Emiighom 11
11
Otu ẹedaneen phọ ạBabilon
1Ẹḅel amem mọ oomo awe sịen aḅirini phọ ụḅa ghan oniin ọnhu, ọḅile oghol ghan rạraar eniin phọ egholom mọ. 2Kụ ịdipho bịdi ọḍuaghu ạga phọ erumuḍio phọ remite ghan bọ kụ rọki, kụ bịdi ọmiin ḍịyaghaghaany ade ẹpe Bạbilonia kụ ọghi orugh sịphe. 3Kụ oniin ạḅeni nyoniin mọ, “Itu ọḅol ọogha ọphophoghi dị ạmaar ạkpar.” Kụ iḍighi kụ bịdi ụmoogh ni iiḅoghoḍi ughol ọloghom aruutu, rꞌọogha ọḅiirom. 4Kụ bịdi ọḅem mọ, “Nyịidipho ọlogh otu ẹmha ẹedaneen dị kasi okuaḍio phọ pịdi yira omitiom ḍien ḅịle kọ́walala sịen aḅirini phọ.”
5Pọ kụ amem dị Ọmoogh-we phọ aru asoor ude kụ ạmiin otu ẹedaneen phọ awe phọ mọlhogh bọ, 6kụ ọdi ạḅem mọ, “Nyịidipho oomo awe phọ ạbuen moḍighi bụo eniin eelhe kụ rọḅa ghan oniin ọnhu. Ịmaar ephogh ịphen bịdi moḍighi yogh bọ. Ịphen kụ emiighom ạraraar dị bịdi koḍighi. Esi ekulha amem, bịdi kotue oḍighi ịyaar lọ bịdi rọwa oḍighi. 7Itu osoor ude ọghi ọgbaragbarami ọnhu phọ ạbidi, pịdi oniin ọnhu oniin kạ́naghan mun ạḅa.” 8Kụ iḍighi kụ Ọmoogh-we phọ ạawalami bịdi oomo aḅirini phọ; kụ bịdi ọwile ẹmha phọ ụ́logh mun. 9Ughol ẹmha phọ mọ ạBabilon: ịdi eḍighi bọ ịsiphe kụ esi phọ Ọmoogh-we phọ ạgbaragbarami bọ ọnhu oomo awe phọ, kụ amiigh sịphe ọowalami oomo awe aḅirini phọ.
Bụo ẹemara ẹemara ạSem
10Bụen kụ ẹemara ẹemara phọ ạSem. Aḍigho phọ ẹḍua bọ ịyal ạsia kụ iten kụ ạSem ạmar olephiri ọony, Apaksad, mem dị ọdi mạman oniin okuron ạsia. 11ẠSem ạmar bọ Apaksad, ọdi ạrol ịnon oogh okuron ạsia, ạḅile ạmaraghi bụnon ạnmuny.
12Mem dị Apaksad ạman ịraardi rꞌoogh ạsia, kụ ạmar olephiri ọony, Sela, 13Apaksad ạmar bọ Sela, ọdi ạrol ịnon inya okuron rꞌịraar ạsia, ạḅile ạmaraghi bụnon ạnmuny.
14Mem dị aSela ạman ịraardi ạsia, ọdi ạmar olephiri ọony, Eber; 15aSela ạmar bọ Eber, ọdi ạrol ịnon inya okuron rꞌịraar ạsia, ạḅile ạmaraghi bụnon ạnmuny.
16Mem dị Eber ạman ịraardi rꞌinya ạsia, ọdi ạmar olephiri ọony, Peleg; 17Eber ạmar bọ Peleg, ọdi ạrol ịnon inya okuron rꞌịraardi ạsia, ạḅile ạmaraghi bụnon ạnmuny.
18Mem dị aPeleg ạman ịraardi ạsia, ọdi ạmar olephiri ọony, Riu; 19aPeleg ạmar bọ Riu, ọdi ạrol ịnon ịyal okuron rꞌesugha ạsia, ạḅile ạmaraghi bụnon ạnmuny.
20Mem dị aRiu ạman ịraardi rꞌịyal ạsia, ọdi ạmar olephiri ọony, Serug; 21aRiu ạmar bọ Serug, ọdi ạrol ịnon ịyal okuron rꞌoḍual ạsia, ạḅile ạmaraghi bụnon ạnmuny.
22Mem dị aSerug ạman ịraardi ạsia, ọdi ạmar olephiri ọony, Nahor; 23aSerug ạmar bọ Nahor, ọdi ạrol ịnon ịyal okuron ạsia, ạḅile ạmaraghi bụnon ạnmuny.
24Mem dị aNahor ạman ịyaldi rꞌesugha ạsia, ọdi ạmar olephiri ọony, Tera; 25aNahor ạmar bọ Tera, ọdi ạrol ịnon oniin okuron rꞌiḍioph rꞌesugha ạsia, ạḅile ạmaraghi bụnon ạnmuny.
26ATera rọman oḍualdi ạsia, kụ ọdi aḍighi ọde Ebram rꞌaNahor rꞌạHaran.
Ẹemara ẹemara phọ aTera
27Bụen kụ ẹemara ẹemara phọ aTera. ATera aḍighi ọde Ebram rꞌaNahor rꞌạHaran. ẠHaran aḍighi ọde ạLot. 28ẠHaran ạrol ẹpe ẹmha Ur ẹpe ọmar bọ nyọdi ẹpe eelhe ạBabilon kụ ạphur amugh ọde phọ ọdi. 29Ebram aphin Serai kụ aNahor aphin Milka, ọnyani ạHaran ọde phọ Iska. 30ASerai ọ́mar nmụny.
31Kụ aTera ạsighe Ebram ọony phọ ọdi, rꞌọony oko phọ ọdi, Lọt, ọony ạHaran ọony phọ ọdi, rꞌaSerai ạnir Ebram ọony phọ ọdi, kụ ạpham bịdi ọḍuanam ẹpe ẹmha phọ Ur ẹpe eelhe phọ ạBabilon, agheel ẹpe eelhe aKenan, kụ bịdi ụkel li osi ẹpe Hạran kụ orugh sịphe. 32ATera ạman ịyal okuron rꞌoogh ạsia, kụ agbi omugh ẹpe Hạran.
Sélection en cours:
Emiighom 11: ẠḌI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
