Mateus 9
9
Yeesus heelt em laame
Markus 2.1-12; Lukas 5.17-26
1Yeesus is uf en kroos kanoo kextii, is tsurik uf ti aner sayt fon te lakoo un is an sayn xtat Kafarnaum khom. 2Tan hon phaar layt en laame man keprung, woo in en pet kelee hot. Yeesus hot kesiin tas tii klaawe hate un saat fer te laame:
— Koraaj, mayn khint! Tayn sinte sin fertsayert.
3Too hoon phaar Kesets mayster aankefang se tënke:
— Tee man is am plasfemeere keeche Hërkot.
4Awer, Yeesus wust was tii am tënke waare un saat:
— Warom sayt teyer tas xlecht tings am tënke? 5Was is laychter se saan fer te laame: “Tayn sinte sin fertsayert” ore “Xtay uf un kee”? 6Wayl ich tuun aych tsayche tas ich, te Soon fom Man, macht hon uf te eyert fer sinte fertsayer.
Tan saat eyer fer te laame:
— Xtay uf, hool tayn pet un kee hëm.
7Te man is uf kextii un is hëm kang. 8Wii tas folek tas kesiin hot, hon se pang kriit un hon Hërkot keloopt wayl eyer soo en macht kep hot fer mënxe.
Yeesus un Mateus
Markus 2.13-17; Lukas 5.27-32
9Yeesus is fon too fort kang un, uf em weech, hot eyer en xtayer kaseerer kesiin, Mateus kenënt, am setse uf em plats woo te xtayer petsaalt kewe muste. Yeesus saat tëm:
— Khom mit mich un say mayn tisipel!
Mateus is uf kextii un is mit tëm kang. 10Xpeeter hiin, wii Yeesus tas nachts ese am ese waar in Mateus sayn haus, sin fiil xtayer kaseerer un anere layt mit en xlechte naame aan khom un hon sich aach an te tix kesetst mit Yeesus un sayn tisiple. 11Phaar fariseyer hon tas kesiin un hon fer ti tisiple kefroot:
— Warom tuut ayre mayster ese mit te xtayer kaseerer un mit anere layt mit en xlechte naame?
12Yeesus hot keheyert was tii kefroot hon un hot keantwort:
— Tii woo kesunt sin prayche khee tokter, awer ti kranke toch. 13Keet un fersuucht ferxteen was tas xtik fon te Hayliche Xrifte petayte sol: “Ich wil tas ti layt kuut sole sin un net tas se fii opfere mache.” Wayl ich sin khom fer se ruufe ti woo sinte mache un net ti kuute.
Yeesus un ti faste
Markus 2.18-22; Lukas 5.33-39
14Tan sin Yohan Te Taafer sayn tisiple ticht pay Yeesus khom un hon kefroot:
— Warom tuun meyer un ti fariseyer oft faste, awer ayre tisiple mache khee faste?
15Yeesus hot keantwort:
— Mënt teyer tas ti woo in kelaat sin fer en hochtsayt traurich khëne sin soo lang wii te praut pay tëne is? Sicher net! Awer khomt ti tsayt woo te praut wech kehool kept tswixich tëne; tan yoo, tuun tii faste!
16— Nimant penutst en nay xtik tsaych fer en alt tsaych se flike; wayl tas nay flik xtik keet in un ferayst tas alte tsaych, un tas loch kept noch kreeser. 17Nimant tuut naye wayn in alte haut sek. Wën yemant tas mache tuut, tuun ti haut sek ferplatse, te wayn keet ferloer, un ti haut sek playwe kaput. Kraat es keeche teel, te naye wayn kept in naye haut sek ketuun, un soo keen net ferloer net mool ti haut sek un net mool te wayn.
Yeesus heelt en fraa un en meetche
Markus 5.21-43; Lukas 8.40-56
18Soo lang wii Yeesus fer tas folek am xpreche waar, is en xëf fon te sinakook ticht pay em khom, hot sich kekniit un saat:
— Mayn tochter is yets kraat kextorep! Khom un hal tayn hënt iwich se tas se noch mool leewe tuut.
19Too is Yeesus mit em kang, un sayn tisiple sin aach kang.
20En fraa, woo xon tswelef yoer en ferpluutung hat, is fon hine khom un hot an te saam fon Yeesus sayne mantel kethupt. 21Wayl tii hot soo ketënkt: “Wën ich ploos an tëm sayne mantel thupe, kewe ich kuriert.”
22Jeesus hot sich rom kewënt, hot ti fraa kesiin un saat:
— Koraaj, fraa! Tuu pist keheelt wayl tuu keklaapt host.
Un in tëm momënt is ti fraa keheelt kep.
23Tëm noo, is Yeesus pis ans haus fom xëf fon te sinakook kang. Wii eyer kesiin hot ti layt woo trauer musik am xpiile waare un tas folek in en kroose rutel, 24saat eyer:
— Keet al too raus! Tas meetche is net toot; tas is am xloofe!
Tan hon se aan kefang em ferxpote. 25Klaych wii tas folek raus kang is, is Yeesus ins tsimer kang woo tas meetche waar, hot se an te hant kehool, un tas is uf kextii. 26Un ti naychkheet hot sich ferprayt iwer ti kans rechioon.
Yeesus heelt tswaay plinte
27Yeesus is fon tëm plats wech kang, un uf em weech sin tswaay plinte tëm noo kang, am xraaye:
— Soon fon Dawii, tu uns petaure!
28Soo wii Yeesus ins haus rin kang is, sin ti plinte pay em khom. Tan hot eyer kefroot:
— Klaapt teyer tas ich aych heele khan?
Tii hon keantwort:
— Yoo, hër! Meyer klaawe!
29Yeesus hot tëne an ti aue kethupt un saat:
— Tan tas es kemach kept wii teyer klaapt!
30Un tëne sayn aue sin keheelt kep. Tan hot Yeesus xtram tii ortnung kep:
— Saat tas fer nimant!
31Awer, tii sin fort kang um hon ti naychkheet iwich Yeesus ferxtraut in tee kans rechioon.
Ti heelung fon en man woo net xpreche khont
32Wii ti fort kang sin, hon phaar layt en man pay Yeesus kenom woo net xpreche khont, wayl eyer tomineyert waar fon en temoon. 33Klaych wii te temoon aus kextoost kep is, hot te man aankefang se xpreche. Al hon sich ferwunert un hon fersichert:
— Noch nii hon meyer soo was kesiin in Israël!
34Awer ti fariseyer saate:
— Te xëf fon te temoone is weyer macht kept fer tee man fer temoone aus se xtoose.
Yeesus petauert tas folek
35Yeesus is kang un pesuucht aler xtet un wile. Eyer hot in te sinakooke keuntericht, ti kuute naychkheete fom Raych aan kesaat un ale xweere krankheete fon te mënxe keheelt. 36Wii Yeesus tas kroos folek kesiin hot, hot eyer se fiil ketauert, wayl tii petrikt waare un in xtich kelos, wii xoofe oone xeefer. 37Tan saat eyer fer ti tisiple:
— Ti ërnt is wërklich kroos, awer ti aarwater sin weenich. 38Ferlangt fer te hër fon te plantaaj tas eyer mee aarwater xike sol fer ti ërnt mache.
Sélection en cours:
Mateus 9: NTHunsrik
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
2022 Sociedade Bíblica do Brasil
