Yòwanìrzɛ̀ 16

1“Nà e òhwèlì ndi hwenè hweyà hwe arzɛ aŋga nanù e rza timbeya ò mburza. 2Wɔ̀ hwa ò e hvaya ò tenì ya e ndawò ya màkanɛ̀. Ò jɔ̀kɛ̀, o ò ja hvònda ema tɔ̀ ima mɔ̀ ema a ò e òŋwɛ, a ò ɔ̀ŋgɛ̀lɛ̀ ndi ema a gbèeyà ndi Lohwɛ̀ èwòlò. 3Wɔ̀ wò ò gbeyà ndi hwèŋge hweyà èhwanja, wɔ̀ hwa rzi hwi Tatɛ̀ tɔ̀ imba. 4Nà e òhwèlì ndi ene eyà, aŋga nanù, e hvònda e jelì tɛ ema hwene hweyà hwe ò gbèyɛ̀nɛ òma ema ɔ̀ŋgɛ̀lɛ̀ ema nà mà e kòkòwɛlɛ.

Èwòlò ya Èlìŋgɛ̀ yà Wòtani

“Nà rzi lòme lì e òhweyà hwenè hweyà ò hwewòtelì, èhwanja, nà mà hwɛ na inyɔ. 5O nàŋgɛ imba na ɛ̀ndɛ òma e mɔ̀ ema à mà nò òma. Ndi tɔ̀ mɔ̀kɔ wa anyu a rzi nò ijòwi ema, ‘One ò ɛ̀ndɛ e?’ 6È òndi na ndùtù èhwanja na e òhwèlì hwenè hweyà. 7Ndi na e òhweyà ndi e jɔ̀kɛ̀. È hwèlì gbamù nanù ema, imba na ɛ̀ndɛ. Èhwanja imba na rza ɛ̀ndi tɛ nanù òma e Moòŋgòwànèlì a rza e jèeyà. Ndi na ɛndi tɛ, na e òmeya e mɔ̀. 8Ndì Mɔ̀ a jelì tɛ a e uŋmɛ̀lɛ̀ hwatò hwa ene rze ema lì rzɔŋgìtɛ̀nɛ̀ la awu lì hvòmɛ̀nɛ̀ lì gbeyà la wòhwe na lì gbeyà la hweyà hwe jɔ̀kɛ̀ hwe rza lɔ̀wu. Ndèŋgana wɔ̀ hwa rza ò rzɔŋgìtɛ̀nɛ̀ hwèkayirzelì hwe ama Lohwɛ̀. 9Li rzɔ̀ŋgìtɛ̀nɛ̀ lì awu la wòhwe lì rza hvòmɛ̀nɛ̀, èhwanja hwatò hwa rza nò lòkɛ̀. 10Hwa tòni lì hvòmɛ̀nɛ̀ hweyà ema hwe hwèlì jɔ̀kɛ̀, èhwanja imba na ɛ̀ndɛ òma Tatɛ̀, ndèŋgàna inyɔ e rza ò nò ɛnɛ hvɛ. 11Ndèŋgànɛ̀lɛ̀ hwa tòni hvɛ o lì o hwàanà hwèkàyìrzèlèlì, hwe ama Lohwɛ̀ èhwanja mɔ̀ à mà màa lì kàyìrzɛ̀ e mòkànèlì wà ene rze.”

