Jn 4

Yeso mbɨ əyi nɨ nyaʼa rɨ ə Sàmàriyà

1Mɨ̀Farisiî nyaʼa zu ni bə̂d mɨ̀nɔnɔʼ mbɨə nyaʼə beenɨ əbɔʼ ə Yeso. Mbɨ nyaʼa bə̀ zu ni ɨ wɨə nyaʼə nàʼə̀ mɨnib əmbɨ ə bə̂d mɨ̀nɔnɔʼ chè ə Jɔ̌n, 2(ka à bè yeʼi ni chəi Yeso ziə nyaʼə nàʼ mɨnib. Àmei mə̀mə̀ə̀nɨ̀-ɨnû ɨməd nyaʼə nàʼə̀). 3Ənɨ wɨ̀ nyaʼa zu ɨnû mbe nɨ mbɨ nyaʼə ghàə̀, wɨ̀ nyaʼa nɔʼ rɨ ə Jùdeyà bə̀ndɨ̀ wò ə Galiliî.

4Ənɨ wɨ̀ nyaʼə wòə̀, wɨ̀ nyaʼa berɨ chè ə Sàmàriyà. 5Wɨ̀ nyaʼa wò pè əsɨ ə mɔʼɔ ə Sàmàriyà nɨ mbɨ nyaʼə tɔŋ ənɨ ə Sikà. Sikà wɨə nyaʼa ɨban əsɨ ə si ze nɨ Jakɔ̂b nyaʼa naʼ əmbɨ Jòsêf nɨ nyaʼə wan məd. 6Ɨbɨgɨ mɨnib we nɨ Jakɔ̂b nyaʼa toŋɨ wɨə nyaʼa əsɨ ze. À nyaʼa ɨghabɨ mɨ̀nyùmə̀ wum chɔ̀b rɨ̀be əziə, Yeso, nɨ nyaʼa fə yènɨ̀ bɔd, nyaʼa pè chub ɨban ɨbɨgɨ mɨnib we.

7Əyi məSàmàriyà mɔʼɔ nyaʼa wò əŋgu ɨ toʼ mɨnib. Yeso nyaʼa gha ɨ bɔ ni, “Naʼ mɨnib ɨ num mə̀ nɔ.” 8(Mə̀mə̀ə̀nɨ̀-ɨnû Yeso nyaʼa fə wò ɨŋga əsɨ ze wo zon ɨghɨjɨg). 9Əyi məSàmàriyà we nyaʼa ghà ɨ bɔ ni, “Àwɔ̀ yɨə Jû, mɔ̌ yɨ əyi Sàmàriyà. À kɨə ghàə̀ ni mə̀ naʼ mɨnib ɨ ne ɨmbə̀ʼ ə yè ə?” (Wɨ̀ nyaʼa ghà əne ɨmbə̀ʼ ɨghəm nɨ chəi mɨ̀Jû nyaʼə fɔtɨ ɨghɨ mbɨ məSàmàriyà.)

10Yeso nyaʼa wììrɨ̀ ɨ bɔ ni, “À mɨ kəʼ kyerɨ əghɨ ze nɨ Ŋwìə̀ ə nàʼə̀, bə̀ kyerɨ wə̀d we nɨə biirɨ mɨnib rɨ ne, njɨ à kəʼ ghà ni wɨ̀ naʼ mɨnib mbe nɨə nàʼ ɨ̀tènɨ̀ ɨ ne.”

11Əyi we nyaʼa ghà ɨ bɔ ni, “Masà, chəi à berɨ ə̀nùŋga, ɨbɨgɨ mɨnib wɔ̂ ə bə̀ sa ɨŋga, əne à kɨə wo nɨŋ mɨnib mbe nɨə nàʼ ɨ̀tènɨ̀ rɨ ə yi ə? 12À wa chè ə Jakɔ̂b nɨ nyaʼə mbǎʼ mba mɨ̀mbǎʼ rəŋwe, nɨ nyaʼa naʼ ɨbɨgɨ mɨnib wɔ̂ ɨ na ə, nɨ məd ziə mbɨ mbi bɔn, mbɨ ti njɨ̀g bə̀ fɔrɨ mbi mbɨ̀rɨkun nyaʼa nɔ rɨŋga ə?”

13Yeso nyaʼa wììrɨ̀ ɨ bɔ ni, “Ədɔʼ ə mɨnib ə bɨrɨ wɨrɨ ne wə̀d jìm we nɨ nɔ mɨnib mbɔ̂, 14àyɨə chəi ədɔʼ ə mɨnib ə bɨrɨ nɔ wɨrɨ ne wə̀d we nɨ nɔ mɨnib mbe nɨ mə̀ bɨrɨ naʼ ɨ bɔ. Mɨnib mbe nɨ mə̀ bɨrɨ naʼ ɨ bɔ bɨrɨ yeʼ jwɨ̀-əmboŋ nɨə koŋ ɨŋga məd bə̀ nàʼ ɨ̀tènɨ̀ rɨ mì ɨ bɔ.”

