Pinongoorapan 9

Nopoimaid si Saulus so si Yisus om diniu'

(P'rapan 22:6-16; 26:12-18)

1Laid nu iri sumundur-a si Saulus mongoraai om momatoi nu mompomaid ni Yisus. Minian iyo so Imam Maayo so Yirusalim, 2mokitaak nu surat kopogboya'an owiton niyo so waloi sosombooyangan nu Yaudi so bandar Damsik, su' bang kolalag iyo nu lobuw woinoi kusoi poimaid so si Yisus, aakom niyo nosiro mongowit so Yirusalim om jiilon.

3Laid niyo manou-panou mian so Damsik, nokorani-rani so bandar-i, ina' po om pokikilap onawau kiat so langit linumiwut dii so iyo. 4Nogupol sono iyo so tana' ri om nokorongou nu bongut minutangar so iyo nu, “Oo Saulus, nokuro su mongindoraai ko so Aku?” koo.

5Sumombuto yo si Saulus nu, “Isai ko ka Tuhan?” koo.

Sumombuto yo bongut iiri nu, “Aku yo si Yisus, indoraayon mu no. 6Nga tungag-o om lombus-o so bandar oono. Tudukan ko ya nai onu otoop goma'on mu,” koo.

7Kouna'an ni Saulus manou-panou-i nga minintoron-a om nokotomos. Norongou-a nosiro bongut iiri, nga dai ya nosiou nosiro lobuw-i. 8Tumungago yo si Saulus om kumolato yo, nga dai sono iyo kosiou. Indadi, tinanud-a sono iyo nu kouna'an niyo ri lumombus so Damsik. 9Kotoluan iyo dai kosiou, om notatad-a iri niyo dai mongokan monginum.

10Ido koyuwan mompomaid ni Yisus dii so Damsik, ngaran niyo si Ananias. Tongaro yo iyo nu Tuhan so ponsorowan nu, “Oo Ananias!” koo.

Sumombuto yo si Ananias nu, “Onu nu iri, Tuhan?” koo.

11Mutongaro yo Tuhan nu, “Koyo, ian-o so lalan iri ingoranan nu Lalan Otulid, om diumo yo so waloi ni Yudas ido koyuwan kiat so Tarsus, ingoranan so si Saulus. Mosaan niyo mogdu'a, 12om so ponsorowan niyo, nosiou ko niyo lumoga' potopop nu palad mu no dii so iyo, su' kosiou iyo koimbagu,” koo.

13Nga sumombuto yo si Ananias nu, “Oo Tuhan, osuang lobuw nopokoilo so aku suat so lobuw iitu no, nu osuang gogoma'on niyo nu sobana ko oraai so lobuw poimaid so Ikau so Yirusalim. 14Om linumoga' po iyo tuui maid nu kopogboya'an kiat so Imam Maayo, mongaakom nu kiawi' lobuw mongusaa' so Ikau,” koo.

15Nga mutongaro yo Tuhan so iyo nu, “Panou-a, so' pinili' Ku yo iyo mugogoma'on paabar suat so Aku so ongo bansa okon ko Yaudi, ongo raja om so lobuw Israil ono yo lobuw Yaudi. 16Om niintolang Ku so iyo nu osuang kosonsora'an oirosaan niyo suat so Aku,” koo.

17Pagka soko iri, miano yo sono si Ananias so waloi iiri, mosuwo yo iyo, om topopi yo niyo palad niyo ri dii si Saulus maid nu mutangar nu, “Oo sulod Saulus! Si Yisus, iri nosiou mu so pomponowan mu ri, Iyo yo su minonuu' so aku mian tuui so ikau, su' kosiou ko koimbagu, om kuosaan ko nu Atod nu Kinoringan,” koo. 18Iya ya iiri, soko gogas minitak kiat so mato ni Saulus, om kosiou-o sono iyo. Tumungago yo sono iyo om diuo yo. 19Nokookan po iyo, noulit-o sono kobosagan niyo.

Minontuduk si Saulus so Damsik

Mogolo yo sono si Saulus so Damsik kotinu-tinuan, minido so ongo mompomaid ni Yisus. 20Miano yo iyo so waloi sosombooyangan paabar nu, si Yisus-o po Anak nu Kinoringan.

21Noiranan kiawi' lobuw mongorongou so si Saulus, om mududuat nu, “Okon ka ko iyo yo iri minokipopomatoi nu kiawi' lobuw nopoimaid so si Yisus so Yirusalim? Om okon ka ko iyo yo iri linumoga' tuui sundur mongaakom nu lobuw poimaid om mongowit so siro so tiningkuangon nu wowaidon nu imam?” koo.

22Nga sumuang nai' lobuw poimaid nu pontudukan ni Saulus. Nopoimaid-o sono lobuw suang-i nu si Yisus-o su Raja Nijanji nu Kinoringan, kiat so niintolang niyo so nosiro suat so si Yisus, sampai dai yo sono kosagka' so iyo lobuw Yaudi minogol so Damsik-i.

