Jn 14

Yeso yɨ ɨnə̂njɨ̀ nɨ wo əsɨ Mbǎʼ

1Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Tɨ tə fîŋ tɔb i əwən. Mbə̀ ben ə Ŋwiə̀ bə̀ ben əmɨ. 2Ɨtu nəb nɔnɔʼ mbɨ ɨŋga nəb mɨ Mbǎʼ. À mɨ yeʼ ni kaʼ à yɨə kə̀ʼ i əne, njɨ mə wa ghà ɨ nən ni mə wɨə wo tekɨ əsɨ ɨ nən ə? 3Ənɨ mə̀ wo tekɨ əsɨ ɨ nən, mə bɨrɨ wɨrɨ yeʼe pè nɨŋ əwən ni mbə̀ yeʼe mbɨ num, ɨmbə̀ʼ əsɨ ze nɨ mə yeʼ əŋgu, mbə bɨrɨ bɨ yeʼ əŋgu. 4Mbə kyerɨ ɨnə̂njɨ̀ we nɨ wò əsɨ ze nɨ mɨə wò əŋgu.”

5Tomas nyaʼa ghà ɨ bɔ ni, “Ə̀nùŋɨ̀sɨg, chəi tɨ̀ kyerɨ əsɨ ze nɨ àwɔ̀ ə wò əŋgu. Tɨ̀ kɨə wo kyerɨ ɨnə̂njɨ̀ we rɨ ye ə?”

6Yeso nyaʼa wììrɨ̀ ɨ bɔ ni, “Mɔ̌ yɨə ɨnə̂njɨ̀ fɔrɨ rəsìʼ bə̀ fɔrɨ ɨ̀tènɨ̀. Chəi wə̀d mɔʼɔ nɨ tɨ̀ wɨ̀ wò əsɨ mɨ Mbǎʼ kɨrɨ ənɨ wɨ̀ che ənɨ mɨ njìm. 7Mbə mɨ kə̀ʼ kyerɨ wə̀d we nɨ mə̀ yeʼ wɨwən, njɨ mbə bə̀ kə̀ʼ kyerɨ wə̀d we nɨ mɨ Mbǎʼ yeʼ wɨwən. Ɨ kɔ rɨ̀nîn mbə fə kyerɨ əməd, əne mbə fə bə̀ zə əməd.”

8Filip nyaʼa ghà ɨ bɔ ni, “Ə̀nùŋɨ̀sɨg, chwiə Mbǎʼ ɨ na. À yɨ ənû nɨ tɨə kə̀b ə ze.”

9Yeso nyaʼa wììrɨ̀ ni, “Ɨmbə̀ʼ mə fə chubɨ mbɨ nən əgha ə se, àyɨə chəi àwɔ̀, Filip, kaŋ kɨrɨ kyerɨ əmɨ ə? Wə̀d jìm we nɨ zə əmɨ fə bə̀ zə ə Mbǎʼ. Àwɔ̀ wɨrɨ che rɨ ye ghà ɨ num ni, 'Chwiə Mbǎʼ ɨ na ə'? 10Chəi à ben ni mə wɨ ənɨ ənû ə mɔʼ mbɨ ə Mbǎʼ fɔrɨ ni Mbǎʼ wɨ ənɨ ənû ə mɔʼ mbɨ num ə? Ɨŋgam we nɨ mə̀ gha ɨ nən, chəi mə̀ ghà əmɨ ənɨ mɨ ɨghəm. À yɨə Mbǎʼ we nɨ yeʼ ənɨ ənû ə mɔʼ mbɨ num we ə ghɨ̀ ɨnû mbe nɨ wɨ̀ kəbɨ. 11Mbə̀ ben ni mə̀ wɨ ənɨ ənû ə mɔʼ mbɨ Mbǎʼ mbɨ ni Mbǎʼ wɨ ənɨ ənû ə mɔʼ mbɨ num. Mbə̀ mɨ ton ben ə, njɨ mbə ben yeʼ ɨmbə̀ʼ ɨchî nɨ mbə̀ zə ɨnû mbe ənɨ mɨə ghɨ̀ə̀. 12Mə ghà rəsìʼ ɨ nən ni wə̀d we nɨ ben ɨnû mbe nɨ mɨə ghàə̀ bɨrɨ bɨ ghɨ ɨnû mbe nɨ mɨə ghɨ̀ə̀. Məd bɨrɨ ghɨ ɨnû nɨ che mbɔ̂, ɨmbə̀ʼ ɨghəm nɨ mə wɨə wò əsɨ Mbǎʼ. 13Mə bɨrɨ ghɨ ənû ə mɔʼɔ ze nɨ mbə̀ biirɨ ənɨ mɨ ɨkum, ɨmbə̀ʼ ə bə̂d wumnɨ ə Mbǎʼ ənjìm ə Wan. 14Mbə mɨ biirɨ ənû ə mɔʼɔ ənɨ mɨ ɨkum, mə bɨrɨ ghɨ ənû ze.”