15Əyi we nyaʼa gha ɨ bɔ ni, “Masà, naʼ mɨnib mbɔ̂ ɨ num, ɨmbə̀ʼ tɨ ədɔʼ ə mɨnib ə nɔ wɨrɨ ne i əmɨ, tɨ mə bə wɨrɨ yeʼe əmɨ əgha ɨ toʼ mɨnib.”

16Yeso nyaʼa ghà ɨ bɔ ni, “Ndə̀ wo tɔŋ e ɨnom, wɨrɨ bə̀ndɨ̀ yeʼe əgha.”

17Əyi we nyaʼa wììrɨ̀ ni, “Chəi mə berɨ ɨnom.”

Yeso nyaʼa ghà ɨ bɔ ni, “À kàŋ kùʼ nɨ gha ni chəi à berɨ ɨnom, 18ɨmbə̀ʼ ɨghəm ni à nyaʼa fə nam mɨnom mɨ̀tân, əne ka mbaŋə̀ ze nɨ àwɔ̀ ə chubə mbɨ məd tɨ̀nîn yɨ i e nom. Ənû ze nɨ à ghǎ yɨə kaŋ rəsìʼ.” 19Əyi we nyaʼa ghà ɨ bɔ ni, “Masà, mə zə ni àwɔ̀ yɨə wə̀d ɨ̀kə̀n Ŋwìə̀. 20Mɨ̀mbǎʼ məSàmàriyà rəŋwe mbɨə nyaʼə wumnɨ ə Ŋwiə̀ ɨgun ɨwum wɔ̂, àyɨə mbə̀nə mɨ̀Jû mbɨə ghàə̀ ni Jèrusalèm yɨ əsɨ ze nɨ tɨ̀ berɨ wumnɨ ə Ŋwiə̀ əŋgu.”

21Yeso nyaʼa ghà ɨ bɔ ni, “Əyî, ben ənû ze nɨ mə̀ gha ɨ ne. Nyùmə̀ wɨə yeʼe nɨ chəi mbə̀ bɨrɨ wumnɨ ə Mbǎʼ ɨgun ɨwum wɔ̂ kɨ ə Jèrusalèm. 22Chəi mbə̀n bə̂d rɨ ə Sàmàriyà jeŋgɨ kyerɨ wə̀d we nɨ mbə̀ə wumnɨə. Àyɨə mbǎ, mɨ̀Jû, tɨ ə kyerɨ wə̀d we nɨ tɨ ə wumnɨə, ɨmbə̀ʼ ɨghəm nɨ ənû nɨ jwɨ rəŋgəʼ yɨ rɨ əmbɨ mɨ̀Jû. 23Nyùmə̀ wɨə yeʼe, əne wɨ̀ fə yeʼe i, nɨ bə̂d bɨrɨ wumnɨ ə Mbǎʼ ɨchî nɨ Əzwî ə chwiə. Zɨə bɨrɨ yeʼ ni mbɨ wumnɨ əməd ɨchî nɨ wɨ̀ yeʼ ə. Bə̂d mbe nɨə ghɨ̀ əne mbɨə wumnɨ ə Mbǎʼ ɨchî nɨ wɨ̀ kə̀bɨ ni mbɨ wumnɨ əməd. 24Ŋwìə̀ yɨ Əzwî, əne bə̂d mbe nɨə wumnɨ əməd berɨ wumnɨ ənɨ ɨka we nɨ Əzwî ə nàʼə̀, bə̀ wumnɨ ənɨ rəsìʼ.”

25Əyi we nyaʼa ghà ɨ bɔ ni, “Mə kyerɨ ni Wə̀d we nɨ Ŋwìə̀ zɔʼɔ wɨə yeʼe, nɨ yeʼ we nɨ mbɨə tɔŋə ni Kristo. Ənɨ wɨ̀ yeʼe, wɨ̀ bɨrɨ toʼrɨ ɨnû jìm ɨ na.” 26Yeso nyaʼa wììrɨ̀ ɨ bɔ ni, “Mɔ̌ wɔ̂ nɨə ghàm ɨ ne yɨ wɨwən.”

Bə̂d mbe rɨ ə Sàmàriyà nyaʼa ben ə Yeso

27Àmei əwu əwən, mə̀mə̀ə̀nɨ̀-ɨnû Yeso nyaʼa wɨrɨ bə̀ndɨ̀ yeʼe. Mbɨ nyaʼa bìd ɨmbə̀ʼ ɨchî nɨ ɨ wɨə nyaʼə ghàmbɨ̀ə̀ mbɨ əyi, àyɨə chəi wɨ mɔʼɔ rəbɔʼ mɨ̀mə̌d nyaʼa biirɨ ni, “À kɨə kə̀b ənû ə ye rɨ əmbɨ əyi wɔ̂ ə?” kɨ ni, “À kɨə ghàmbɨ̀ə̀ mbɨ məd ɨmbə̀ʼ ə yè ə?”

