मत्ती 5

डूँगर प ईसु सीख दिनी

(लूका 6:20–23)

1जद ईसु बि भीड़नै देख्यो जणा डूँगर क उपर चढगो अर आपका चेलानै सीख देबा ताँई बठै बेठगो। बे बिकी सुणबा ताँई बिकन आया। 2जणा ईसु बानै सीख देबा लाग्यो,

3“भागहाळा ह बे मिनख जखा आत्मा का भूखा हीं; क्युं क ईस्बर नगरी को राजपाट बाकोई ह! 4भागहाळा ह बे जखा रोवै ह; क्युं क परमेसर बानै स्यांती देसी! 5भागहाळा ह बे जखा सूदा हीं; बे धरती का हकदार होसी! 6भागहाळा ह बे जखा धरम का काम करबा ताँई भूखा हीं; परमेसर बाकी इंछ्या पूरी करसी! 7भागहाळा ह बे जखा दयालु ह; क्युं क बापै दया करी ज्यासी! 8भागहाळा ह बे जाको मन परमेसर की नजर्या म पबितर ह; बे परमेसरनै देखसी! 9भागहाळा ह बे जखा मेळमिलाप करावै ह; बे परमेसर का टाबर खुवासी! 10#1 पत 3:14भागहाळा ह बे जखा धारमिक्‍ता की बजेऊँ सताया जावै ह, क्युं क ईस्बर नगरी को राजपाट बाकोई ह! 11#1 पत 4:14भागहाळा हो थे जखा मनै मानबा की बजेऊँ मिनख थानै सतावै ह, थारी बेजती करै अर झूठ बोलर हर बाता म थानै बुरा बतावीं हीं। 12#काम 7:52जणा थे राजी होज्यो क्युं क ईस्बर नगरी म थानै इको फळ मिलसी। क्युं क बे तो परमेसर की खेबाळानै बी जखा थारूँ पेली हा बानै बी अंय्यांई सताया हा।

लुण अर च्यानणो

(मरकुस 9:50; लूका 14:34,35)

13 # मर 9:50; लूक 14:34,35 “थे धरती का सगळा मिनखा ताँई लुण हो; पण जद लुण मऊँ सुवाद चल्योजा जणा बिनै ओज्यु चरचरो कोनी बणायो जा सकै। अर नइ बो कोई काम आवै। पण बिनै फेक दिओ जावै ह, जिऊँ बो लोगा क पगा तळै मसळ्यो जावै ह। 14#यह 8:12; 9:5थे जगत का मिनखा ताँई च्यानणा हो। अर जखी नगरी डूँगर प ह बा कोनी लुख सकै। 15#मर 4:21; लूक 8:16; 11:33मिनख दिओ जळार कुंडा तळै कोनी म्हेलीं पण आळ्या म म्हेलीं हीं जिऊँ घर म आबा-जाबाळा मिनखानै च्यानणो दिख सकै। 16#1 पत 2:12थारा चोखा काम बि दिआ क च्यानणा की जंय्यां चमकणा चाए जिऊँ दुसरा मिनख भला कामानै थारै जरिए देख सकै अर थारा परम-पिता की जखो ईस्बर नगरी म ह बिकी बडाई करै।

नेम-कायदा क बारां म ईसु की सीख

17“थे ओ मना सोचो क म नेम-कायदा नहिस परमेसर की खेबाळा की मांडेड़ी पोथ्यानै नास करबा आयो हूँ। म बानै नास करबा कोनी आयो पण बानै पूरो करबा आयो हूँ। 18#लूक 16:17म थारूँ सची बोलुँ हूँ अकास अर धरती टळ सकै ह पण नेम-कायदा म मंडेड़ो आंक पूरो होया बिना कोनी रेह्‍वै। 19इ ताँई जखो बी मिनख आ छोटाऊँ छोटा आदेसा मऊँ एकनैई कोनी मानै अर बो बंय्यांई दुसरा मिनखानै बी करबा की सीख देवै बो ईस्बर नगरी म छोटाऊँ बी छोटो खुवासी। पण जखो मिनख बा बातानै मानै ह अर दुसरा मिनखानै बी मानबा ताँई सीखावै ह बो ईस्बर नगरी राज म बडो खुवासी। 20म थारूँ साची बोलुँ हूँ ज थारा नेकी का काम सास्तरी अर फरिसीया की नेकिऊँ बेसी कोनी ह जणा थे ईस्बर नगरी का राज म कदैई कोनी जा सकोगा।