Yeso nyaʼa kàʼ ni i Mbǎʼ bɨrɨ cha Əzwî ə Zeŋɨ

15Yeso nyaʼa bə̀ yi ghà əmbɨ mbi mə̀mə̀ə̀nɨ̀-ɨnû ni, “Mbə mɨ ghaʼ əmɨ, mbə bɨrɨ nuŋ tum rɨkə. 16Mbə mɨ ghɨ̀ əne, mə bɨrɨ biirɨ əmbɨ Mbǎʼ, əne wɨ̀ bɨrɨ naʼ Ə̀wèèrɨ̀-bə̂d cherə ɨ nən nɨ bɨrɨ chubɨ mbɨ nən koŋ. 17Məd yɨ Əzwî ə Zeŋɨ ze nɨ bɨrɨ ghɨ ni bə̂d kyerɨ rəsìʼ. Chəi ənɨ tɨ ɨsɨg nɨŋ əməd ɨmbə̀ʼ ɨghəm nɨ chəi ənɨ tɨ̀ wɨ̀ zə əməd kɨ̀ bè kyerɨ əməd. Mbə bɨrɨ kyerɨ əməd, ɨmbə̀ʼ ɨghəm nɨ məd wɨ i mbɨ nən, bə̀ kyerɨ ni məd wɨ i ɨŋga nən.

18“Chəi mə bɨrɨ saŋ əwən ɨghabɨ ni mbə yɨ mɨchɨ, àyɨə mə bɨrɨ wɨrɨ yeʼe əsɨ nən. 19À sɨ bùʼ ɨkə nyumə̀, chəi ɨsɨg bɨrɨ wɨrɨ zə əmɨ, àyɨə mbə bɨrɨ zə əmɨ. Ɨchî nɨ mə yeʼ ɨkǎ, əne bə̂ mbə bɨrɨ bɨ yeʼ ɨkǎ. 20Ənɨ əni ze ə pe, mbə bɨrɨ kyerɨ ni mə wɨ ənɨ ənû ə mɔʼ mbɨ mɨ Mbǎʼ, kyerɨ ni mbə mbɨ ənɨ ənû ə mɔʼ mbɨ num bə̀ kyerɨ ni mə wɨ ənɨ ənû ə mɔʼ mbɨ nən.

21“Wə̀d we nɨ ghaʼ əmɨ yɨ we nɨə zuə tum rɨkə bə̀ nùŋə̀. Mɨ Mbǎʼ bɨrɨ ghaʼ wə̀d we nɨə ghaʼə əmɨ, mə bɨrɨ bɨ ghaʼ əməd bə̀ chwi mɨ ɨnyod ɨ bɔ.”

22Judàs mɔʼɔ we nɨ kaʼi Judàs Iskàriɔ̀t, nyaʼa ghà ɨ bɔ ni, “Ə̀nùŋɨ̀sɨg, à kɨə wo chwi e ɨnyod ɨ na nɨ chəi à chwi əmbɨ ɨsɨg rɨ ye?”

23Yeso nyaʼa wììrɨ̀ ɨ bɔ ni, “Wə̀d mɔʼɔ mɨ ghaʼ əmɨ, wɨ̀ bɨrɨ zu mɨ ɨŋgam bə̀ nùŋ. Mɨ Mbǎʼ bɨrɨ ghaʼ əməd, əne mɔ̌ mbɨ mɨ Mbǎʼ bɨrɨ wo əsɨ məd pè chubɨ mbɨ məd. 24Ka wə̀d we nɨ chəi wɨ̀ ghaʼ əmɨ bɨrɨ zu i mɨ ɨŋgam bə̀ nùŋ. Ɨnû mbe nɨ mbə fə zu kaʼi mbum, mbɨ yɨ rɨ əmbɨ Mbǎʼ we nɨ nyaʼa tom əmɨ.

25“Mə fə ghà ɨnû mbɔ̂ ɨ nən ənɨ mə kɨrɨ mbɨ nən. 26Mbǎʼ bɨrɨ cha Ə̀wèèrɨ̀-bə̂d we ənɨ mɨ ɨkum. Məd yɨ Əzwî ə Zeŋɨ ze nɨ bɨrɨ chwi ɨnû jìm ɨ nən bə̀ ghɨ̀ ni mbə̀ kɔndɨ ɨnû jìm mbe nɨ mə̀ fə gha ɨ nən.

27“Mə sàŋ əbɔrəbɔd ɨ nən. Mə bə̀ nàʼ mɨ əbɔrəbɔd ɨ nən. Chəi mə naʼ ɨchî nɨ ɨsɨg ə nàʼə̀. Tɨ tə fîŋ tɔb i əwən. Tɨ mbə̀ bɔ ə. 28Mbə fə zu ənɨ mə ghà ɨ nən ni, 'Mə wɨə wòə̀, àyɨə mə bɨrɨ wɨrɨ yeʼe əsɨ nən.' À kɨ ənɨ mbə nyaʼa kaŋ ghaʼ əmɨ, njɨ mbə bɨrɨ ghaʼ ni mə wɨə wò əsɨ Mbǎʼ, ɨmbə̀ʼ ɨghəm nɨ Mbǎʼ ə chè əmɨ. 29Mə fə ghà ənû zɔ̂ ɨ nən tɨ̀nîn bɔŋ zɨə sɨə ghɨ̀ə̀, ɨmbə̀ʼ ənɨ zɨə ghɨ, mbə bɨrɨ benɨ. 30Chəi mə wɨrɨ berɨ nyùmə̀ nɔnɔʼ nɨ ghambɨ mbɨ nən, ɨmbə̀ʼ ɨghəm nɨ wə̀d we nɨə tùmbɨ̀ ɨsɨg wɔ̂ wɨə yeʼe. Chəi wɨ̀ berɨ ɨka ɨgwɨ num, 31àyɨə mə wɨə ghɨ̀ àmei ɨchî nɨ Mbǎʼ gha ɨ num, ɨmbə̀ʼ ɨsɨg kyerɨ ni mə ghaʼ ə Mbǎʼ. Mbə̀ nɔʼ tɨ̀ kɔ wo a.”

Sélection en cours:

Jn 14: mgo

Surbrillance

Copier