Naanearü ügüchiga 8
8
Inayacua̱x ga mucü rü ínixe
1Natürü ga Tupana rü tama Noéxü̃ inayarüngüma, rü tama nüxü̃ inayarüngüma ga guxü̃ma ga yema naeü̃gü ga wüxigu Noémaxã wapuruwa yexmagüxü̃. Rü yemaca̱x ga Tupana rü nayabuanexẽxẽ, rü yema dexá rü inanaxügü ga nax íyaxexü̃.
2Rü narüwãxtaü̃gü ga dexá ga mártamawa yagoxü̃chiügüxü̃ rü dexá ga daxũwa iwãxnaxü̃güxü̃ rü ínayachaxãchi ga nax napuxü̃.
3-4Rü yexguma ga yema dexá rü ínixechigü. Rü 150 ga ngunexü̃guwena rü marü poraãcüxüra ínixechigü ga dexá. Rü meama norü 7 ga tauemacüarü 17 arü ngunexü̃gu rü guma wapuru rü ma̱xpǘne ga Araráwa nayaxũ̱x rü yexma ínixexü̃.
5Rü ínixechigü ga dexá rü 3 ga tauemacüguwena rü nango̱x ga ma̱xpǘnetape̱xegü.
6Rü 40 ga ngunexü̃guwena rü Noé nayawãxna ga wüxi ga norü beü̃tána ga gumá wapuru.
7Rü ínanamuxũchi ga wüxi ga ngurucu, natürü yema ngurucu rü nu ne nanañamare yerü taxũta nipaane.
8Rü yemawena ga Noé rü wüxi ga muxtucuxü̃ ínamuxũchi nax nüxü̃ nacuáxü̃ca̱x rü aixcüma marü yapaane.
9Natürü ga guxema muxtucu rü wenaxarü wapuruca̱x tataegu yerü taxuguma tayarüwa̱xéga, yerü taũtama aixcüma ínixexechi ga dexá. Rü yemaca̱x ga Noé rü tümaca̱x ínaxuxuchime̱xẽ rü wenaxarü wapurugu tüxü̃ nimucuchi.
10Rü to ga 7 ga ngunexü̃ ínanangu̱xẽxẽ, rü wenaxarü muxtucuxü̃ ínamuxũchi.
11Rü yexguma marü nachütachaü̃gu rü ítangu ga guxema muxtucu. Rü tümapaguxegu wüxi ga oribuatü yéma ne tange. Rü yemawa nüxü̃ nacua̱x ga Noé ga marü nax yapaanechigüxü̃.
12Rü wenaxarü 7 ga ngunexü̃ ínanangu̱xẽxẽ rü wenaxarü tüxü̃ ínamuxũchi ga guxema muxtucu. Natürü ga guxema muxtucu rü marü tama tataegu.
13Rü yexguma Noéaxü̃́ nayexmagu ga 601 ga norü taunecü, rü marü nipaane. Rü 29 ga ngunexü̃ ngupetü̱xguwena rü Noé ínanangegüaxü̃ ga guma wapuru nax yéma ínadaxuchixü̃ca̱x. Rü nüxü̃ nadau ga marü nax yapaanexü̃.
14Rü norü taxre ga tauemacüarü 27 arü ngunexü̃gu rü marü aixcüma nipaane.
15-16Rü yexguma ga Tupana rü Noéxü̃ ñanagürü: —¡Ínaxüe ya yima wapuruwa tümamaxã ya cuxma̱x rü cunegü rü cuneã̱xgü!
17¡Rü ngẽxgumarüxü̃ ta i guxü̃ma i naeü̃gü, rü naxü̃nagü, rü naeü̃gü ga ixãxpe̱xatüxü̃, rü ngẽma naxtanecamaxã waixü̃mügu ixĩxü̃ i cumaxã ngẽxmagüxü̃, rü ínamuü̃ nax guxü̃wama naxĩxü̃ca̱x rü ngẽmaãcü nügü nax yamuxẽẽxü̃ca̱x rü napaxẽẽgüãxü̃ca̱x i naane! —ñanagürü.
18Rü yexguma ga Noé rü naxma̱x rü nanegü rü naneã̱xgü rü ínachoü̃ nawa ga guma wapuru.
19Rü yexgumarüxü̃ ta ínachoü̃ ga guxü̃ma ga naxü̃nagü, rü naeü̃gü ga naixnecücüã̱x, rü naeü̃gü ga ixãxpe̱xatüxü̃, rü guxü̃ma ga yema naxtanecamaxã ixĩxü̃.
20Rü yemawena ga Noé rü Tupanaca̱x nanaxü ga wüxi ga ãmarearü guruxü̃. Rü nayayaxu ga ñuxre ga yema naxü̃nagü rü naeü̃gü ga ixãxpe̱xatüxü̃ ga mexü̃ nax namaxã Tupanaxü̃ yacua̱xüxüxü̃ca̱x. Rü Cori ya Tupanaca̱x nanadai rü yema ãmarearü guruü̃wa ínanagu.
21Rü yexguma Cori ya Tupanaxü̃ napaxgu ga yema naema rü nüma rü namaxã nataãxẽ. Rü ñanagürü: —Tagutáma wena chixexü̃ namaxã chaxuegu i ñaa naane nagagu i ngẽma duü̃xü̃gü woo yexguma noxritama chanango̱xẽẽgu i ngẽma duü̃xü̃gü rü chixexü̃guxicatama narüxĩnüe. Rü ngẽxgumarüxü̃ ta tagutáma wena chanadai i guxü̃ma i naeü̃gü i ngẽma ñu̱xma namaxã chaxüxü̃rüxü̃.
22Rü ñu̱xma i ñaa naane nangẽxmaxü̃ rü tagutáma inarüxo nax natoegüxü̃ i duü̃xü̃gü rü yaxoxü̃ i nanetügü. Rü tá nangẽxma i naianexü̃ rü gáuanexü̃, rü tá nayimá ya mucü rü taunecü, rü ngunexü̃ rü chütaxü̃ —ñanagürü.
Sélection en cours:
Naanearü ügüchiga 8: tcaP
Surbrillance
Partager
Copier
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Ffr.png&w=128&q=75)
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2022, Wycliffe Bible Translators, Inc. All rights reserved.