23Kotinu-tinuan kiat nu iri, muupokato yo sono lobuw Yaudi ri nu potoyon si Saulus, 24nga noilaan-a niyo padu-padu nosiro ri. Awi runat mongindad lobuw Yaudi ri so pintu nu bandar-i, tayon ong osipian nosiro si Saulus momatoi. 25Nga ido awi, osuwi yo sono nu lobuw poimaid-i si Saulus so wakid, om uluwi yo nosiro so uang nu rinding watu, polaiw kiat so bandar iiri.#2 Kur 11:32-33

Minululi' si Saulus so Yirusalim

26Miano yo si Saulus so Yirusalim om midoo yo so mompomaid ni Yisus dii, nga lumaa' nosiro so iyo, so' dai po poimaid nosiro nu bana-bana ya ka nu minaid-o iyo so si Yisus ko' dai po. 27Lumogaa yo sono si Barnabas monabang so iyo, om owito yo sumamba so opulu om ido pinongoorapan ni Yisus, om tuturani yo nu kinosiowan ni Saulus so si Tuhan so lolanon mian so Damsik, om iri pinokimutongar-tongaran nu Tuhan so si Saulus, om koopogi niyo montuduk so Damsik suat so si Yisus. 28Soko iri po, midoo yo sono si Saulus so nosiro, om opogi iyo paabar suat so si Tuhan Yisus so pilolongkop nu Yirusalim. 29Mokimuupakat om mokimudaawa yo iyo nu lobuw Yaudi, iri mutangar nu tangar Yunani, om pokipopotoyan sono iyo nosiro. 30Pagka noilaan-a iri nu lobuw poimaid-i, owito yo sono nosiro si Saulus so Kaisaria, om opiti yo iyo so Tarsus.

31Soko iri po d'ado yo sono koogutan nu puimpugan nu lobuw poimaid so pilolongkop nu Yudia, Galilia, om Samaria. Mongorumat nosiro nu Tuhan, om maid nu ponobangan nu Atod nu Kinoringan, pinopiot koimaidan nosiro om muririnuang koosuang nosiro.

Minomaal si Pitrus nu koiran-iran

dii so Lida om Yupa

32Iya iiri, minanou-panou si Pitrus mongondaa nu lobuw poimaid so siombo-ombo ya. Ido runat minongondaa iyo nu lobuw poimaid dii so Lida. 33Nokosambat sono iyo nu lobuw ingoranan so si Onias. Kusoi oono d'ado kaya, om walu yo notoun dai kotungag kiat so poomoturuwan niyo ri. 34Mutongaro yo si Pitrus so iyo nu, “Oo Onias, poli'an ko ni Yisus. Tungag-o om imomoso yo poomoturuwan mu no,” koo. Iya ya iiri, tumungago yo si Onias. 35Kiawi' lobuw so Lida om so pilolongkop nu puola'an nu Yupa om Kaisaria ingoranan nu Sarun, nga nokosiou so si Onias, om nopoimaid-o sono nosiro so si Tuhan Yisus.

36Ido woinoi so Yupa ingoranan so si Tabita, sobana ko poimaid so si Yisus. (Ngaran niyo so tangar Yunani, si Durkas, orati “payou”). Owarong dadan gogoma'on niyo om moonabang nu lobuw omiskin. 37Dai sono nokaatu' si Tabita om minatoi. Nodiu' yo po bangkai niyo ri, polaki yo so bilik dilanggau-i.

38Dai ya orawu' Yupa kiat so Lida. Indadi, norongou-o po nu mompomaid ni Yisus so Yupa ri nu dii-dii si Pitrus so Lida, monuuo yo nosiro duo koyuwan monogina so iyo om kinodawan nu, “Sikap-o ya lumoga',” koo. 39Mutimos-timoso yo si Pitrus om maido yo so duo koyuwan-i. Nokologa' iyo, owito yo iyo so bilik dilanggau-i. Kiawi' balu ri tumapu' dii si Pitrus, maid nu tumangi' om posiou so iyo nu pokakas om sabung winilit ni Durkas so nosiro ri. 40Polobuso yo ni Pitrus kolobuwan iiri, om sumurukudo yo iyo mogdu'a. Nopupus iri, rumonio yo iyo so bangkai ni Durkas om mutongaro yo nu, “Oo Tabita, tungag-o!” koo. Kumolato yo si Tabita om nosiou-o po niyo si Pitrus, tumungago yo iyo. 41Kuyuti yo ni Pitrus longon nu woinoi iiri, om tongguo yo poundii. Paawo yo niyo lobuw poimaid-i, om balu ri, om komoulii yo niyo si Tabita so nosiro. 42Nokolongkop-o sono abar iiri so Yupa, om osuang nopoimaid so Tuhan. 43Kotinu-tinuan si Pitrus dii mido-ido so pookodat nu kulit nu kulos-kulos,#9:43: kulos-kulos; intawa: sotua ingoranan so si Simun.

Sélection en cours:

Pinongoorapan 9: TomPWPgLgPn

Surbrillance

Copier