12“Nà hwɛnɛ rzayì-rzayì ja hweyà ò lì e òhweyà, hwe akayi tɔ̀ mamɛ ema e rza tànɛyi lì hwanɛ. 13Ndi e Èlìŋgɛ̀ ya jɔ̀kɛ̀ e jelì tɛ, ye e tìmba ò lì hwiya e jɔ̀kɛ̀ ya arzɛ. Mɔ̀ a rza ò òhwa lì hvòmɛ̀nɛ̀ lìkànèyà la eni. Eyà ema hwa mò òhweyà yɔ ndi à ò òhwa, ndèŋgàna a ò e òhweyà hvɛ hweyà ema hwe ò gbèyɛ̀nɛ. 14Mɔ̀ a nò jàneyà èluhwe ndɛnɛ, èhwanja a ò nò wòwàna mamɛ ema na òhwa rzìi a e òhweyà. 15Tɔ̀ mamɛ ya arzɛ ema Tatɛ̀ wa ami a òhvi, e hwèlì ndi e ya ami. Ɔ̀ndeŋgàtɛ̀ na e òhweyàyi ema Èlìŋgɛ̀ e ò wòwa mamɛ ema na òhwi rzi a e òhweyà.”

Lì arzuumɛ la Hwà-òkòwèlì lì ò tìmba mɔ̀nyɛ̀ŋgì

16“Yerzù rzìi a hwata hvɛ lì òhwa nanù ema, ‘O ŋmanà hvònda e rza ò nò ɛnɛ hvɛ, rzi ò mburzà ŋmanà hvònda hvɛ e ò nò ɛnɛ.’” 17Lòŋgò la Hwà-òkòwèlì hwa ama Yerzù rzìi hwa ijòwa mɔ̀kɔ na ɔ̀nɛyi nanù ema, “Mamɛ mɔ̀ à ɔ̀ŋgɛ̀lɛ̀ ò lì jò òhweyà nanù ema, ‘O ŋmanà hvònda e rza ò nò ɛnɛ hvɛ, ndèŋgàna ò ŋmanà hvònda hvɛ e nò ɛnɛ.’ Ndèŋgana à mà òhwa hvɛ nanù ema, ‘Èhwanja na ɛ̀ndɛ òma Tatɛ̀.’” 18Rzi hwa wòteya lì ijòwa nanù ema, “Mamɛ e hwèlì jànda ja mamɛ ema mɔ̀ à òhwa nanù ema, ‘O ŋmanà hvònda e?’ Irzɔ i rza rzɔ̀ŋgìtɛ̀nɛ̀yi mamɛ mɔ̀ à hwèlì a òhwa.”

19Yerzù à mà àyɛ̀mbɛ̀ ema hwà mà arza ò lì mò ijòwa eyà, ò èŋgànɛ̀lɛ̀ à mà hwa òhweyà nanù ema, “Èya ema na òhwi nanù ema, ‘O ŋmanà hvònda e rza ò nò ɛnɛ hvɛ, ndèŋgànɛ̀lɛ̀, ò mburzà ya ŋmanà ya hvònda hvɛ e ò nò ɛnɛ,’ eyà eŋge ema e hwèlì lì àyijòwànɛ̀ mɔ̀kɔ na ɔ̀nɛyi e?” 20Nà e òhweyà ndi e jɔ̀kɛ̀, e ò èya na lì ɛhwɛ ndi e rze e hwɛ ò mɔ̀nyɛ̀ŋgì. È ò hwɛ ndi rzɔ̀lùu, ndi e rzɔ̀lùu e anyu e ò tìmba ndi mɔ̀nyɛ̀ŋgì. 21È mòlanà ema a hwèlì ò lìyalì a arzuumɛ èhwanja e hvònda ya eni ya mòtàkà e ma uka. Ndi e ŋmanà wa eni à mà yahwa tɛ, a ò lìŋga èhwanja ŋmanà a ŋyahwahwi ò rze. 22Nànu ndi e hwèlì na inyɔ. È arzuumɛ nàŋgɛ ndi na hwɛnì lì e ɛnɛ hvɛ. O eŋge hvònda e òka mɔ̀nyɛ̀ŋgì. Ndèŋgànɛ̀lɛ̀ ò rza enje tɔ̀ mòtò tɔ̀ mɔ̀kɔ ema a wòwa mɔ̀nyɛ̀ŋgì mò anyu. 23Ò wòŋgò wùnyà è rza ò nò ijòwa hvɛ tɔ̀ eyà. Nà è òhweyà ndi è jɔ̀kɛ̀ ema Tatɛ̀ à è ŋgbà ndi tɔ̀ mamɛ ema è ijò ò lìnà là ami. 24Nàtɛ̀ɛ nà nàŋgɛ è rzi mò ijòwi tɔ̀ yomà ò lìnà là ami. E ijòwa Lohwɛ̀, à ò ŋgbà, òma mɔ̀nyɛ̀ŋgì mò anyu mò mà ònda.

