Panagnaan 9

Janjiꞌ Tuhan ni si Nū

1Pag-anu, lay na baw Tuhan nupaatan si Nū ka ga anak na, yuk na, “Hanak-balanak na kam supaya lataꞌ na junyaꞌ meꞌ panubuꞌ bi. 2Mimon kahayop-hayopan, ga manuk-manuk ka ga daying sampay sagannap balnyawa ma palele taꞌ gumi tawu na sina mintu ningkaam. Kaam na sina magbayaan sila sikamimon. 3Maka labba man batnaa, dari na sila labbasakayi pabuwat bi lawuk bi. Dean ku na sila ningkaam man bi magbalanjaꞌ sibuꞌ du ka tinanom bay pamuwan ku ningkaam nohoꞌ kinakan. 4Sugaꞌ daa jaꞌ kam mangan sumbalian ma yaꞌ bay pingkaꞌ pinatiis lahaꞌ na. Batan lahaꞌ ina muwan kaallum ni balnyawa.”

5-6Maka yuk Tuhan, “Mimon manusiyaꞌ hagaan niyaku batan kaam bay pinapayak ni limbagan arat-tabiat ku. Sangkon, bong luu bay mapatoy manusiyaꞌ, jama na ka, hayop na ka, hukuman ku njataꞌ na subay du ya pinapatoy.

7“Hanak-balanak na kam supaya paeka boꞌ paeka na pin panubuꞌ bi ni sikaliput junyaꞌ.”

8Maka yuk Tuhan ni si Nū ka ga anak na, 9“Batnaa janjiꞌ ku ningkaam ka ga panubuꞌ bi pangkat mamangkat 10sampay na ni mimon balnyawa ma bay tabeꞌ ningkaam taꞌ bahitlaꞌ looy meꞌ tuu: 11Basta yaꞌ na ku ngatisan mimon balnyawa pabalik ka dunuk atawa pun makaat junyaꞌ ka boheꞌ. 12Labba man kaam sampay na mimon balnyawa pangkat-mamangkat, buwanan ta na kam sipat man bi ngindan yaꞌ kuhi baluba janjiꞌ ku saumu. 13Sipat na meꞌ tuu: Luu sina bangaw nnaꞌ ku jawom tayiꞌ baliyu yana pangindanan ni bay janjiꞌ ku ningkaam. 14Dari bila mintu mōꞌ na ku andom man ku mauwan lahat, boꞌ luu tulun bangaw, 15mastiꞌ tapanambung ku du bay janjiꞌ ku ningkaam sampay ni mimon balnyawa. Dari yaꞌ na sina mintu pabiya ku boheꞌ ngatisan mimon balnyawa taꞌ junyaꞌ pabalik. 16-17Batan tuktuk ku ina mintu ngita bangaw njawom tayiꞌ baliyu, mastiꞌ taintom ku du inaa sipat ni bay janjiꞌ ku ni mimon balnyawa taꞌ junyaꞌ. Boꞌ janjiꞌ ku itu, meꞌ bay halling ku na siꞌ, basta yaꞌ na tabaluba saumu.”

Siga anak si Nū

18-19Na siga awon ga anak si Nū ma bay mmeꞌ niiya taꞌ bahitlaꞌ yana ga si Sem, si Ham ka si Japet. Ga lalla looy ilay siꞌ sikatallu yana poonan mimon manusiyaꞌ ni sikaliput junyaꞌ. Na song hallom, anakan na si Ham lalla, yana si Kanan.

20Na si Nū ilay siꞌ pahuhuma. Dari paddus dunuk looy, lay ya ngabbun anggul. 21Pag taabut kakattuan, lay ya buwat tubaꞌ anggul boꞌ na bay nginum paeka sampay lango na ga ya. Pag bāk na, lay jaꞌ nantang ni tangngaꞌ lumaꞌ luna na. 22Sasang na tuli, lay kapaasok anak na si Ham, yana mmaꞌ si Kanan, boꞌ lay takita na mmaꞌ na tuli nantang jaꞌ. Pag pōꞌ na, lay ya nuntutan siga danganakan na bay kadarihan mmaꞌ da. 23Sugaꞌ kuwan si Sem ka si Japet lay ngaddoꞌ juba binoo pilay man nambunan mmaꞌ da. Pag takka da, lay sabloyan da langngon juba looy ni baha da saliꞌ-saliꞌ boꞌ da pasuhut bong pin yaꞌ jaꞌ takita da mmaꞌ da nantang. Pag-anu, lay na patambun da ni baran mmaꞌ da sasang da patikut.

24Na pag batiꞌ si Nū, yaꞌ hallom, lay na tasayu na bay kadarihan anak na ma siyali, yana si Ham. 25Dari lay sumpaan na anak si Ham yana si Kanan, yuk na, “Tuwaꞌ sumpaꞌ na sina si Kanan. Kadari na ina mintu subay ga ata siga danganakan na.”

26-27Maka yuk si Nū, “Kuwan si Sem, kamura-murahan sinupaatan du meꞌ Papuꞌ ku Tuhan. Kamura-murahan kuwan si Japet, pinaluhān na pin meꞌ Tuhan paglahat na sampay tumabeꞌ du ya ni siga supaat njataꞌ si Sem. Maka kamura-murahan kuwan si Kanan, dari ata da na sikaduwa.”

28Na si Nū ilay, lay gi pasampun umu na tallu hatus limampūꞌ taun paddus dunuk looy. 29Bong tinibuuk umu na labbasakayi, luu na siyam hatus limampūꞌ taun boꞌ na lay matoy.

Sélection en cours:

Panagnaan 9: sjm

Surbrillance

Copier