28Əne əyi we nyaʼa zu ɨŋgam Yeso, wɨ̀ nyaʼa nɔ̀ʼ sàŋ fɨkyiŋ fɨ mɨnib fe əŋgu, wò ɨŋga əsɨ ze pè ghà əmbɨ ə bə̂d ni, 29“Mbə̀ yeʼe zə mbaŋə̀ mɔʼɔ nɨ fə gha ɨnû jìm mbe nɨ mə̀ nyaʼa kweʼ ghɨ̀. Tɨ̀ wɔ̂ wa yeʼ Wə̀d we nɨ Ŋwìə̀ zɔʼ ə?” 30Bə̂d mbe nyaʼa zu əne, jwɨ̀ rɨŋga əsɨ ze wò əsɨ Yeso.

31Ənɨ əyi we nyaʼə wò ɨŋga əsɨ ze, mə̀mə̀ə̀nɨ̀-ɨnû Yeso nyaʼa buʼ ɨbɔ ɨ bɔ ghà ni, “Əchwiə̀-ɨnû, jɨg əghɨ ə mɔʼɔ.”

32Àyɨə wɨ̀ nyaʼa wììrɨ̀ əmbɨ mɨ̀mə̌d ni, “Mə berɨ tɨjɨg nɨ chəi mbə̀ kyerɨ ənû ə mɔʼɔ ɨmbə̀ʼ rɨwən.”

33Ənɨ wɨ̀ nyaʼa ghà əne, mə̀mə̀ə̀nɨ̀-ɨnû mbe nyaʼa kɔ biirɨ mbənə mbənə ni, “Wə̀d mɔʼɔ wa fə nàʼ ɨghɨjɨg ɨ bɔ ə?”

34Àyɨə Yeso nyaʼa ghà əmbɨ mɨ̀mə̌d ni, “Mɨ əghɨjɨg yɨ nɨ ghɨ ɨnû mbe nɨ wə̀d we nɨ tom əmɨ kə̀bɨ, bə̀ fɔrɨ nɨ maanɨ ɨnû mbe nɨ wɨ̀ nyaʼa naʼ ɨ num. 35Ɨmbə̀ʼ mbə̀ berɨ ɨŋgam mɔʼɔ nɨə ghàə̀ ni, 'À sɨ bùʼ əmɨg ə kwè mbɨ kwə̀ŋ ɨghɨjɨg ə?' Àyɨə mə ghà ɨ nən ni mbə̀ jeŋgɨ nèŋ mbeŋ ɨchî chɔ̀m zə ɨchî nɨ ɨghɨjɨg fə tənɨ kùʼ nɨ tɨ̀ mbɨ kwə̀ŋ. 36Ɨ mbɨə chwɨə wə̀d we nɨə kwə̀ŋ ɨghɨ. Məd wɨə fetɨ ɨghɨ mbe ɨmbə̀ʼ mbɨ jɨg ɨ̀tènɨ̀ rɨ mì. Əne wə̀d we nɨ konɨ mbɨ we nɨ kwəŋɨ bɨrɨ ghaʼrɨ ɨnɔ̂n. 37Ɨŋgam wɔ̂ yɨ wɨ rəsìʼ ni, 'Wə̀d fibɨ̀ bɨrɨ kon, wɨ cherə kwə̀ŋ.' 38Mə fə tom əwən ni mbə̀ kwəŋ ɨghɨ rəkaʼ ɨbən nɨ chəi mbə̀ nyaʼa faʼ ɨŋga. Bə̂d cherə nyaʼa fàʼ, əne mbə fə jɨg njìm tɨ ənɨ ə̀fàʼì ze nɨ mɨ̀mə̌d fàʼi.”

39MəSàmàriyà nɔnɔʼ ɨŋga əsɨ ze nyaʼa ben ə Yeso ɨmbə̀ʼ ɨghəm nɨ əyi we nyaʼa ghà əmbɨ mɨ̀mə̌d ni, “Wɨ̀ fə gha ɨnû jìm mbe nɨ mə nyaʼa kweʼ ghɨ̀.” 40Ənɨ məSàmàriyà mbe nyaʼa wò kumnɨ əməd, mbɨ nyaʼa buʼ ɨ bɔ ni wɨ̀ chubɨ mbɨ nən. Əne wɨ̀ nyaʼa chub əŋgu ɨni be. 41Bə̂d mɨ̀nɔnɔʼ cherə nyaʼa ben ɨmbə̀ʼ ɨnû mbe nɨ wɨ̀ nyaʼə ghàə̀.

