Эхин 6
6
Хэһээлтэ ба найдуулга
Хүнэй нүгэлтэ хэрэгүүд
1Түби дэлхэй дээрэ зон олошоржо эхилбэ. Басагадтай тэдэнэй болоходонь, 2хүмүүн басагадай сэбэр һайханиие Огторгойн хүбүүд анхаржа, дуратай басагадые шэлэн, һамга абадаг болобо. 3Тиихэдэнь Эзэн зарлиг буулгаба:
— Хүн гээшэ юрэ бусын амитан, тиимэһээ иимэ удаан тэдэниие байлгаха хэрэггүй. Энээнһээ хойшо хүнэй ами наһанай болзор, амиды ябаха, ажамидарха сагынь зуун хорин жэл болог.
4Бурханай хүбүүдэй хүн түрэлтэнэй басагадтай ханилхада, тэдэнь түрэжэ, түрэһэн хүүгэдынь абарга мантан бэетэйнүүд байгаа. Тэдэ эртэ урдын нэрэ солотой баатарнууд болоно.
5Түби дэлхэй дээрэ хүн зоной муу үйлэ хэхые, тэдэнэй хүсэл һанааньшье буруу шэглэлтэй гэжэ Эзэн харахадаа, 6газар дэлхэй дээрэ хүн гээшые бии болгоһондоо хара бууба. Тэрэ угаа ехээр гэмшэн, 7иигэжэ айладхаба:
— Би газар дэлхэйн нюрууһаа хамаг хүн зониие, тэдэнтэй хамта адуу мал, арьяатаниие, шубуудые огтолон үгы болгохоб. Эдэниие байгуулһандаа голхорноб.
8Гансал Ной эдээн сооһоо Эзэнэй һанаанда тааруу, аятай байгаа бэлэй.
Нойн үнэн шударга байлга
9Энэ болбол Нойн түүхэ юм.
Тэрэ сагай хүн зон соо гансал Ной үнэн шударга, ямаршье өө мөөгүй байгаа, Бурхантай эбтэй эетэй ажаһуугаа. 10Тэрэ Шеэм, Хаам ба Яапэт гэдэг гурбан хүбүүтэй бэлэй.
11Ииһээр Бурханай урда хүн түрэлтэн ёро муу ябадалтан боложо, алаха, һүйд хэхэ ушарнууд хаа-хаанагүй дэлгэрбэ. 12Хүн бүхэн ёро муу хэрэгтэ дашуурба. Иигэжэ хүн түрэлтэн газар дэлхэйе бузарлаа һэн. Бурхан энээниие хараад, 13Нойдо айладхаба:
— Хүн түрэлтэн хаа-хаанагүй ёрото муу хэрэг үйлэдэнэ, тиимэһээ Би тэдэниие дууһан хюдахам. 14Харин ши һайн шанартай бүхэ модоор абдар мэтэ онгосо өөртөө бүтээжэ, тэрээн соогоо таһалгануудые хээд, онгосынгоо газаа, досоо талые дабирхайда. 15Тэрэшни утаашаа гурбан зуун тохой, хүндэлөөшөө табин тохой, үндэрөөрөө гушан тохой байгуужаг. 16Ханза-онгосошни хушалта оройтой байха, хушалта ба ханануудай хоорондо нэгэ тохой зай үлөөгөөрэй. Хажуу талаһаань үүдэ хэхэш. Ханза-онгосошни гурбан дабхартай байгуужан. 17Амиды хамагые үгы хэхэеэ Би түби дэлхэйдэ уһан галаб — асари ехэ үер буулгахаб. Энэ дэлхэй дээрэ байгаа амитан бүхыдөө хосорхо. 18Зүгөөр Би шамтай хэлсээ баталхаб. Тиимэһээ ши ханза-онгосо руу һамгантаяа, хүбүүдтэеэ, бэреэдтэеэ хамта орохош. 19-20Бүхы амитадһаа — жэгүүртэ шубуудһаа, адуу малһаа, зэрлиг амитадһаа түрэл түрэлөөрнь — эрэ, эмые өөртөө абалсахаш. Эдэ шамтай хамта амиды үлэхэ ёһотой. 21Өөртөөшье, бэшэндээшье хүрэхөөр элдэб эдеэ абахаш.
22Бурханай зарлигые Ной дүүргэхэеэ оролдоо һэн.
Sélection en cours:
Эхин 6: BurOTp
Surbrillance
Partager
Copier
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Ffr.png&w=128&q=75)
Tu souhaites voir tes moments forts enregistrés sur tous tes appareils? Inscris-toi ou connecte-toi
© Bible Society in Russia, 2002-2007, 2011, 2013, 2018.