Yerzù à akayi è rze yà mɔ̀nyɛ̀

25Yerzù rzìi à òhweyà hwà-òkòwèlì hwa eni hvɛ nanù ema, “Tɔ̀ nɛ nàŋgɛ nà è òhwàna ndi nà è mbɔrzi yà meyànà, è hvònda è hwèlì è jà ema nà rza è òhwìrzɛ̀nɛ̀ hvɛ ò ene tumba yà mbɔrzi, ndi nà è òhweyà ndi nà è mbɔrzi yà rzɛŋgɛ-rzɛŋgɛ lì hvòmɛ̀nɛ̀ Tatɛ̀ wà ami è ŋgàna ema è hweni lì rzɔ̀ŋgìtɛ̀nɛ̀. 26Ò wòŋgò wùnyà yò mò ijòwa tɔ̀ mamɛ ò lìnà là ami. Nà rza ò gba à gba è nyò ò lì òhweyà Tatɛ̀ ò lì è ò òŋgòwànà, 27èhwanja, Tatɛ̀ mɔ̀ ŋmìti à è lìŋgàni. À è lìŋgàni èhwanja è nò lìŋgàni, ndèŋgàna è lòkɛ̀ nanù ema nà uwɛ̀lɛ̀lɛ̀yi ndi nà mɔ̀. 28Nà mà uwɛ̀lɛ̀lɛ̀yi ndi òma Tatɛ̀, rzi nà jà ò rze. Nàŋgɛ nanù imba nà è lìya è rze ò lì ɛ̀ndɛ lì tìmba ò mà Tatɛ̀.”

29Hwà-òkòwèlì hwa eni rzìi hwa òhwa nanù ema, “Nàŋgɛ nanù ò òhwa rzɛŋgɛ-rzɛŋgɛ ò rza òhwàna meyàna. 30O naŋgɛ, irzɔ i hwi ema ò hwi hweyà hwe arzɛ, ò èŋgànɛ̀lɛ̀ ò wa ò rza lùwa tɔ̀ mòtò ema a ò ijòwa miijòwelì. Ène eyà yɔ yiti, e jò gbe irzɔ i lòkɛ̀ ema ò wa ò ma uwɛ̀lɛ̀lɛ̀yi ndi òma Lohwɛ̀.” 31Yerzù rzìi à mà hwa alàhwɛ̀ nanù ema, “È lòkɛ̀yi naŋgɛ e? 32È ɔ̀ŋgɔ tɛ, e hvònda e hwèlì e ja, ndèŋgàna e ma màa lì jàa, ema e ò wùhweyà. Tɔ̀ ima mɔ̀ tɛ a ò hwaŋga lì timba ò èki ema a uwɛ̀lɛ̀lɛ̀yi. È ò nò lìya imba mbiti. Ndi tɔ̀ nanù, na rza enje imba mbiti, èhwanja Tatɛ̀ wa ami a hwèlì na imba. 33Nà e òhwèlì hwene hweyà, aŋga nanù, e hwɛnɛ ɛ̀yɔ̀lɛ̀ na òma e hwèlì na imba. Anu rze e hwɛnɛ ndi ndùtù. Ndi e kake mèèmà! Imba nà mà màa lì aka e rze ya mɔ̀nyɛ̀.”

Sélection en cours:

Yòwanìrzɛ̀ 16: bri

Surbrillance

Copier