkuasa,” koo si Yisus.

70“Bang soko ono, Anak Ko bo itu nu Kinoringan?” koo nosiro.

Sumombuto yo si Yisus nu, “Oo. Bana ya,” koo.

71Mutongaro yo nosiro nu, “Adang toko yo modium nu lobuw wokon pokosala' so Iyo so' norongou toko yo tinangar Niyo mongusiba' nu Kinoringan!” koo nosiro.

Sélection en cours:

Lukas 22: TomPWPgLgPn

Surbrillance

Copier