Mateus 7
7
Ti kewoonheet fer ti anere julkeere
Lukas 6.37-38,41-42
1— Julkeyert net ti anere tas teyer net julkeyert kept fon Hërkot. 2Wayl Hërkot tuut aych julkeere kraat soo wii teyer ti anere julkeere tuut un tuut ti selwich moos penutse woo teyer penutst fer ti anere mese.#Mk 4.24 3Warom siist tuu te trek krimel woo in tayne pruuter sayn au is un mërekst net tas hols xtik woo in tayn aychne au is? 4Wii khanst tuu fer tayne pruuter saan: “Los mich tee trek krimel aus tayn au mache”, wën tuu en xtik hols in tayn aychne au host? 5Xaynhayliche! Mach eyerxt tas xtik hols aus tayn au un tan khanst tuu kuut siin fer te trek krimel wech mache aus tayne pruuter sayn au.
6— Net tas hayliche te hunt kewe, wayl tii xtele sich keeche aych un tuun aych ferope; wëreft net ayer phërle fer ti xwayn, wayl tii tuun se ferthape.
Hërkot sayn kuutheet
Lukas 11.9-13
7— Ferlangt un teyer wërt kriin; suucht un teyer wërt fine; klopt un ti tier wërt uf kemach fer aych. 8Wayl, al tii woo ferlange, kriin; tii woo suuche, fine; un ti teyer wërt uf kemach fer weyer klope tuut. 9Teet filaycht yemant fon aych, woo fater is, en xteen kewe fer sayn khint, wën tee en xtik proot ferlangt? 10Ore kept en xlang, wën tee en fix ferlangt? 11Teyer, wën teyer ach xlecht sayt, wist kuut tings fer ayre khiner kewe. Wii fiil mee ayre Fater, woo im himel is, wërt kuut tings kewe fer tii woo iim ferlange tuun!
12— Macht fer ti anere was teyer wolt tas tii fer aych mache; wayl tas is was Mooses sayn Kesets un te Profëte sayn unterichte lërne.
Ti tswaay weeche
Lukas 13.24
13— Keet an ti ëng tier rin, wayl ti prayt tier un te laychte weech fiire pis in ti hel, un es kept fiil layt woo uf tëm weech keen. 14Ti ëng tier un te xwiiriche weech fire pis ans leewe un weenich mënxe fine tee weech.
Ti falxe profëte
Lukas 6.43-44
15— Past uf mit te falxe profëte! Ti khome keklayt als xoofe, awer inerlich sin se wilte wolfe. 16Teyer tuut se erkhëne torich was se mache. Ti tëner phitx kewe khee trauwe, un ti prëneltse xtek kewe khee fayche. 17Soo, yeete kuute paam kept kuute fruchte, un te paam woo fer niks taaft kept xlechte fruchte. 18Te kuute paam khan khee xlechte fruchte kewe, un te paam woo fer niks taaft khan khee kuute fruchte kewe. 19Yeete paam woo khee kuute fruchte kept wërt ap kehakt un ins fayer kexmis. 20Soo, teyer tuut ti falxe profëte erkhëne torich em tings woo se mache.
Weyer khomt in te Himels Raych
Lukas 13.25-27
21— Is net yeete persoon woo mich “Hër, Hër” nënt woo in te Himels Raych rin khomt, awer ploos weyer te wile macht fon mayne Fater, woo im himel is. 22Wën tee taach khomt, fiil layt wole mich saan: “Hër, Hër, mit te macht fon tayne naame hon meyer Hërkot sayn mensaaj aan kesaat un torich tayne naame hon meyer temoone aus kextoost un hon fiil wunere kemach!” 23Tan saan ich kans klaar fer tii layt: “Ich hon aych nii kekhënt! Keet wech fon mich, teyer woo ploos xlechtes tuut!”
Ti tswaay funtamënte
Lukas 6.46-49
24— Weyer tii mayn unterichte aan heyert um tuut tëm noo leewe is wii en kluuche man woo sayn haus uf ti fels kepaut hot. 25Te reen is kefal, tas hooch waser is khom, un te wint hot mit kraft keploost keeche tas haus. Awer, tas is net um kefal wayl tas haus waar uf ti fels kepaut kep.
26— Weyer tii mayn unterichte aan heyert un net tëm noo leewe tuut is wii en man oone ferxtant woo sayn haus uf te sant kepaut hot. 27Te reen is kefal, tas hooch waser is khom, un te wint hot mit kraft keploost keeche tas haus. Tas is um kefal un is kans fernicht kang.
Yeesus sayn autoriteet
28Wii Yeesus uf kheyert hot se xpreche, waar tas folek ferwunert mit tëm sayn aart fer se unterichte. 29Tee waar net wii ti Kesets mayster; kraat es keeche teel, hot mit sayn aychne autoriteet keuntericht.#Mk 1.22; Lk 4.32
Sélection en cours:
Mateus 7: NTHunsrik
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
2022 Sociedade Bíblica do Brasil