झाळ क बारां म सीख

21“थे सुण्या हो, क आपणा बडकानै ओडायो गयो हो, ‘हत्या मना करज्यो’ अर ज कोई हत्या करसी बिको न्याय होसी। 22पण म थारूँ खेऊँ हूँ क ज कोई मिनख कोई पाड़ोसी भाईड़ा प झाळ काडै बिको न्याय होसी। अर ज कोई मिनख कोईकी बेजती करै बिको न्याय पंचायत करसी; अर ज कोई मिनख कोईनै बावळो खेवै बिनै परमेसर नरक की आग म गेरसी। 23इ ताँई जद बेदी प चढावो चढाती टेम तनै याद आवै क तेरा पाड़ोसी भाई का मन म तेरै खिलाप कुटळाई ह। 24जणा तू तेरा बि चढावानै बेदी क आगै धर'र पेल्या तेरा पाड़ोसी भाईऊँ मेळमिलाप करले अर बिकै पाछै तू तेरा चढावानै चढाजे। 25अर ज कोई तनै कचेरी म लेज्यावै जणा तू बिकै सागै गेला मई सुळजेटो कर लिए कदै अंय्यां नइ होज्या क बो तनै पंचा क सामै पेस करै अर पंच सिपाईड़ानै सूपै अर सिपाईड़ा तनै काळ-कोठड़ी म पटकै। 26म तनै सची बोलुँ हूँ ज तू एक बार बी काळ-कोठड़ी म चलेगो जणा जद ताँई तू पाई-पाई नइ चुका दे जद ताँई तू बठैऊँ कोनी छुट सकै।

कुकरम क बारां म सीख

27“थे जाणो हो थानै ओडायो गयो हो क थे कुकरम मना करज्यो।” 28पण म थारूँ अंय्यां बोलुँ हूँ क ज कोई मिनख पराई लूगाईनै बुरी नजर्याऊँ देखै ह जणा बो आपका हिया म बि लूगाईऊँ कुकरम कर लिआ। 29#मत्त 18:9; मर 9:47इ ताँई ज तेरी दाइणी आँख तनै पाप करावै जणा तू बिनै फोड़ दे; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक म जाबाऊँ बच जावै। 30#मत्त 18:8; मर 9:43अर ज तेरो दाइणो हात तनै पाप करावै जणा बिनै काट फेक; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक की आग म जाबाऊँ बच जावै।

तलाक क बारां म सीख

(मत्ती 19:9; मरकुस 10:11,12; लूका 16:18)

31 # मत्त 19:7; मर 10:4 “थानै अंय्यां बी ओडायो गयो हो; क ज कोई आपकी लूगाईनै छोडबो चावै, जणा बिनै आपकी लूगाईनै तलाकनामो देणो चाए। 32#मत्त 19:9; मर 10:11,12; लूक 16:18; 1 कुरन्थी 7:10,11पण सुणो, ज कोई मिनख आपकी लूगाईनै कुकरम क अलावा कोई ओर बजेऊँ छोडै ह अर बा लूगाई दुसरा मोट्यार क सागै रेह्‍वै जणा बिको कुकरमी होबा को जिमेबार बिको पेलड़ो मोट्यार ह अर बि छोडेड़ी लूगाईऊँ ब्या करबाळो बी कुकरम करै।

