Matthew 4
4
Jisu Ke Porikha Kora
1Etu pichete Jisu ke Atma pora ekta sunsan jagate loi jaise juntu jagate saitan pora taike porikha koribo. 2Aru chalis din aru chalis rati Jisu upwas korise, etu karone Tai bhuk lagi jaise. 3Titia porikha kora jon#4.3 Saitan ahikena Taike eneka koise, “Apuni Isor laga Putro ase koile, etu pathor khan ke roti hobole kobi.” 4Kintu Jisu taike jowab dikena koise, “Isor kotha te eneka likhi kene ase, ‘Manu to khali bhaat khaikena jinda nathake, kintu Isor laga mukh pora ula kotha te he jinda thakibo.’” 5Etu pichete saitan pora Jisu ke pobitro sheher te loi jaise aru mondoli laga sob pora uporte khara koribo dise, 6aru Taike koise, “Apuni Isor laga Putro ase koile, yate pora nijorke nichete phelai dibi, kele koile Isor laga kotha te eneka likha ase,
‘Tai pora Tai laga duth khan ke hukum dikene Apuni ke bachai lobo,’
Aru,
‘Taikhan laga hath pora Apuni ke dhuri lobo,
Aru Apuni laga theng ke pathor pora bhi jokhom nahobo.’”
7Jisu taike eneka koise, “Aru Isor kotha te etu bhi likhi kene ase, ‘Apuni laga Probhu Isor ke porikha na koribi.’” 8Aru, saitan pora Jisu ke untcha pahar te loi jaise aru Taike prithibi laga rajyokhan laga dangor mohima thaka dikhai dise. 9Saitan pora Taike koise, “Apuni moike athukari kene aradhana korile, eitu khan sob ami Apnike di dibo.” 10Titia Jisu pora taike koise, “Yate pora jai jabi, Saitan! Kilekoile Shastro te eneka likhi kene ase,
‘Tumikhan khali Probhu, tumi laga Isor ke he aradhana koribi, aru khali Taike he sewa koribi.’”
11Titia saitan Taike chari kene jai jaise, aru sabi, sorgodoth khan ahi kene Taike modot korise.
Jisu Porisorja Shuru Kora
12Jitia John ke dhurise koi kene Jisu khobor paise, Tai Galilee jagate wapas jai jaise. 13Tai Nazareth sheher chari kene Galilee Samundar laga usorte thaka, Capernaum town te jaise, etu jaga to Zebulun aru Naphtali laga majot te ase. 14Isaiah bhabobadi dwara Isor kotha pora kowa pura hobole karone eitu khan sob eneka hoise,
15“Zebulun laga mati aru Naphtali laga mati,
Sagar phale, Jordan paar kori kene,
Porjati khan laga Galilee!
16Utu manu khan jun andhera te bohi thake taikhan dangor ekta ujala dikhise,
Aru jun khan mora laga chaya aru jagate bohi thake,
Taikhan uporte ekta pohor dikhai dise.”
17Utu somoi pora he Jisu prochar kori bole shuru hoise aru koise, “Mon ghura bhi, kele koile sorgo laga rajyo to usor hoise#4.17 Mon ghura bhi, kele koile sorgo laga rajyo to usor hoise Mark 1:16-20; Luke 5:1-11; John 1:35-42..”
Jisu Pora Prothom Chela khan ke Mata
18Jitia Tai Galilee Nodi phale berai thakisele, Tai Simon junke Peter koi, aru tai laga bhai Andrew khan ke maas dhora jaal loi kene samundar te phelai thaka dikhise, kele koile taikhan maas dhora manu thakise. 19Jisu taikhan ke koise, “Ahibi, Ami laga piche koribi, aru Moi tumikhan ke manu dhori bole bonai dibo.” 20Loge-loge taikhan laga maas dhura jaal khan phelai dise aru Jisu laga piche kori bole shuru hoise. 21Jitia Jisu ta te pora jai thakise, tai duijon bhai ke dikhise, James, Zebedee laga chokra, aru tai laga bhai John Tai ekta naw te taikhan laga baba Zebedee logote maas dhura jaal khan milai thakise. Jisu taikhan ke matise, 22Aru etu loge-loge taikhan laga naw aru baba ke chari kene Jisu laga piche korise#4.22 Luke 6: 17-19. .
Jisu Pora Bisi Manu Majot Te Kaam Kora
23Titia Jisu Galilee laga sob jagate berai jaise, synagogue khan te sikhaise, aru rajyo laga susamachar prochar korise, aru sob kisim laga ghao bemar aru bemar manu khan ke changai korise. 24Tai laga khobor sob Syria jagate punchi jaise, aru manu khan Jisu usorte kisim-kisim bemar pora dukh pai thaka khan, gaw bhitor te bhoot huma khan, murgi-bemar thaka khan, aru jothor bemar thaka khan sobke loi kene anise. Aru taikhan ke Jisu pora changai kori dise. 25Aru Galilee, Decapolis#4.25 Etu motlob to dosta sheher, Jerusalem, Judea, aru Jordan pora bhi dur thaka sob jaga pora manu khan Jisu logot ahise.
Sélection en cours:
Matthew 4: ISVNag
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
NAG-ISV
Creative Commons License
Indian Standard Version (ISV) - Nagamese (Indian Standard Version (ISV) - Nagamese), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
