Pinongurugan 16

Si Agar om si Ismail

1Sawo ni Abram, si Sarai, d'ado po anak, nga kiuripon iyo nu roraa kiat so Masir ingoranan so si Agar. 2Tongaro yo sono ni Sarai si Abram nu, “Oo tuan, kalu dai aku yo popuonakon nu TUHAN. Indadi, owarong ondoton mu uripon ku iitu, kalu muanak-a iyo suat so aku,” koo. Tinumaayun-a sono si Abram nu tangar ni Sarai iiri. 3Posondomino yo sono ni Sarai si Agar so si Abram, urugon nu tapil niyo. Iya oono opulu yo notoun si Abram momolak-polak so Kanaan. 4Mondoto yo si Abram so si Agar, om minomontian-o sono. Nga noilaan-o po ni Agar nu momontian iyo, osumbung sono iyo om poboba'on si Sarai.

5Mutongaro yo sono si Sarai so si Abram nu, “Oo tuan, nisondamin ku yo si Agar, uripon ku no so ikau, om noilaan-o po niyo nu momontian iyo, poboba'on aku sono niyo. Ikau-a so sala' itu. Muda-mudaan ong TUHAN-a su monapus ong isai su obana so kito,” koo.

6Sumombuto yo si Abram nu, “Iyo yo po uripon mu, om kopogbaya' ko ya so iyo. Waalo yo onu-onu ya koinginan mu so iyo,” koo. Indadi, raai-raayon-o sono ni Sarai si Agar, sampai minulaiw si Agar.

7Nosambat sono si Agar nu susuu'on nu TUHAN, orani yo so towud nu sungoi so padang pantai, so lalan sundur so padang pantai nu Sur. 8Mutongaro yo susuu'on iiri nu, “Oo Agar, uripon ni Sarai, ombo kiat mu, om ombo ianan mu?” koo.

Sumombuto yo si Agar nu, “Minulaiw aku kiat dii si Sarai, inuriponan ku ri,” koo.

9Mutongaro yo susuu'on-i nu, “Pululi' yo dii so iyo om orumato yo iyo. 10Posuangon Ku komongkupuan mu no om ado ido koiap so nosiro. 11Dai yo olaid om kopuanak ko nu kusoi, om ingorani yo iyo so si Ismail,#16:11: Orati yo po nu Ismail so tangar Ibrani nga, rinongou nu Kinoringan. so' norongou-o nu TUHAN tangi' mu ri. 12Sobana ko okosog inawo niyo, soko koladai lalang. Lumawan iyo so isai yo po, om kiawi' lobuw nga mongolawan so iyo. Kotondiang iyo so anak sulod niyo,” koo.

13Mutongaro yo sono si Agar so inawo nu, “Bana ya ka nu nokosiou aku nu Kinoringan nu minomoduli' so aku?” koo. Indadi ingorani yo sono niyo TUHAN, iri minokimutangar-tangar so iyo ri nu, “Kinoringan-o su Momoduli'”. 14Ono yo ko' iningoranan nu lobuw towud nu sungoi so puola'an nu Kadis om Birid iiri nu, “Porigi nu Kinoringan, iri Minomoduli' so aku ri”.

15Nokopuanak-o sono si Agar nu kusoi om ingorani yo ni Abram so si Ismail.#Gal 4:22 16Iya oono, umur ni Abram walu nopulu om onom toun.

Sélection en cours:

Pinongurugan 16: TomPWPgLgPn

Surbrillance

Copier