सोगन खाबा क बारां म सीख

33“थे आ बी जाणो हो क आपणा बडकानै ओडायो गयो हो क थे सोगन मना तोड़ज्यो पण बिनै परबु का नाम म पूरो करज्यो। 34#याकू 5:12; मत्त 23:22पण म थानै खेऊँ हूँ क थे कदैई सोगन मना खाज्यो; नइ तो ईस्बर नगरी की क्युं क ओ परमेसर को सिंघासन ह। 35अर नइ इ धरती की क्युं क आ परबु क पगा की चोकी ह। अर नइ यरूसलेम नगरी की क्युं क इको राजा परमेसर ह। 36थे थारा सीर की सोगन बी मना खाज्यो क्युं क थे थारा बाळा मऊँ एक बी बाळ नइ तो धोळो अर नइ काळो कर सको हो। 37पण थारी बात ‘हाँ’ की ‘हाँ’ अर ‘ना’ की ‘ना’ हो। क्युं क जखो मिनख इकै अलावा क्युं बोलै ह जणा बो सेतान कानिऊँ ह।

रिस्ता क बारां म सीख

(लूका 6:29,30)

38“थे जाणो हो थानै ओडायो गयो हो क, ‘आँख क बदलै आँख अर दांत क बदलै दांत।’ 39पण म थारूँ खेऊँ हूँ थे थारै सागै बुराई करबाळा क सागै बुराई मना करज्यो। पण ज कोई थारै दाया गाल प थपड़ मारै जणा बिकै कानि दुसरो गाल बी आगै कर दिज्यो। 40अर ज कोई मिनख न्याय ताँई तेर प मुकदमो चलार तेरो कुर्तीयो लेबो चावै जणा बिनै तेरो कोट बी दे दिजे। 41अर जखो मिनख जबरदस्ती आपको समान तनै पकड़ा'र एक कोस पैदल लेज्यावै जणा बिकै सागै दो कोस चल्यो जाए। 42अर ज कोई मिनख तेरूँ क्युं माँगै जणा बिनै दिजे। अर ज कोई मिनख तेरूँ उधारो लेबो चावै जणा बिनै बी मना मत करजे।

सगळा मिनखाऊँ प्यार-परेम राखजे

(लूका 6:27,28,32–36)

43“थारूँ ओ बी ओडायो गयो हो क, ‘थे थारा पड़ोसीऊँ परेम करज्यो अर थारा दुस्मनाऊँ नफरत करिओ।’ 44पण म थानै खेऊँ हूँ क थे थारा दुस्मनाऊँ परेम करज्यो। अर जखो थानै सतावै, बा ताँई बी अरदास करज्यो। 45जिऊँ थे ईस्बर नगरी म रेह्बाळा थारा परम-पिता की ओलाद बण सको। क्युं क परमेसर भला अर बुरा दोन्यु जंय्यां का मिनखा प सूरज को च्यानणो करै ह। अर धरमी अर पापी दोन्यु प म्हें बरसावै ह। 46अंय्यां म इ ताँई खेऊँ हूँ क्युं क ज थे थारूँ प्यार-परेम करबाळा क सागैई परेम करस्यो जणा थानै बिको काँई फळ मिलसी। अंय्यां तो चुंगी लेबाळा#5:46 चुंगी लेबाळा यहूदि लोग चुंगी लेबाळाऊँ नफरत करता हा। बी कोनी करै के? 47अर ज थे थारा भाई-भाणा किई आवभगत करो हो जणा इमै काँई गुण-एसान? अंय्यां तो परमेसरनै नइ ध्यारबाळा मिनख बी कोनी करै के? 48इ ताँई थानै सिद बणबो चाए, जंय्यां की ईस्बर नगरी म रेह्बाळो थारो परम-पिता सिद ह।

Sélection en cours:

मत्ती 5: एस डब्लु वी

Surbrillance

Copier