42Mbɨ nyaʼa ghà əmbɨ əyi we ni, “Tɨ̀ fə benɨ tɨ̀nîn, kaʼi ɨmbə̀ʼ ənû ze nɨ à kəʼ gha ɨ na. Tɨ̀ fə ben ɨmbə̀ʼ ɨghəm nɨ tɨ̀ fə zu ənû ze nɨ məd ghǎ, əne tɨ̀ kyerɨ ni məd yɨə kaŋə Wə̀d we nɨ bɨrɨ chɨ ɨsɨg jìm rəŋgəʼ.”

Yeso nyaʼa vɨ̀ wan mbaŋə̀ wə̀d kyeŋ gɔmen

43Ənɨ ɨni mbe be nyaʼa fə che i, Yeso nyaʼa nɔ̀ʼ rɨ əsɨ ze wò ə Galiliî. 44Wɨ̀ nyaʼa wò əŋgu ɨmbə̀ʼ ɨghəm nɨ məd ziə nyaʼa ghà ni, “Chəi bə̂d ə wumnɨ ə wə̀d ɨ̀kə̀n ɨŋga əbeŋ əməd.” 45Ənɨ wɨ̀ nyaʼa pè ə Galiliî, bə̂d mbe rəŋgu nyaʼa nɨŋ əməd, ɨmbə̀ʼ ɨghəm nɨ ənɨ mbɨ nyaʼa wo ənɨ Əchwɨ̂ ə Che-ɨgun ə Jèrusalèm, mbɨ nyaʼa pè zə ɨnû jìm mbe nɨ wɨ̀ nyaʼa ghɨ əŋgu.

46Yeso nyaʼa nɔ̀ʼ rəŋgu bə̀ndɨ̀ wò ə Kanà, əsɨ nɨ wɨ̀ nyaʼa beŋ mɨnib ənɨ mɨ̀nòʼ. Wə̀d kyeŋ gɔmen mɔʼɔ wɨə nyaʼə əŋgu nɨ wan məd nyaʼə wɔ̀n ə Kàpenàhom. 47Ənɨ wɨ̀ nyaʼa zu ni Yeso fə nɔ̀ʼ rɨ ə Jùdeyà yeʼe ə Galiliî, wɨ̀ nyaʼa wò buʼ ɨbɔ ɨ bɔ ni wɨ̀ swiʼi wò vɨ̀ i wan mbaŋə̀ nɨ nyaʼa sɨ ɨchù ɨvɨ. 48Yeso nyaʼa gha ɨ bɔ ni, “Chəi wə̀d mɔʼɔ rəbɔʼ nən bɨrɨ nɔ benɨ, kɨrɨ ənɨ mbə̀ zə ɨnweenɨ-ɨnû fɔrɨ ɨnû yiirɨ.”

49Wə̀d kyeŋ we nyaʼa ghà ɨ bɔ ni, “Masà, mə̀ buʼ ɨbɔ, tɨ̀ swiʼi wò bɔŋ mɨ wan sɨə kwɨə.”

50Yeso nyaʼa ghà ɨ bɔ ni, “Sɨ wo e, e wan bɨrɨ ten i.”

Wə̀d kyeŋ we nyaʼa ben ənû ze nɨ Yeso nyaʼa gha ɨ bɔ, əne wɨ̀ nyaʼa nɔ̀ʼ wò i. 51Ənɨ wɨ̀ nyaʼə swiʼə wòə̀, bə̂d ə̀fàʼì ɨməd nyaʼa bòmnɨ̀ mbɨ məd ghà ɨ bɔ ni, “E wan wɨ i ɨkǎ.”

52Ənɨ wɨ̀ nyaʼa zu əne, wɨ̀ nyaʼa biirɨ nyùmə̀ we nɨ wan we kəʼ kɔ bɔtɨ. Mbɨ nyaʼa ghà ɨ bɔ ni, “À yɨə nyaʼa ɨghabɨ ənɨ ə nyùmə̀ mɔʼ əziə rɨwɔ̀ nɨ ɨfə we kəʼ sàŋ əməd.” 53Mbǎʼ wan we nyaʼa zu əne, kyerɨ ni à yɨə nyaʼa ənɨ ə nyùmə̀ we nɨ Yeso kəʼ ghà ni, “E wan bɨrɨ ten i.” Əze ə nyaʼa ghɨ̀ məd mbɨ i ɨnəbɨ jìm ben ə Yeso.

54Əzɔ̂ yɨ ənû ə yiirɨ ze nɨ pè ənɨ mbɨ be nɨ Yeso nyaʼa ghɨ̌ ənɨ wɨ̀ nyaʼa nɔʼ rɨ ə Jùdeyà wò ə Galiliî.

Sélection en cours:

Jn 4: mgo

Surbrillance

Copier